MATÌÙT 6
6
Inagarok apùnì aike wogisagarek wene
1Atì'nogo yogoisasikesik he, aike mel yogoisasike:
“Ala nen,
Tì'nogo hagatì logoino, ìlùk isikomo, hit en higit hogo hagatì lagep mene atì, apùnì nen ineileken hisìkì logouagalùk sele'ma hagatì logogùp o. Ineileken hisìkì logouagalùk hagatep halok he, hinopase pogot oba mene oko wokhisegein motok lek o. Hit ina'la ebe'ni! 2Nen, hit aike hinagarok werek mene nen, it lek mene leberìsùogolùk halok,
An tì'nogo hagatì lagì, ìlùk hinane a'mìt sup hogo hagatì logogùp o. It aike inetaùken pìre logolìk inogat oba nek hano salek logolìk, o sapan egarek oba kìlìk mel, ebekwe laga logolìk mel, it aike nen,
It hano, ìlùk hogorìnabuagalùk hagarì'lùgì atì, hit atì'nogo hagatì logogùp. It atì oko hela hùk he, we hogorinabì'lùgì atìat o. 3Halok he, hit hinagarok apùnì inagarok lek mene wogisùogolùk halok he,
An tì'nogo wogisegein, ìlùk, it hinerùgì hinagaiya'lak mel, it aike mel, motok yogoisagùp o. 4Hinagasogo wogisamo re, hinopase Ala pogot oba mene apùnì hinagasogo hagatarek mene eileken isikerek atì nen oko wokhisegein o,” ìlùk yogoisasike.
“Sapan yì'nogo ìkì logoino,” ìlùk yakùlisasike wene
(Luk.11:2-4)
5Atì'nogo yogoisasikesik he, aike mel yogoisasike:
“Halok he, hit sapan ìkì logolìk, apùnì aike inogat oba nek hano salek logolìk inetaùken pìre mene nen he,
Sapan ìkì lagì atì apùnì nen hùthanuak, ìlùk Ala awì wùrì'mo kagaresik he, inebe melarìk sapan ìgìk, kwe atogolma melarìk sapan ìgìk, egarek atì hak he, ìkì logogùp o. It atì oko hela hak he, we hogorinabì'lùgì atìat o, ìlùk eberogoat yogohisìgì o. 6Meneat he, hit sapan uogolùk halok he, hinaua kwe yagarogo kìlìk, hinopase Ala pogot oba mene ebe ineileken hagarek lek mene a'nogo nen wokhisoagalùk kìno yogotì logoino. Hit en hinagasogo kìno yogosugun mene atì, at eileken hinago mene hikeresi'mo nogo nen he, wokhisegein o. 7Halok he, hit en sapan ìkì logolìk, it apùnì etakwe mene nen egarek hak ìkì logogùp o. It atì sapan ìkì logolìk, ina'la nen he,
Uan-aban ìkì lagì atì nen, ninopase pogot oba mene asuk holigin o, ìlùk, lisìlì'-lasìlìk egarek atì. 8Hit he, it inoabùt wanhùp o. Hinopase Ala pogot oba mene atì oan kìno yogotì'lek werek kolek he, hit walok mene atì, hageat elu welagarek o. 9-10Halok he, sapan ìkì logolìk he, yì'nogo ìkì logoino:
Ninopase pogot oba mene hokawerek hetage
esinethìkì logouagalùk, haga'ninabi me o.
Ninebe hawe a'ma logouagalùk hina me o.
It pogot oba hat ha'la akegetek mene hagatarek
hak, nit kweangma atì'nogoat hagatì logouagalùk, haga'ninabi me o.
11Nit ninapùrùk yogotak nasak mene elok hogoat
wo'nisa me o.
12Apùnì nen nit weaga'ninapa mene, nit en
sagalogo legetsogo atì hak, nit weak hagato
mene hat en sagalogo legetsano o.
13Weak hagasuagalùk nina'la kagaliginmo atoma
herakhinìgì'lek pìkìrat wo'nisek laga logoino.
Oabùt weak mene atì nen eki ha'nisike halok,
hat en telninapì logoino. [Ninopase Hetagepogot
harat logolìk, yì mene tì mene hagasusak
ene'ma re, harat hogothapo motok logogun o.
Ebe asuak u hak,
Amin,]
ìlùk sapan atì'nogo ìkì logoino. 14Nen, apùnì nen hit weagathinapa mene, hit en sagalogo legetsegep halok, hinepase Ala pogot oba mene nen hit weak hagatep mene atì sagalogo legetsegeinat o. 15Meneat he, it aike nen hit weak hagathinapa mene, hit en sagalogo legetsìgì'lek halok he, hinopase pogot oba mene nen hit weak hagate mene nagalogo legetsegein legat o,” ìlùk yogoisasike.
Sùpùrùk nìkì'lek sapanat iko motok logolìk, hagasusak wene
16Atì'nogo yogoisasikesik he, aike mel yogoisasike:
“Hit sùpùrùk nìkì'lek sapanat iko motok logouogolùk halok he, it apùnì aike inogat oba nek hano salek logolìk inetaùken pìre mene nen,
Apùnì aike nen enagat hù'nisoak, ìlùk inelokoken ohuselogo welagaikarek atì hak, logousak lek. It atì oko hela hak he, we, apùnì nen enagat yerisagarek atìat ìlùk, eberogoat yogohisìgì o. 17-18Mene, hit enek he, sùpùrùk nìkì'lek sapanat iko logouogolùk halok, apùnì nen enagat hùthikanogo. Hinopase Ala apùnì nen ineileken hagarek lek mene a'nogo aligat en enagat hùthikoagalùk, hinogat sobalogo re, hinesi hesalogo logolìk, sapan ìkì logousak o. Atì'nogo hinagasogo hagatep halok he, hinopase Ala apùnì ineileken hagarek lek mene atì eileken hisìlìk oko wokhisegein o,” ìlùk yogoisasike.
