Gaoi 21
21
Pale a Paulo ki Selusalemi
1I le oki o lamatou tuku poloaki mo latou, na motou folau loa, o fakatuula ki Kose, mo Lote i leia ake a aso, ti mei ai ki Patala. 2I le maua loa o se vaka leia na folau ki Fenisia, na motou sopo loa ki ai, o ano. 3I le kite o le motu ko Sipele, na motou tuku loa a ia i le fetuu sema, kae soko atu lamatou folau o taumua ki Silia, ti na motou taufenua loa i Tile, leia na tonu ke laku ai le uta a le vaka. 4Ti na motou maua loa i ai le kau tisipulo, ti na motou nonofo loa i ai i aso e fitu. Ti i le takitaki a le Laumalie, na pati loa le kau tisipulo kia Paulo, ke aua na pale ki Selusalemi. 5Kae, i le oki o aso ana e fitu, na motou ano loa, ke soko atu lamatou folau, ti na lotou au fuli loa mo olatou avaga ti mo olatou fanau, o ave matou o tuku ki le tua kolo. Na motou tuutuli loa i le mata tai, o faikole. 6Ti i le oki o lamatou tuku poloaki, na motou sopo loa ki le vaka, kae lotou toe liliu loa ki olatou kaiga.
Paulo i Petolemaise mo Sesalea
7I le fakaoki o lamatou folau, na motou ano loa mei Tile ki Petolemaise, leia na motou felavei ai loa mo fetaina, ti na motou nonofo loa i ai i se aso katoa mo latou.
8Na motou mavae loa i leia ake a aso, ti na motou kaku loa ki Sesalea. Na motou ulu loa ki le fale o Filipo ko le evaselisita, leia na kau i le toka fitu, ti na motou nonofo loa mo ia. 9Na maua e ia ni taineliki taupoou e toka fa, ala na kikite. 10I le fualoa o lamatou nofo i ai, na ifo loa mei Sutea se polofeta na igoa ko Akapusi, 11o au loa kia matou. Na too loa e ia le kilipipi o Paulo, o sai ki ona vae mo ona lima, o pati : Ko leinei le nea leia e fakasa e le Laumalie Maokioki : Ko le tagata leia o ona le kilipipi leinei, e saisai feneeki loa a ia e le kau Sutea i Selusalemi, ti e lotou tuku loa a ia ki lima o le kau pagani. 12I lamatou logo ki le nea lena, na motou kole loa kia Paulo, e matou mo latou ala na nonofo i le ganea lena, ke aua na pale ki Selusalemi. 13Ti na tali loa Paulo : Kolea e kotou fai ia, o fetagisi ke fatii ai loku loto ? Talie kua kau teuteu, o leaise gato fua ke saisai au, kae ke kau toe mate foki i Selusalemi o tupu ko le suafa o le Aliki ko Sesu. 14I le leaise toe fetogi o lona loto, na motou fakalologo loa, o pati : Ke fai le finegalo o le Aliki !
15I le oki o aso ana, na motou fakamaopoopo loa amatou kavega, ti na motou pale loa ki Selusalemi. 16Na au foki mo matou ni iki o le kau tisipulo o Sesalea, o taki matou ki le fale o se tagata ko Manasone, mei le motu ko Sipele, ko se tisipulo mei le kamataaga, leia na tonu ke motou nonofo ai i lona kaiga.
