Мәтта 27
27
Иса дьбьнә бәр Пилато
(Марԛос 15:1; Луԛа 23:1-2; Йуһʼәнна 18:28-32)
1Гава сьбәһ сафи бу, тʼәмамийа сәрәкед кʼаһина у рʼуспийед щьмәʼте ль һәв шеԝьрин кӧ Иса чаԝа бьдьнә кӧштьне. 2Әԝ гьредан, бьрьн данә дәсте Пилатойе ԝәли.
Ахьрийа Щьһуда
(Кʼаред Шандийа 1:18-19)
3Һьнге Щьһудайе кӧ нәмамийа Ԝи кьр, дит кӧ Иса һатә нәһәԛкьрьне, пʼошман бу, әԝ си зив вәгәрʼандә сәрәкед кʼаһина у рʼуспийа 4у гот: «Мьн гӧнә кьр. Әз бумә сәбәбе хуна бесущ». Ԝана жи готә ԝи: «Чи мәрʼа нә? Тӧ зани». 5Әԝи жи әԝ зив авитьнә нав пʼарьстгәһе, дәркʼәт чу хԝә хәньԛанд.
6Сәрәкед кʼаһина зив һьлдан у готьн: «Нә рʼаст ә кӧ әм ван бькьнә нав хьзна пʼарьстгәһе, чьмки әԝ һәԛе хуне йә». 7Һьнге әԝ ль һәв шеԝьрин у бь ԝан зива Әʼрде Ахинкәр кʼьрʼин, бона тʼьрбед хәриба. 8Ләма әԝ әʼрд һʼәта иро жи «Әʼрде Хуне» те готьне. 9Һьнге әԝ готьна бь заре Йерәмийа пʼехәмбәр һатә сери: «Си зив ԛимәт дан, ԝәкә ԝи ԛимәте кӧ һьнәкә жь зарʼед Исраеле ԛайл бун 10у әԝ данә Әʼрде Ахинкәр, чаԝа кӧ Хӧдан мьнрʼа әʼмьр кьр»#27:10 Зәкәрийа 11:12-13; Йерәмийа 32:6-9. .
Пьрса Пилато
(Марԛос 15:2-5; Луԛа 23:3-5; Йуһʼәнна 18:33-38)
11Иса бәр ԝәли сәкьни, ԝәли жь Ԝи пьрси у гот: «Тӧ йи пʼадше щьһуйа?» Иса ԝирʼа гот: «Тә бь дәве хԝә гот». 12Ле чахе сәрәкед кʼаһина у рʼуспийа давитьнә Ԝи, Әԝи ԛәт щаба кәсәки нәда. 13Һьнге Пилато Ԝирʼа гот: «Тӧ набьһейи чьԛас шькийате Тә дькьн?» 14Әԝи диса щаба кәсәки нәда, һʼәта ԝәли жи шаш ма.
Диԝанеда һʼӧкӧме кӧштьне ль сәр Иса дәрдьхьн
(Марԛос 15:6-15; Луԛа 23:13-25; Йуһʼәнна 18:39–19:16)
15Әʼдәте ԝәли бу кӧ ль щәжьнеда бь хԝәстьна әʼлаләте гьртик ԝанрʼа бәрʼда. 16Һьнге гьртики ԝани кʼьфш һәбу, кӧ наве ԝи Барабас бу. 17Гава кӧ әԝана щьвийан, Пилато ԝанарʼа гот: «Һун кʼижани дьхԝазьн кӧ әз бона ԝә бәрʼдьм, Барабас йан Исайе кӧ Мәсиһ те готьне?» 18Әԝи заньбу кӧ жь дәст һʼәвсудийе Иса дабунә дәсте ԝи.
19Гава әԝ ль һәрәма диԝане рʼуньштьбу, кʼӧлфәта ԝи щаб шанд у гот: «Кʼаре тә әԝи Бесущ нәкʼәтийә, чьмки ве шәва дәрбазбуйи хәԝнеда бона Ԝи гәләк тьшт сәр мьнрʼа дәрбаз бун». 20Ле сәрәкед кʼаһина у рʼуспийа әʼлаләт рʼази кьр, кӧ Барабас бьхԝазьн у Иса ӧнда кьн. 21Ԝәли диса ԝанарʼа гот: «Һун жь ван һәр дӧйа кʼижани дьхԝазьн кӧ әз ԝәрʼа бәрʼдьм?» Ԝана жи гот: «Барабас!» 22Пилато ԝанарʼа гот: «Ле әз Исайе кӧ Мәсиһ жерʼа дьбежьн чаԝа бькьм?» Һʼәмуйа жи гот: «Бьра бе хачкьрьне!» 23Ԝәли гот: «Ле Әви чь хьраби кьрийә?» Һьнге ԝана һе кьрә ԛирʼин у готьн: «Бьра бе хачкьрьне!»
