Maatiusiup Aglangit 5
5
Jiisusiup Ajuriqtuininga Qaqqaup Qaangani
1Jiisusiup inugiakturjuat takugamigit, qaqqaup qaanganuaqpuq, tavvani iksivaqtluni. Ilinniaqtingit avataaniilirmata, 2Jiisusiup ajuriqtuqpait uqarluni:
Sulijumik Quviasungniqatsiarniq
Luukasi 6:20-23
3“Saimanaqtumiipput anirnikkut ajuqsaqtut;
Guutiup Ataniuvinganik piqalirmata.
4Saimanaqtumiipput qiksaanirmut quvviuqtut;
Guutiup saimmaqtittumaarmagit.
5Saimanaqtumiipput immingnik angijuruqtinngittut;
Guutiup angirutigisimajanginnik nunarjuarmi kingurngujjijumaarmata.
6Saimanaqtumiipput kaaktut imiruktullu nalaaguurnirmik;
Guutiup naammaksitinniarmagit pijumajanginnik.
7Saimanaqtumiipput inuuqatimingnik nikagusuktut,
Guutimut nikagijaujumarmata.
8Saimanaqtumiipput uummatimigut pasijaujjutiksaqanngittut;
Guutimik takujumaarmata.
9Saimanaqtumiipput inuuqatigiitsianngittunik ilagiitsialiqtitsijut;
Guutiup qiturngaminik taijumaarmagit.
10Saimanaqtumiipput akiraqtuqtaujut nalaaguurniq pillugu;
Guutiup Ataniuvinganik piqalirmata.
11“Saimanaqtumiippusi inuit qanutuinnaq uqarnirlugvigikpasi, akiraqtuqtaugussilu, sulinngittumiglu qanutuinnaq uqarnirluutigijaugussi uvannut maliktiunisi pijjutigillugu. 12Quviasugissi sirilusilu, angijumik akiliqtaujumaarassi qilangmi, nalauttaijuttauq taimailiuqtaulaurmata sivunissinni.”
Tariurlu Qaumajurlu
Maakusi 9:50; Luukasi 14:34-35
13“Nunarjuap tariurivaasi; tariuq tariungujunniiqpat qanuq tariunngukkanniqtitaujunnaqpa? Sunamut atuutiksaqarunniiqpuq, maniqqamut naavitauluni inungnut tulliragaksauliqpuq.
14“Silarjuap qaumanirivaasi; iglugasait qaqqaup qaanganiittut sunatuinnamut taliumatitaujunnanngilat. 15Naniruarmik ikitsijuqaqpakpaa qattarmut pusijjutiniaqtaminik; qaummaqqulli ikitausuunguvuq ininganuaqtaulluni, iglumiittulimaat qaummaktitauqullugit. 16Taimaaktauq qaummaqutisi inungnut qaumatisiuk, piniatsiarnitsinnik takuqullugit, Ataatasi qilangmiittuq niqtuqtauqullugu.”
Jiisusiup Piqujanik Ajuriqtuijjutiqarninga
17“Isumattailigissi Muusisiup piqujanginnik, nalauttaijullu ajuriqtuijjutinginnik aturunniiqtitsijaqturasugilunga; aturunniiqtigiaqtunngilakka, nalautsitittaqtuqpakkali. 18Sulijumik uqautivassi, qilak nunarjuarlu nungulauqqaaqtinnagik, piqujait naaningit aaqqigiarutingillu aturunniiqtuqajjaanngilat, tamarmitsiaq nalautsilauqqaaqtinnagit. 19Taimaimmat, nalliat piqujait mikinniqpaanganigluunniit atunngittuq, asiminiglu taimaak ajuriqtuiluni, taanna pillariunnginniqpaujumaaqpuq Guutiup Ataniuvingani; taimaaktauq nalliat piqujanik atuqtuq asiminiglu taimaak ajuriqtuiluni, taanna pillariuniqpaujumaaqpuq Guutiup Ataniuvingani. 20Uqautivassili imaak: Guutiup Ataniuvinganuarunnarniaqpusi, kisiani piqujanik ilisaijinit Paarisinillu atutsiarniqsaugussi Guutiup piniaqtauqujanginnik.”
Jiisusiup Ajuriqtuininga Ninngaumaniq Pillugu
21“Tusaqsimagassi inuit uqaujjausimalaurmata, ‘Pijaarilutit inuaqtuksaunngilatit: pijaariluni inuaqtuq iqqaqtuivingmuaqtauniaqpuq.’ 22Maannali uqautivassi: inuuqatiminut ninngaktuq iqqaqtuivingmuaqtauniaqpuq; inuuqatiminiglu atuutiksaqanginniraijuq taanna Juutit iqqaqtuijinginnuaqtauniaqpuq, inuuqatiminiglu sunaksaunginniraijuq, taanna ikumarjuarmut pititaksauvuq. 23Taimaimmat tunirrusirvingmi tunirrusirnialirlutit Guutimut, tavvani iqqaiguvit inuuqatingnut saimmarviusimanginnirnik, 24tunirrutiginiaqtait tunirrusirviup saanganut qimaglugu; qatanngutiit upaglugu saimmaqatigiliruk, kinguningagut tunirrusirvingmut utirlutit, tunirrutiksait tuniliruk Guutimut.
