Máà 8
8
Zízɛ̀ e ɓèlè-pɛ̀ nɔ mia wáá yììsɛ lɛ̀ɛ
(Máfìù 15.32-39)
1Lúó e kília káa, mia gbũ gbùò zɛ̀ o pá o kíe mɔ̀ zeĩ́. Pɛ gbɛɛ lɛ̀ɛ́ gbaa kɛ o kɛ̀lɛ̀ ó ɓèlè. Lɛ̀ e kɛ kília, Zízɛ̀ e là tòà-píé-mìà súo kɛ e píé, áà gèè o lɛ̀ɛ, 2“Míá o kéa o yéĩ́ lɛ́ɛ̀ m kɛ̀, ɓii waà ɓo m píé zèe yààka, ɛ̃́ɛ̃́ pɛ gbɛɛ wá gbaa o kɛ̀lɛ̀ ó ɓèlè. 3Yé maà o vɔ o pà lɔ̀ɔ káa, o vũ̀nɛ̀ĩ̀ lɛ́ɛ̀ lo ɓoò o yí zi là. Ƃii mia gbṹũ̀ óò go zi gbèkèni píé.”
4Là tòà-píé-mìà wa gèe à lɛ̀ɛ, “Mɛ́ɛ zàá lɛ́ ò bɛ̀i à mɔ̀ ó léɓèlè gɛ̃̀ yi yɛ̀í e kéa là, kɛ é lɔ̀ɔ ɓo míá o kéa o gé?”
5Zízɛ̀ e o wɛ̃́ĩ́-lɔ̀ɔ kɛ weeá kélɛ̀, “Belè-kpo wɛ̀ɛɛ̀ lɛ́ e ka kɛ̀lɛ̀?”
Wa gèe kélɛ̀, “O sálápèèlɛ.”
6Zízɛ̀ a gèe mia gbũa lɛ̀ɛ ó yà tã́ã̀. E belè-kpo sálápèèlɛɛ sí gbaa, e Wálà zúo ɓo, e belèa kpú yɛ́ kélé kélé, áà nɔ̀ là tòà-píé-mìàa lɛ̀ɛ ó nɔ míáa lɛ̀ɛ. Là tòà-píé-mìàa wa kɛ kíli. 7Kpã̀ã́ ɓéĩ́ kélé kélé e kɛ o kɛ̀lɛ̀ nɔ́ kíli. Zízɛ̀ e Wálà zúo ɓo o wɛ̃́ĩ̀, ɛ̃́ɛ̃́ a gèe là tòà-píé-mìàa lɛ̀ɛ ó à nɔ míáa lɛ̀ɛ zeĩ́. 8Mia séĩ́-séĩ́ wa ɓèlè, o gí e dɔ. Lɛ̀ e kɛ gbaa kília, o à kpuú-kpuú e tóa wɔ́ɔ́. E támé-kɔ̃̀ɛ̃̀ sálápèèlɛ pa. 9O kɛ míá o kélɛ̀ vɔ̀ mia wáá yììsɛ káa ká. Zízɛ̀ e o vɔ o pà píé. 10Yé e kɛ nɔ́ kília, e yà gɔɔ yí wà là tòà-píé-mìàa ká, wáà lò lɛ̀ lɛ́ ò si Dàmànútàa mɔ̀.
Fálásíì-mìà o lé-pa-wɔ̃̀ naa ó gɛ̃̀
(Máfìù 16.1-4)
11Fálásíì-mìà o nu Zízɛ̀ píé, o gbɛ̃̀ gbaa, wáà tèé dà à ká. Wa naa ó à yí dã́. À mɔ́ɔ̀ wɔ̃̀ mɔ̀ɔ, o à gèe à lɛ̀ɛ é lé-pa-wɔ̃̀ kɛ, kɛ á zɔ̃̀ɔ̃̀ kélɛ̀ à zì yíkɛ̀ gáàa lɛ́ɛ̀ go Wálà kɛ̀lɛ̀ lɛ̀í. 12Zízɛ̀ e e wúú sí e gé a káá, áà gèè, “Míá ka ɓe yà kɔa ɓoa yí e ké ɓɛ, mɛ́ e kɛ lɛ́ kà mɔ́ɔ̀ à naa ɓo lé-pa-wɔ̃̀ ká? Wánà-wɔ̃̀ lɛ́ m̀ gèe ka lɛ̀ɛ ɓɛ. Lé-pa-wɔ̃̀ gbɛɛ lɛ̀ɛ́ ló kɛɛ̀ ɓe míá ka ɓe yà kɔa ɓoa yía lɛ̀ɛ.”
13Zízɛ̀ e o tó yi, e yà gɔ́ɔ́ɔ yí zeĩ́ é ló yíía mɛ̀ĩ́.
Fálásíì-mìà wà Hɛ́lɔ̀ o zì belè-fɔ̀ɔ-pɛ̀
(Máfìù 16.5-12)
14Là tòà-píé-mìàa o zò e ni kɛ ó nu belè ká. Kɛɛ à kpo doó lɛ́ nɔ́ e kɛ o kɛ̀lɛ̀ gɔ́ɔ́ɔ yía. 15Zízɛ̀ e lìè-wè gèe o lɛ̀ɛ weeá kélɛ̀, “Kà ka líé dɔ, ɛ̃́ɛ̃́ kà ka yɛ́lɛ́ kɛ ka dìè píé Fálásíì-mìà zì belè-fɔ̀ɔ-pɛ̀, ɛ̃́ɛ̃́ Hɛ́lɔ̀ zì belè-fɔ̀ɔ-pɛ̀ɛ wɛ̃́ĩ̀.”
16O gbɛ̃̀ gbaa, wáà wɔ̃́ gèè o kíe píé weeá kélɛ̀, “A gèe kíli, ɓii belè wá ko kɛ̀lɛ̀ɛ wɛ̃́ĩ̀.”
17Zízɛ̀ e wɔ̃́ lɛ́ o kɛ à gèepìàa yí dɔ. Yé e kɛ kília, a gèe o lɛ̀ɛ, “Mɛ́ e kɛ lɛ́ kà zi lɛ́ belè wá à ká ka kɛ̀lɛ̀ɛ, wɔ̃̀ gèe ɓɛ? Kàá à yí dɔ, ɛ̃́ɛ̃́ à yí ma nɛ́? Ka wũ-kèlè yí lɛ yɔɔ kɛ̀è? 18Ka nyìɛ lɛ ka mɔ̀. Kàá lɛ̀ gɛ̃̀ à ká? Ka tóó lɛ ka mɔ̀. Kàá wɔ̃́ ma o ká? Ka zò lɛ̀ɛ́ vùò 19lúó lɛ́ m belè-kpo sɔ́ɔ́li kpú yɛ́ à ká, ká nɔ mia wáá sɔ́ɔ́li lɛ̀ɛ ká? À kpuú-kpuú yé e tó, lɛ́ ka wɔ́ɔ́ɔ, e ɓɛ̀lɛ̀-kolo-kɔ̃̀ɛ̃̀ wɛ̀ɛɛ̀ pa?”
Wa gèe à lɛ̀ɛ, “Kɔ̃̀ɛ̃́ vũ̀ doó wɛ́lɛ́ pèèlɛ lɛ́ a paa.”
20“E bɛ̀i, lúó lɛ́ m belè-kpo sálápèèlɛ kpú yɛ́ à ká, ká nɔ mia wáá yììsɛ lɛ̀ɛ, à kpuú-kpuú yé e tó lɛ́ ka wɔ́ɔ́ɔ, e támé-kɔ̃̀ɛ̃̀ wɛ̀ɛɛ̀ pa?”
Wa gèe à lɛ̀ɛ, “Kɔ̃̀ɛ̃́ sálápèèlɛ lɛ́ a paa.”
21Zízɛ̀ e gèe zeĩ́ o lɛ̀ɛ, “Kàá à yí ma nɛ́?”
Zízɛ̀ e gɔ̃ nyìɛ káàa zɛ̀ la Bɛ̀sádà
22O bɛ̀i, o ɓɔ Bɛ̀sádà. Mia dò o nu gɔ̃ nyìɛ káàa zɛ̀ doó ká Zízɛ̀ píé, wáà kpé kã̀ à lɛ̀ɛ é pá à mɔ̀. 23Zízɛ̀ e gɔ̃ nyìɛ káàa zɛ̀ɛ kṹ e kɔ̀ mɔ̀, áà gò à ká pɛlɛí. Lɛ̀ e e leí suo à nyìɛɛ, e e kɔ̀ kpɔ́ gbaa à là, áà wɛ̃́ĩ́-lɔ̀ɔ kɛ̀ à kɛ̀lɛ̀ weeá kélɛ̀, “Íì pɛ dò gɛ̃̀?”
24Gɔ̃́ɛɛ e e wũ wɛ̀lɛ̀ lɛ̀í, áà gèè, “Ḿm̀ mia gɛ̃̀, wáà tàà, kɛɛ óò kɛ̀ lɛ̀ yílí lɛ́ ɓe.”
25Zízɛ̀ e bɛ̀i e e kɔ̀ kpɔ́ gɔ̃́ɛɛ nyìɛ là. Yé e kɛ kília, gɔ̃́ɛɛ áà lɛ̀ gɛ̃̀ sĩ́ĩ́ le. À nyìɛ e kɛ gbaa kéléŋ-kèlèŋ, áà pɛ séĩ́ gɛ̃̀ gbaa e yiè ká. 26Zízɛ̀ a vɔ gbaa e pà, áà gèè à lɛ̀ɛ, “Yékɛ̀ í ló i mɛ̀ĩ́ pɛ́lɛ e yía yí.”
Wɔ̃́ Pílɛ̀ a gèe é gbɛ̃̀á Zízɛ̀ mɔ̀ɔ
(Máfìù 16.13-20; Lúù 9.18-21)
27Zízɛ̀ wà là tòà-píé-mìà o ló gbaa pɛ́lɛ kélé kélé, lɛ́ e kɛ Sízàlíà Félépà yí píé píé. Lɛ̀ o kɛ lópìàa, e o wɛ̃́ĩ́-lɔ̀ɔ kɛ weeá kélɛ̀, “Míáa óò gèe dé e m ká?”
28Wa yí ɓo weeá kélɛ̀, “Mia gbṹũ̀ óò gèe i Zɔ̃̀ɔ̃́ mia bàtáì-kɛ-mì ká. Tó mia gbṹũ̀ bɛ̃̀ɛ̃ wáà gèè Ìláyà lɛ́ e i káa. O dò wáà gèè zeĩ́ i dɔ̀-Wálà-lé-là-mìàa dò ká.”
29Zízɛ̀ e o wɛ̃́ĩ́-lɔ̀ɔ kɛ zeĩ́ kélɛ̀, “Ka bɛ̃̀ɛ̃, káà gèe deĩ̀ lɛ́ e m ká?”
Pílɛ̀ a yí ɓo weeá kélɛ̀, “Kɛ́lɛ̀ì lɛ́ e i káa.”
30Yé e kɛ kília, Zízɛ̀ e mɛ́ĩ́ ɓo o lɛ̀ɛ, yékɛ̀ ó wɔ̃́ lɛ́ à gbɛ̃̀ɛ̃̀ lɛ à mɔ̀ e kília gèe mi gbɛɛ lɛ̀ɛ.
