পত্থম 14
14
লোটর উদ্ধোর্ অনা
1শিনিয়র দেজর্ রাজা অম্রাফল, ইল্লাসরর রাজা অরিয়োক, এলমর রাজা কদর্লায়োমর আর গোয়ীমোর রাজা তিদিয়ল- 2এ চের্বো রাজা এক ওইনে একপল্লা সদোমর রাজা বিরা, ঘমোর রাজা বির্শা, অদ্মার রাজা শিনাব, সরোয়িমোর রাজা শিমেবর আর বিলার, অত্তাৎ সোয়র রাজার বিরুদ্ধে যুদ্ধো গুরিবাত্তে গেলাক্। 3এ পাচজন রাজা তারার সৈন্যগুন এগত্তর্ গুরিনে সিদ্দীম কলগত্ গেলাক। এ জাগানরে মরা-সাগর কন্।
4ইয়েন আগেদি এ রাজাগুনে বার বজর সং রাজা কদর্লায়োমর অধীনোত্ এলাক, মাত্তর্ তের বজরত্ এইনে তারা উল্লোমি গুরিলাক্। 5-6সে পরেদি বজরত্ রাজা কদর্লায়োমর আর তা সমাজ্যে রাজাগুনে যেইনে রফায়ীয়গুনোরে, সুষীয়গুনোরে, এমীয়গুনোরে আর হোরীয়গুনোরে ওদেই দিলাক্। তারা রফায়ীয়গুনোরে ওদেই দিলাক্ অস্তরোৎ-কর্ণয়িমত, সুষীয়গুনোরে ওদেই দিলাক্ হমত্, এমীয়গুনোরে ওদেই দিলাক্ শাবি-কিরিয়াথয়িমোত্ আর হোরীয়গুনোরে ওদেই দিলাক্ এল-পারণর সোজা সেয়ীরর মুড়ো-মুড়ি চাগালাত্। এল-পারণান এলদে ধূল্যেচর-চাগালা কায়কুরে। 7সে পরেদি এ রাজাগুনে ঘুরি যেইনে ঐনমিষ্পট, অত্তাৎ কাদেশত্ গেলাক তারা অমালেকীয়গুনোর পুরো দেজ্ছান্ জিদি নেযেয়োন্ আর হৎসসোন-তামর শঅরত্ যে ইমোরিয়োগুনে এলাক তারারে ওদেই দিলাক্। 8-9এ ঘটনাগানির্ পরেদি সদোম, ঘমোরা, অদ্মা, সবোয়িম আর বিলার, অত্তাৎ সোয়র রাজাগুনে এলম রাজা কদর্লায়োমর, গোয়ীমর রাজা তিদিয়ল, শিনিয়র রাজা অম্রাফল আর ইল্লাসর রাজা অরিয়কোর লগে যুদ্ধ গুরিবাত্তে সিদ্দীম কলগত্ তারার সৈন্যগুনোরে সাজেলাক্। চের্বো রাজার বিরুদ্ধে পাচ্চো রাজা যুদ্ধো গুরিবাত্যে যুক্কোল্ অলাক্। 10সিদ্দীম কলগত্ মাত্যে তেল্লোই ভরা বোউত্ গাত্ এলাক্। যেক্কে সদোম আর ঘমোরা রাজাগুনে ধেই যাদন্ সেক্কে তারা মানুচ্চুনো ভিদিরে কয়েকজনে সে মাত্যেতেলর্ গাদ্তোত্ পড়ি যেইয়োন্, আর অন্যগুনে মুড়ো-মুড়ি মোক্কে ধেই গেলাক্। 11যে রাজাগুনে জিত্ত্যন্ তারা সদোম আর ঘমোরার বেক্ ধন-সোম্বোত্তিগানি আর হানা-জিনিসছানি লুদেই নেযেয়োন্। 12অব্রাম ভেইপুত্ লোটে সেক্কে সদোমত্ বজত্তি গুদিদো। সে রাজাগুনে লোটর বেক্ ধন-সোম্বোত্তিগানি সুমুত্তো তারেয়ো ধুরি নেযেলাক্।
