मत्ती 6
6
दान देणे रे बारे मन्झ उपदेस
1“चतन्न रहुआ! तुस्से माह्णुं जो दसणे रे कठे आपणे खरे काम नी करा, नी ता तुस्सा आपणे स्वर्गीय बापू ले कुछ भी इनाम नी पाणा।
2इधी कठे जेबे तू दान करहे, ता बाजा बजाई के सब लोको मत दसा, जेह्ड़ा पाखंडी यहूदी सभा होर गल्हिया मन्झ करहा ऐं, ताकि लोक तिन्हारी बड़ाई करहे। हांऊँ तुस्सा किन्हें सच्च बोल्हा आ कि, स्यों आपणा इनाम पाई चुके जो तिन्हा जो लोका री बड़ाई करणे ते मिल्या। 3पर जेबे तू दान करहे, ता जो तेरा सीधा हाथ करहा, तेता रा पता तेरे पुठा हाथा जो नी चलणे पाए। 4ताकि तेरा दान परदे मन्झ रहे; होर तेबे तेरा बापू जेह्ड़ा परदे मन्झ देख्हा, तुजो इनाम देणा।”
प्रार्थना करणे रा उपदेस
(लूक. 11:2-4)
5“होर जेबे तू प्रार्थना करहे, ता पाखंडिया साहीं मत करदे क्यूंकि स्यों चाहे कि जेबे स्यों यहूदी सभा मन्झ होर सड़का रे मोड़ा पर खड़े हुई किन्हें प्रार्थना करहा ऐं ता लोक तिन्हा जो देखी किन्हें तिन्हारी बड़ाई करहे। हांऊँ तुस्सा किन्हें सच्च बोल्हा कि, स्यों आपणा इनाम पाई चुके, जो तिन्हा जो लोका री बड़ाई करणे ते मिल्या। 6पर जेबे तू प्रार्थना करहे, तेबे आपणे कमरे मन्झ जा; होर दुराजा बंद करी किन्हें आपणे बापू किन्हें जो परदे मन्झ आ प्रार्थना कर; तेबे तेरा बापू जो परदे मन्झ देख्हा, तुजो इनाम देणा। 7होर प्रार्थना करणे रे टैम होरी लोका साहीं बार-बार एक गल्ला जो नी बोला, क्यूंकि तिन्हारी ये समझ बणी गईरी कि तिन्हारे बार-बार एक गल्ला जो बोलणे ले तिन्हारी सुणी जाणी। 8इधी कठे तुस्से तिन्हा साहीं नी बणां, क्यूंकि तुस्सा रा बापू तुस्सा रे मांगणे ले पैहले जाणहां कि, तुस्सा री क्या-क्या ज्रूरत ई।”
9“इधी कठे, तुस्से इंहां करी किन्हें प्रार्थना करेया करा:
‘हे आस्सा रे बापू, तुस्से जो स्वर्गा मन्झ ऐं; तुस्सा रा नांऊँ पवित्र मन्या जाए।#6:9 लूक. 11:2
10तुस्सा रा राज्य आये, जिहां तुस्सा री इच्छा स्वर्गा मन्झ पूरी हुंहाँ ईं, तिहां ईं धरती पर भी पूरी हो।
11आस्सा री ध्याड़ी भरा री रोटी आज आस्सा जो दे।
12होर जिहां आस्से आपणे गुन्हेगारा जो माफ करहा ऐं, तिहां ईं तू भी आस्सा रे पापा जो माफ कर।
13होर आस्सा री परखणी नी कर, पर आस्सा जो तेस दुस्ट सैताना ले बचा;
क्यूंकि राज्य होर सामर्थ होर महिमा हमेसा तुस्सा रे ई ऐं।’ आमीन।”
14“इधी कठे अगर तुस्से माह्णुंआं रे गलतिया जो माफ करघे, ता तुस्सा रे स्वर्गीय बापूआ भी तुस्सा रे पाप माफ करी देणे। 15होर अगर तुस्से माह्णुंआं रे गलतिया माफ नी करघे, ता तुस्सा रे बापूआ भी तुस्सा रे पाप माफ नी करणे।”
ब्रत रे बारे मन्झ उपदेस
16“जेबे तुस्से ब्रत करो, ता पाखंडिया साहीं तुस्सा रे मुंहा पर दुआसी नी हूणीं चहिए, क्यूंकि स्यों आपणा मुंह फुलाई रख्हा ऐं, ताकि लोक तिन्हा जो ब्रत रखणे वाल़े जाणें, हांऊँ तुस्सा किन्हें सच्च बोल्हा कि, स्यों आपणा इनाम पाई चुके, जो तिन्हा जो लोका री बड़ाई करणे ते मिल्या। 17पर जेबे तू ब्रत करहे ता आपणे मूंडा पर तेल मल होर मुंह धोई ले। 18ताकि तेरे ब्रता रे बारे मन्झ तेरे स्वर्गीय बापू रे सिवाए केसियो पता नी लगे, होर जो तू जो लुके छुपे करहा, तुस्सा रा बापू जो सब कुछ देख्हा तेस तुस्सा जो इनाम देणा।”
स्वर्गा मन्झ धन कठा करणा
(लूक. 12:33-34)
19“आपणे कठे धरती पर ढब्बे कठे मत करा; जेथी कीड़े होर जंग नास करी देहां ऐं, होर जेथी चोर चोरी री ताका मन्झ रैंहयां ऐं। 20पर आपणे खरे कामा किन्हें स्वर्गा मन्झ धन कठा करा, जेथी ना ता कीड़ा, होर ना जंग खराब करहा, होर जेथी ना ता चोर चोरी री ताका मन्झ रहें। 21क्यूंकि जेथी तेरा धन आ तेथी तेरा मन भी लगी रैहणां।”
सरीरा रा दिऊया
(लूक. 11:34-36)
22“सरीरा री हाखिया दिऊये साहीं ई, इधी कठे अगर तेरी हाखि बांकी हो, ता तेरे सारे सरीरा भी चमकदार हूंणां। 23पर अगर तेरी हाखिया बुरी हुन्घी, ता तेरा सारा सरीर भी नह्यारे किन्हें भरी जाणा; इधी कठे से ज्योति जो तुध मन्झ ई अगर से नह्यारी हुई जाए, तेबे से न्हयारा कितणा बडा हूंणां!”
