Embandizo 10
10
Oruzaro rwa Noa
1Aba nibo baijukuru ba batabani ba Noa: Shemu, Hamu na Yafeti. Orwo omutunga gwahoire bakazara abaana b'abojo.
2Batabani ba Yafeti ni Gomeri, Magogi, Madai, Yavani, Tubali, Meshaki na Tirasi. 3Batabani ba Gomeri ni Ashikenazi, Rifati na Togama. 4Batabani ba Yavani ni Elisha, Tarishishi, Kitimu na Dodanimu. 5Aba nibo baish'enkuru babantu bona ab'emyegego y'enyanja. Abantu abo ni baijukuru ba Yafeti, okwo balikutura omu nganda zabo n'omu nsi zitali zimoi, buli bamoi nibagamba rulimi rwabo.
6Batabani ba Hamu ni Kushi, Misiri, Putu na Kanaani. 7Batabani ba Kushi ni Seba, Havila, Sabuta, Raama na Sabuteka. Batabani ba Raama ni Sheba na Dedani. 8Kushi akazara Nimurodi; Nimurodi niwe manzi ya mbere omu nsi yona. 9Omukama akamusingira yaba muhigi emanzi, nikyo abantu bagambira bati, “Omukama akusingire ob'omuhigi emanzi nka Nimurodi.” 10Obubere obukamabwe bwakwataga Babeli, Ereki, Akadi na Kalune: Ebigo ebi byona bili omu nsi ya Shinari. 11Kuruga Shinari agya Asiria mbali yayombekire ebigo bya Ninive, Rehoboitiri, Kala, 12na Reseni, ekigo kikuru omugati ya Ninive na Kala. 13Misiri akazara Abaludi, Abaanami, Abalehabi, Abaanafituhi; 14Abapaturusi, Abakasiluhi (abalikutabukwamu Abafilisiti), n'Abakafutori.
15Kanaani akazara Sidoni, niwe mwanawe w'omuzigaijo na Heti. 16Kanaani ni ishenkuru Omuyebusi, Omwamori, Omugirigashi; 17Omuhivi, Omwariki, Omunyasini; 18Omwarivadi, Omusemari n'Omuhamati. Ahanyuma enganda z'Abakanaani zayemalira amahanga. 19Ensi y'Abakanaani ekaba neyema Sidoni omu bwolekera bwa Gerari kugoba Gaza, n'omu bwolekera bwa Sodoma na Gomora, Adima na Seboimu kugoba Lasha. 20Aba nibo baijukuru ba hamu, nk'okwo balikutura omu nganda n'ensi zitali zimoi, buli bamoi nibagamba rulimi rwabo.
21Shemu, mukuru wa Yafeti mara ishenkuru Abaeberi bona nawe akazara abaana. 22Abatabani ni Elamu, Ashuru, Aripakishadi, Ludi na Aramu. 23Batabani ba Aramu ni Uzi, Huli, Geteri na Mashi. 24Aripakishadi akazara Sela, Sela yazara Eberi. 25Eberi akazara abaana b'abojo babili. Omoi eibaralye ni Pelegi, aha rw'okuba omu makiroge nirwo abantu babeganukire omu nsi. Omurumuna eibaralye ni Yokitani. 26Yokitani akazara Alimodadi, Shelefu, Hasarimaweti, Yera, 27Hadoramu, Uzali, Dikila, 28Obali, Abimaeli, Sheba, 29Ofiri, Havila na Yobabu. Aba bona bakatabuka ahali Yokitani. 30Ensi eyo baturagamu yayemaga Mesha omu bwolekera bwa Sefari kuhika eibanga ly'oburugaizoba. 31Aba nibo baijukuru ba Shemu nk'okwo balikutura omu nganda n'omu nsi zabo ezitali zimoi, buli bamoi nibagamba rulimi rwabo.
32Enganda ezi zona ni baijukuru ba Noa, nk'okwo amahiga gabo gali, eihanga aha lindi. Kwema orwo omutunga gwahoire amahanga omu nsi yona gakatabuka ahali Noa.
Цяпер абрана:
Embandizo 10: RHAY01
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ruhaya DC Bible © Bible Society of Tanzania, 2001.