Марԛос 8
8
Иса чар һʼәзара тʼер дькә
(Мәтта 15:32-39)
1Ԝан рʼожада диса әʼлаләтәкә гьран щьвийа. Тьштәки ԝани хԝарьне тʼӧнәбу кӧ бьхԝарана, Иса гази шагьртед Хԝә кьр у гот: 2«Гӧне Мьн ль ве әʼлаләте те. Әв се рʼож ә тʼәви Мьн ә у тьштәки ԝани хԝарьне тʼӧнә. 3Һәгәр Әз ԝан бьрʼчи вәрʼекьмә малед ԝан, дьле ԝане рʼева хԝәва һәрʼә у жь ван һьнәк жи жь щийед дур һатьнә». 4Шагьртед Ԝи ле вәгәрʼандьн у готьн: «Ль ве бәрʼийе әме жь кʼӧ һаԛас нан дәст хьн, кӧ ве щьмәʼте тʼер кьн?» 5Иса жь ԝан пьрси: «Чәнд нанед ԝә һәнә?» Ԝана гот: «Һʼәфт». 6Һьнге әʼмьр кьр кӧ әʼлаләт сәр әʼрде рʼуне. Әԝи әԝ һʼәфт нан һьлдан шькьри да, әԝ кәркьрьн у паше данә шагьртед Хԝә, кӧ дайньнә бәр әʼлаләте. Ԝана әԝ данинә бәр ԝан. 7У чәнд мәʼсийед ԝанә һур жи һәбун. Иса бона ԝан жи шькьри да у гот: «Ван жи дайньнә бәр әʼлаләте». 8Ԝана хԝар у тʼер бун. Паше һʼәфт зәмбил жь һурькед бәрмайи бәрәв кьрьн. 9Әԝед кӧ хԝарьн, ԝәкә чар һʼәзар мәрьва бун. Гава кӧ Иса әԝ вәрʼекьрьн, 10перʼа-перʼа тʼәви шагьртед Хԝә кʼәтә ԛәйьке у чунә ԛәза Далманутайе.
Кʼәрәмәтәке чаԝа нишан жь әʼзмана дьхԝазьн
(Мәтта 16:1-4)
11Ферьси һатьн у дәстпекьрьн Исарʼа кʼәтьнә дәʼԝе. Әԝ дьщерʼьбандьн у жь Ԝи нишанәк жь әʼзмен дьхԝәстьн. 12Кʼур кʼәсәр һате у гот: «Чьма әва ньсьла ль нишанәке дьгәрʼә? Әз рʼаст ԝәрʼа дьбежьм кӧ ви ньсьлирʼа нишанәк найе дайине». 13Ԝи әԝ һьштьн, диса кʼәтә ԛәйьке у дәрбази ԝи бәри голе бу.
Һәвиртьрʼшке ферьсийа у Һеродәс
(Мәтта 16:5-12)
14Ижар шагьрта бир кьрьбу кӧ хԝәрʼа нан һьлдана. Ль щәм ԝан, ԛәйькеда пештьри нанәки тьштәки ԝани хԝарьне тʼӧнәбу. 15Иса тʼәми да ԝан у гот: «Мьԛати хԝә бьн, һʼәвза хԝә жь һәвиртьрʼшке ферьсийа у ӧса жи йе Һеродәс#8:15 Нав һьнәк дәстньвисарада дәԝса «Һеродәс» «Һеродәсийа» һәйә. бькьн». 16Ле әԝана нав һәвда хәбәр дьдан у дьготьн: «Нане мә тʼӧнә, ләма аһа дьбежә». 17Исава әʼйан бу кӧ әԝ чь дьбежьн у ԝанрʼа гот: «Һун чьма нав һәвда хәбәр дьдьн, кӧ нане ԝә тʼӧнә? Һәла һе һун фәʼм накьн? У сәре ԝәда рʼунани, һәла һе һун нагьһижьнә гьлийа?
18Чʼәʼве ԝә һәнә, һун набиньн?
Гӧһе ԝә һәнә, һун набьһен?
Чаԝа найе бира ԝә#8:18 Йерәмийа 5:21; Һәзәкийел 12:2. , 19чахе Мьн пенщ нан бона пенщ һʼәзар мәрьва кәркьрьн? Ԝә жь һурькед бәрмайи чәнд сәләйед тʼьжи бәрәв кьрьн?» Ԝан ле вәгәрʼанд у готьн: «Донздәһ». 20«У гава Мьн һʼәфт нан бона чар һʼәзар мәрьва кәркьрьн, ԝә чәнд зәмбилед тʼьжи бәрмайи бәрәв кьрьн?» Ԝан гот: «Һʼәфт». 21Иса ԝанрʼа гот: «Ле чьма һун һе фәʼм накьн?»
