Mat 13

Ngan kum ngos ɛymaken

(Mak 4.1-9; Luk 8.4-8)

1Ko se lu ɛ kechii fo, Jesus fəy se ndaa, è ndu, è diom əbghune kechem keghuye. 2Ngose wel kaame ɛ wen ɛybee bɛme, əb me lii se kenək è diom se ten nɛ ghel ɛjime teem se əbghune jio. 3Əb me se dinte əbnəə se ghene se ɛydio ɛ nganse suuye ge:

Wel ɛylem əblee nè lô shik se make ngos. 4Əb loo mak, ɛylee chemke ɛ beelese, əmnənme gwiy, è biŋte è yiɛ. 5Ɛylee chemke əbkuk ɛtiy nɛ ntiɛ wiy fo se ɛydio, è me fəyke kaŋ ɛymok bek ka ntiɛ nɛ̀ dion wiy fo. 6Chuy nɛy loo ban, è nyok əbfua ten, əb yoble bek ka ɛghaŋe nè báà toke lii se ntiɛ. 7Ɛylee chemke ɛ məme kenjoonjoŋ, ke me tooke, è kuy è chite. 8Ɛylee chemke nɛ lu ɛ ntiɛ ɛyjuŋ, è fəy, è kuy è loote koom. Əbtuu əblee se foo ɛshiɛ kaŋ əbviɛ chia ka ɛ́ nè maken, nɛ əblee foo ɛshiɛ kaŋ əmntuufe chia ka ɛ́ nè maken, nɛ əblee foo ɛshiɛ kaŋ əmmtal chia ka ɛ́ nè maken.

9Jesus loo ləysen è suuy ge: Naa ndɛ wɛ əb kiin əbtuule se yio, əb yio.

Shii wɛ Jesuse suŋnen ɛ nganse

(Mak 4.10-12; Luk 8.9-10)

10Ghon-ɛyfɛl nə Jesus kokte gwiy è bif se wen ge: Lu bek ghɛ wɛ wɛ̀ suŋnen se ghel ghine ɛ nganse?

11Əb fise ge: Feyine nɛɛymen ghɛne keele əbnəə wɛ kum ɛysak ə wen wɛ əb luun ɛ kenlete, dî è jia nɛɛy ge ghene keele. 12Naa ndɛ wɛ əb kiin lu nɛ Feyine nɛ̂y gise é ke dio, nɛ naa ndɛ wɛ əb báà se ki lu nɛ Feyine náà fii kɛ́ ɛylaaye kɛ əb kiin. 13Mɛ suŋnen se ghene ɛ nganse bek ge ghene kiye, yɛne wiy, yiote əbnəə, yio wiy, gese keele wiy. 14Ghene nɛɛy dî kenəə kɛ Ezaya wɛ wele ntum nə Feyine nè nyaken me kwɛn. Əb nè nyak ge:

“Ghɛne nɛ̂y yɛ yiote kɛn yioten, keele wiy;

kiye kɛn kiyen, yɛne wiy.

15Bek ge tetem ə ghel ghine boolemen,

ghene chite əbtuule ə ghen

è gese bvəte ɛshiɛ ə ghen,

fɛ ghene yɛ yɛn nɛ̀ ɛshiɛ ə ghene,

yio nɛ̀ əbtuule ə ghene

è yɛ keele əbnəə nɛ̀ ɛytem ə ghene,

è me fiile se mɛ

ka mɛ chuk ghene.”

16Ke lu kejuŋ se ghɛn bek ge ɛshiɛ ə ghɛne yɛne, nɛ əbtuule ə wɛne yio əbnəə. 17Ghɛn keele se əbluuy ge, ghele ntum nə Feyine se ɛydio nɛ̀ ghel ə Feyin ɛlee se ɛydio nè lô se shii se yɛn əbnəə wɛ ghɛne yɛnen, dî è jia yɛn, è se shii se yio əbnəə wɛ ghɛne yion dî è jia yio.

Jesus din kenəə kɛ ngane ngose chioten

(Mak 4.13-20; Luk 8.11-15)

18Ghɛn yiote yi kenəə kɛ kum ngane ngos ɛymaken. 19Ngos yɛ ɛy nè chemken ɛ beelese lu ghel ghɛ ɛ́ yion kenəə kɛ kum ɛysak ə Feyin è jia keele, Satan me gwiy è fəyse kenəə ten se ghene tetem. 20Ngos yɛ ɛy nè chemken ɛ əbkuk ɛtiy lu ghel ghɛ ɛ́ yion kenəə ə Feyin, ɛ́ me beeme kaŋ ɛymok nɛ̀ chɛkle. 21Ghene beeme, dî ke jia lii se ghene tetem. Ngɛkse ghene əbbaanese loo gwiy se ghene bek kenəə ə Feyin nɛ̂ ki ghene me fɛy kaŋ ɛymok. 22Ngos yɛ ɛy nè chemken ɛ məme kenjoonjoŋ lu ghel ghɛ ɛ́ yion kenəə ə Feyin ɛ́ vii ɛytem nɛ lu əbnəə wɛ ketuu ntiɛ fɛne ghene əbghaake, ke jia yɛ ki kelik ɛ ghene tetem, è jia koom əmtam. 23Ngos yɛ ɛy nè chemken ɛ ntiɛ ɛyjuŋ lu ghel ghɛ ɛ́ yion kenəə ə Feyin, ɛ́ lɛm se ɛytem, è me yɛ nɛɛy əbnəə əbjuŋe ka ngos yɛ ɛy nè koom ɛshiɛ əblik əbviɛ chia ka ɛ́ nè maken, ɛylee koom əblik əmntuufe chia ka ɛ́ nè maken, ɛylee koom əblik əmmtal chia ka ɛ́ nè maken.