24Пилато жи дит, ԝәки тьштәк кʼаре надә, ле һе шәрʼ у дәʼԝ дәстпедьбә, ав һьлда ль бәр әʼлаләте дәстед хԝә шуштьн у гот: «Әз жь хуна Ви бесущ ьм. Һун хԝәха бьньһерʼьн». 25У тʼәмамийа щьмәʼте щаба ԝи да у гот: «Бьра хуна Ԝи ль сәр мә у ль сәр зарʼед мә бә!»
26Һьнге Пилато Барабас ԝанарʼа бәрʼда, ле Иса да бәр ԛамчийа у да дәсте ԝан кӧ бе хачкьрьне.
Әскәр ԛәрфе хԝә ль Иса дькьн
(Марԛос 15:16-20; Йуһʼәнна 19:2-3)
27Һьнге әскәред ԝәли Иса бьрьнә һьндӧрʼе ԛәсьре у тʼәмамийа рʼәфа әскәра сәр Ԝи щьвийа. 28Кʼьнще Ԝи же ехьстьн у чӧхәки соре гәвәз ле кьрьн. 29Паше тʼащәк жь стьрийа вәгьртьн данә сәре Ԝи у ԛамишәк жи данә дәсте Ԝийи рʼасте. Һьнге бәр Ԝи чок дан, ԛәрфе хԝә пе кьрьн у готьн: «Хԝәш бә, Пʼадше Щьһуда!» 30Тʼуйи Ԝи кьрьн, ԛамиш һьлдан сәре Ԝи хьстьн. 31Пәй ԛәрфкьрьнерʼа чӧхе сор жь Ԝи ехьстьн у кʼьнще Ԝи лекьрьн у данә пешийа хԝә бьрьн кӧ Ԝи хач кьн.
Хачкьрьна Иса
(Марԛос 15:21-32; Луԛа 23:26-43; Йуһʼәнна 19:17-27)
32Чахе әԝ дәркʼәтьнә дәрва, әскәра йәки курени дит кӧ наве ԝи Шьмһʼун бу, пʼейи сәр ԝи кьрьн кӧ хаче Ԝи һьлдә. 33Әԝана гьһиштьнә ԝи щийе кӧ жерʼа Голгота дьготьн, кӧ те фәʼмкьрьне: «Щийе Ԛафа». 34Шәрава зьрав тʼәвкьри дане кӧ вәхԝә. Ле чахе Әԝи тәʼм кьр, нәхԝәст вәхԝә.
35Әԝ хач кьрьн, сәр кʼьнще Ԝи пʼәшк авитьн у ль нав хԝәда бәла кьрьн#27:35 Нав дәстньвисаред пашԝәхтийеда әв жи һәйә: «Кӧ готьна пʼехәмбәр бе сери: ‹Кʼьнщед Мьн ль нав һәвда бәла кьрьн у сәр чӧхе Мьн пʼәшк авитьн›» (Зәбур 22:18). . 36Паше ԝе дәре рʼуньштьн у нобәдари ль Ԝи кьрьн. 37Нәһәԛийа Ԝи ньвисин данин феза сәре Ԝи: «ӘВ ИСА, ПʼАДШЕ ЩЬҺУЙА ЙӘ».
38Һьнге дӧ ԛачах жи тʼәви Ԝи һатьнә хачкьрьне, йәк мьле рʼасте у йе дьн мьле чʼәпе. 39Әԝед кӧ ԝьррʼа дьчун-дьһатьн Әԝ беһӧрмәт дькьрьн, сәре хԝә дьһʼәжандьн 40у дьготьне: «Нә Тәйе пʼарьстгәһ һьлшанда у се рʼожада чекьра? Дә Хԝә хьлаз кә, һәгәр Тӧ Кӧрʼе Хԝәде йи! Жь хач ԝәрә хԝаре!» 41Ӧса жи сәрәкед кʼаһина, ԛанунзана у рʼуспийа тʼәвайи ԛәрфе хԝә Ԝи дькьрьн у дьготьн: 42«Хәлԛ хьлаз кьр, ле Хԝә нькарә хьлаз кә! Әв нинә Пʼадше Исраеле? Дә бьра ньһа жь хач бе хԝаре у әме баԝәрийа хԝә Ԝи биньн. 43Гӧмана Хԝә дани сәр Хԝәде, дә бьра ньһа Ԝи хьлаз кә, һәгәр Хԝәде жь Ԝи рʼази йә, чьмки гот: ‹Әз Кӧрʼе Хԝәде мә›». 44Ԛачахед кӧ тʼәви Ԝи һатьнә хачкьрьне, ԝана жи ӧса тәʼн ль Ԝи дьхьстьн.