25“Nalliannut iqqaqtugaksalianguguvit iqqaqtuivingmuaqqaaqtinnasik saimmaqsalauruk. Iqqaqtuivingmut kajusigussik taassuma iqqaqtuijimuaqtinniarmatit, iqqaqtuijiup puliisimuaqtikkajarmatit, puliisiullu tigujausimavingmuaqtillunitit. 26Sulitsiarlunga, uqautivagit, tavvaniilirajaravit, akiliriaqaqtalimaarnik akiliilaunginnirni.”
Jiisusiup Ajuriqtuininga Asinniariaqanginnirmik
27“Tusaumavusi uqausiuvaktumik, ‘Nuliariingnirmik asiruriijuksaunngilatit.’ 28Maannali uqautivassi: nalliat arnamik takunnaarluni iksiguktuq, taanna nuliariingnirmik asiruijariiqpuq uummatimigut. 29Taimaimmat ijivit taliqpiup ajuqtulitippatit, piiruk igillugulu! Ilingnut piuniqsauvuq timiit ilakuukpat, timilimaavit igitaugajarninganit ikumarjuarmut. 30Aggakpillu taliqpiup ajuqtulitippatit, nakakkit igillugit! Ilingnut piuniqsauvuq avativit ilanganik ilakuuliruvit, timilimaavit igitaugajarninganit ikumarjuarmut.”
Jiisusiup Ajuriqtuininga Nuliariingnut Avillariktuungnut
Maatiusi 19:9; Maakusi 10:11-12; Luukasi 16:18
31“Uqaqtuqaqpalaurivuq, ‘Nalliat nuliaminik avitsillariktuq, avitsillaringninganik nalunaiqsisimajunik titiqqanik tunisivigijaksarivaa.’ 32Maannali uqautivassi: angutiup nuliani avillarikpagu asinniarnirmuungitillugu, taanna pasijaksauliqpuq nuliariingnirmik asiruinirmut; taassumingalu arnamik avitaullariksimajumik nulianiktuq asiruigivuq.”
Jiisusiup Ajuriqtuininga Angimmaringnirmik
33“Tusalaurivusi inuit uqaujjauvalaurmata, ‘Angimmariktuksaunngilatit sulinngillutit, angimmarikkuvit Ataniup saangani atugaksarivatit aturniarniraqsimajatit.’ 34Maannali uqautivassi: sunatuinnarmik taisiqasiujjilusi angimmariktuksaunngilasi, qilagluunniit taiqasiutilugu, Guutiup iksivautarjuaringmagu. 35Nunarjuarluunniit taiqasiutilugu, itigangita ikurraringmagu; Jiruusalimluunniit taiqasiutilugu, taanna Angajuqqaarjuanguniqpaap iglugasagjuaqutigingmagu. 36Angimmariktuksaunnginnivusi niaqusi taiqasiutilugu, nujarmik atausirmigluunniit qakuqsititsijunnannginnassi qirniqsititsijunnarasilu. 37Imaagli uqaqattalirissi, angirussi angirlusi, anginngikkussi anginngillusi! Taakkua asianik uqakkannirasukkussi tamanna piunngittualungmit pivuq.”
Jiisusiup Ajuriqtuininga Akiniariaqannginnirmik
Luukasi 6:29-30
38“Tusaumavusi uqausiuvaktumik, ‘Iji ijimik, kigut kigutimik akiqariaqaqpuq.’ 39Maannali uqautivassi: akiniarasuktuksaunngilasi pitsiaqtiginngitassinnut. Uluakkut patiktauguvit, uluavit igluattauq maniliruk. 40Nalliannut iqqaqtuivingmuaqtitauguvit uviniruit pijumalugu, annuraattauq silalliq pitaarilaurliuk. 41Unataqtuksamut agjaqsiqujauguvit 1-mailimik ungasingnilingmut, agjaqsilaurit 2-mailimik. 42Nalliannut pijumaviuguvit tunisivigilauruk: sunatuinnarmik aturviujumaguvit atuqtilauruk.”
Akiraqtuqtimik Nagligusungniq
Luukasi 6:27-28,32-36
43“Tusaumavusi uqausiuvaktumik, ‘Inuuqatisi nagligisigik, akiraqtuqtisilu uumigilugit.’ 44Maannali uqautivassi: akiraqtuqtisi nagligisigik, ilissinnik uqausiqarluktut saimmatitauqusigik, akiraqturnirmut uqumaiksaqtitsijut tuksiutisigik, 45qiturngarijauliqullusi Ataatasinnut qilangmiittumut; taassuma siqinini qaummaktimmagu pitsiaqtunut pitsianngittunullu, silaluktitsivaglunilu akaujulijunut akaunngittulijunullu. 46Ilissinnik nagligusuktut kisimi nagligijatuarigussigik, sunamik akiliqtaujjutiksaqaqpisi? Ruumamiut kiinaujaiqtitsijiqutingit#5:46 Juutiullutik Ruumamiunut iqqanaijaqtut Juutiuqatimingnik kiinaujaijaillutik aglaat taimailiuqpakkivut! 47Ilannaarijasi kisimi tunngasuktiqattarussigik, qanuq asitsinnit pitsiarniqsaugajaqpisi? Ukpinngittut aglaat taimailiuqpakkivut! 48Taimaimmat naammatsiaqtumik iliqqusiqaqtuksauvusi, suurlu Ataatasi qilangmiittuq naammatsiaqtumik iliqqusiqarmat.”
Цяпер абрана:
Maatiusiup Aglangit 5: EAIBR
Пазнака
Падзяліцца
Капіяваць
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.