Gaoi 15
15
Visi ki le silikosisio i Selusalemi
1Ti na ifo loa mei Sutea ni tagata, ala na akonaki ki fetaina, o pati : Kapau e leaise silikosisio koutou o mulimuli ki le lao a Moisese, ti e leaise mafai ke kotou saofaki. 2Ti na fakafesagai loa Paulo mo Palenapa kia latou, o lotou visi lasi ai ; ti na fakatotonu loa e fetaina ke pale Paulo mo Palenapa, mo ni iki o latou, ki Selusalemi ki le kau apositolo mo le kau fakamatuatua, o tupu ko le nea lena. 3I le oki o lolatou tuku ake e le Ekelesia, na lotou soko atu loa lolatou fanoga i Fenisia mo Samalia, o fakamatala ki fetaina le tafoki o le kau pagani, ti na lotou fiafia lasi ai. 4I lalatou kaku ki Selusalemi, na fakatalitali loa latou e le Ekelesia, mo le kau apositolo, ti mo le kau fakamatuatua, ti na lotou fakamatala loa a nea fuli ala na fai e le Atua ia latou.
Taofi a Petelo : ke aua na fakamaua le kau pagani ki le lao
5Kae na tuu ake loa ki aluga ni iki kua tui i le fetuuga o le kau faliseo, o pati : E tonu ke silikosisio le kau pagani mo fakamaua latou ke mulimuli ki le lao a Moisese.
6Ti na fakatasi loa le kau apositolo mo le kau fakamatuatua o tioi le nea lena. 7Ti na fai loa se visi lasi, ti na tuu ake loa Petelo ki aluga, o pati kia latou : Tagata fetaina, kua kotou iloa talu mei fualoa kua fai e le Atua se filifili ia koutou, o tupu ke logo le kau pagani ki le folafola o le Evaselio mei loku gutu, ti ke lotou tui. 8Ti ko le Atua, leia e iloa ia a loto, na fakamaoki kia latou, o soli le Laumalie Maokioki kia latou ofaipe tatou ; 9Ti na leaise fai fua e ia se fakakesekese ia tatou mo latou, o fakamea e ia olatou loto i le tui. 10Ti ko leinei, kolea e kotou asiasii ai le Atua, o kotou teki ai ki le ua o le kau tisipulo se kavega leia na leaise mafai ke amo e otatou tamana pe ko tatou totonu ? 11Kae e tou tui na fakamauli tatou o tupu ko le kalasia o le Aliki Sesu, o tatau mo latou.
12Na fakalologo loa le fakatasi katoa, ke fakalogo kia Palenapa mo Paulo, ala na fakamatala ia loa a milakulo fuli mo nea fakaofolele ala na fai e le Atua ia laua i lotomalie o le kau pagani.
13I le oki o lala fakamatala, na masau loa Sakopo, o pati : Tagata fetaina, kotou fakalogo mai kiate au ! 14Kua fakamatala e Simone le uluaki tuku e le Atua ona mata ki puleaga, o filifili meia latou se kakai ke amo ia lona suafa. 15Ti e ano tasi le nea lena mo folafola a le kau polofeta, ofaipe lona tuu i le tosi :
16I le sili o le nea lena, e kau toe liliu mai loa, ti e kau toe lagai loa le falela o Tavite leia na solo,
E kau toe fakafoou loa a nea na maumau, ti e kau toe fakatuu loa a ia,
17 O tupu ke afa le Aliki e le toetoega o tagata,
Ti mo puleaga fuli e puaki ai loku suafa.
Epati le Aliki, leia e fai ia a nea ana,
18 Ti na fakasa ia latou talu mei fualoa.
E leaise maua le kau pagani ki le lao
19Koia e kau manatu ai ke aua na fakatupu ni faigataa kia latou ala kua tafoki ki le Atua i le kau pagani, 20kae ke tou fai se tosi kia latou ke lotou fakamamao mei fakalialia o taulaatua, mo le fai feauaki, mo manu mamate, ti mo le toto. 21Talie kua maua i kolo fuli, talu mei tautupu afea, ni kakai ala e akonaki kia Moisese mo lau ia a ia i sapato fuli i sinakoka.