Ль Бәйтсайдайе ԛәнщкьрьна корәки
22У әԝ һатьнә Бәйтсайдайе. Һьнәка мәрьвәки кор ани щәм Иса у лава же кьрьн, кӧ дәсте Хԝә дайнә сәр ԝи. 23Әԝи жи дәсте мәрьве кор гьрт, жь гӧнд дәрхьстә дәр, тʼуйи чʼәʼвед ԝи кьрьн у дәстед Хԝә данинә сәр ԝи, пьрси: «Тӧ тьштәки дьбини?» 24Әԝи жи ль жоре ньһерʼи у гот: «Әз мәрьва дьбиньм, ле мина дара нә, кӧ дьгәрʼьн». 25Диса Иса дәстед Хԝә данинә сәр чʼәʼвед ԝи, кор зурʼ бу ньһерʼи у чʼәʼвед ԝи вәбун, һәр тьшт зәлал дит. 26Иса әԝ шандә мала ԝи у жерʼа гот: «Нәкʼәвә нава гӧнд»#8:26 Нав һьнәк дәстньвисарада әв жи һәйә: «Гӧндда кәсәкирʼа тьштәки нәбежи». .
Пәтрус шәʼдәтийе ль сәр Иса дьдә
(Мәтта 16:13-20; Луԛа 9:18-21)
27Иса тʼәви шагьртед Хԝә чу гӧндед Ԛәйсәрийа Филипойе у рʼеда жь шагьртед Хԝә пьрси: «Бь тʼәхмина мәрьва Әз кʼи мә?» 28Ԝан ле вәгәрʼанд у готьн: «Һьнәк дьбежьн ‹Йуһʼәннайе ньхӧмдар ә›, һьнәкед дьн дьбежьн ‹Елйас ә›, һьнәкед майин жи дьбежьн ‹йәк жь пʼехәмбәра йә›». 29Иса жь ԝан пьрси: «Ле һун чь дьбежьн? Бь тʼәхмина ԝә Әз кʼи мә?» Пәтрус ле вәгәрʼанд у готе: «Тʼӧ Мәсиһ и». 30Әԝи тʼәми ль ԝан кьр, кӧ дәрһәԛа Ԝида кәсирʼа тьштәки нәбежьн.
Иса дәрһәԛа щәфа у мьрьна Хԝәда дьбежә
(Мәтта 16:21-28; Луԛа 9:22-27)
31Пәй ве йәкерʼа Иса дәстпекьр шагьртед Хԝә һин кьр, кӧ гәрәке Кӧрʼе Мерьв гәләки щәфе бькʼьшинә, жь алийе рʼуспийа, сәрәкед кʼаһина у ԛанунзанада бе тʼәхсиркьрьне у кӧштьне, ле рʼожа сьсийа жь мьрьне рʼабә. 32Әԝи әв йәк зәлал гот. Һьнге Пәтрус Әԝ да алики у ле һьлат. 33Ле Иса сәр мьле Хԝәва зьвьрʼи у ль шагьртед Хԝә ньһерʼи, ль Пәтрус һьлат у гот: «Жь бәр чʼәʼве Мьн бәтавәбә, щьно! Чьмки нет-фькьра тә нә жь Хԝәде йә, ле жь мәрьвайе йә».
34Паше Иса гази әʼлаләте у шагьртед Хԝә кьрьн, ԝанрʼа гот: «Һәгәр йәк дьхԝазә ль пәй Мьн бе, бьра хԝә инкʼар кә, хаче хԝә һьлдә у пәй Мьн бе. 35Чьмки кʼи кӧ дьхԝазә әʼмьре хԝә хьлаз кә, әԝе ԝи ӧнда кә у кʼи кӧ әʼмьре хԝә бона Мьн у Мьзгинийе ӧнда кә, әԝе ԝи хьлаз кә. 36Чь фәйдә һәгәр мәрьв тʼәмамийа дьнйайе ԛазьнщ кә, ле әʼмьре хԝә ӧнда кә? 37Йан жи мәрьв чь дькарә бәр әʼмьре хԝәва бьдә? 38Әԝе кӧ Мьн у хәбәред Мьн нав ви ньсьле хальфи у гӧнәкʼарда шәрм һʼәсаб кә, Кӧрʼе Мерьв жи ԝе ԝи шәрм һʼәсаб кә, гава рʼумәта Баве Хԝәва тʼәви мьлйакʼәтед пироз бе».
Цяпер абрана:
Марԛос 8: KmrNTC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Институт перевода Библии, 2000, 2011