Máà 5
5
Zízɛ̀ e gɔ̃ lɛ́ pɛ yɔɔ e kɛ à píéa la
(Máfìù 8.28-34; Lúù 8.26-39)
1O ɓɔ Gálàlíì Yíí-pṹã́a mɛ̀ĩ́ Gèlásɔ́nì-mìà pà. 2Lɛ̀ Zízɛ̀ e gó nɔ́ gɔ́ɔ́ɔ yía, gɔ̃ doó e ɓɔ à mɔ̀. Gɔ̃́ e kília, e gó ɓɔ́à kɔ́ɛ́í. Pɛ yɔɔ e kɛ à píé. 3E kɛ yììpìà ɓɔ́à sɔ́nɔ́ píé píé. Bɛ̀i lɛ̀ɛ́ gbaa kɛ mi gbɛɛ mɔ̀ kɛ á yèlè pɛ-kúlú ɓɛ̀lɛ̀ ká gbaa. 4Ƃii o kɛ à yèlèpìà pɛ-kúlú ɓɛ̀lɛ̀ ká à kɔ̀ wà à gã̀ mɔ̀ teele. Kɛɛ ɓɛ̀lɛ̀ lɛ́ e kɛ à kɔ̀ mɔ̀ɔ, a gã́ã́ e kã́. Ɛ́ɛ̃́ à yé e kɛ à gã̀ mɔ̀ɔ, a mɛ̀, áà kã̀ e kíe kɛ̀lɛ̀. Yíkɛ̀ gáàa lɛ̀ɛ́ gbaa kɛ mi dò kɛ̀lɛ̀, kɛ é dieá à là. 5E kɛ ɓɔ́à kɔ́ɛ́í, ɛ̃́ɛ̃́ tɔ̃̀ũ̀ wĩĩ́ píéa mɔ̀ bĩ́ã́ ɛ̃́ɛ̃́ nyɛ́nɛ́ĩ́. E kɛ gbɛ́ɛ́pìà yi, áà e dìè kã̀ gɛ̀lɛ̀ ká teele.
6E Zízɛ̀ gɛ̃̀, kɛɛ e kɛ à ká gbèkèni. E bàlà sí, e káá e kpuò là Zízɛ̀ gã̀ dṹɔ̃̀. 7E gbɛ́ɛ́ yí-gágà-zɛ̀, áà gèè, “Zízɛ̀, lɛ́ i Wálà yé e pɛ séĩ́ làa Gbe káa, mɛ́ ɓà nàà m píé? Ḿm̀ kpé kã i lɛ̀ɛ Wálà wɛlɛ mɔ̀, yékɛ̀ í m sã̀ dɔ.” 8Gɔ̃́ɛɛ e kɛ à gèepìà kíli, ɓii Zízɛ̀ e kɛ à gèepìà à lɛ̀ɛ, “Pɛ yɔɔ, ì gó gɔ̃́ e kéa píé.”
9Zízɛ̀ e à wɛ̃́ĩ́-lɔ̀ɔ kɛ weeá kélɛ̀, “I tɔ́ lɛ́ deĩ̀?”
Gɔ̃́ɛɛ a gèe, “M tɔ́ lɛ́ Mia Gbũ, ɓii ko kù lɛ gbùò.” 10E kɛ kpó-kpó ɓo kpé kã́pìà Zízɛ̀ lɛ̀ɛ, yékɛ̀ é pɛ yɔɔ vɔ̀ɔ lúó lɛ̀ e kília mɔ̀.
11Ƃɔ̀ kù gbùò zɛ̀ dò o kɛ o lé ɓèlèpìà tɔ̃̀ũ̀a mɔ̀ kɔ̀ɛ́. 12Pɛ yɔɔ vɔ̀ɔ o kpé kã́ Zízɛ̀ lɛ̀ɛ, wáà gèè, “Ko vɔ ɓɔ̀ vɔ̀ɔ píé. Wéé à mɔ̀ kó dà o bà.” 13Yé e kɛ kília, Zízɛ̀ e wéé à mɔ̀ ó ló yi. Ɛ́ɛ̃́ pɛ yɔɔ vɔ̀ɔ o gó gbaa gɔ̃́ɛɛ píé, o ló gbaa, o dà ɓɔ̀ vɔ̀ɔ bà. Ƃɔ̀ vɔ̀ o kɛ yía, o wáá e kɛ lèĩ pèèlɛ. O séĩ́-séĩ́ o gbĩ̀ĩ bàlà ká goo gbèkènia là, wáà dùò yíía bà. Yé e kɛ kília, o tó yíí bà e nyɛ.
14Gɔ̃à lɛ́ o kɛ o nyìɛ kɛpìà ɓɔ̀ vɔ̀ o kília mɔ̀ɔ, o wàà. Ɛ́ɛ̃́ o ló, wáà wɔ̃́ sùu e kília dɔ̀ɔ̀ dɔ̀ pɛlɛí, ɛ̃́ɛ̃́ nyɛ́nɛ̀ĩ̀ kɔ́ɛ́í píé déĩ́ le. A kɛ tó mia wáà nù wɔ̃́ e kɛ kília gɛ̃̀ɛ̃̀. 15Lɛ̀ o ɓɔ Zízɛ̀ mɔ̀ɔ, o gɔ̃ lɛ́ pɛ gbũ e kɛ à píéa gɛ̃̀. E kɛ yàá yi. Sɔ e kɛ à mɔ̀, ɛ̃́ɛ̃́ à wũ-kèlè yí e kɛ gbaa sɛ̀. Lɛ̀ e kɛ kília, míáa o kɛ túópìà. 16Wɔ̃́ lɛ́ e kɛ gɔ̃ lɛ́ pɛ yɔɔ e kɛ kpá à píéa, ɛ̃́ɛ̃́ wɔ̃́ lɛ́ e kɛ ɓɔ̀ vɔ̀ káa, mia lɛ́ wa gɛ̃̀ɛ, o à yí ɓo míáa lɛ̀ɛ. 17Lɛ̀ e kɛ kília, o gbɛ̃̀, wáà kpé kã̀ Zízɛ̀ lɛ̀ɛ é gó o pà.
18Lɛ̀ Zízɛ̀ e kɛ yàpìà gɔ́ɔ́ɔ yía, gɔ̃ lɛ́ pɛ yɔɔ e kɛ à píéa, áà kpé kã̀ à lɛ̀ɛ é kɛ Zízɛ̀ píé.
19Kɛɛ lɛ̀ɛ́ gbaa wéé à wéè mɔ̀. Kɛɛ a gèe gɔ̃́ɛɛ lɛ̀ɛ, “Lo i pà i mìà nì píé, í zi lɛ́ i Dàa-mì aà wɔ̃́ kɛá i lɛ̀ɛ, ɛ̃́ɛ̃́ zi lɛ́ aà i yéĩ̀ kṹ à káa, yí ɓo o lɛ̀ɛ.”
20Yé e kɛ kília, gɔ̃́ɛɛ e wɛ̀lɛ̀ gbaa, lɛ́ e ló lɛ̀ lɛ́ o kɛ à sípìà Pɛ́lɛ Vũ̀ Doóa yí, áà lò wɔ̃́ lɛ́ Zízɛ̀ a kɛ à lɛ̀ɛ, gèèá sí mia lɛ̀ɛ. Ɛ́ɛ̃́ mia lɛ́ o wɔ̃́ e kília maa, o séĩ́ o lé kpó-kpó e pa.
Zálɛ̀ lú wà lee lɛ́ e pá Zízɛ̀ mɔ̀-sɔ̀ mɔ̀ɔ
(Máfìù 9.18-26; Lúù 8.40-56)
21Zízɛ̀ e yà gɔ́ɔ́ɔ yí, áà yíía kã̀, áà nù e mɛ̀ĩ́ kɔ̀ pɔ̃́ũ̀ yé e gó kpá yia mɔ̀. Mia gbààlà gbùò zɛ̀ o nu à sɔ́nɔ́ píé yíía kpóṹ là. 22Gɔ̃ lɛ́ e kɛ Zúù-mìà zì Wálà-kà doó-mì wũ-là-mì káa, e nu yí. Gɔ̃́ e kília tɔ́ lɛ́ Zálɛ̀. Yé e Zízɛ̀ gɛ̃̀ nɔ́ɔ, e gbini à gã̀ dṹɔ̃̀ gbaa, 23áà kpé kã̀ à lɛ̀ɛ kpó-kpó ɓo, áà gèè, “M lú nyɔ̀nɔ́ lɛ ɓúópìà gaà yáá bà. Nu í i kɔ̀ kpɔ́ à là m lɛ̀ɛ wɛ̀, kɛ é kɛ kéléŋ-kèlèŋ, yékɛ̀ é ga.”
24Yé e kɛ kília, wà Zízɛ̀ o ló. Mia kù gbùò zɛ̀ o tó à píé, wáà lò à zɔ̀ŋɔ-zɔ̀ŋɔá sí.
25Lee doó e kɛ yía, léà-yàà a kɛ kɛ̀ɛ̀ vũ̀ doó wɛ́lɛ́ pèèlɛ mɔ̀. 26Nyìɛ̀-kɛ-mìà búnùzɛ̀ waà nyìɛ̀ kɛ à mɔ̀, kɛɛ lééa aà wàa ɓèlè nyɔ́ɔ̀ɔ, ɛ̃́ɛ̃́ aà là pɛlèe e kɛ à kɛ̀lɛ̀ɛ séĩ́ gó, aà nyɛ. É kɛ bɛ̃̀ɛ̃ kília, lɛ̀ɛ́ gbaa kɛ gbɛɛ ɓo kéléŋ-kèlèŋ. Yááa e kɛ lópìà e líé teele. 27Lééa e Zízɛ̀ wɔ̃̀ ma. Yé e kɛ kília, lééa e nu Zízɛ̀ mɛ̀ĩ́ mia gbũ fĩ̀ã̀a mɔ̀. E pá à mɔ̀-sɔ̀ mɔ̀. 28Ƃii a gèe, “Ḿ pàá à mɔ̀-sɔ̀ mɔ̀ bɛ̃̀ɛ̃, ḿm̀ lo la gɛ̃̀ɛ̀ ma ɓo.”
29Yé e kɛ nɔ́ kília, léà-yààa e tèá gbaa à kɛɛ̀ ká. Lééa a yí dɔ gbaa e kpóló yí kélɛ̀ aà la wɔ̃́ nyɔ́ɔ̀ɔ sùu e kília bà. 30Zízɛ̀ a yí dɔ nɔ́ zá e dìè píé kélɛ̀ à zì yíkɛ̀ gáàa dò aà gó à yí. Yé e kɛ kília, e nìɛ̀ mia gbũ fĩ̀ã̀a mɔ̀, áà gèè, “Deĩ̀ lɛ́ e pá m mɔ̀-sɔ̀ mɔ̀ ɓe?”
31À zì tòà-píé-mìà wáà gèè à lɛ̀ɛ, “Íì mia gɛ̃̀ i sɔ́nɔ́ ké wìà-wìà le, ɓáà gèè, ‘Dé e pá m mɔ̀ ɓɛ?’ ”
32Zízɛ̀ áà e nyìɛ kpɔ̀ mi lɛ́ e pá à mɔ̀-sɔ̀ mɔ̀ɔ ká. 33Lééa e wɔ̃́ lɛ́ e kɛ à káa yí dɔ. Yé e kɛ kília, e nu túó ká, à mɛ́ áà tàlè, e gbini gbaa Zízɛ̀ gã̀ dṹɔ̃̀, áà wɔ̃́ wánà zɛ̀ lɛ́ à gbɛ̃̀ɛ̃̀ lɛ à dìè-tĩ́ mɔ̀ɔ, séĩ́ gèè à lɛ̀ɛ. 34Zízɛ̀ a gèe à lɛ̀ɛ, “M lú, i zì zò-dɔ̀à-mɔ̀ aà i la. I laà lɛ gbaa wɔ̃́ nyɔ́ɔ̀ɔ i kɛ à gɛ̃̀pìàa bà. Ì ɓà ló ɓo í yi yiè zɛèé.”
