Luka 13
13
Mu ta lova loku mu nga hunzuluki.
1A ka xikhati lexo ku lota vanwani lava va nga mu byela hi va le Galilea, lava a nkhata wabye Pilatu a nga wu patsa ni miphahlelo yabye.
2Jesu i lo hlamula aku ngalo kabye: Mu alakanya lezaku a vaGalilea lava va wa hi vaonhi a ku hunza a vaGalilea vanwani, lezo va nga welwa hi khombo lego ke?
3Ahihi, kanilezi nziku ka nwina: Loku mu nga hunzuluki, nwina nwentlhe mu ta lobyisisa lezo.
4Hambu ni lavo va khume ni ntlhanu ni vanharu, lava va nga welwa hi likhokhola la Siloame, li va daya; mu alakanya lezaku va wa hi vanyamilanzu ku hunza vanwani lava va akileko Jerusalema ke?
5Nza mu byela, Kokwihi! Kanilezi loku mu nga hunzuluki, nwina nwenthle mu ta lobyisisa lezo.
A nkuwu wu nga kala ku pswala mihanzu.
6I lo kanela mufananiso lowu: A munhu wo kari i wa hi ni sinya ya nkuwu yi byalilweko sinwini gakwe ga xivini; i loya ku ya lava a mihanzu ka yona, kanilezi a nga yi kumangi. Isa. 5:2; Mat. 21:19
7I te ngalo ka murimi wa simu: Languta, a malembe laya manharu nzi tileko a ku ta lava mihanzu ka nkuwu lowu, a nzi yi kumangi; wu tseme, xana wu onhela yini misava ke?
8A murimi aku ngalo kakwe: Hosi, ngha wa nga wu tsika ni nyanwaka, nzi kala nzi wu kuhela, nzi wu chela koho;
9kutani wu ta pswala mihanzu ha nwakani; kanilezi loku wu nga pswali u ta wu tsema.
Jesu a hanyisa wasati hi sabado.
10I wa kari a gonzisa ka ginwe ga masinagoga hi siku ga sabado,
11laha ku nga hi ni wasati loyi a nga wa hi ni moya lowu wu nga mu xanisile a 18 wa malembe; yena i wa ovekile, i wa nga zi koti ku ti ololoxa.
12Laha Jesu a nga mu wona, i lo mu vitana, aku ngalo ka yena: Wasati, u tlhatlhilwe wubabyini ga wena.
13Zonake i lo mu tlhateka mandla; khalakale a su swi, a bonga Nungungulu. Mar. 16:18; Miti. 9:17
14Kanilezi a murangeli wa sinagoga i lo zangara hilezi Jesu a nga hanyisa hi siku ga sabado, a byela vanhu, aku: Ku na ni ntlhanu wa masiku ni ginwe laya a vanhu va faneleko ku tira ha wona; tanani ha wona mu ta hanyiswa, na ku nga hi siku ga sabado. Ekso. 20:9; Mat. 12:10; Mar. 3:2
15Kanilezi Hosi yi lo mu hlamula, yiku ngalo: Nwina vaxengeteli, xana a munwe ni munwani wa nwina a nga tlhatlhi homu kutani mbongola xigowolweni hi siku ga sabado, a yi gula ku ya yi nwisa ke?
16Xana loyi wasati, a nga nhwana wa Abrahama, loyi Satani a nga mu bohile a 18 wa malembe, a nga faneli ku tlhatlhiwa xibohweni hi siku ga sabado ke?
17Laha a nga wula leti timhaka, vontlhe a valala vakwe va lo chelwa tingana; ni xidlemo xontlhe xi lo tsaka hi mitiro yontlhe yo saseka leyi yi nga mahiwa hi yena.
A mbewu ya xinapi.
18Zonake aku ngalo: A mufumo wa Nungungulu wu fanana ni yini, nzi ta wu fananisa ni yini ke? Mat. 13:31; Mar. 4:30
19Wu fanana ni mbewu ya xinapi, leyi a munhu a nga yi teka a yi byala sinwini gakwe; yi lo kula, yi maha sinya, ni tinyanyani ta tilo ti wa zumba maravini ya yona.
20Kambe aku ngalo: Nzi ta wu fananisa ni yini a mufumo wa Nungungulu ke?
21Wu fanana ni comelo legi a nga gi teka wasati, a gi chela lomu ka zipimo zinharu za mapa, ma kala ma vila wontihe.
A nyangwa yi hlongileko.
22A kufambeni kakwe Jerusalema, Jesu i lo tsemakanya miti ni zimitana na a kari a gonzisa.
23Ni wo kari aku ngalo kakwe: Hosi, va tsongwani lava va hanyiswako ke? Yena i te ngalo ka vona:
24Kurumetani ku enghena hi nyangwa yi hlongileko; hakuva nziku ka nwina: Mbanyingi va ta nga ringa ku enghena, kanilezi va ta tsanzeka. Mat. 7:13; Rom. 9:31
25Loku a nwinyi wa yindlu a vukile, a vala livati, zonake na mu yimile lahandle, mu sangula ku gongonza, muku: Hosi, hi vululele; i ta mu hlamula, aku: A nzi ku tivi laha mu tako ha kona. Tis. 32:6; Isa. 55:6; Mat. 25:10
26Zonake mu taku ngalo: Hi loga, hinwa zinwe na wena, u gonzisile mitini ya hina.
27Yena i taku ngalo: Nza mu byela, a nzi ku tivi laha mu tako ha kona; sukani ka mina, nwina nwentlhe mu mahako kubiha. Tis. 6:8; Mat. 7:23; 25:41
28Laho ku tava ni mikosi ni kugetsela ka meno, loku mu wona Abrahama, na Isaka, na Jakobe, ni vaprofeti vontlhe le mufunweni wa Nungungulu, kasi nwina mu hoxiwa lahandle. Mat. 8:11, 12; 13:42; 24:51
29Va tata hi le Mutsuwuka-gambo, ni Muhlwa-gambo, ni le Nwalungu, ni Dzongeni, va ta tshama kugeni mufunweni wa Nungungulu.
30Kanilezi a vanwani va lava vo gumesa va tava vo ranga, ni vanwani va lava vo ranga va tava vo gumesa. Mat. 19:30; 20:16; Mar. 10:31
Jesu a xanisekela Jerusalema.
31Ka xwalexo xikhati ku lota a vaFarisi vo kari, va taku: Suka laha, u ti fambela; hakuva Herodi i lava ku ku daya.
32Yena aku ngalo kabye: Fambani, mu ya byela hlati loye, Languta, inyamutlha na manziko nzi hlongola madimoni, nzi hanyisa a vababyako, nzi ta mbhetisa mundlwani. Maheb. 2:10
33Ahemba-lokoke, nzi yimelwe hi ku famba nyamutlha na manziko na mundlwani; hakuva a zi faneli lezaku a muprofeti a dawa lehandle ka Jerusalema.
34Jerusalema, Jerusalema, wena loyi u dayako vaprofeti, ni ku gandla hi maribye lava va rumelweko ka wena! Zikhati zingani nzi nga xuva ku wungeletela a vanana va wena, kota a pswele gi wungeletelako a zihukwana za gona lahasi ta tipapa ta gona, kanilezi a mu zi ranzangi! Mat. 23:37
35Langutani, mu ta siyelwa a yindlu ya nwina na yi hi rumbi; kanilezi nza mu byela nziku: Mu nga ha ta nzi wona kambe mu kala muku: A khesiwe loyi a tako hi vito ga Hosi! Levi 26:31, 32; Tis. 69:25; Isa. 1:7; Dan. 9:27; Mat. 21:9
Цяпер абрана:
Luka 13: TSC72
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Tshwa Bible © Bible Society in Mozambique, 1972, 2007.