YAYA 1
1
OBEELOM WONE YAYA MBANEEGERAK YI O
Wone nogo nen aakumi ineenik eeginake menggerak wone
1O aa'nduk togon mbogut-nggween wakkaga'lek kagak at Wone nogo wonagagerak. Wone nogo ti, Ala imbirak aret wonagagerak. Ndi, Wone ti, Ala aret wonagagerak. 2At nogo aa'nduk togon Ala imbirak aret wonagagerak. 3Ala nen at Wone nogo yoge kagak, mbogut-nggween yi mendek ndi mendek abok aret wakkagagerak. Yi mendek ndi mendek wakkagagerak nogo at lek kagak, wakkagagerak lek o. 4Aakumi ineenik eeginake alom at aret wonagagerak. Ndi, ineenik eeginake alom ti nen aakumi inikime eya eeginake menggerak. 5Eya nogo ti, o apit me eya eeke menggerak. Ndi, o apit nogo nen o eya lamungga'lek aret wonagagerak.
6Ala nen aap ambi ayonggo endage Yaya aret nappi wagagerak. 7At Yaya nogo nen aakumi inikime eya eeginake menggerak nogo abok paganogo yorage logokit nduk, wagagerak. At yorage paga yi aakumi ndi aakumi abok aret iniki eya nogo oba panggombunuk, abet mbaruwak nduk, paganogo yorage a wagagerak. 8At aakumi inikime eya eeginake menggerak nogo ti, at Yaya lek kwe, at eya eeginake menggerak nogo abok mban paganogo yorage logokit nduk aret wagagerak. 9Eya abe o nggween paga yime unggwi wage logominggirik, yi aap ndi aap inikime eya eeginake logorak nogo yi aret wambi wagagerak.
10At o nggween paga yime wambi wage nagagirik, wonagagerak. O mbogut-nggween yi, at aret wakkagagerak kwe, it aakumi nggween paga yime menggaarak nogo at yelok kaga'lek aret wonogogwaarak. 11At ame lombok aret wambi wagagerak kwe, it aap at owe-awot nogo nen at eebe wagangga'lek aret wonogogwaarak. 12Eebe wagangga'lek aret wonogogwaarak kwe, it ando iniki at oba panggombunuk, abet mbako nogogwaarik, waganeegwaarak nogo perak, ”Kit mondok-mondok an napuri aret logomunggup o,” yinuk, it abok at apuri aret aganabeegerak. 13It aap nogo aakumi inapuri ndaganakwi kwak ndaganabulik o. Ndi, aakumi nggween paga mendek nen, ”An naput ndarikit,” mba'nuk, ndaganakwi kwak ndaganabulik mban. Ata. Ala nen aret ndaganabeegerak o.
14At Wone nogo, aap aret age nagagirik, ninom aret wonagagerak. Ninom logonet, oona ngginik kagak, iniki kunik nen eeppinanege, Ala ndogop menggerak, liirogon yo'nirage, eeke kogo logonet, at Ala aput ambolom ndarak me, ogoba nen tiyappereegerak mondok tiyanak aret kogogurak o.
15At Yaya nen oone nggwok paga at nogo abok paganogo yorage logonet, ”Aap ambi nambokan woraagin nogo, an nda'naga'lek neegak, at aa'nduk togon wonagagerak me, an ta mbuuluk. Ndi, at mondok nggwok aret o, yinuk, yokkirage nagagirak nogo eebe yi aret o,” yinuk, yorage nagagerak.
16At oona ngginik logonet, iniki kunik nen eeppinanegak mban, eeppinanegak mban, eeke kagak, nit abok aret waganeegurak. 17At Ala nen wone lengganogo yoge kenok, Muta nen yo'niragagerak kwe, Ala iniki kunik nen eeppinanege, ”Ala ndogop menggerak o,” yinuk, liirogon paganogo yo'nirage, eereegerak nogo ti, Yetut Keritut aret o. 18Aakumi nen Ala mondok inigen kogolik aret o. At Ala aput ambolom ndarak iniki kunik lombok nogo nen perak, Ala abok paganogo yo'niragagerak.
At Yaya Yiime Wuppiige Menggerak nogo nen yorage nagagerak wone
(Mat 3:1-12, Mrk 1:1-8, Luk 3:1-18)
19It aap Yakuri mendek nen aap Ala unde inom, it aap Leewi mendek inom, at Yaya, ”Kat aap ta o?” yoruwak nduk, o Yerutalem nen at owagam nappiya wogogwaarak owagam wogo mbareegwa, at Yaya paganogo yoragagerak nogo yi aret o.
