MATIYO 6
6
Dɛsɛbagatɔw sɔncogo
1“Aw ka aw yɛrɛw kɔlɔsi. Aw kana aw ka Alasira taama kɛ tɔgɔnyini koo ye. N'o tɛ, aw Faa min bɛ sankolo la, o tɛna tɔnɔ d'aw ma. 2O la, n'i bɛ fɛɛn dɔ di dɛsɛbagatɔw ma, i kana buru fiyɛ i nyafɛ i n'a fɔ tɔgɔnyinilaw b'o kɛ cogo min na Alabatosow kɔnɔ, ani sira daaw la janko mɔgɔw k'u tando. Tinyɛ na, ne b'a fɔ aw ye ko olu y'u ka tɔnɔ sɔrɔ ka ban. 3E kɔni, n'i bɛ fɛɛn dɔ di dɛsɛbagatɔw ma, i kan'a to mɔgɔ si ka bɔ a kala ma. 4I k'a kɛ dogo la. I Faa Ala min bɛ kodogoninw ye, ale bɛna i sara.
Ala dalicogo nyanaman
(Luka 11.2-4)
5“N'aw bɛ Ala dali, aw kan'a kɛ i n'a fɔ tɔgɔnyinilaw b'a kɛ cogo min na. Ka lɔ Alabatosow kɔnɔ ani sira daaw la ka Ala dali, o le ka di u ye. U b'a kɛ ten janko mɔgɔw k'u ye. Tinyɛ na, ne b'a fɔ aw ye ko u y'u ka tɔnɔ sɔrɔ ka ban. 6E kɔni, n'i b'a fɛ ka Ala dali tuma min na, i ka don i ka soo kɔnɔ ka daa tugu. I Faa Ala min b'o yɔrɔdogonin na, i k'ale dali yen. I Faa Ala min bɛ kodogoninw ye, ale bɛna i sara. 7N'aw bɛ Ala dali tuma min na, aw kana segi kuma kelen kan sinyɛ caaman i n'a fɔ Alalɔnbaliw, bari olu bɛ miiri ko u ka kuma caaman le bɛn'a to Ala b'u jaabi. 8Aw kana olu ladege, bari aw mako bɛ fɛɛn minw na, aw Faa Ala bɛ olu lɔn sanni aw k'u dali a fɛ.
9“Aw ka kan ka Ala dali cogo min na, o filɛ:
‘An Faa min bɛ sankolo la,
i tɔgɔ ka bonya.
10I ka kɛ an ka masa ye tuma bɛɛ.
I sago ka kɛ dugukolo kan
i n'a fɔ a bɛ kɛ sankolo la cogo min na.
11An ka bii dumuni di an ma.
12E ka yafa an ma
i n'a fɔ an fana bɛ yafa an hakɛ tabagaw ma cogo min na.
13I kan'a to Sutana ka se an kɔrɔ,
an tanga kojugu ma.
Bari masaya ni sebagaya ani nɔɔrɔ y'i ta ye waati bɛɛ. Amiina.’#6.13 bari masaya ni...Amiina: O kuma nin tɛ sɔrɔ kitabu bɛɛ kɔnɔ.
14“N'aw bɛ yafa aw hakɛ tabagaw ma, aw Faa min bɛ sankolo la, ale fana bɛna yafa aw ma. 15Nga, n'aw tɛ yafa aw hakɛ tabagaw ma, aw Faa min bɛ sankolo la, ale fana tɛna yafa aw ma.
Suun doncogo
16“N'aw bɛ suun na tuma min na, aw kana aw nyaa kumu i n'a fɔ tɔgɔnyinilaw b'a kɛ cogo min na. Olu b'u nyaa kumu janko mɔgɔw k'a lɔn k'u bɛ suun na. Tinyɛ na, ne b'a fɔ aw ye k'u y'u ka tɔnɔ sɔrɔ ka ban. 17E kɔni, n'i bɛ suun na tuma min na, i k'i nyaa ko k'i kunsigi lalaga, 18janko mɔgɔw kan'a lɔn ko i bɛ suun na fɔɔ i Faa Ala min bɛ yɔrɔdogonin na. I Faa Ala min bɛ kodogoninw ye, o bɛna i sara.