35Lɛ̀ Zízɛ̀ e kɛ tĩã́ wɔ̃́ e kília gèepìàa, mia gbṹũ̀ o gó Zálɛ̀ píé kɛ́ì, wáà gèè à lɛ̀ɛ, “I lú aà ga. Mɛ́ e kɛ lɛ́ ì Tísɛ̀ yí gíni gbaa ɓɛ?”
36Zízɛ̀ lɛ̀ɛ́ gbaa e tóó dɔ wɔ̃́ o kɛ à gèepìà kília mɔ̀. Kɛɛ a gèe Zálɛ̀ lɛ̀ɛ, “Yékɛ̀ i lè é dũ. I zò yee dɔ nɔ́ gágà.” 37Kɛɛ Zízɛ̀ lɛ̀ɛ́ gbaa zṹ wà mia gbɛɛ ó ló líé. Kɛɛ Pílɛ̀, wà Zĩ́ĩ̀, ɛ̃́ɛ̃́ Zĩ́ĩ̀ lèe-gé Zɔ̃̀ɔ̃́ lɛ́ nɔ́ wà à ye nì o ló líéa. 38Yé e kɛɛ, o ɓɔ Zálɛ̀ píé kɛ́ì. Lɛ̀ e kɛ kília, Zízɛ̀ e mia gbũ gɛ̃̀ yi, wáà wèè, ɛ̃́ɛ̃́ wáà gbɛ̀ɛ̀ gbóó ká kpó-kpó ɓo. 39E ló kɛ́ì, áà gèè o lɛ̀ɛ, “Mɛ́ e kɛ lɛ́ kà mɔ́ɔ̀ wéé ɓo ké, ɛ̃́ɛ̃́ káà gbóó bɛ̃̀ɛ̃ ɓò ɓɛ? Nɛ́fúa gaà wá. Yi lɛ́ lɛ à bàa.”
40Míáa wáà yéí sì Zízɛ̀ mɔ̀. Kɛɛ e o séĩ́-séĩ́ o ɓɔ pɛlɛí. Zízɛ̀ e nɛ́fúa dàa wà à lèe, ɛ̃́ɛ̃́ mia lɛ́ wà à ye nì o nua, o líé sí, wà ye nì o ló lɛ̀ lɛ́ nɛ́fúa e kɛ yía mɔ̀. 41Zízɛ̀ e nɛ́fúa kṹ e kɔ̀ mɔ̀, áà gèè à lɛ̀ɛ, “Tálétà kúmà.” À yí lɛ́ e tɔ́, “Lee-nɛ̀fú, ḿm̀ gèe i lɛ̀ɛ, wɛ̀lɛ̀.”
42Yé e kɛ nɔ́ kília, lee-nɛ̀fúa e wɛ̀lɛ̀, áà tàà. Nɛ́fúa kɛ̀ɛ̀ e kɛ vũ̀ doó wɛ́lɛ́ pèèlɛ. Lɛ̀ wɔ̃́ sùua e kɛ nɔ́ɔ, o lé e pa kpó-kpó ɓo. 43Kɛɛ Zízɛ̀ a gèe o lɛ̀ɛ kpànazɛ̀ kélɛ̀ yékɛ̀ ó à gèe mi gbɛɛ lɛ̀ɛ. A gèe o lɛ̀ɛ ó léɓèlè dò nɔ nɛ́fúa lɛ̀ɛ á ɓèlè.
Цяпер абрана:
Máà 5: MNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Mann New Testament © Bible Society in Liberia, 1978.