Zízɛ̀ e wɔ̃́ gèe é gbɛ̃̀á e ga-wɔ̃̀ mɔ̀
(Máfìù 16.21-28; Lúù 9.22-27)
31Zízɛ̀ e gbɛ̃̀ áà pɛ zɔ̃̀ɔ̃̀ là tòà-píé-mìàa lɛ̀ɛ, áà gèè, “Lɛ Mi Gbe mɔ̀ é wɔ̃́ nyɔ́ɔ̀ɔ búnùzɛ̀ gɛ̃̀. Mia dìè-dìè vɔ̀, wà sálà-ɓò-Wálà-mɔ̀-mìà kpànazɛ̀, ɛ̃́ɛ̃́ Wálà kii-dɔ-mìàa, óò lo à wɔ̃̀ dàà o kɔ̀ mɛ̀ĩ́. Óò lo à zɛɛ̀. Yé lúó yààka aà diea, lɛ́ɛ̀ lo wɛ̀lɛ̀ ga kɛ̀lɛ̀.” 32Zízɛ̀ e wɔ̃́ e kéa gèe kpeĩ le. Pílɛ̀ e Zízɛ̀ súo kɛ zi doó ká, e gbɛ̃̀ áà mɛ́ĩ́ ɓò à lɛ̀ɛ. 33Kɛɛ Zízɛ̀ e nìɛ̀, áà lɛ̀ gɛ̃̀ là tòà-píé-mìàa píé, áà mɛ́ĩ́ ɓò Pílɛ̀ lɛ̀ɛ, áà gèè, “Sétɔ̃̀, gó dɔ̀á m là. I zì yɛ́lɛ́-tááa, ye wá Wálà zì yɛ́lɛ́-táá ká. Kpóṹ là mìà zì yɛ́lɛ́-táá lɛ́ e à káa.”
34Zízɛ̀ e mia kù gbùò zɛ̀ɛ, ɛ̃́ɛ̃́ là tòà-píé-mìàa, o súo kɛ e píé, áà gèè o lɛ̀ɛ, “Yé mi nɔ́ɔ fé à nàà kò ye kó tàà-kíe-píé kɛɛ, lɛ à mɔ̀ é kã́ e nàà-ká-pɛ̀ séĩ́ lɛ̀ɛ, é là kɔ́lɔ́sì lɛ́ è lo gaà mɔ̀ɔ sí, é tó à ká m píé. 35Ƃii mi lɛ́ à nàà é e dìè zì kɛ̀ɓe laa, lɛ́ɛ̀ lo kɔ̃́ɔ̃̀ e dìè wɔ̃̀ yí ká. Kɛɛ mí è e dìè wɔ̃̀ dà tã́ã̀ m mɔ́ɔ̀ wɔ̃̀ mɔ̀, ɛ̃́ɛ̃́ wɔ̃́ làṹ yièa wɛ̃́ĩ̀a, lɛ́ɛ̀ lo e dìè laà. 36Yé kpóṹ là zèe séĩ́ aà kɛ mi doó là pɛ ká, ɛ̃́ɛ̃́ aà e kɛ̀ɓe gíni à mɔ́ɔ̀ wɔ̃̀ mɔ̀ɔ, mɛ́ è à sɔ̀lɔ̀ ɓo à kolo là? 37Mɛ́ e ɓe kɛ mi á nɔ, kɛɛ é là kɛ̀ɓe sɔ̀lɔ̀ ɓo e mɛ̀ĩ́? 38Lúó lɛ́ gbaa e kéa, mia waà Wálà tó, wáà lò wà sɔ̃̀ɔ̃ yɔɔ kɛ̀á sí. Mi lɛ́ yɛ́lɛ̀ è lo à kɛɛ̀ m lɛ̀ɛ, ɛ̃́ɛ̃́ m lé-wè lɛ̀ɛ lúó e kéa káa, kɛɛ yɛ́lɛ̀ lɛ́ɛ̀ lo Mi Gbe kɛɛ̀ à lɛ̀ɛ, yé wà Wálà zì vɔ-mìà waà kɛ nupìà à Dàa zì lɛ̀ fɔ̀nɔɔ̀ɔ yía ká.”
Цяпер абрана:
Máà 8: MNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Mann New Testament © Bible Society in Liberia, 1978.