Inagarok atogorogo hakasak wene
(Luk.12:33-34)
19Atì'nogo yogoisasikesik he, aike mel yogoisasike:
“Apùnì nen yì mene tì mene kweangma yoma atogorogo hikenem he, elugeke nen palhìk, nakusi legetìk, ap ineil agasabu weak mene nen yogot wagani kìgìk, egare'ma yoma re, yì mene tì mene atì atogorogo housak lek o. 20Meneat he, pogot oba mene nek he, elugeke nen palhìk, nakusi nen legetìk, ap ineil agasabu weak mene nen yogot wagani kìgìk, egarek motok lek. Halok he, pogot oba atomaat hano mene atogorogo lakhakasak o. 21Hit hinagarok hinetaùken hutik mene atogorek were'ma, hinetaùken atomaat logogin o,” ìlùk yogoisasike.
Inebe hano lìarogo welagarek wene
(Luk.11:34-36)
22Atì'nogo yogoisasikesik he, aike mel yogoisasike:
“Hinebe lìarogo esage kìalek hake, hineileken atìat werek o. Halok he, hineileken hano halok, hinebe abirat motok lìaat logogun o. 23Meneat he, hineileken weak halok he, hinebe abirat o mùm hake logogun o. Mene re, hina'la o lìa hake mene atì mùm aga halok he, eigo! Motok ebenagei'mo mùmat welagep o,” ìlùk yogoisasike.
Inetaùken leiksek welagaikarek wene
(Luk.16:13, 12:22-31)
24Atì'nogo yogoisasikesik he, aike mel yogoisasike:
“Atì hak he, ap omakeat mene ap kaintek inebe pìre mene inatitigeke logolìk ineyabu hagatì logousak motok mea o. Atì'nogo logogin halok he, at inatitigeke atì nen:
Nopase aike yì hano netawì. Nen, aike atì, weak nabìt, ìlùk, ìkì logolìk he, etawì mene atì eperak lopok hogo logolìk he, aike abìt mene atì aberalìthìkì logousak o. Atì hake, hit he, Ala atitigeke logolìk, uang atitigeke logousak mea o. 25An nen atì'nogo yogohisìgì atì nen, hit hina'la nen he,
Nineluk logouogolùk he, sùpùrùk mel, i mel, kì mene nogoin. Nen, ninebe su kì mene laberogoin, ìlùk hinalabut hìrogo wenesùgì uan horo ebetì logoinogo ìlùk yogohisìgì. Nekarek mene atì esin nogo? Hineluk welagep atì esin akìgì. Su labetarek mene atì esin nogo? Hinebe atì esin akìgì. 26Sùe pogot obakwe purogo nikerek mene atì hineileken lakhìkì logolìk hina'la ebe'ni. It sùe atì yì mene tì mene awì yatìk, eken ìtenem palogo obùlù'mo hagarek oba hìgìk, egarek lek meneat he, hinopase pogot oba mene nen inapùrùk wogisikerek o. Mene re, Ala nen it sùe atì agaugerinaperek nogo? Lek o. We, hit hinebeat agaugethinapì logolìk, hinapùrùk wokhisegein lek nogo? Wokhisegeinat o. 27Nen, hit aike hina'la nen,
An nebe wa'lasigin atì sat he, katok hogo wa'lagì'lek, hobuk hamùlùk hogo aike neluk logoile e, ìlùk, wenesùgì uan horo ebesigin atì ba, heluk aike inom logousak nogo? Men o. 28Hit he, su hinogat oba labesusak atì hesigat nahalok hinalabut hitì lagep. Eken muliken molaken o leimokwe ìterek a'nogo hùthani. Eken atì oan isigìlùk he, set kwìl-kwal hogo hagatìk, yo lalogo su negen itìk, ikerek motok lek. 29Mene re, at ap Salomo ebe kain logolìk helalike wagane'ma hogoratì lagaukwa atì mea akìgì. Eken atì nek he, eilamùlìt weak hano motok atì hani! 30Eka heleka o leimokwe welagarek atì re, yogotak hak hano welagaresi'mo nen, hùen hak etumo lolhisagarek meneat he, Ala nen inasu laberìsa hak hano mene hagarogo hisikerek atì hak, hinebe hesik, hanorogo labethikegein lek nogo? Labethikegeinat o. Hinetaùken Ala oba hipìrethùhùk yì rì! 31Halok he, hit hinalabut hìrogo wenesùgì uan horo ebetì logolìk,
Ninapùrùk mel, ninagei mel, kì mene nogoin. Nen, ninasu kì mene laberogoin, ìkì lagep atì usak motok lek o. 32Atì'nogo hagatarek atì obogat he, it apùnì etakwe mene nen atì mene esinethìlìk herarìk negarek meneat he, hit yì nek he, yì mene tì mene lek en hinelageik negen welagep atì, at hinopase Ala pogot oba mene elu welagarek o. 33Halok he, hinopase Ala nen awe a'ma logolìk hagatì logousak atì hesik mel, nen, at en,
Yì'nogo tì'nogo haga'no, ìlùk yogohisikenem hagatì logousak atì hesik mel, esinethìkì logogun halok, yì mene tì mene atì oba louk hogo wokhisegeinat o. 34Halok he, hit he, hùen hesik hinalabut hìrogo wenesùgì uan horo ebetap o. Yogotak weak arì'logo mene werek kolegat he, hùen weak asigin mene ebesusak lek o,” ìlùk yogoisasike.
Цяпер абрана:
MATÌÙT 6: LAIDNI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце