Matiu 10
10
Yesu mowei kuasa i topeguruNa au hampulo hai rodua
(Mrk. 3:13-19; Luk. 6:12-16)
1Yesu mokakio topeguruNa au hampulo hai rodua, hai Naweihe kuasa mampopeloho seta hai mopakaoha ope-ope tauna au mahai hai au bara masilolonga watanda. 2-4Hanganda surona Pue Yesu au hampulo hai rodua iti, idemohe: Au nguru-nguruna Simo, au rahanga wori Peturu; roo indo, Andaria adina Simo, Yakobu anana Sebedeus, Yohane adina Yakobu, Pilipu, Bartolomeus, Tomas, Matiu toperuru asele, Yakobu anana Alfeus, Tadeus, Simo to Selot,#10:2-4 Simo iami hadua anggota partai nasionalis (au rauli “to Selot”) au moewa poparentana to Roma. hai Iskariot au mampobalu Yesu.
Yesu mopaturohe topeguruNa hai Natuduhe lao mobambari Ngkora Marasa
(Mrk. 6:6-13; Luk. 9:1-6)
5Au hampulo hai rodua iti natuduhe Yesu lao mobambari Ngkora Marasa. Hangko damanihe meangka, Napaturohe nauli node, “Ineekau lao i boeanda tauna au barahe to Yahudi. Ineekau lao i boeanda to Samaria. 6Agaiana laokau hampai i hangka to Yahudinta, pemuleanda to Isaraeli. Ihira nodohe dimba au puha. 7Niuliangaahe, ‘Barapi mahae ina hawe poparentana Pue Ala i dunia.’ 8Nipakaoha tauna au mahai, nipatuwo tauna au mate, nipakaoha tauna au kehaki tangga, nipopeloho seta au mampesuangi tauna. Ope-ope pewati nawei mberokau Pue Ala. Mewali, hangangaa niwei mbero worihe rangami pewati iti.
9Ineekau moanti anu-anumi i polumaomi. Ineekau moanti doi ba bulawa ba salaka. 10Ineekau mebaku, ineekau moanti badumi morontau ba kandupa ba lai. Lawi hintotokau molambi kaparaluuami hangko i tauna au nibambaria Ngkorana Pue.
11Ane hawekau i hambua boea, nihaoki inditi tauna au maroa lalunda au raunde modokokau i lalu sounda. Hai maidakau inditi duumi meangka lao i boea ntanina. 12Ane mesuakau i lalu sou, niuliangaahe ampu sou, ‘Pue mowatikau!’ 13Ane ampu sou iti bula lalunda modokokau, ina nawatihe Pue Ala. Agaiana ane barakau radoko, barahe ina molambi pewati hangko i Pue. 14Ane ara ampu sou ba ampu boea au barahe modokokau ba au barahe mounde mampehadingi lolitami, nipalehi sou ba boea iti, hai nitaronta awu au mentaka i palanta bitimi, iti tandana barapi ikamu au mohuru ane Pue Ala mohukuhe. 15Tou mpuu au Kuuliangaakau, i alo pebotusi i kahopoa dunia, meliu pehukuna Pue Ala i tauna iti pane pehukuNa i ampu boea Sodomo hai Gomora hangkoia.”
Pepopeahi-ahi i alo au ina mai
(Mrk. 13:9-13; Luk. 12:2-9; 21:12-19)
16“Maroa-roakau, lawi Kutudukau lao i tauna au kadake. Ikamu ina nodo dimba i olonda serigala. Hangangaa mapande-pandekau nodo ile, agaiana hangangaa nipamaalusu wori poantimi nodo tadasi manggebodo. 17Mainga-ingakau, lawi ikamu ina rahaka hai raanti lao i tadulako agama. Ina rapopeahi-ahiakau i lalu sou penombaa. 18Anti peulami Iriko, ikamu ina rahuhu i topoparenta hai i datu-datu. I tempo iti, ina raweikau katepaka mopahawe kana i pepoinalaimi Iriko i lindonda topoparenta hai i tauna au bara manihe moisa Pue Ala.
19Agaiana ane raantikau lao i topoparenta, ineekau langa kana i apa au ina niuliangaahe ba noumba pehanami. Lawi i tempo iti, Pue Ala ina mouliangaakau apa au hintoto niuli. 20Mewali, apa au niuli i tempo iti, bara hangko i pekirimi. Lolitami iti ina mesuwu hangko i Inao Malelaha au Naweikau Umami au ara i suruga. Iami au ina mopakanotoakau apa au niuli i tempomi mololita.
