MATIYO 13
13
Yezu ye talen min la sumankisɛ seriko la
(Mar 4.1-9; Luka 8.4-8)
1O loon na, Yezu bɔra ka taa sigi bada la. 2Jamaba taara lajɛn a kɔrɔ fɔɔ a y'u to kɛnɛma ka don kurun kɔnɔ ka sigi.
3A ye kuma caaman fɔ u ye talen na. A ko: “Loon dɔ, sɛnɛkɛla dɔ bɔra ka taa suman seri a ka foro la. 4K'a to serili la, kisɛ dɔw taara ben sirada la. Kɔnɔw nana olu kunu. 5Dɔw fana kɛnyɛna fara yɔrɔ ma, bɔgɔ bɛrɛ tun tɛ yen. U falenna joona bari u ma don duguma ka se yɔrɔjan. 6Tile nana gwan tuma min na, yɔrɔ jara, u sara, bari lili nyanaman tun t'u la. 7Dɔw fana kɛnyɛna binjugu yɔrɔ ma, u ni biin falenna nyɔgɔn fɛ. Biin wilila joona joona k'u datugu. 8Nga dɔw kɛnyɛna dugukolonyuman ma. O yɔrɔ suman nyana kosɛbɛ. Dɔw ye deen kɛmɛ sɔrɔ, dɔw ta bi wɔɔrɔ, dɔw ta bi saba.” 9Yezu sɔrɔla k'a fɔ ko: “Ni min b'a fɛ ka mɛnni kɛ, o k'a tulo malɔ ka nya.”
Mun na Yezu bɛ to ka talen la mɔgɔw ye?
(Mar 4.10-12; Luka 8.9-10)
10O kɔ, Yezu ka kalandenw gwɛrɛla a la k'a nyininga ko: “Mun na i bɛ to ka kuma mɔgɔw fɛ talen na?” 11A y'u jaabi ko: “Aw kɛra Ala ka masaya gundo lɔnbagaw ye, nga a lɔnniya ma di tɔw ma, 12bari fɛɛn bɛ mɔgɔ min bolo, Ala bɛna dɔ fara o tigi ta kan kosɛbɛ. Nga, fɛɛn tɛ mɔgɔ min bolo, hali dɔɔni min b'a bolo, Ala bɛna o bɔsi a la. 13O le y'a to ne bɛ talen la u ye, bari u bɛ filɛli kɛ, nga, u tɛ foyi ye, u b'u tulo malɔ, nga, u tɛ foyi faamu. 14O cogo la, kira Ezayi ye kuma min fɔ, o bɛ kɛ. A tun ko:
‘U bɛna u tulo malɔ ka sɛgɛn,
u tɛna foyi faamu.
U bɛna filɛli kɛ fɔɔ u nyaa ka ja,
u tɛna foyi ye.
15Bari u tulo ka gwɛlɛ,
u tɛ miiri,
u t'a fɛ ka yeli kɛ,
u t'a fɛ ka mɛnni kɛ.
N'u tun ye yeli kɛ ka mɛnni kɛ,
u tun bɛna sɔn ne Ala ma.
Ne tun bɛna u kisi.’
16“Aw kɔni ye dubadenw ye bari aw nyaa yɛlɛnin lo, aw tulo bɛ mɛnni kɛ. 17Tinyɛ na, ne b'a fɔ aw ye ko aw bɛ fɛɛn minw yera, kira caaman ni Ala ka mɔgɔ caaman tun b'a fɛ k'u ye, nga u nyaa ma la u kan. Aw bɛ kuma minw mɛnna, u tun b'a fɛ k'u mɛn, nga, u m'u mɛn.
Talen min lara suman kisɛ seriko la, o kɔrɔ
(Mar 4.13-20; Luka 8.11-15)
18“Ne ye serilikɛla koo fɔ talen min na, aw k'aw tulo malɔ o talen kɔrɔ la. 19Minw bɛ Ala ka kuma mɛn n'u t'a faamu, olu bɔnin bɛ sira daa fɛ, kisɛ benna o yɔrɔ min na. U man'a mɛn dɔrɔn, Sutana bɛ na o bɔ u kɔnɔ. 20Mɔgɔ minw b'o kuma mɛn ka sɔn a ma joona ni nisɔndiya ye, olu bɔnin bɛ fara yɔrɔ fɛ. 21U t'a to o kuma ka sigiyɔrɔ sɔrɔ u kɔnɔ, u bɛ nyinɛ a kɔ joona. O le y'a to ni mɔgɔ b'u tɔɔrɔ o kuma kɔsɔn dɔrɔn, u bɛ sin ka ban Ala ma. 22Mɔgɔ minw bɛ o kuma mɛn, nga, ni nafolo koo, ni dinyɛ hami koo, ni nyanagwɛ koow b'o kuma kɛ kuma gwansan ye u nyana, n'a tɛ foyi nya u ye, olu bɔnin bɛ binjugu yɔrɔ fɛ. 23Mɔgɔ minw bɛ kuma nin mɛn, k'o faamu, olu bɛ kɛ i n'a fɔ suman nyanin. Dɔw bɛ kisɛ kɛmɛ kɛ, dɔw ta bɛ se bi wɔɔrɔ, dɔw ta bi saba.”
