Gaoi 8
8
Fakaveliveli o le Ekelesia : Saulo
1Na loto malie Saulo ki le tamate o Setefano. Na i ai loa, i le aso lena, se fakaveliveli lasi ki le Ekelesia o Selusalemi ; ti na mavetevete loa le kakai katoa i le fenua o Sutea mo Samalia, kae nofo fai le kau apositolo. 2Na tanu loa e ni tagata lotu malie a Setefano, ti na lotou tagi lasi loa ki lona mate. 3Kae na maumaui e Saulo le Ekelesia ; na ulu a ia ki fale fuli, o toso a tagata mo fafine, o fakaulu ki le fale pilisoni.
Fakasa e Filipo le logo malie i Samalia
4Ko latou ala na fakamavetevete, na ano loa ki potu fuli, o fakasa le logo malie o le folafola. 5Ti na ifo loa Filipo ki le kolo ko Samalia, ti na fakasa loa e ia i ai le Kilisito. 6Na tokaga ai a kakai fuli ki nea ala na masau ki ai Filipo, i lalatou logo mo tio ki milakulo ala na fai e ia. 7Talie na mavae loa ni laumalie veli mei se toka api leia na avagaia, o tagi leo lasi, ti na fakamauli se toka lasi na palalisia mo kito. 8Ti na i ai loa se fiafia lasi i le kolo lena.
9Kae na i ai se tagata na igoa ko Simone, leia na fai nea fakatemonio i mua atu i le kolo, o tupu ai le punamauli o le kakai o Samalia, ti mo lalatou tuku ko se tagata mauiga a ia. 10Ti na lotou tokaga fuli kiate ia, mei leia e ikiiki oki o kaku ki leia e lasi oki, o pati : Ko ia leinei ko le makeke lasi a ia o le Atua. 11Na lotou tokaga kiate ia, talie kua fualoa lana fakaofolele latou ki ana gaoi fakatalatupua. 12Kae, i lalatou tui loa kia Filipo, leia na fakasa ia kia latou le logo malie o le Puleaga o le Atua ti mo le suafa o Sesu-Kilisito, na lotou papitema loa, a tagata mo fafine.
13Ti na tui foki mo Simone totonu kia Filipo ; ti i le oki o lona papitema, na leaise toe mavae loa a ia meia Filipo, ti na tio fakaofolele loa a ia ki fakamailoga lalasi mo milakulo ala na fai e ia.
14Ko le kau apositolo, ala na nonofo i Selusalemi, i lalatou logo kua tali e Samalia le folafola a le Atua, na kakau ia loa ki ai a Petelo mo Soane. 15Ko laua ana, i lala kaku ki Samalia, na faikole loa kia latou, o tupu ke lotou tali le Laumalie Maokioki. 16Talie na leikiaise ifo foki a ia ki se tasi fua o latou ; talie na papitema fai latou i le suafa o le Aliki ko Sesu. 17Koia na teki loa e Petelo mo Soane ola lima kia latou, ti na lotou tali loa le Laumalie Maokioki.
18Ko Simone, i lana tio kua soli le Laumalie Maokioki i le teki o lima o apositolo, na aumai loa kia laua se paaga, o pati : 19Kolua tuku mai foki kiate au le makeke lena, o tupu ko leia e kau teki loa ki ai oku lima, ke tali e ia le Laumalie Maokioki. 20Kae na pati loa Petelo kiate ia : Ke puli lau paaga mo koe, talie kua ke pati e totogi paaga le nea alofa o le Atua ! 21E leaise ke maua sou vaega fua i le nea lena, talie e leaise sako lou loto i mua o le Atua ! 22Koia ke ke fakasemala ki lau agaveli, o faikole ki le Aliki ke fakamolemole ki le manatu o lou loto, mo kapau e feala ; 23Talie e kau tio nei kua ke nofo i se au kona, ti kua sai a koe e le agasala. 24Na tali loa Simone : Kolua ulufaki au e koulua totonu ki le Aliki, ke aua na soko mai kiate au se nea i nea ala kua kolua masau ki ai.
25I le oki o lala fakamaoki ki le folafola a le Aliki, ti mo lala fakasa a ia, na toe liliu loa Petelo mo Soane ki Selusalemi, o fakamafola le Evaselio i ni kolo mauke ai o le kau Samalia.
Filipo mo le minisi Etiopia
26Na masau loa se aselo o le Aliki kia Filipo, o pati : Tuu ki aluga, ti ke ano ki le potu saute, ki le ala leia e ifo mei Selusalemi ki Kasa, leia e toafa. 27Na tuu loa a ia ki aluga, o ano. Ti ko leinei, ko se tagata Etiopia, ko se enuke, minisi a Kanetase, fafine sau o Etiopia, na tokaga ki ona koloa fuli, ti na pale a ia ki Selusalemi o atolasio i le fale tapu, 28ti kua toe liliu a ia mei ai, o eke i lana saliote, ti na lau e ia le tosi a le polofeta ko Esaia. 29Na pati loa le Laumalie kia Filipo : Ano o fakafeofi ki le saliote lena. 30Na makape loa Filipo, ti na logo loa a ia ki le tagata Etiopia na lau ia le tosi a le polofeta ko Esaia. Ti na pati loa Filipo kiate ia : Pe ke matala ki le nea leia e ke lau ? 31Ti na tali loa le Enuke : Pe feaki loa laku matala mo kapau e leaise taki au e se tasi ? Ti na fakaafe loa e ia Filipo ke sopo ake ki aluga o eke mo ia.
32Ko le koga tosi leia o le Tosi tapu na lau e ia ko ia leinei :
Na taki a ia ofaipe se ovi fafine ki le fale tamate manu ;
Ti, ofaipe se akeno gutu mate i mua o leia e koti ia a ia,
Na leaise fakamavaa fua e ia lona gutu.
33 Na fakataulaloi a ia, ti na fakamaaui a ia.
Ti ko lona sakoga, ko ai e masau loa ki ai ?
Talie na motusi lona mauli i le malama nei.
34Ti na pati loa le enuke kia Filipo : E kau kole atu kiate koe, ko ai leia e fia masau ki ai le polofeta ? Pe masau a ia kiate ia totonu pe ki se tasi ake ? 35Ti na masau loa Filipo, o kamata i le koga tosi lena, ti na fakasa loa e ia kiate ia le logo malie o Sesu.
36I le soko atu o lola fanoga, na la felavei loa mo se vai. Ti na pati loa le enuke : Ko leinei se vai, kolea ka taofi ia loku papitema ? 37Ti na pati loa Filipo : Kapau e ke tui i lou loto katoa, e feala le nea lena. Ti na tali loa le enuke : E kau tui ko Sesu-Kilisito ko le Alo o le Atua. 38Ti na fakatotonu loa e ia ke fakatuu le saliote ; na la ifo toka lua loa ki le vai, a Filipo mo le enuke, ti na papitema loa e Filipo le Enuke. 39I lala mavae ake loa i le vai, na too loa Filipo e le Laumalie o le Aliki, ti na leaise toe tio loa le enuke kiate ia : Ti na soko atu loa e ia lona fanoga, i le fiafia. 40Kae na kaku loa Filipo ki le kolo o Asoti, ti na fakamafola loa e ia le logo malie o Sesu i kolo fuli ala na fakalaka ai, o kaku ki lana kaku ki Sesalea.
Цяпер абрана:
Gaoi 8: FB2000
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Société Biblique de Genève, 2000-2020