Intaliko 1
1
Ukwelewulwa kwansi
1Pakutalika e Leza welewuzile iyulu ni nsi. Munsi mutalinji ichintu nanti chonga; 2ni mfinzi yalinji papela pa minzi, nu Muzimu wakwe Leza walinji ndivino umuza wuno wukapupa papela pa minzi. 3Nga Leza ati, Kuswepe; nga akuswepa, 4E Leza alola kuno ukuswepa kwazipa; ngapano apawunkania ukuswepa ku mfinzi. 5E Leza ayita ukuswepa ati, a Musanya, ni mfinzi ati a Wunsiku. Akuwa manguzi nu mutondotondo, a wanda wonga.
6Nga Leza ati, Pawe ulwelele pakasi pa minzi, ukupawunkania minzi ku minzi mawuye. 7E Leza ayelewula ulwelele aleka aluwapawunkania aminzi yano yalinji mwisika na yano yalinji papela; nga achiwa wowonye. 8Nga Leza ayita ulwelele ati, a Liyulu. Akuwa manguzi nu muntondotondo, a wanda wa chitiwili.
9Nga Leza, ati, Ndi aminzi yonsi yano yali pansi yawungane apaliponga, alyakuti kuwe umusili. Nga achiwa wowonye. 10E Leza ayita umusili ati, a Nsi, na minzi yano yawungine apaliponga ati, we Sumbi. Leza alola kuno chazipa. 11Ngapano Leza ati, Isote limele, imbeyu zya misango-misango zino impumba zili mu mitwe yakwe zyolizyo, ni miti ya misango-misango yino impumba zyawo zili mu vikomwa vyawo munsi. Nga achiwa wowonye. 12Isote alimela munsi, ni mbeyu zya misango zino impumba zyawo zili mu vikomwa vyawo. E Leza alola kuno chazipa. 13Akuwa manguzi nu mutondotondo, a wanda wachititatu.
14Nga Leza ati, Mu lwelele lwa mupela muwe inkozyo zya kupawunkania uwanda ku wusiku; alyakuti kuwe ivimanyilo vya mpindi ivya manda ni myaka, 15swinya ziwale mu lwelele lwa mwi yulu kukuwalila munsi. Nga achiwa wowonye. 16Achaleka Leza ayelewula inkozyo nkulu ziwili, nu kuti ulukozyo lukulu ukulusye luwapanzya umusanya; nu lukozyo lutichi luwapanzya uwusiku; nga ayelewula ni ntanda. 17Aziwika mu lwelele mwi yulu kukuwalila munsi, 18kukupanzya umusanya nu wusiku, swinya nu kupawunkania ukuswepa ku mfinzi. Nga Leza alola kuno chazipa. 19Akuwa manguzi nu mutondotondo, a wanda wa chitini.
20Nga Leza ati, Ndi mu minzi mwizule ivya wumi, nu kuti ni nyuni ziwapapuka mupela mu nsi. 21Nga Leza ayelewula inswi nkulu nkani ni vitumbulwa vinji vyonsi ivya wumi vino vikanyang’anya vino vizula mu minzi ni nyunyi zyonsi zino zikapapuka. Nga Leza alola kuno chazipa. 22Apano Leza avipepa ati, Muwanyama mulunduluke mwizule mu minzi yakwe sumbi, nazyo inyimyi ziwanyama munsi. 23Akuwa manguzi nu mutondotondo, a wanda wa chitisano.
24Nga Leza ati, Ndi munsi mwizule ichawumi chonsi, ni kwata na vino vikasela ni vinyamana vyonsinye. Avino achiwa. 25Nga Leza ayelewula ivinyamana vyonsi ivya misango-misango, ayelewula ni vintu vyonsi vya misangomisango vino vikasela, ni vikwato vyonsi vya misango-misango. Nga Leza alola kuno chazipa.
26Nga swinya Leza ati, Ndi kanonzi twelewule umuntu ku wukola witu, uwakuti atukole; alyakuti awe we songo wa nswi zya mwe sumbi, ni nyunyi zya mupela ni vikwato mu nsi yonsi na vyonsi vino vikasela pansi. 27Ngapano Leza ayelewula umuntu ku wukola wakwe, amwelewula ku wukola wakwe Leza; ayelewula umonsi nu mwanachi. 28Nga Leza awapepa awanena ati, Kavulanji muwakwatana, mwize mwizuzye insi muyitonsye; muteke inswi zya mwe sumbi ni nyunyi zya mupela ni vintu vyonsi ivya wumi munsi. 29Nga Leza ati, Lolani nawapa wila mbeyu izya munsi moo, zino impumba zyawo zili mu mitwe yawo, ni miti yonsi yino impumba zyawo zili mu vikomwa vyawo; avino mwandi muwalya. 30Ni nyama zyonsi izya munsi, ni nyunyi zya mupela, na wila chintu chino chikasela pansi, na chonsi ichawumi chino chikafuta munsi, navipa mafwa yonsi ukuwa a chakulya chawo. Nga achiwa wowonye. 31Nga Leza alola wila chintu chino welewuzile, na vyonsi vyazifile nkaninye. Akuwa manguzi nu mutondotondo, a wanda wa chitimutanda.
Цяпер абрана:
Intaliko 1: WWN82
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Chinamwanga Bible © United Bible Societies, 1981.