20At Yaya nen, ”Onggo yoroorak ti, neebi,” mbarulik o. Ata, ”Ala nen leenogo mippereegerak nogo an ta lek aret o,” yinuk, tena'me paganogo yoragagerak.
21Yorage mbareegi, it nogo nen at Yaya yogo logonet, ”Ndi, ti kenok, kat Eliya ilik?”
Yogo mbareegwa, at Yaya nen, ”Eliya ti kunduk, an lek mban o.”
Yorage mbareegi, it nen, ”Ti kenok, aap Ala wone yorage menggerak nabi-nabi ambi nogo kat aret ilik?”
Yogo mbareegwa, at nen, ”Ti kunduk, an lek mban o.”
22Yorage mbareegi, it nen at yogo logonet, ”Ndi, ti kenok, kat ta o? It nappinani wagaarak nogo wone wonok yora nawam yo'niret ubi! An aap ndogop o, yinuk, pagangge menggendak nogo ngge o?”
23Yogo mbareegwa, at Yaya nen, ”At Ala wone yorage nagagerak Yetaya nogo nen ari logonet,
Aap ambi karume aakumi lek me kuum ari logonet,
At ninogoba endagembogut woroorak tu koonogo yako
logonip o, yereegerak nogo ti, an aret o,”
yinuk, yoragagerak.
24It wogogwaarak nogo ti, it aap Pariti mendek nen aret nappiya wogogwaarak. 25It nappiya wogogwaarak nogo nen Yaya yogo logonet, ”Kat nen, An Ala nen leenogo mippereegerak nogo lek o. Eliya lek o. Aap Ala wone yorage menggerak nabi nogo lek o, yagandak kwe, nonggop nduk, aakumi yiime wuppiinet nege agandik?”
26Yogo mbareegwa, at Yaya nen, ”Lek o. An aakumi yiime wuppiige minggirak aret kwe, aap ambi kit liippega'lek kiigak wambi wagagerak kinenggela'me wonage o. 27At nogo ti, nambokan woraagin kwe, aap nggwok me, an at iyogogut nggerenak piiniyak meek o,” yinuk, yoragagerak.
28Wone ti yoragagerak nogo ti, at aakumi yiime wuppiige nagagim niyo Yoreran enebaga o Mbetaniya nogome logonet, yoragagerak.
”Ala andomba yi kaanip o,” yinuk, yoragagerak wone
29Nogo yinuk, ko'lu Yetut Yaya owagam wage enegen kage nagagirik, at Yaya nen, ”Aakumi nggween paga yime menggaarak inomaluk lek agago piige menggerak nogo Ala andomba wage yi kaanip o. 30Aap ambi an nambokan woraagin nogo an nda'naga'lek neegak, at aa'nduk wonagagerak me, an ta mbuuluk. Ndi, at mondok nggwok aret o, yinuk yokkirage minggirak nogo eebe yi aret o. 31At eebe an liippega'lek aret wonagarak kwe, aakumi Iterali mendek at ineenu aruwak nduk, an yiime wuppiinet wagarak nogo o,” yinuk, yoragagerak.
32Yorage nagagirik, at Yaya paganogo yorage logonet, ”Aberiniki towe puume pogom mbogut paga nen wuga agan wambi wage nagaarik, Yetut oba kwi'ndak wonage an nenegen kagarak o. 33An perak, at liippega'lek aret wonagarak kwe, at aakumi yiime wuppiyoorak nduk, nappani wagagerak nogo nen, Aberiniki wambi woraamenggerak at ambi oba kwi'ndak wonage kenegen kaamunggun nogo ti, Aberiniki kinoba wuppinagi woraagin nogo aret o, yo'nereegerak me, 34an aret nenegen kage nagarik, Yi Ala aput aret o, yinuk, paganogo yokkiragi o,” yorage nagagerak.
It inaa'nduk Yetut oone waganeegwaarak wone
35Nogo yinuk, ko'lu at Yaya it at oone waganggwi mendek mbere inom logonet, 36Yetut nage enegen kage nagagirik, ”Wologo wae! Ala andomba nage ti kaanip o.”
