Embandizo 6
6
Okufakara kw'abantu
1Orwo abantu babandize kukanya omu nsi bakazara abaisiki, 2batabani ba Ruhanga babona abaisiki aba okwo bali barungi; barondamu abandi baba bakazi babo. 3Aho Omukama agamba ati, “Abantu tindibaleka kurora biro byona; aha rw'okuba bonene b'okufa. Kandi ebiro byabo birabaga myaka kikumi mwo makumi gabili.” 4Omu biro bilinya nangu n'ahanyuma, omu nsi omu hakaba halimu abantu emyandu, abo batabani ba Ruhanga bazaire aha baisiki abo bashweire. Nibo bashaija emanzi ab'eirai, ab'eiranga.
5Omukama abona abantu omu nsi okwo bafakara muno n'okwo ebiro byona balikutekeleza kubi kushai aha mutima. 6Aho ayefuuhya ekyo yatondeire omuntu omu nsi, ashasha muno. 7Aho agamba ati, “Abantu abo natonzire mbasilikye mbaihye omu nsi; abantu, ebigunju, ebyekurura n'ebinyonyi. Aha rw'okuba nayefuuhya ekyo nabatondeire.” 8Kyonkai Noa aganja aha Mukama.
Noa nakora obwato
9Oru nirwo ruzaro rwa Noa. Noa akaba ali mushaija murungi, nyakatetere omu makiroge, yayekwataga Ruhanga. 10Kandi akaba aina abatabani bashatu: Shemu, Hamu na Yafeti.
11Ruhanga ensi ekaba emufeleire orwema, abantu nibaitangana muno. 12Abona okwo ensi efire orwema; abantu nibajanguka. 13Aho Ruhanga agambira Noa ati, “Ningoza kusilikya abantu bona nkabamaliraho kimoi, enshonga buli hantu nibaitangana. Ndabasilikijanyia n'ensi. 14Okore obwato, obukoze embaho z'omuti gw'omugoferi. Obutemu ebiyumba, mara obusige elami omunda n'aheru. 15Obukor'oti: Oburai bwabwo mita kikumi mwo makumi gashatu na ishatu. Obukika mita makumi gabili na ibili. Obwemi mita ikumi na ishatu. 16Obwato obuteho orushwi, kandi kubwema aha mugoma kubugoba aha rushwi osigemu omwanya nk'ogw'enusu mita. Oshube obutemu ebibani bishatu n'orwigi rw'omu rubaju. 17Kuba ensi ninyija kugibunza omutunga gw'amaizi, nyite abantu bona omu nsi mbamaremu, na buli kimoi ekili omu nsi nikifa. 18Kyonkai ndakora endagano na iwe. Orataha omu bwato iwe hamoi na batabani bawe, mukazi wawe na bakamwana bawe. 19Buli ngeli y'ekigunju n'ekinyonyi oihyeho bibili bibili ekishaija n'ekikazi, obitahye omu bwato oikare nabyo, bitafa. 20Omu binyonyi kuhonderana n'engeli zabyo, n'omu bigunju kuhonderana n'engeli zabyo. Buli kintu ekyekurura ahansi kuhonderana n'engeli yakyo: Bibili bibili ahali buli ngeli. Bitahe omu bwato oikare nabyo obilinde bitafa. 21Kwakwo okwate buli ngeli y'ekyakulya ekikalibwa, okibike. Kiraba kyakulya kyawe, iwe, hamoi na byonene.” 22Noa akora atyo; akora byona ebyo Ruhanga yamuragiire.
Цяпер абрана:
Embandizo 6: RHAY01
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ruhaya DC Bible © Bible Society of Tanzania, 2001.