योहान 2
2
येसु एतुन अंगुर पानकम कीतोर
1इद जर्गुता मूडोव रोजुननाड गालिल राज्येमता काना इनना नाटे मरमिं मत्तां, आ मरमिने येसुना यावलगुडा मत्ता. 2मरमिंकु येसुन, ओना सिस्युल्कुनगुडा केय्सि मत्तुर. 3मरमिने अंगुर पानकम मारतस्के, येसुना यावल, “ओरागटा अंगुर पानकम मारसोत्ता कोको,” इंचि येसुन इत्ता.
4अस्के येसु, “यावा! निमे नाकु बारि वेहचंतिन? नना बतलन्ना कियना वेला इंका वाया हिल्ले,” इंचि इत्तोर. 5पजा येसुना यावल अगा मत्ता जीतागाह्कुन, “ईर मीकु बतल वेहंतोरो, मिमेट अदे कीम्टु,” इंचि इत्ता. 6यहुदिल्कुना सुद्दिकरन कियाना रिवाज कियनाहाटीं अगा बंडातोनि तयार कीतव हारुं पेरपुल्क मत्तां. आ उंद-उंदि पेरपु नूर (100) लीटर्कुना एर पियनलायक मत्ता.
7“आ पेरपुल्कुने एर निहाट,” इंचि येसु आ जीतागाह्कुंक वेहतोर. अस्के ओर आ पेरपुल्क सीगा निंडानाल निहातुर. 8अस्के येसु, “इंदके उंदि पेरपुनाल इच्चुर एर पीसि, ई कुळपु हियना पेद्दा मनकानगा ओम्टु,” इंचि आ जीतागाह्कुंक वेहतोर, अस्के ओर ओतुर. 9-10पजा आ पेद्दा मनकल एतुन गिचचो उंचि हूळतोर अय्ते, अद एर पुरागा अंगुर पानकम आसि मत्ता. इद पानकम बोर तत्तोर, बगाटाल वाता इत्तद आ पेद्दा मनकंक तेळिया हिल्ले गानि आ जीतागाह्कुंक मात्रम एर्का मत्ता. पजा आ पेद्दा मनकल मरमिना पेडन केय्सि, “अंटोर अय्ते पिव्वर अंगुर पानकम मोट्टा मोदाला हींतुर. लोकुल्क पीरनिंडा उट्टारित्ते, पज्जोटाल सप्पटा पानकम हींतुर. गानि निमे अय्ते पिव्वर अंगुर पानकम इदवेरदाकागुडा मिगलिच्चि इरतिन,” इंचि इत्तोर.
11इल्हा येसु गालिल राज्येमता काना नाटे इचंत्रम आयना कबळ कीसि, ओना महिमातुन हुपिस्तोर. इद ओना मोट्टा मोदाटा चिन्ह आंद. अदुनहाटीं ओना सिस्युल्क ओन नम्मुतुर.
12पजा येसु, ओना यावल, ओना तम्मुह्क, ओना सिस्युल्क अंटोर कलियसि कपर्नाहुम इनना सहर होत्तुर. ओर अंटोर अग्गेन कोन्नि रोजुक आगतुर.
येसु गुळितगा दांतोर
(मत्तयाल 21:12-13; मरकुस 11:15-17; लूकाल 19:45-46)
13यहुदि लोकुल्कुनद दाटसि होनना पंडुगु#2:13 दाटसि होनना पंडुगु इजिप्त देसेमता गुलामगिरिताल यहुदि लोकुल्कुन पेन पेचाहचि तत्ता मतिते, इद पंडुगु कींतुर. गुलामगिरिताल पलाते अरता रोजु इजिप्त देसेमता हरेक लोता पेद्दा मर्रिन पेनदा दूता हव्कुता. गानि यहुदिल्कुना लोतोर्कुनाल बोरे हाया हिल्लुर. दग्गेर्क एवसि मत्ता. दानहाटीं येसु येरुसलेम होत्तोर. 14अगा होत्तस्के गुळिता लोप्पो, लोकुल्क पेनदुक मोक्कु हियालय कुर्रां, गोर्रें, पावरेम पिट्टें अमसेक दिसतुर. अचोने आयका सरकार कोत्तां पेनदा गुळिते वाटालय कुदरों इंचि, आ कोत्तां बदलांचि यहुदिल्कुना कोत्तां हियानोरगुडा अगा उद्दिस मत्तद येसु हूळतोर. 15हूळसि, उंदि नोंडे नोटसि पोट्टे तयार कीसि, गुळिताल अंटोर्कुन गेदुमतोर. गोर्रें, कुर्रन गुळिताल पलाते गेदमिसि, कोत्तां बदलांचानोरा बल्लन बोर्ला वाटसि कोत्तानंता लीकतोर. 16पजा पावरेल्क अम्मानोर्कुन, “इवुन इगेटाल पलाते ओम्टु, नावा पेनबाबाना लोतुन हाटुमलेह्का कियमट,” इंचि इत्तोर.
17अगा जर्गतदुन हूळसि, “नीवा लोता बारेमते नावा जीवा बागा तंलाडसंता,”#बजन संहिता 69:9 इंचि दर्मसास्त्रमते दाविद राजाल रासता पोल्ले ओना सिस्युल्कुंक मति वाता.
18येसु अल्हा कीतदुन हूळसि यहुदि पेद्दाल्क ओनगा वासि, “इल्हा कियना अदिकारम नीकु मंता इंचि मोमोट नम्मनाहाटीं निमे माकु बसोंटा चिन्ह हुपसंतिन?” इंचि पूसकीतुर. 19अस्के येसु, “इद गुळितुन कूल्हाट, नना मूड रोजकुने मर्रा निलाहंतन,” इंचि जवाब हीतोर.
20अस्के यहुदि पेद्दाल्क, “इदु गुळितुन दोहालय नल्पै हारुं वर्सां दल्गतां. अय्ते निमे दीन मूड रोजकुने बल्हा निलाहंतिन?” इंचि पूसकीतुर.
21गानि येसु मात्रम ओना सतता मेंदुलता गुळिता बारेमते वळ्कतोर. 22येसु हासि मर्रा जीवाते तेदतस्के ओना सिस्युल्कुंक इद पोल्ले मति वाता. अस्के ओर दर्मसास्त्रमते रासि मत्तादुन आनि येसु वेहता पोल्लेन नम्मुतुर.
23दाटसि होनना पंडुगुना वेलाते येसु येरुसलेम सहरते मत्ताहाटीं, वेल्लेटोर लोकुल्क ओर कीता अद्बूताल्क हूळसि, ओनपोर्रो विस्वासम इरतुर. 24-25गानि अंटोर लोकुल्क बोर-बसंटोर इंचि येसुंक एरपाट मत्ताहेंका, ओरा बारेमते येसुंक बोर गवाइ वेहना अव्सरम हिल्ले. अदुनहाटीं ओर बोरे लोकुल्कुन नम्मा हिल्लोर.
Цяпер абрана:
योहान 2: esg-Deva
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2022, Wycliffe Bible Translators, Inc. All rights reserved.