Yezu ye talen min la binjugu koo la
24Yezu ye talen wɛrɛ la u ye. A ko: “Koo min bɛ masa Ala ka baara kɛcogo gwɛya aw ye, o filɛ: Cɛɛ dɔ ye sumansi nyanaman dan a ka foro la. 25Ka mɔgɔ bɛɛ to sinɔgɔ la sufɛ, a jugu taara binjugu kisɛ seri suman cɛma ka tɛmɛ n'a yɛrɛ ye. 26U nana falen, u y'a daminɛ ka kuun bɔ tuma min na, binjugu lɔnna ka bɔ suman na. 27Forotigi ka baaradenw taar'a fɔ a ye ko: ‘I tun ma sumansi nyanaman le dan i ka foro la wa? Binjugu nin do bɔra min?’ 28A y'u jaabi ko: ‘Ne jugu dɔ le y'o baara kɛ.’ Baaraden nunu tilara k'a nyininga ko: ‘I b'a fɛ an ka taa binjugu nin bɔn ka bɔ yen wa?’ 29A y'u jaabi ko: ‘Ayi. Aw kana ta'a bɔn, bari aw bɛ se ka fili ka suman dɔ bɔn. 30Aw k'a to u ka wili nyɔgɔn fɛ fɔɔ sumantigɛtuma ka se. N'o tuma sera, n bɛn'a fɔ sumantigɛlaw ye k'u ka binjugu nin tigɛ fɔlɔ, k'a siri, k'a jɛni, u ka sɔrɔ ka suman tigɛ k'a kɛ n ka bondo kɔnɔ.’ ”
Ala ka masaya bɔnin bɛ mun fɛ?
(Mar 4.30-32; Luka 13.18-19)
31Yezu ye talen wɛrɛ la u ye tugu. A ko: “Ala ka masaya koo bɔnin bɛ mutaridi kisɛ fɛ, cɛɛ dɔ y'o min ta k'a dan a ka foro la. 32Mutaridi kisɛ ka dɔgɔ ni fɛɛn bɛɛ kisɛ ye. Nga, n'a falenna, a bɛ bonya ka tɛmɛ nankɔ fɛɛn sɛnɛta tɔw bɛɛ kan. A bɛ kɛ yiri ye, kɔnɔw b'u ka nyaga la a bolo kan.”
Yezu ye talen min la burufununan koo la
(Luka 13.20-21)
33O kɔ, Yezu ye talen wɛrɛ la u ye ko: “Koo min bɛ Ala ka masaya koo gwɛya aw ye, o filɛ: Muso dɔ ye burufununan ta k'a kɛ farinimugu fiyɛ nyaa kelen na k'a nɔɔni, k'a bila fɔɔ a bɛɛ fununa.”
Yezu ka talen lakun
(Mar 4.33-34)
34Yezu y'o kuma bɛɛ fɔ jama ye talen na. A tun tɛ kuma u fɛ n'a ma talen la u ye. 35A tun b'a kɛ ten janko kira tun ye min fɔ, o ka kɛ. A tun y'a fɔ ko:
“N bɛna kuma u fɛ talenw na.
Mɔgɔw ma koo minw lɔn kabini dinyɛ dantuma,
ne bɛna olu fɔ u ye.”
Yezu ye talen min la binjugu koo la, o kɔrɔ ye nin ye
36Yezu bɔra jama kɔrɔ ka taa soo tuma min na, a ka kalandenw gwɛrɛla a la k'a fɔ a ye ko: “I ye talen min la ko mɔgɔ dɔ taara binjugu kisɛ seri a jugu ka foro la, o talen kɔrɔ fɔ an ye.” 37Yezu y'u jaabi ko: “Mɔgɔ min ye sumansi nin dan, o ye Mɔgɔ Dencɛ ye. 38Foro nin, o ye dinyɛ ye. Sumansi, o ye Ala ka mɔgɔw ye. Binjugu nin, o ye Sutana ka mɔgɔw ye. 39Jugu min ye binjugu kisɛ seri foro nin kɔnɔ, o ye Sutana yɛrɛ ye. Sumantigɛtuma, o ye dinyɛ laban tuma ye. Sumantigɛlaw ye mɛlɛkɛw ye. 40U bɛ binjugu tigɛ k'a jɛni cogo min na, o koo nyɔgɔn bɛna kɛ dinyɛ laban tuma na. 41Mɔgɔ Dencɛ bɛn'a ka mɛlɛkɛw ci. Mɔgɔ minw bɛɛ bɛ kojugu kɛ ka tɔw fana nigɛ k'u bila a la, u bɛna olu woloma k'u bɔ Ala ka mɔgɔw cɛma. 42Mɛlɛkɛw bɛna o mɔgɔjuguw fili tasuma kɔnɔ. U bɛna kasi yen k'a fɔ ko n'u tun y'a lɔn. 43O kɔ, mɔgɔ minw bɛ Ala sago kɛ, olu bɛɛ bɛna bonya sɔrɔ ka manamana i n'a fɔ tile, u Faa Ala ka masaya yɔrɔ la. Ni min b'a fɛ ka mɛnni kɛ, o k'a tulo malɔ ka nya.
Yezu ye talen min la nafolo dogonin koo la
44“Ala ka masaya yɔrɔ bɛ sɔrɔ cogo min na, koo min b'o gwɛya aw ye, o filɛ: A bɛ i n'a fɔ cɛɛ dɔ taara nafolo dogonin sɔrɔ foro dɔ la. A y'a ta k'a dogo tugu. A nisɔn diyara kosɛbɛ, fɔɔ a taar'a bololafɛn bɛɛ feere ka segi ka taa foro nin san.
Yezu ye talen min la kɔnɔkisɛ koo la
45“Ala ka masaya yɔrɔ bɛ sɔrɔ cogo min na, koo min b'o gwɛya aw ye, o filɛ: A bɛ i n'a fɔ jagokɛla dɔ, min bɛ kɔnɔkisɛnyuman nyini. 46A nana dɔ ye min ka nyi, a taar'a bololafɛn bɛɛ feere k'o kɔnɔkisɛ nin san.
Yezu ye talen min la mɔnikɛlaw koo la
47“Ala ka masaya koo bɔnin bɛ mɔnikɛla dɔ fɛ min y'a ka jɔɔ fili baji la, a ye jigɛ sifa bɛɛ minɛ. 48A fanin kɔ, a y'a sama ka bɔ jii la ka sigi ka jigɛw woloma. Jigɛ minw ka nyi, a ye olu kɛ minan kɔnɔ. Jigɛ minw man nyi, a ye olu fili. 49O koo nyɔgɔn bɛna kɛ dinyɛ labantuma na. Mɛlɛkɛw bɛna na mɔgɔjuguw woloma k'u bɔ mɔgɔnyumanw na. 50U bɛna o mɔgɔjuguw fili tasuma na. O yɔrɔ la, u bɛna kasi k'a fɔ ko n'u tun y'a lɔn.”
Fɛnkura ni fɛɛn kɔrɔman ka koo
51O kɔ, Yezu y'u nyininga n'u y'o talenw bɛɛ faamu. U y'a jaabi ko ɔnhɔn. 52A y'a fɔ u ye tugu ko: “Ayiwa. Sariya karamɔgɔ min kalanna kosɛbɛ Ala ka masaya koo la, a bɔnin bɛ sotigi dɔ fɛ min bɛ fɛnkura ni fɛɛn kɔrɔman sɔrɔ a ka nafolo la.”
Mun na Nazarɛtikaw ma la Yezu la?
(Mar 6.1-6; Luka 4.16-24)
53Yezu y'o talenw la ka ban tuma min na, a bɔra yen 54ka ta'a ka dugu la. O yɔrɔ la, a donna Alabatoso kɔnɔ ka mɔgɔw kalan. Mɔgɔ minw tun bɛ yen, u bɛɛ kabakoyara. U tora k'a fɔ ko: “Haan! A bɔra ni hakilitigiya nin ye min? A bɛ kabako nunu kɛ cogo di? 55Yirilɛsɛbaga ka deen nin tɛ wa? Mariyamu t'ale le bamuso ye wa? A dɔgɔcɛw tɛ Zaki ni Yusufu ni Simɔn ani Zude ye wa? 56A dɔgɔmusow bɛɛ tɛ dugu nin kɔnɔ yan wa? A do ye hakilitigiya ni kabako kɛ see nin sɔrɔ min?” 57O miiriya le y'a to u ma la Yezu la. O la, Yezu y'a fɔ u ye ko: “Kira tɛ bonya sɔrɔ a ka dugu mɔgɔw n'a ka somɔgɔw fɛ ka ye.” 58Yezu ma kabako caaman kɛ yen bari u ma la a la.
Цяпер абрана:
MATIYO 13: JULNT94
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Jula New Testament © Bible Society of Burkina Faso, 1994.