37Yorage mbareegi, it at oone waganggwi mbere nogo at Yaya yereegerak konenggo nogogwaarik, Yetut mugurok nogogwaarak. 38Amugurok nogwe me, Yetut ena logurogon enegen pegiige logonet, ”Kit nano kwaarit wogop o?”
Yorage mbareegi, it nen, ”Rabi wae! Kat kawi ngge o?” yinuk, yoreegwaarak, (”Rabi wae,” yoreegwaarak ti, nit ninoone paga, ”Nogoba wae,” yoreegwaarak.)
39Yogo mbareegwa, Yetut nen, ”Pekka wa'nip o,” yorage mbareegi, inom nogo nogogwaarik, at ame inigen kogogwaarak. Ndi, ne tiyom paga o kiyoma-kiyoma jam 4 negen ari nagagerak me, inom aret wonogogwaarak.
40Aap mbere nen Yaya yoreegerak nogo konembunuk, Yetut amugurok nogogwaarak nogo ambi endage Andereyat, Timon Peterut awuluk nogo aret. 41At nogo oweeluk Timon mbet-mbet kwaakkage nagagirik, ”Timon wae! Mesias nogo muk wagaarak ninigen kogoorak o,” yinuk, yoreegerak. (Mesias yoreegerak nogo ti, nit ninoone paga Ala nen leenogo mippereegerak Keritut aret nduk yoreegerak o.)
42Yoge nagagirik, wonok at Yetut owagam nage mbareegi, Yetut enegen kage nagagirik, ”Kat Timon Yaya aput aret kwe, kendage Kepat aret yokkogo logogun o,” yinuk, yoreegerak. (Ti yoreegerak nogo ti, aap Yunani inoone paga Peterut ti, ”Yugum o,” yinuk, yoreegerak.)
At Yetut nen Piliput Natanayen imbirak wiiragagerak wone
43Nogo yinuk, ko'lu at Yetut o Nggalileya noorak kooneegerak. Koombunuk, nage logonet, aap Piliput kwaakkage nagagirik, ”Nimbirak nawok nduk, mok o,” yinuk, yoreegerak. 44At Piliput awi Mbetayira Andereyat Peterut imbirak inom inawi ambi'me time aret wonogogwaarak. 45”Nimbirak nawok nduk, mok o,” yoge mbareegi, Piliput nogo nen aap Natanayen kwaakkage nagagirik, yoge logonet, ”Natanayen wae! At ambi woraagin o, yinuk, at Muta nen Ala wone lengganak liiru mbangge, ndi, it aap Ala wone yorogo nogogwaarak nabi-nabi nen liiru mbanggwi, eereegwaarak eebe nogo ti, Yutup aput Yetut awi Nataret mendek aret me, muk wagaarak ninigen kogoorak o.”
46Yoge mbareegi, at Natanayen nen, ”Ubi! Abe mendek o Nataret time nen op woroorak me nduk yagan a?”
Yoge mbareegi, at Piliput nen, ”Pekka mok mban o.”
47Yoge mbareegi, at Yetut aap Natanayen at owagam wage enegen kage nagagirik, ”Aap Iterali mondok abe oone mbere arilik yi kaanip o.”
48Yoge mbareegi, at Natanayen nen, ”Ubi! Kat nonggop togon an neebe keenu agandak o?”
Yoge mbareegi, at Yetut nen, ”Piliput awo wiigega'lek kagak, kat eyo ara alome kwi'ndak wonage nogo muk nenegen keegirak o.”
49Yoge mbareegi, at Natanayen nen, ”Ngguru wae. Ala aput aakumi Iterali inowe endagembogut kat aret keegi o.”
50Yogo mbareegi, at Yetut nen, ”Kat eyo ara alome kwi'ndak wonage keegirak o, yinuk, yokkigirak paga kiniki noba panggombunuk, abet nombakendak ya? Kat eeke kagandak yi ti, mbuuluk negen eeke kagandak kwe, peebi perak, nggwok aret eeke kaamunggun o.” 51Yoge nagagirik, ”Peebi mbogut keyaappunuk, it yonggo Ala nen nappiya wage menggerak melaikat nogo nen an aap aret nda'nagagirak pe'neya wambi wogwe, mbogut paga lagi nogwe, eekwi iige logomunggun o, yinuk, abet lombok aret yokkigi o,” yoreegerak.
Цяпер абрана:
YAYA 1: WNO
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце