Luk 5
5
Jeju kun nawg sɔɔ
(Oo Mat 4:18-22; Mrk 1:16-20)
1Ndɔ mad Jeju ɗa ta bahbo Jenejaret't. Deg koosɨg ɗa ɓan'na kɨ roat kad kɨ n'oon dɔ ta lo Luwah. 2Jeju oo toog joo ndɨn ta bahbot. Nawg teen kamdt kɨ'n tugon bandg lod. 3Jeju and kam toot kɨkɨɗa ku toogt kɨ joo'n ndɨn ta baht, toon non i lo Simõ, ndɨjea kad ɔsɨ too kɨ kam mant ngonsĩ. 4Lon nya takelta ye, el Simõ an: Ɔsɨ kɨ dɔɓult, ũn bandbɨrag losɨ nẽbe, i hɔn ne kanj.
5Simõ tura an: Ngeem, jɔr dan kondɔ tube kɨ ndang kari, kanj hɔ nya mad; na kɨgo tat loi m'a m'ũn bandbɨrag.
6Lon ɗan nya 'nten ye, hɔn kanjg ngãibe, mbã bandbɨrag lod ɗa kɨ'n gang. 7Kunɨn namdg'n ndɨn kam toot kɨ nu nõ kɨ jid kad ɗe ɗan sed. Ɗe doosɨn toog kɨ joo'n non kɨkanj, mbã toog ɗa kĩn nduin. 8Na lon Simõ Pierr, oo ye, ɔsɨ gojɨn nõ Jejut, an: Bɨraɓe i ɗa kɨ sãi, kɨta mĩ ngeɗamajal. 9Kɨtɔ yad biw, kɨ tubeg'n in sia nãt, kɨta tir kanj'n hɔɔn. 10Titbe tɔ la Jak kɨ Jã ngan Jebede kɨ ĩn madna sed Simõ, nya 'nten yad ngãi ho, kamla Jeju el Simõ an: Ot ɓool nẽbe kɨnõt a i naw hɔ deg.
11Lon ɗen kɨ toog lod kɨ ta gɔsɨ baht ye, nyan nyag lod, na ndulon go Jeju.
Jeju yoot ngebanj
(Oo Mat 8:2-4; Mrk 1:40-45)
12Lon Jeju ndɨ kam ɓet mad ye, de mad kɨ banj ganga i nõ. Lon oo Jeju ye, so ber kɨ takumɨn ningt nõ Jejut, kɔa an: Bɨraɓe, ĩla i ndig a ne, asɨ karɨm.
13Jeju la jin ɔda'n an: M'ndig kɨ ar.
Tentenbe banj goto roat. 14Kamla Jeju ndaa mber kɨ ot kel de mad, na ela an: Aw, i da roi ngéjamosɨ kadkarig ad kadkari kɨ Moij eltaa kɨtakad deg gerɨn ne banj goto roit.
15Na hoia ɔrr go log kɨ tɔi, ad deg koosɨg kawɨn na kɨroat kad oon dɔ ta loa, na kad yootd dɔ rotogt lod ho. 16Na Jeju tɔ ron aw kam dɨlalot, elta kɨ Luwah nu.
Jeju yoot ngerokoinjɔr
(Oo Mat 9:1-8; Mrk 2:1-12)
17Ndɔ mad Jeju ndɨ ndoo deg, Parisɨ madg kɨ ngéndoo mberkɨnda lo Moij ndɨn roat, ĩgɨn hã ɓain ɗen ko kam ngon ɓet kɨ ɗen kam dɔning Galilet, kɨ kam dɔning Judet, kɨ kam ɓebo Jerusalemt. Na tɔg Bɨraɓe i nat sia kad yootɨn deg. 18Deg unɨn de mad kɨ ngerokoinjɔr kɨ nyatoa, a sahn kɨ n'andɨn sia, kɨ'n lana nõ Jejut. 19Na lon ngahn ɗob kand sia al kɨta koosɨdeg ye, alɨn sia dɔ kujt, ɗan bulo dɔkujt, tuin nyato kɨ ngerokoinjɔr tot dan degt kɨ nõ Jejut. 20Lon Jeju oo kadkam lod kad i kadkam kɨ jeje ye, el an: Dekɨdɨngã, majalg loi ĩn kɨ nyàgo kɔ. 21Ngéndoo maktubg kɨ Parisɨg mban girr gah ta kamdt anan: De kɨ ngekelta kɨmal dɔ Luwaht kɨ titbe i nõ a? Nõ asɨ nyàgo majalg kɔ a? Luwah kɨɗabe tã. 22Jeju ger tagahd ɓet, turd an: Kɨtɔɗi i gaan ne taag 'nten kamsɨt a? 23Oon ye kɨ ɗah i soot a? Kad de el ngerokoinjɔr an: Majalg loi ĩn kɨ nyàgo kɔ, a ke kad ela an i ɓai dõ i ɓaning? 24Na kɨtakad i gerɨn Ngon de ndɨ kɨ tɔg dɔningt ne kad nyan go majalg lo de kɔ ye, Jeju el ngerokoinjɔr an: M'eli m'an i ɓai dõ, un nya toi, na aw ɓe loi.
25Tentenbe ɓai ɗa nõdt, un nyaton, na aw ɓe lon, a ɔsɨgon Luwah. 26Ta ya deg tube biw, ad ɓool tɔld sɔkɨr. Ɔsɨn gon Luwah anan: J'oo nyag kɨdang ɓone.
Jeju kun Lebi
(Oo Mat 9:9-13; Mrk 2:13-17)
27Gog go nyagt 'nten, Jeju tee aw, oo de mad kɨ ngetirrdɔnya, tɔa i Lebi, ndɨ lo tirr dɔ nyat, ela an: I ndulo gom. 28Lebi ɓai ndulo goa. 29Lebi ɗa mburr nam kɨbobe kam ɓet lon kɨta Jeju. Koosɨ ngétirrdɔnyag kɨ deg madg ndɨn sed ta nyasat. 30Na Parisɨ madg kɨ ngéndoo Maktub lod nyurɨn ta dɔ ngéndoogt lo Jeju, anan: Kɨtɔɗi i ndɨ san ne, i ndɨ ãin ne sed ngétirrdɔnyag kɨ ngéɗamajalg a?
31Jeju turd an: Ngérongang a geen dɔktor al, na ngémõig tã. 32M'ɗe kɨta deg kɨdenesew al, na kɨta ngéɗamajalg kad tɔrrɨn ndid tã.
Ta ndɨje dɔ kɔgro nyasat
(Oo Mat 9:14-17; Mrk 2:18-22)
33Deg madg elɨn Jeju anan: Ngéndoog lo Jã ɔgɨn rod nyasa kɨ nja natnatbe, ndɨ elɨn ta kɨ Luwah, titbe ngéndoog lo Parisɨg ndɨ ɗan ne ho, na ngéndoog loi ndɨ san ho ndɨ ãin ho.
34Jeju eld an: Lon de kɨ ngeɗa lo ta dekɨdẽ kij i nat kɨ namɨng ɓai tɔ ye, oo kad asɨn hɔ rod dɔ nyasat e? Be al. 35Na kaglo a ɗee nõ lon a unɨn de kɨ ngeɗa lo ta dekɨdẽ kij rodt kɔ la, a hɔn rod dɔ nyasat ye? 36Jeju el terrta 'nten tɔ an: De kɨ til ta gaj kub kɨ kij la'n lew kɔn kub goto. Ĩla i ɗa titbe a ne, a til kub kɨ kij, tagahj kub kɨ kij'n non a ɓona kɨ kon kub al. 37De kɨ a ut kasɨnduu kɨ kij kam kõn galgt goto kɨta ĩla i titbe a ne, kasɨnduu a ndu galg ad kasɨnduu ũ kɔ, galg tɔ a tujɨn. 38Na kari na a utɨn kasɨnduu kɨ kij kam galgt kɨ kij. 39De kɨ ãi kon kasɨnduu kete woi, kɨ ndig kãi kɨ kij goto, kɨta a el an: kõna maj tɔi kɨ kij.
Цяпер абрана:
Luk 5: MlL
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Mbai Bible Revision © Bible Society of Chad, 2015.