Nafolo marayɔrɔnyuman
(Luka 12.33-34)
19“Aw kana nafolo caaman lajɛn aw yɛrɛw ye dinyɛ nin kɔnɔ, bari bagabaga ni tumuw bɛ cɛnni kɛ, soonw fana bɛ daaw kari ka don ka fɛɛnw cɛ. 20Nga, aw ye nafolo caaman lajɛn aw yɛrɛw ye sankolo la. O yɔrɔ la, bagabaga ni tumuw tɛ se ka cɛnni kɛ yen, soonw fana tɛ se ka daa kari ka don. 21I ka nafolo bɛ yɔrɔ min na, i ka miiriya bɛ t'o yɔrɔ la fana.
Fari ka lanpan
(Luka 11.34-36)
22“Mɔgɔ nyaa kɛra i n'a fɔ a fari ka lanpan. N'i nyaa ma cɛn, i bɛ yeli kɛ. 23Nga, n'i nyaa cɛnna, i tɛ yeli kɛ, i bɛ to dibi la. Ayiwa, e min ye mɔgɔnyuman ye, n'e nana tilan ka kɛ mɔgɔjugu ye, o ye juguya daan ye.
Ala koo ni nafolo koo
(Luka 16.13)
24“Mɔgɔ si tɛ se ka baara kɛ kuntigi fila ye, bari a bɛna kelen kɔniya ka kelen kanu, walima a bɛna nɔrɔ kelen na k'a mako bɔ kelen na. O cogo la, aw tɛ se k'aw jigi la nafolo kan, ka baara kɛ Ala ye fana.
La Ala la
(Luka 12.22-31)
25“O le y'a to ne b'a fɔ aw ye ko aw kana jɔɔrɔ aw baloko la k'a fɔ ko aw bɛna mun dumu ka mun min? Aw kana jɔɔrɔ aw fɛɛrɛbɔko la fana k'a fɔ ko aw bɛna mun fani don? Aw nii koo man fisa ni dumuni koo ye wa? Farisogo koo man fisa ni fani koo ye wa? 26Aw ka kɔnɔw filɛ, u tɛ danni kɛ, u tɛ suman tigɛ. U tɛ suman don bondo kɔnɔ. Nga aw Faa min bɛ sankolo la, ale b'u balo. Aw man fisa ni kɔnɔw ye kosɛbɛ wa? 27Aw la, jon bɛ se ka tile kelen dama fara a sii kan hami fɛ? 28Mun y'a to aw bɛ jɔɔrɔ aw ka fɛɛrɛbɔko la? Binfeeren minw bɛ bɔ kongo kɔnɔ, aw ka olu wilicogo filɛ. U tɛ baara kɛ, u tɛ kɔɔri fana parata. 29O n'a ta bɛɛ, ne b'a fɔ aw ye ko masa Solomani n'a ka faamaya bɛɛ, a ma fani sɔrɔ min ka cɛnya ye feeren nunu ta bɔ. 30O biin min bɛ kongo kɔnɔ bii, ni tasuma bɛn'a jɛni sini, ni Ala b'a janto o la ten, a tɛna aw fɛɛrɛ bɔ ka tɛmɛ o kan kosɛbɛ wa? Mun na aw tɛ aw jigi la Ala kan? 31Aw kana jɔɔrɔ aw ka dumuni koo ni minnifɛn koo la, walima fani koo la. 32Alalɔnbaliw le b'o fɛɛnw nyinina tuma bɛɛ. Aw Faa min bɛ sankolo la, ale b'a lɔn ko aw mako b'o fɛɛnw bɛɛ la. 33Aw kɔni ka jija Alako la fɔlɔ, ani k'a sago kɛ. N'o kɛra, Ala bɛna fɛɛn tɔw bɛɛ d'aw ma. 34Aw kana jɔɔrɔ aw ka sini makoya koow la, bari aw ka sini makoya koow bɛna nyanabɔ sini. Loon o loon n'a kunko lo.
Цяпер абрана:
MATIYO 6: JULNT94
Пазнака
Падзяліцца
Капіяваць
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fbe.png&w=128&q=75)
Want to have your highlights saved across all your devices? Sign up or sign in
Jula New Testament © Bible Society of Burkina Faso, 1994.