Judit 12
12
Judit ti iyajñibäl xts'a'leyajob
1Che' jiñi Holofernes tsi' choko majlel Judit ya' baki mi' cha'leñ we'el uch'el, ba'añ weñ it'ojoljaxbä we'ibäl. Ya'i tsi' yäk'ä it'añ cha'añ mi' yäk'eñtelob jiñi bäl ñäk'äl yik'ot ya'lel ts'usub lotbilbä icha'añ. 2Che' jiñi, Judit tsi' su'be:
—Mach mejlik jk'ux jiñi awaj, ame ktaje' ksajtemal ti' itojlel kCh'ujutat. Jiñ cha'añ tsa' kch'ämä tilel chajpäbilbä waj —Che'eñ.
3Holofernes tsi' k'ajtibe:
—¿Chuki mi' kaj amel che' mi' jilel ibäl añäk'? ¿Bajche' ma' kaj ataj yambä? Kome ma'añik mi juñtikilik iwiñikob lok'emo'bä ti atejklum ilayi.
4Judit tsi' jak'ä:
—Mach amel apusik'al kyum. Lak Ch'ujutat mi' kaj its'äktesañ kik'ot pejtelel chuki tsi' iña'ta imel che' maxto jilel jiñi kbälñäk'äl —Che'eñ.
5Che' jiñi, jiñi x-e'telob icha'añ Holofernes tsa' kaji ipäyob majlel jiñi Judit ya' ti pisilbä otot, ya'i tsa' kaji ti wäyel k'äläl ti yojlil ak'älel. Che' ts'itajax yom säk'ajel pañämil, tsa' ch'ojyi; 6che' jiñi tsi' choko ti su'bol jump'ejl t'añ ti tojlel Holofernes cha'añ mi yäk' it'añ, cha'añ mi' lok'el majlel ipejkañ Lak Ch'ujutat. 7Jiñi Holofernes tsi' cha'le xik'oñel ti' itojlel xkäñtayajob icha'añ, cha'añ mi' mejlel iyäk'ob ti lok'el.
Awilañ, jiñi Judit tsa' ajñi uxp'ejl k'iñ ya' baki añ ilejchempat otot. Ti jujump'ejl ak'älel tsa' lok'i majlel ya' ti joktäl ambä ya' ti Betulia yik'ot tsi' cha'le' ts'ämel ya' ti wut ja', chäñ käñtäbilbä. 8Che'bä wolix icha' sujtel majlel ya' ti lejchempat otot, tsa' ik'ajti ti wokol t'añ Lak Ch'ujutat Iyum Israel, cha'añ mi' yäk'ob ikoltäñtel. 9Che' ujtemix imel ik'ajtiya cha'añ mi' säk'esañ ipusik'al, tsa' sujti majlel ya' ba' jijlem, baki mi' yajñel jiñto che' mi' ch'ämbeñtel majlel ik'ux iwaj ti ak'älel.
Holofernes mi' päy tilel Judit ti k'ux waj ti ak'älel
10Che' ti' chämp'ejlel k'iñ, Holofernes tsi' chajpa jump'ejl k'iñijel cha'añ jiñi x-e'telob ñukbä ik'äjñibal ti' itojlel, ma'añik tsi' päyäyob tilel mi' juñtikilik machbä ñukobik. 11Che' maxto mejl jiñi k'iñijel, tsi' päyä tilel jiñi Bagoas, jiñi iyaj e'tel ñukbä ik'äjñibal mi' ik'el, tsi' isu'be:
—Kuku, päyä tilel jiñi x-ixik hebreabä, tsa'bä kälel ti atojel cha'añ ma' käñtañ, cha'añ mi tilel ti' we'el uch'el lak kik'ot. 12Kisiñtik jax che' ma'añik mik pi'leñ ti wäyel che' wä'añ kik'ot. ¡Mi' mach che'ik mi yujtel, mi kajel itse'tañoñ!—Che'eñ Holofernes.
13Tsa' bäk' lok'i majlel jiñi Bagoas. Tsa' k'oti ba'añ Judit, tsi' isu'be:
—Awokolik, weñ t'ojolbä x-ixik, yom ma' tilel ba'añ jiñi kyum cha'añ ma' pi'leñ ti ili k'iñ. La' ajap ya'lel ts'usub yik'ot tijikñäyel, lajal che' bajche' juñtikil xch'okbä iyalobil asiriajob chumulo'bä ya' ti ñukbä otot icha'añbä Nabucodonosor.
14Judit tsi' jak'ä:
—¿Chuki jk'äjñibäyel cha'añ mik ñusäbeñ it'añ kyum? Che'eñ. ¡Mi' kaj kmajlel ya' baki añ, mi' che'äch yom ipusik'al! ¡K'ax ñuk itijikñäyel kpusik'al wäle k'äläl che' kuxuloñto!
15Judit tsa' kaji ich'äl ibä, tsi' iläpä jiñi it'ojol jaxbä pislel yik'ot tsi' ch'älä ibä yik'ot pejtelel ich'äjlib. Jiñi x-ixik iyaj e'tel ya' bä añ yik'ot Judit, ñaxañ tsa' ixäñä majlel. Che'bä tsa' k'oti ti' itojlel Holofernes, tsa' ilich'i jiñi pächi tsa'bä iyäk'e Bagoas ti' itojlel Judit, cha'añ mi' k'äñ jiñi Judit cha'añ mi' tasiñ ya' baki mi kajel ik'ux iwaj.
16K'äläl che'bä tsi' ik'ele Judit ti ñaxañ jiñi Holofernes, wolix ipijtañ jiñi k'iñ cha'añ mi' ipejkañ. Jiñ cha'añ che'bä tsa' ochi jiñi Judit yik'ot tsa' buchle ti it'ejl tsa' iweñ ñuk'aj ipusik'al, cha'añ woli iweñ mulañ ipi'leñ ti wäyel.
17Holofernes tsi' yälä:
—¡Cha'leñ uch'el, yom ma' tijikñesañ apusik'al kik'ot lojoñ! Che'eñ.
18Judit tsi' jak'ä:
¡Uts'atäch kyum! ¡Ma'añik bakibä k'iñ tsa' kubi ktijikñäyel che' bajche' wäle! Che'eñ.
19Che' jiñi tsa' kaji ti we'el uch'el ti' tojlelob, tsi' k'uxu jiñi bäl ñäk'äl tsa'bä imele iyaj e'tel icha'añ. 20Ñumeñ tijikña jiñi Holofernes cha'añ ya'añ Judit yik'ot, jiñ cha'añ tsa' weñ yäk'a. Ma'añik bakibä k'iñ tsi' japä ya'lel ts'usub che' k'amel bajche' jiñi.
Цяпер абрана:
Judit 12: CholDc
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Biblia Chol de estudio con DC- Derechos reservados por SBM