केसी गल्ला री फिकर नी करणा
(लूक. 16:13; 12:22-31)
24“कोई माह्णुं दो माल्का री सेऊआ एक ई टैमा पर नी करी सक्दा, क्यूंकि तेस एकी किन्हें दुस्मणी होर दूजे किन्हें प्यार रखणा, या तेस एकी किन्हें मिली किन्हें रैंह्णां होर दूजे जो तेस घटिया समझणा, तुस्से परमेसरा री होर ढब्बे री सेऊआ एक साउगी नी करी सकदे। 25इधी कठे हांऊँ तुस्सा किन्हें सच्च बोल्हा कि, आपणे जीणे रे कठे खाणे-पीणे फिकर मत करा। होर आपणे सरीरा रे कठे कपड़े री फिकर छाडी देआ। क्यूंकि जिन्दगी खाणे ले होर सरीर कपड़े ले बढ़ी किन्हें हाया 26आसमाना रे चिड़ुआ जो देखा! स्यों ना ता बाहें, होर ना काटहा ऐं, होर ना पेड़ु मन्झ कठा करहा ऐं; फेरी भी तुस्सा रा स्वर्गीय बापू तिन्हा जो खुआहाँ, होर तुस्सा री कीमत तिन्हा ले बढ़ी किन्हें हाई। 27तुस्सा मन्झा ले एह्ड़ा कुणहां, जेह्ड़ा फिकर करी किन्हें आपणी जिन्दगी री उम्रा मन्झ एक घड़ी भी बढ़ाई सक्हा?
28होर कपड़े रे कठे किधियो फिकर करहा ऐं? जंगली फूला पर ध्यान देआ कि, स्यों किहाँ बढ़हा ऐं, स्यों ना ता मैहनत करहा ऐं, होर ना आपणे कठे कपड़े बणाहें। 29फेरी भी हांऊँ तुस्सा किन्हें बोल्हा कि, सुलेमान राजे भी, आपणे सारी साना मन्झ तिन्हा मन्झा ले एक फूला साहीं भी नी सजी सकेया। 30इधी कठे जेबे परमेसर मदाना रे घाह री परवाह करहा, जो आज हाया, होर जो काला आगी मन्झ फुकी देणा, हे! कम विस्वास रखणे वाल्यो, परमेसरा तुस्सा री परवाह एता ले भी बढ़ी किन्हें करणी। 31इधी कठे तुस्से फिकर करी किन्हें एह्ड़ा देख्या बोल्दे कि, आस्सा क्या खाणा, या क्या पीणा या क्या पैन्ह्णा? 32क्यूंकि होर सारे लोक इन्हा सभ चीजा जो तोप्दे रैंहयां ऐं, होर तुस्सा रा स्वर्गीय बापू जाणहां कि, तुस्सा जो केस चीजा री ज्रूरत ई। 33पर सभ गल्ला ले पैहले तुस्से परमेसरा रे राज्या री होर तेसरी धार्मिकता जो तोप्हा, ता तेस ये सारी चीजा तुस्सा जो देणी जेता री तुस्सा जो ज्रूरत ई। 34इधी कठे काला री फिकर मत करा, क्यूंकि काल्के ध्याड़ेया आपणी फिकर आपणे आप करी लैणी, आजके कठे आजा रा दुःख बौह्त आ।”
Цяпер абрана:
मत्ती 6: MJLNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
This work is licensed under Creative Commons Attribution-ShareAlike 4.0 License.