Мьрьна Иса
(Марԛос 15:33-41; Луԛа 23:44-49; Йуһʼәнна 19:28-30)
45Нивро жь сьһʼәта донздәһа һʼәта сьһʼәта сьсийа тʼәмамийа әʼрде бу тәʼри. 46Незики сьһʼәта сьсийа Иса бь дәнгәки бьльнд кьрә ԛирʼин у гот: «Ели, Ели, лама сабахтани?» кӧ те фәʼмкьрьне: «Хԝәдейе Мьн, Хԝәдейе Мьн, Тә чьма Әз һьштьм?»#27:46 Зәбур 22:1. 47Әԝе кӧ незик сәкьнибун, гава әв хәбәр бьһистьн, готьн: «Әԝ гази Елйас дькә». 48Йәк жь ԝан бь ләз бәзи, луфька бәʼре һьлда сьркеда кьр, ль сәр ԛамишәкива дани у да Ԝи кӧ вәхԝә. 49Ле һьнәкед дьн готьн: «Бьсәкьнә. Әм бьбиньн, кʼа Елйасе бе Ԝи хьлаз кә?»
50Иса диса бь дәнгәки бьльнд кьрә гази у рʼӧһʼе Хԝә да.
51Һәма һьнге пʼәрʼда пʼарьстгәһе жь сери һʼәта бьни ԛәльши, бу дӧ тиша. Әʼрд һʼәжийа, кәвьр ԛәльшин, 52тʼьрб вәбун у гәләк мьрийед бӧһӧрти рʼабун. 53Әԝ жь тʼьрба дәркʼәтьн пәй рʼабуна Исарʼа, чунә Бажаре Пироз у гәләка әԝ дитьн.
54Чахе сәрсәд у әԝед кӧ тʼәви ԝи нобәдарийа Иса дькьрьн, әʼрдһʼәж у әԝ һʼәму тьште ԛәԝьми дитьн, рʼьсасе әԝ гьртьн у готьн: «Рʼасти жи Әва Кӧрʼе Хԝәде бу!»
55Ль ԝе дәре гәләк кʼӧлфәт жи һәбун, кӧ дурва дьньһерʼин. Әԝ жь Щәлиле ль пәй Иса һатьбун, бәрдәсти Ԝирʼа кьрьбун. 56Мәрйәма Мәждәлани, Мәрйәма дийа Аԛуб у Усьв у дийа һәр дӧ кӧрʼед Зәбәди ль нав ԝанда бун.
Дәфьнкьрьна Иса
(Марԛос 15:42-47; Луԛа 23:50-56; Йуһʼәнна 19:38-42)
57Бәре еваре мәрьвәки дәԝләти жь Аримәтйайе һат, кӧ наве ԝи Усьв бу. Әԝ жи йәк жь шагьртед Иса бу. 58Әԝ чу щәм Пилато у щьнйазе Иса жь ԝи хԝәст. Ԝе гаве Пилато әʼмьр кьр кӧ щьнйаз бе дайине. 59Усьв щьнйаз һьлда, ԛәдәке кʼьтанийи паԛьжда кʼәфән кьр 60у дани нав тʼьрба#27:60 Тʼьрба Иса мьхарәк бу. Щьһуйа һьнге дәсте кʼева бьһата мьрийед хԝә дькьрьнә мьхара. Әԝ йан шкәфт бун йан жи ԛәйада дькʼолан. хԝәйә ну кӧ ԛәйеда кʼолабу. Паше әԝи кәвьрәки мәзьн һоли бәр дәре тʼьрбе кьр у чу. 61Мәрйәма Мәждәлани у Мәрйәма дьн ль ԝе дәре бун у пешбәри тʼьрбе рʼуньштьбун.
Нобәдаред тʼьрбе
62Рʼожа дьн кӧ пәй рʼожа тʼьвдарәккьрьне#27:62 «Рʼожа тʼьвдарәккьрьне» рʼожа инийе бу. бу, сәрәкед кʼаһина у ферьсийа ль щәм Пилато щьвийан 63у готьн: «Әм хӧлам, те бира мә, кӧ әԝи дәрәԝин сахтийа Хԝәда готьбу: ‹Әзе рʼожа сьсийа жь мьрьне рʼабьм›. 64Ньһа әʼмьр кә кӧ һʼәта рʼожа сьсийа мьԛати тʼьрбе бьн, нәбә кӧ шагьртед Ԝи бен Ԝи бьдьзьн у щьмәʼтерʼа бежьн: ‹Әԝ жь мьрьне рʼабуйә›. Иди хальфандьна пашийе жь йа пешийе хьрабтьр бә». 65Пилато ԝанрʼа гот: «Ва нә ԝәрʼа әскәред нобәдар. Һәрʼьн чаԝа кӧ һун заньн ӧса жи мьԛати тʼьрбе бьн». 66Әԝ жи чун мьԛати тʼьрбе бун, кәвьр мор кьрьн у әскәред нобәдар ль бәр данин.
Цяпер абрана:
Мәтта 27: KmrNTC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Институт перевода Библии, 2000, 2011