Manatu a le kau apositolo
22Ti na malie loa ki le kau apositolo, mo le kau fakamatuatua, ti mo le Ekelesia katoa, ke filifili ia latou ti ke kakau ki Atiokia, o fakatasi mo Paulo mo Palenapa, a Suta na fakaigoa ko Palasapasi mo Silasi, ko ni tagata mauiga i fetaina. 23Ti na lotou fakatoo loa kia latou se tosi kua fai feneeki : Ko le kau apositolo, mo le kau fakamatuatua, ti mo fetaina, fakaalofa atu ki fetaina i le kau pagani, kia latou ala e nonofo i Atiokia, mo Silia, ti mo Silisia !
24I lamatou logo na natu ni iki ia matou, kae na leaise motou tuku fua kia latou se fakatotonu, ti kua lotou fakamamae koutou ki alatou akonaki, ti kua lotou fakamaveuveui okoutou laumalie, 25kua sa malie kia matou i le oki o lamatou fakatasi fuli o loto tasi, ke motou filifili ni fakafofoga ti ke motou kakau atu latou kia koutou mo otatou alofaaga ko Palenapa mo Paulo, 26laua ala na tiaki ia ola mauli o tupu ko le suafa o lotatou Aliki ko Sesu-Kilisito. 27Koia kua motou kakau atu ai loa a Suta mo Silasi, ala e fakasa gutu ia loa le nea lena kia koutou. 28Talie na malie ki le Laumalie Maokioki ti mo matou foki, ke aua na fakamaua kia koutou se tasi ake kavega i le nea leia e aoga, 29ke iloa : ke kotou fakamamao mei inati kua momoli ki taulaatua, mo le toto, mo manu mamate, ti mo le fai feauaki ; e malie kia koutou ke fakamamao mei nea ana. Nonofo la.
Kakau o Suta mo Silasi ki Atiokia
30Na lotou mavae loa meia latou, o ano ki Atiokia, ti na lotou fakatoo loa le tosi ki le fakatasi katoa. 31I le oki o lona lau, na fiafia loa fetaina ki masau fakalotomakeke ala na lotou maua mei le tosi. 32Ko Suta mo Silasi, ala na polofeta foki, na fakalotomakeke ia loa a fetaina mo fakamakeke loa latou ki ni akonaki mauke ai. 33I le oki o ni aso, na tuku loa laua e fetaina ke toe liliu i le tokamalie kia latou ala na kakau ia mai laua. 34Kae na malie ia loa e Silasi ke toe nofo atu mua.
35Ti na nofo loa Paulo mo Palenapa i Atiokia, o akonaki mo fakasa le folafola a le Aliki, ti mo ni iki ake.
Mavete a Paulo mo Palenapa
36Ti na sili ki ai ni iki a aso, na pati loa Paulo kia Palenapa : Ta toe liliu mua o fakatele ki fetaina i kolo fuli ala na ta fakasa ai le folafola a le Aliki, ke ta iloa lolatou anoaga. 37Ti na loto Palenapa ke la toe ave foki Soane, na fakaigoa ko Maleko ; 38kae na leaise malie loa kia Paulo ke la ave leia na tiaki ia laua i Pafilia, ti na leaise ano mo laua i lala gaoi. 39Ti na makeke ai lala loto kesekese o tupu ai loa lala mavete. Ti na too loa e Palenapa a Maleko mo ia, o la folau i se vaka ki le motu ko Sipele.
40Ti na filifili loa e Paulo a Silasi, ti na la ano loa, i le oki o lola tuku e fetaina ki le kalasia o le Aliki.
41Na ano loa a ia i Silia mo Silisia, o fakamakeke a Ekelesia.
Цяпер абрана:
Gaoi 15: FB2000
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Société Biblique de Genève, 2000-2020