13পরেদি এক্কো মানুচ্ ধেই এইনে ইব্রীয় অব্রামরে সে হবরান্ দিলো। অব্রামে সে অক্তত্ ইমোরীয় মম্রির্ এলোন ঝাড় কায়কুরে বজত্তি গুরিদো। মম্রি এলদে ইষ্কোল আর আনের ভেই। অব্রাম লগে ইগুনে সমাজ্যে ধোক্ক্যেন এলাক্। 14অব্রামে যেক্কে শুনিলো, তা কুদুম্মোবোরে সে রাজাগুনে ধুরি নেযেয়োন সেক্কে তে যুদ্ধোর শিক্ষ্যে পেইয়্যে তার তিনশ আদার জন চাগররে যুদ্ধোত্ লামেল আর দান শঅর্ সং শত্রুগুনোরে লোড়েই নেযেলাক্। এ চাগরুনে তা ঘরত্ জর্মেয়োন। 15তে নিজো মানুচ্চুনোরে কয়েক্কো দলত্ ভাগ গুরিলো আর তারারে লোইনে রেদোত্ শত্রুগুনোরে আক্রমন গুরিনে তারারে ওদেই দিলাক্। সে পরেদি তারারে লড়াদে লড়াদে তে দামেস্ক উত্তোরেদি হোবা সং গেলঅ। 16লুদেয়্যে বেক্ পযাপিরানি তে ফিরেই আনিলো আর তা ভেইপুত্ লোটরে তার ধন-সোম্বোত্তি সুমুত্তো উদ্ধোর গুরিলো। সে লগে বেক্ মিলেগুনোরে আর অন্য মানুচ্চুনোরেয়ো উদ্ধোর গুরি আনিলো। মল্কীষেদকে অব্রামরে বর্ দিলো। 17কদর্লায়োমর আর তার সমাজ্যে-রাজাগুনোরে ওদেই দিইনে যেক্কে অব্রামে ফিরি এলঅ সেক্কে সদোমর রাজাবো তা লগে দেগা গুরিবাত্তে শাবী কলগত্, অত্তাৎ রাজার কলগত্ নিগিলি এলঅ। 18শালেমর রাজা মল্কীষেদকে অব্রামত্তে পিদে আর আংগুর-রস আনিলো। তে এলদে দাঙর্ গোজেনর ধর্মগুরু। 19তে অব্রামরে বর্ দিইনে কলঅ, “যে দাঙর্ আগাজ্ছান্ আর পিত্থিমীগান বানেইয়্যে সে দাঙর্ গোজেনে অব্রামরে বর্ দুয়োক্। 20যিবে তঅ শত্রুগুনোরে তঅ আঢত্ দিলো সেই দাঙর্ গোজেনরে বাঈনী গরা ওক্।” সেক্কে অব্রামে তার উদ্ধোর গোজ্যে পযাপিরানির দশভাগর একভাগ মল্কীষেদকরে দিলো। 21পরেদি সদোম রাজাবো অব্রামরে কলঅ, তুই ধন-সোম্বোত্তি বেক্কানি রাগা মাত্তর্ মানুচ্চুন্ মরে ফিরেই দে। 22জোবত্ অব্রামে সদোম রাজাবোরে কলঅ, “যে দাঙর আগাজ্চান আর পিত্থিমীগান বানেয়্যে সে দাঙর্ গোজেন লগেপ্রভুর নাঙে আত্ তুলিনে মুই শমত্ খেইনে কঙর্, 23তর কনঅ জিনিস, এন্ কি, এক্কেনা সুদো বা টেঙর্ জদা-সেন্দেলর্ ফিটেয়ো মুই ন-নেযেম। এ শমত্তান্ মুই গরঙর্ যেনে তুই কোই ন-পারচ্, মঅ সোম্বোত্তিলোই অব্রামে মাজন্ ওইয়্যে। 24মঅ মানুচ্চুনে যিয়েনি হেইয়োন্ সিয়েনি বাদে মুই আর কিচ্ছু ন-নেযেম; মাত্তর আনের, ইষ্কোল আর মম্রি, যিগুনে মঅ লগে যেইয়োন্, তারা ভাক্কো তারারে নেযেবাত্তে দে।”
Цяпер абрана:
পত্থম 14: CBT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright © 2021 Bangladesh Bible Society