Genese 11
11
Babela ve Uvi
1Kahara, meahaiapo va uri haroapo, kai oharo lahua lahua oaria ka. 2Haela uku kauri ukai ve hahi leivahaeape la hoa ere Sinara ve leia ita heheapa koarai le apeape. 3Ere elare oharo mari hukavape: “Ekeila, elaviila pikuru ila have karikikilai, kai erero a aroukilai ehovea aheke leikive.” Ere ve have va pikuru have hiki, kai koperereaki eharu va mea ve la pikuru. 4Ere maeape: “Elaviila karikara erarikilai, kai kaia akea havahu pekaki uvi arari haroapo kukilai, elaviila ve rare haroapo lei eapapo leikilai, elaviila meahaiapo ita lahua lahua ve kopurapaki ave.”
5Iehova kaia ve kihoaupe ehovea haela ve akoremari kupe karikara kai uvi arari ovohae eavakive. 6Iehova maeape: “Eavaila, ere ve haela ve hiru haroapo, ere kai uri haroapo hiki; ma va ere horova au hiki ipopeavave, ere va aireaki horova ehoaha oaria hovea hovea leivahaeakilai, kai erero hereavaki oki karia. 7Ekeila, elaviila hoahukakilai, ereve la uri au aiviarava la, laria, ere va elarelare hukavaki iapa va ka.” 8Kahara, Iehova erero meahaiapo ita lahua lahua oaria ve kopurapape. Ere karikara āre ve la horova le hakurepape. 9Laelave areve rare Babela rare itavape, ehova leia Iehova meahaiapo haela ve uri lahua lahua aiviaravarape, kai Iehova erero meahaipo ita lahua lahua oaria kopurapape.
Sema ve meavohula
10Sema ve meavohula ma: Sema hitolo 100 leipe hoa Arepakasada epape, ma haa karia leipe hitolo orahokaila hovea. 11Sema Arepakasada oropa epai aireaki are hitolo 500 aeaveape, are aeka akoremari i marita ila erape.
12Arepakasada hitolo 35 leipe hoa are Sela epape; 13Arepakasada Sela oropa epai, aireaki are hitolo 403 ovokake aeaveape; are aeka akoremari i marita ila erape.
14Sela hitolo 30 leipe la hoa are Ebera epape; 15Sela oropa Ebera epape, aireaki are ovokake aeaveape hitolo 403. Are aeka akoremari i marita ila erape.
16Ebera hitolo 34 lei pelega epape; 17Ebera Pelega oropa epape, aireaki are ovokake aeaveape hitolo 430; are kai akoremari i marita ila aeka erape.
18Pelega hitolo 30 lei Reu epape; 19Pelega Reu oropa epape, aireaki are hitolo 209 ovokake aeaveape, kai aeka akoremari i marita ila erape.
20Reu hitolo 32 lei Seruga epape; 21Reu Seruga oropa epape, aireaki are hitolo 207 ila ovokake aeaveape, kai aeka akoremari i marita ila erape.
22Seruga hitolo 30 lei Nahora epape; 23Seruga Nahora oropa epape, aireaki are hitolo 200 ila ovokake aeaveape, kai aeka akoremari i marita ila erape.
24Nahora hitolo 29 lei Tera epape; 25Nahora Tera oropa epape, aireaki are hitolo 119 ovokake aeaveape, kai aeka akoremari i marita ila erape.
26Tera hitolo 70 lei Aberamo, Nahora i Harana ila erape.
Tera ve meavohula ve huhuve
27Ma va Tera ve akoremari mae — Tera Aberamo, Nahora i Harana ila erape. Harana va Lota ve oa. 28Harana oropa apape, areve oa Tera aireaki apape. Harana apape ita va arero epape la ita, Ura, Kaladea haela ve ita. 29Aberamo i Nahora ila uavila karape. Aberamo ve uva ve rare va Sarai, aeva Nahora ve uva ve rare va Milika, Milika i Isika ila ve oa, Harana, ve mari la. 30Sarai korovu leipe; are akoremari au epaila.
31Tera, areve akore Aberamo, kai Lota, Harana ve akore, are havahu ve meavore, kai Sarai areve akore Aberamo ve uamari, karape. Ere are i hareho Ura, Kaladea haela ve ita hakorepai Kanana ve la ita auvahaeape. Ere iki Harana leia ekepe la hoa ere au hiki apearoape. 32Tera ve hare va hitolo 205. Tera Harana leia apape.
Цяпер абрана:
Genese 11: ORO
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Published by the British and Foreign Bible Society 1963-1972