Ngan kum ngos ghene əbgii

24Jesus gese maa ngan ɛylee se ghene ge: Ɛysak ə Feyine lu ka wel wɛ əb nè maken ngos ɛ wen ɛylem. 25Nɛy se lu nɛ ntəke nɛ ghele buunemen, wel əbbaanese nə wen gwiy è mak ngos əbgii se ten è lòò. 26Ngos yi fəy, è kuy è kɛɛte se koom, əbgii vi me yɛnsen sɛy. 27Ghon-ɛyfɛl nə wel vi gwiy è bif se wen ge: Babɛy, wɛ̀ lɛ nè báà mak nɛ lu ngos ɛyjuŋ ɛ wɛ̀ ɛylem-a? Ke ghan lɛɛy ge əbgii yɛ kuy ɛ ten? 28Əb fise ge: Nɛɛy wel əbbaanese nə mɛ. Ghon-ɛyfɛl ghii bif ge: Wɛ̀ koŋe ge ghɛs ndu è dəəne əbgii ten-a? 29Əb fise ge: Ɛngaŋ! Tame ghɛn loo dəəne, è chok ngos ɛ məme ten. 30Ghɛn vəse é əb yɛ kuy fo əbjim se chin se kechii kɛ ɛ́ náà kaa əbfua. Naa loo lu ɛ kechii fo é mɛ suuy se ghel ɛyfɛl ge: Ghɛn chia mbiy è dəəne əbgii vi è kul ɛ giɛse ɛ giɛse è nyok, è me dən ɛsaŋ è vii se mɛ əbŋwak.

Ngane ngos yɛ ɛy layten è chia

(Mak 4.30-32; Luk 13.18-19)

31Jesus gese maa ngan ɛylee ge: Ɛysak ə Feyine lu ka ɛyhiɛ ngose fekak yɛ wel nè liɛn è mak ɛ wen ɛylem. 32Ngos nɛ̂ yin lu nɛ ɛy layte è chia ngose əmkak naa sejim. Dî nɛ ɛy fəye, ɛy kuy è yɛ ghake chia naa əmkak əmjim. Əmnənme me yɛ gwiye bakle ndaase ghen ɛ ɛytam ten.

Ngan kum feshik

(Luk 13.20-21)

33Jesus gese maa ngan ɛylee ge: Ɛysak ə Feyine lu ka ɛyshiɛ feshik yɛ əbvii nè liɛn è too kɛlse əmnkfeŋ setal so, feshik fi jɛl kebane ten naa kejim.

Shii wɛ Jesus nè suŋnen ɛ nganse

(Mak 4.33-34)

34Jesus nè suuy əbnəə vin əbjim se ngose wel nɛ lu ɛ nganse. Əb nè báà suuy kenəə se ghene nɛ wiy ɛ nganse. 35Kii nɛ̂ kine nè lu se lunse kenəə kɛ wele ntum nə Feyine nè suuyen ge:

“Mɛ nɛ̂y yɛ suŋnen se ghene nɛ lu ɛ nganse;

mɛ nɛ̂y fekte əbnəə wɛ əb nè luun ɛ kenlete,

Se kɛ̀ɛ̀tè se əbliy wɛ Feyine nè bomen mbi.”

Jesus sayte ngan yɛ kum ngos ghene əbgii

36Jesus nɛy lòò è vəse feliɛ wel fi è lii se ndaa. Ghon-ɛyfɛl nə wene gwiy è suuy se wen ge: Fekte se ghɛs kenəə kɛ əbgii wɛ əb kuyen ɛyleme dinen. 37Əb fise ghene ge: Wel wɛ əb nè maken ngos lu Wanwel. 38Nɛ ɛyleme lu mbi yin. Ngos ɛyjuŋ lu ghel ghɛ Feyine saken, nɛ əbgii lu ghel ghɛ ɛ́ yion se Satan. 39Wel wɛ əb nè maken əbgii lu Satan, wɛ wel əbbaanese nə Feyine. Əbliye ɛydən ɛsaŋe lu əbliy wɛ mbi yî mɛy ɛ ten, nɛ ghel ɛydən ɛsaŋe lu nchiyse-ndaa nə Feyine. 40Kɛn ka ɛ́ nè baaten əbgii è nyok, lu ghɛɛ-ghɛɛ ka ke naa gan əbliy wɛ mbi mɛy. 41Wanwel náà tum nchiyse-ndaa nə wen é se baate ghel ghɛ ɛ́ nɛɛyen nɛ ghele nɛɛye mbeese gese nɛ ghel ɛbee ɛlee è fəyse se məme ghel ghɛ əb saken, 42è mak se kemboo əbvəs bene fɛ ghene náà toŋnen gese kfəle ɛsoŋ, 43é ghel ə Feyine me yɛ ban ka chuy ɛ məm ɛysak nə Ba ə ghen. Naa ndɛ wɛ əb kiin əbtuule se yio, əb yio.

