Matias 8
8
Yesus 'o si-la ngowa'a si-siḏi 'eno'o matengo
(Mrk. 1:40-45; Luk. 5:12-16)
1Wakutu Yesus 'uci da'u kie tala, ngowa'a repe 'U mete'e Unanga. 2Toma 'orasa gena-ge, ngowa'a si-siḏi 'eno'o matengo 'o sapolo re 'o maḏipolono ra Yesus 'ai biono re 'o kanau, “Jou na'o No nyengara, No si-la ngoi.”
3Yesus 'a sitoa'a i'a 'Ai giama re 'a siteru toma ngowa'a gena-ge re 'O kanau, “Ngoi to nyengara, ngana no la.” Toma 'orasa gena-ge ḏua, unanga 'ai si-siḏi ri iranga. 4Ḏua Yesus 'o kanau, “ 'Elingi! Awa sijarita mangale gena-ge ra guna ḇato. Mada'a no tagi re no masijumu 'ani lese toma 'imam, la siwaro tala mangale ngana reno la. Pasala i'a no pula'a 'ani jou-jou ga'a mete'e Musa 'ai hukumu sa'olo bukiti rimoi toma ngowa-ngowa'a ḏi'i mangale ngana reno la.”#Im. 14:1-32
Yesus 'o si-la Roma ma sordado ma sae'e matengo 'ai falalomu
(Luk. 7:1-10)
5Wakutu Yesus 'o osama toma limau Kapernaum, Roma ma sordado ma sae'e matengo 'o sapolo ra Yesus 'o golo'o, la Yesus 'o riono unanga. 6Unanga 'o kanau, “Jou, 'ari falalomu ga'a ngoi to dadalara 'o siḏi toma wala, unanga 'o lu-lulu tai jingi'i re 'a cokutu 'ai lese mai nga'unu ua, sababu 'o basono tala lai si-siḏi madutu.”
7Yesus 'o kanau, “Ngoi to sapolo to si-la unanga.”
8Roma ma sordado ma sae'e gena-ge 'o sangoro i'a ra Yesus, “Jou, so'o gena-ge awa! Sababu ngoi to patasa ua to dawongo Jou tari wala. Jou, pa'i No siajele demo bale moi ḇato re 'ari budaka ro la. 9Sababu ngoi ḏi'i mai balasu to 'isene 'ari sae'e 'ai parenta. Re 'ari aḏutala sordado-sordado ananga ḏi'i balasu 'aḏi mete'e 'ari parenta. Na'o ngoi to soma'a 'ari aḏutala matengo, ‘Tagi!’ unanga 'o tagi, re na'o to 'aro'o 'ari aḏutala ma lelegu ‘Ino 'ane!’ unanga 'o sapolo ino. Na'o ngoi to soma'a 'ari budaka ‘No 'a'a ne!’ unanga ḏi'i 'o 'a'a.”
10Wakutu Yesus 'a 'isene Roma ma sordado ma sae'e 'o kanau so'o gena-ge togumu i'a, Unanga 'o heranga masala. Dadi Unanga 'o kanau i'a toma ngowa'a repe ga'a 'aḏi mete'e Unanga, “Ni ngaku mode-mode'e 'Ari demo-demo nena-ne: Toma ngowa'a Israel manga sigolona, Ngoi to sanga matengo i'a mai nyangu, ga'a 'ai ngo-ngaku ma de'e so'o nena-ne. 11Mode'e! Ngowa'a Yahudi ua manga repe ḏuanga i'a 'aḏi sapolo da'a wangere ma la'o ino re toma wangere ma soḏu isa di'a oromo mamete'e rea Abraham, Ishak re Yakub toma Soroga ma Pareta.#8:11 “Soroga ma Pareta” ma tero Ma Jou'ongu Madutu 'ai Pareta#Luk. 13:29 12Momongolo ua ngowa'a Yahudi manga repe ga'a Ma Jou'ongu Madutu ro cumutu di'a dadi 'Ai 'umata, ananga gena-ge ḏuanga i'a 'aḏi sanga upa'a toma ngi'i hafu-hafu toma ḏuḏunu. Toma ngi'i gena-ge ananga ḏuanga i'a ya rerese ma gaḏi re ya doiti ma sangisara.”#Mat. 22:13, 25:30; Luk. 13:28
13Ḏua Yesus 'o kanau i'a toma Roma ma sordado ma sae'e gena-ge, “No maḏibo, 'oru ga'a ngana na ngaku, gena-ge ḏua 'i dadi.”
Re toma 'orasa gena-ge ḏua 'ai budaka ro la.
Yesus 'o si-la ngowa'a manga repe
(Mrk. 1:29-34; Luk. 4:38-41)
14Wakutu Yesus 'o osama ra Petrus 'ai wala ma dara, Unanga 'o oḏi'i 'a Petrus 'ai dedono we-were'a mo lu-lulu tami jingi'i sababu mo gagama. 15Yesus 'a gu'u 'ami giama. Toma 'orasa gena-ge ḏua, 'ami gagama ri iranga. Gena ḏua, munanga mo momi'i re mo de-de'oso 'a Yesus.
16Wakutu wangere tumunu, ngowa'a 'aḏi gasa ino ngowa'a ga'a roh ma jira ya'u dungosama manga repe ra Yesus. Unanga gena-ge pa'i 'o kanau demo bale moi ḇato, ḏua roh ma jira 'i supu re Unanga ya'u si-la ngowa'a mo-moini ga'a 'aḏi siḏi. 17Mo-moini ga'a Yesus 'a si'a'a gena-ge, enanga 'i sitotomo 'oru ga'a Nabi Yesaya 'o kanau pasala ḏua:
“Unanga 'a doiti nanga sangisara,
re 'A si-la nanga si-siḏi.”#Yes. 53:4
Ngowa-ngowa'a mau 'aḏi dadi Yesus 'ai me-mete'e
(Luk. 9:57-62)
18Toma wangere rimoi, ngowa'a manga repe masala 'aḏi sigoloḏi 'a Yesus. Dadi wakutu Unanga ya'u oḏi'i ananga mo-moini, Unanga 'o soma'a 'ai me-mete'e la 'aḏi ḏu-ḏuanga ḏua di'a 'aḏi sidete si'a talaga kaci moi. 19Ḏua guru 'agama matengo sapolo ra Yesus re 'o kanau, “Guru, ngoi mau to mete'e Guru tagi le'a ḇato.”
20Yesus 'a sangoro ra unanga, “Serigala rema aḏu'u, re namo diwanga rema ngi'i, mada'a Ngoi, Manusia ma Ngowa'a Nau'u kari ngi'i ua di'a to masibatongo.”
21Gena ḏua, Yesus 'ai me-mete'e ma lelegu, 'o kanau, “Jou, pula'a loasa ngoi to maḏibo siḏa, la to palihara 'ari ḇaḇa. Gena ḏua kara tini mete'e.”
22Mada'a Yesus 'o sangoro ra unanga, “Ino mete'e Ngoi! Sieanga i'a ḇato ngowa'a sengene 'aḏi palihara ngowa'a sengene.”#8:22 Yesus 'ai maksudu so'o ne: Ngowa-ngowa'a ga'a ngaku Ngoi ua, ananga gena-ge ma tero sa'olo ngowa'a sengene. Dadi sieanga ḇato ananga gena-ge 'aḏi palihara ngowa'a sengene.
Yesus 'a sitogumu rato
(Mrk. 4:35-41; Luk. 8:22-25)
23Yesus 'o mabalene toma oti Rai me-mete'e, kara 'aḏi sidete. 24Kage-kage rato 'i sapolo, talaga gena-ge ma momoku 'i baolo, singadolo oti ga'a ananga ya balene 'o momoku ya wa'ala i'a re ino, mada'a Yesus 'o otu ḇato. 25Ḏua 'Ai me-mete'e 'U tamanga Unanga re 'aḏi tuduba, “Jou! Riono! Tiara ua wo jala!”
26Yesus 'o kanau, “I'a sa'olo ni mojongo? Ngini ninga ngo-ngaku te'e ua ra Ngoi!” Gena ḏua, Yesus 'o te'oso re 'a ḇangata rato re talaga gena-ge. Re talaga 'i ogoro madutu sa'olo wag̱ele tau'u.
27Yesus 'ai me-mete'e 'aḏi matai heranga madutu re 'aḏi kanau, “Ngowa'a 'oru Unanga nena-ne?! Singadolo rato re momoku mai ya mete'e 'Ai parenta!”
Yesus 'o si-la ngowa'a nga muḏiḏi ga'a roh ma jira ya'u dungosama
(Mrk. 5:1-20; Luk. 8:26-39)
28Wakutu Yesus 'o ngadolo da'a talaga kaci moi toma daeraha Gadara, ngowa'a nga muḏiḏi ga'a roh ma jira ya'u dungosama 'aḏi supu da'a toma kubu ma 'aḏu'u ino re 'aḏi sapolo ra Yesus. Ananga nga muḏiḏi gena-ge 'aḏi pona lai cira madutu singadolo manga ngi'i gena-ge, matengo i'a mai ua nga'unu tola'a i'a. 29Ananga 'aḏi maboa-boa'a, “Ma Jou'ongu Madutu 'ai Ngowa'a Nau'u, 'Ani maksudu 'oru ra ngomi? Kalaha ma 'orasa ngadolo nyangu, Ngana no mau sisikisa ngomi?”
30Kiḏanga ua toma ngi'i gena-ge 'age rema soto ma repe 'i disa ngo-ngoromo. 31Roh-roh ma jira gena-ge 'i golo'o ra Yesus, “Na'o no soma'a ngomi mi supu, soma'a mi osama toma soto-soto gena-ge.”
32Yesus 'o kanau, “Supu!” Dadi roh-roh ma jira gena-ge 'i supu toma ngowa'a nga muḏiḏi, re 'i osama toma soto-soto. Ḏua, ma soto enanga 'i masiwale toma bawata ma 'uḏu singadolo masieta'a toma talaga, ḏua ri jala.
33Soto ma sowohi ananga matai lalara sapolo toma limau re ya sijarita 'oru ga'a 'i dadi gena-ge, re ya sijarita ḏi'i mangale 'oru ga'a 'i dadi toma ngowa'a nga muḏiḏi ga'a roh ma jira ya'u dungosama. 34Dadi ngowa-ngowa'a mo-moini toma limau gena-ge 'aḏi sapolo ma'u sanga ra Yesus. Wakutu ananga 'aḏi oḏi'i Yesus, ananga 'aḏi golo'o mode-mode'e, la Yesus jau-jau sisoi'i tala ananga manga daeraha gena-ge.
Цяпер абрана:
Matias 8: SNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
2015 © Indonesian Bible Society