PUDUT 7
7
Ratnan Ereb
1Idi kebala Tuhan Allah ni Noh, “Semuet iko dengan amung uang tetek ruma'mu bang alud rayeh ineh, ngaceku iko mo' luk matu pa kiungKu arang amung-amung lemulun luk luun tana' ini. 2Do' iko nguit tudu' etung pung luk meligan. Iamo' ratnan pung luk na meligan, do' nguit sebuleng deléi idi sebuleng tineh mo'. 3Idi do' iko nguit ratnan puar-puar suit, tudu' etung, ieh ineh deléi idi tineh, pad ngasa' inuldeh aput tana'. 4Ngaceku tudu' aco teh idi Ui ngacing udan pa luun tana', apat ngepulu' aco idi apat ngepulu' dacem kinioneh, pad ngaté amung-amung pudut luk inan niat, luk pangeh inau'Ku.” 5Idi Noh nenganau' amung-amung luk icuk Tuhan neneh.
6Idi ulun Noh kareb ereb ineh 600 lak. 7 Idi Noh dengan awanneh, idi anak-anakneh dengan awandeh nesemuet bang alud rayeh pad mepuit ratnan ereb ineh. 8Idi puar-puar pung idi suit luk meligan idi luk na meligan, 9nesemuet bang alud ineh dengan Noh, ieh ineh deléi idi tineh, maya' kudeng luk icuk Allah ni Noh. 10Idi pangeh tudu' aco inan ereb.
11 Kareb ulun Noh 600 Lak, ieh ineh pulu' tudu' aco bulan dueh amung-amung bued abpa' rayeh ineh pana' uput, idi inan teh udah luk pelaba ula'. 12Idi udan netemurun pa luun tana' apat ngepulu' aco idi apat ngepulu' dacem kinioneh. 13Idi bang aco sineh teh Noh dengan awanneh idi teluh anakneh, Sem, Ham, idi Yapet, dengan awandeh ineh nesemuet bang alud ineh. 14Idi ideh dengan puar-puar pung luk meliput idi luk melayo, luk rayeh idi luk isuut pana', dengan puar-puar suit, 15idi puar-puar pudut luk nginiat, nacing tedueh-tedueh matun Noh bang alud ineh. 16Idi ideh luk nesemuet ineh, ieh ineh deléi idi tineh ratnan amung-amung pudut, idi ideh nesemuet maya' kudeng luk icuk Allah ni Noh. Idi Tuhan nengitek tanga' alud ineh.
17Idi ereb ineh inan pa luun tana' apat ngepulu' aco kinioneh, idi abpa' ineh iuk-iuk temubu' idi nengelapung alud ineh, pad ieh netegenang. 18Idi abpa' ineh iuk-iuk rayeh idi temubu', pad alud ineh lupung. 19Idi abpa' ineh iuk-iuk temubu' teh, pad amung-amung pegkung luk medita' nereb peh. 20Idi ieh nengereb amung-amung pegkung ineh apat depeh kidita' neh. 21Idi amung-amung pudut luk inan niat luun tana' ineh pana' naté, ieh ineh suit, pung, idi lemulun pana'. 22Idi amung-amung pudut luk luun tana', luk inan niat pana' naté. 23Idi Tuhan nengaté amung-amung pudut luk inan niat luun tana', do' lemulun, pung, idi suit pana'. Iamo' Noh dengan amung-amungdeh luk denganneh bang alud ineh mo' luk mulun. 24Idi kinio abpa' ineh na melena' 150 aco.
Цяпер абрана:
PUDUT 7: BLD
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
BALA LUK DO' Lun Bawang Bible © The Bible Society of Malaysia 1982, Second Edition 1998.