21Hambela tempo, tauna ina mohuhuhe halalunda ba ananda au meulahe Iriko bona rapapate. Ara wori anangkoi au ina moewa tosaenda hai ina nahuhuhe rapapate. 22Ina rakahihikau ope-ope tauna anti peulami Iriko. Agaiana tauna au meula liliu Iriko duuna i kahopoana ina tehoremahe. 23Ane rapopeahi-ahikau i boea au hambua, padukau lao i boea hambuana. Bona niisa, Kuuliangaakau, hangko damanikau roo mobambari Ngkora Marasa i humalele tamponda to Isaraeli, Iko, Ana Manusia, ina hawe.
24Toposikola bara meliu karabilana hangko i guruna. Hadua hawi bara meliu karabilana hangko i ampuna. 25Apa au mewali i hadua guru, iti wori au ina mewali i topeguruna. Apa au mewali i hadua tuana, iti wori au ina mewali i hawina. Maroa-roakau, lawi Iko, Ampumi, hai ikamu, topeguruNgku. Mewali, ane rapana Iko rahanga Beelsebul, datunda ope-ope seta, pelumbunami ikamu au meula Iriko. Ina rakakabosai worikau.”
Ineekau mampokalanga manusia, aginami mengkorukau i Pue Ala
26“Agaiana kehapiri nodo, ineehe nipokalanga tauna au moewakau. Lawi ope-ope au Kuuliangaakau ide ina tewungkehi. Hai ope-ope lolitaNgku au tewuniangi mani batena ina tongawa.
27Apa au Kuuliangaakau au bara rahadi tauna ntanina, hangangaa nipololita i ope-ope tauna. Apa au Kukaneniakau i talingami, nipasimbuku kanipahawena i talinganda tauna bosa. 28Ineekau mampokalanga tauna au peisa peahe mopapate watami, lawi bara ara kuasanda mohukukau hawe i hae-haena. Au hangangaa nipokalanga iami Pue Ala, lawi Ia au makuasa motendekau i lalu naraka.
29Rombaa dena peisa rapobalu hampeka pea doi see. Agaiana nauri nodo, bara ara hambaa au mate ane bara peundeana Pue Ala, Umami. 30Apa mani ikamu. Mogalori weluami, naisa Pue Ala kangkaiana. 31Mewali, ineekau langa. Melumbu pekadipurana Pue Ala irikamu pane pokadipuraNa dena au bosa.
32Hema au mopangaku i lindonda tauna bosa peulana Iriko, ia ina Kupangaku wori i UmaNgku au ara i suruga. 33Agaiana hema au mosapuaka peulana Iriko i lindonda tauna, ia wori ina Kusapuaka i UmaNgku au ara i suruga.”
Mapari meula i Yesu
34“Inee niharunga kamaiNgku ide ina mopahintuwu tauna. Bara! KamaiNgku ide ina mampoposisala tauna. 35-36Lawi i kamaiNgku ide, tauna au hantambi ina mobungka-bungka, lawi hantanga meula Iriko, hantangahe bara. Ananda tobalilo moewa umana, ananda towawine moewa inana, maniana moewa pengantina.
37Hema au melumbu pampokakaiana inana ba umana pane pepokaahina Iriko, bara hintoto mewali topeulaNgku. Hema au melumbu pampokakaiana anana pane pepokaahina Iriko, bara hintoto mewali topeulaNgku. 38Hema au bara mau mohalea kau mombehape hai meula Iriko, bara hintoto mewali topeulaNgku. 39Hema au mokabaha peundeana haduduana hai meula Iriko kehapiri rapapate, ia ina molambi katuwo maroa au bara mokahopoa. Agaiana hema au mampeulai peundeana haduduana, bara ina molambi katuwo maroa au bara mokahopoa iti.
40Hema au modokokau, himbelami Iko au nadoko. Hema au modokoNa, himbelami Pue Ala au nadoko, lawi Ia au motuduNa. 41Hema au modoko hadua surona Pue Ala lawi ia mpuumi surona Pue Ala, ia ina molambi hurungina au hintoto i tauna au natudu Pue Ala. Hema au modoko hadua tauna au manoto lawi ia mpuumi tauna au manoto, ia ina molambi hurungina au hintoto i tauna au manoto. 42Hema au motulungi hadua topeulaNgku lawi ia mpuumi topeulaNgku, ina molambi hurungina i alo au ina mai. Kehapiri hadua tauna mowei pea owai ntoo i hadua topeulaNgku au koi tuwona, ia ina molambi hurungina hangko i babehiana au maroa.”
Цяпер абрана:
Matiu 10: NPY
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
@LAI 2016