Paulo mo Sakopo i Selusalemi
17I lamatou kaku loa ki Selusalemi, na tali loa matou e fetaina i le fiafia. 18I leia ake a aso, na ano loa Paulo mo matou ki le fale o Sakopo, ti na au foki ki ai le kau fakamatuatua katoa. 19I le oki o le fakatau mauli mo latou, na fakamatala katoa loa e ia a nea ala na fai e le Atua i atu puleaga i lana gaoi. 20I lalatou logo ki nea ana, na lotou fakakololia loa ki le Atua. Ti na lotou pati loa kia Paulo : E ke tio, taina, kua lau afe le kakai Sutea leia kua tui, ti e lotou tausi malie fuli ki le lao. 21Kae kua lotou logo o uiga mo koe, na ke akonaki ki le kau Sutea fuli ala na nonofo i le kau pagani ke fakafiti kia Moisese, o pati kia latou ke aua na silikosisio olatou fanau ti ke aua na mulimuli ki atatou agai fenua. 22Ti kolea ke fai ? E leaise toe sala nei, e tanaki loa le kakai, talie e lotou iloa loa kua ke au. 23Koia, fai le nea leia ka motou fakasa atu loa kiate koe. E nonofo ia matou ni tagata e toka fa ala kua fai ia se fakapapau ; 24too latou mo koe, ti ke fakamea fakatasi mo latou, ti ke totogi a nea fuli, o tupu ke lotou tele olatou ulu. I le nea lena e iloa loa e le kakai katoa e leaise maoki se nea fua i nea ala kua lotou logo o uiga mo koe, kae ko koe foki, e ke fai le lao. 25Ki le kau pagani kua tui, kua motou fai le tonu ti kua motou fai le tosi kia latou ke lotou fakamamao mei nea ala na momoli ki taulaatua, mo le toto, mo manu mamate, ti mo le fai feauaki. 26I leia ake a aso, na too loa e Paulo a tagata ana, ti na fakamea loa a ia, ti na ulu loa a ia ki le fale tapu i leia ake a aso, o fakasa le aso e katoa ai loa lolatou fakamea, ti mo le moliga kia latou taki toka tasi.
Too o Paulo i le fale tapu
27I le fakaoki o aso ana e fitu, na tio loa le kau Sutea o Asia kia Paulo i le fale tapu, ti na lotou lagai loa le kakai katoa, ti na lotou too loa Paulo, 28o kalaga : Tagata Iselaele, tokoi mai kia matou ! Ko leinei le tagata leia e akonaki ki le kakai katoa i potu fuli o fakafesagai ki le kakai Iselaele, mo le lao, ti mo le ganea leinei ; ti na fakaulu foki e ia ni Keleka ki le fale tapu, o fakakelekele ai le ganea taputapu leinei. 29Talie i mua atu, na lotou tio ki le taka fakatasi a Tolofime mei Efeso mo Paulo i le kolo, ti na lotou masalosalo na fakaulu a ia e Paulo ki le fale tapu.
30Ti na maveuveu loa le kolo katoa, ti na feoso mai loa le kakai katoa mei potu fuli. Na lotou too loa Paulo, o toso ki fafo mei le fale tapu, kae na lotou tapotapono aifai a matapa. 31I lalatou faiga ke tukipooi a ia, na kaku loa lona fakasa ki le pule lasi o le solia, kua maveuveu Selusalemi katoa. 32Ti na too aifai e ia ni tagata solia mo olatou pule o fai makape kia latou. I lalatou tio ki le pule lasi mo le kau solia, na lotou tuku loa le sasa o Paulo. 33Ti na fakafeofi atu loa le pule lasi, o too Paulo, o fakatotonu ke sai a ia ki ni tini e lua, ti na vesili loa a ia pe ko ai a ia, pe kolea lana nea na fai. 34Kae na kalaga kesekese loa le kakai, ti na leaise matala loa a ia ki se nea, o tupu ko le logoa, ti na fakatotonu loa e ia ke ave Paulo ki le fale solia. 35I le lakaga leia na kaku ai loa Paulo ki le kakega, na amo loa a ia e le kau solia, o tupu ko le feoso ake a le kakai ;
36talie na lotou ano i muli, o taukalaga : Ke mate a ia !
37I le temi leia na fakaulu ai loa Paulo ki le fale solia, na pati loa a ia ki le pule lasi : Pe taga ke kau masau atu ki se nea ? Ti na tali loa le Pule lasi kiate ia : E ke iloa le fakakeleka ? 38Pe leaise ko le tagata Esipito a koe leia nao fakatupu ia nei fua ni maveuveu, ti na taki ia ki le toafa ni kau tagata tukipo e tino afe fa ? 39Ti na pati loa Paulo : E kau Sutea, mei Talese i Silisia, ko le tagata au o se kolo logologona. E kau kole atu ke ke fakataga mai mua ke kau masau ki le kakai. 40I le fakataga ake loa e le pule lasi kiate ia ke masau, na tuu loa Paulo i le kakega, o siki lona lima ki le kakai. Na fakalologo fuli loa le kakai, ti na masau loa Paulo i le fakaepeleo, o pati :
Цяпер абрана:
Gaoi 21: FB2000
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Société Biblique de Genève, 2000-2020