Ngan kum kefaa əbkaa kɛ wel nè yɛnen

44Ɛysak ə Feyine lu ka ngan yɛ kum kefaa əbkaa kɛ ke nè luun ɛ əbkwak yɛnsen wiy. Wel nɛy yɛn, è nɛyte chite, è se saŋle naa se ŋaŋ, è ndu è feene ɛykɛŋ ə wen naa ɛyjim è yun əbkwake wɛ́ tene əbjim.

Ngan yɛ kum ɛytiy ɛyjuŋe

45Ɛysak ə Feyine gese lu sɛy ka ngan yɛ kum wel əbwɛy əblee wɛ əb nè kɛŋe ɛtiy ɛjuŋe se yun, 46é nɛy yɛn ɛylee nɛ ɛy jofe naa se ŋaŋ, è ndu è feene ɛykɛŋ ə wen ɛyjim, è yun so.

Ngan yɛ kum felame səəse

47Ɛysak ə Feyine gese lu ka ngan yɛ kum felame səəse fɛ ɛ́ nè maken ɛ jio ɛyghaken, fe koo ɛynkii səə sejim. 48Səəse lun se ten, ghel ɛykoo səəse guf, è fəyse se bɛy, è diom, è tayte sejuŋe è vii se nkaa, è fəyse sebee è maay. 49Lu ka ke náà yɛ lu əbliy wɛ mbi mɛyen. Feyine náà tum nchiyse-ndaa nə wen, é se gwiy è fəyse ghel ɛbee se məm nə ghel ɛjuŋe, 50è mak se kemboo əbvəs bene fɛ ghene yɛ toŋnen, gese kfəle ɛsoŋ.

Əbnəə əbfɛɛ ghene əbməə

51Jesus bif se ghon-ɛyfɛl nə wene ge, ghene sɛ lu nɛ ɛ́ keele əbnəə vin-a? Ghene beeme.

52Əb me suuy se ghene ge: Naa ndinte tesak ɛykɛ yɛ ɛy yiɛkemen se yɛ lu wel əblee ɛ məme ɛysak nə Feyine lu ka ba ə ndaa wɛ əb fəysen əbfua əbfɛɛ ghene əbməə ɛ wen ɛychia.

Ɛ́ tunse Jesus ɛ Nazalet

(Mak 6.1-6; Luk 4.16-30)

53Nɛy se lu ka Jesus dinten əbnəə se ghele ɛ nganse è mɛyse ɛ leghɛ, è me lòò se fo, 54è ndu se ghene ntɛk è se dinte əbnəə se ghele ɛ ghene ngay ɛyjem. Ghele yio è se lu nɛ̀ əbchíò əbyúméné, ghɛynen ge: Əb liɛ ghááy əbfee vin? Ke ghan lɛɛy ge əb yɛ nɛɛye əbnəə əbchio əbyúméné lɛ? 55Vin lɛ báà se lu wán ə kamenda-a? No ə wen lɛ wiy Mɛɛle-a? Jɛms nɛ̀ Josɛf, nɛ̀ Simon gese nɛ̀ Judas lɛ báà se lu ghone-no ə wen ɛluumene-a? 56Jɛmtese wene lɛ báà se chii ghɛsen nɛ̀ ghene fɛn-a? Əb liɛ ghááy əbtaawe wɛ əb nɛɛyen əbnəə vin so? 57Ghene ghɛynen dì, è me tunse wen.

Jesus me suuy se ghene ge: Ɛ́ lóó ɛ́ yɛ ngvəmle wele ntum nə Feyine əblik əbjim buu kɛn ɛ ghene ntɛk nɛ̀ se ghene ɛykfəə. 58Əb nè báà nɛɛy əbnəə əbchio əbyúméné fô bek ka ghene nè báà fo ɛytem se wen.

Цяпер абрана:

Mat 13: oku

Пазнака

Падзяліцца

Капіяваць

Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце

©CABTAL, 2012

Больш падрабязна Аб Ŋwaale Feyin; Kelek Kefɛɛ

Mat 13

Папулярныя біблейскія вершы з
Mat 13

Слухаць Mat 13

Біблія:

Oku

Пераклад: Ŋwaale Feyin; Kelek Kefɛɛ - oku

Mat 13

Mat 13

Папулярныя біблейскія вершы з Mat 13

Слухаць Mat 13

Біблія:

Oku

Пераклад: Ŋwaale Feyin; Kelek Kefɛɛ - oku

Mat 13

Папулярныя біблейскія вершы з
Mat 13