Mark 10
10
1Lā geh‐īd lāk kās gāḵī lāḵ uḵās Judæa glū qīsūtas Jordan: gāḵa‐ās ītīdī da kīnum bagwānum lāk; wa lāḵīs īsī qātl qīgīlasa, la ītīd glīḵs‐āla lāh dāḵwuk.
2Gāḵa‐ā sa Pharisees lāk, gwānāk wuklāk, ek ma ī kā qīsdāmasī sī da numūqī bagwanum ḵīs kunumā?
3La nānāḵmī kās nīkī lāh dāḵwuk, mās wīs gla wātldum ūtlas Moses lāh dāḵwūkl?
4Lāh dāḵw nīkia, nīk wūtlī Moses kā k̤iātīd gītlī sī ḵā k̤iāduq, kās qīsdāmasī sī ḵīs kunumī.
5Aumīsī Jesus nīk lāh dāḵwuk, kegl kā īs pīsāh dāḵwūs naukāya lāgītl wūtl tsī k̤iatīd yisa wātldum kās:
6Geh‐īd glā‐kl lākīḵs gāla ūtlūḵ da nāhwāḵ uḵāya, lūtlī da Ik̤e Gīkumī baqīl glū zidākīla.
7Hīmīs lāgītl klisa bagwānum bo sīs ūmpī gla wīs abumpī, kās le lāḵīs kunumī.
8Lā klīḵs mālūqa ī numūq um‐kl lā‐kl, kās kīsī‐kl lā‐kl ītīd‐kl mālūq‐kl, au‐um glātl lā‐kl numūq um‐kl.
9Lāgītl klisa le āḵūtsū sa Ike Gīkumī, kīs klila gwītl‐zun tsūs numūqa bagwanum.
10Gil mīs la‐īkl lī da disciples wuklā ḵaāk lāḵ gada wātldumk.
11Wa la nīk lāh dāḵwuk, yiḵī da qīsdā mas kla ḵīs kunumī, kās kugādih‐īdī sa ūgwila mī, hī um yāksamī qīh‐īda‐asas.
12Glū kū hīlā ḵī da zidāk qīsdā mas ḵīs tlāwunumī, kās tlāwādih‐īdī sa ūgwila mī, lamīs yaksamī qīh‐īda‐asas.
13¶ Gāḵ dāḵwī sa gīnginānum unīḵwī lāk, kā pāgaā‐klilū dīsī sīs āsasūwī lāk: lī dā disciples yāk̤iālāh dāḵw ḵī da gāḵās.
14Gil mī sī Jesus dūḵ‐wāklilāk, la kīs ekākik, la nīk lāh dāḵwuk, gāḵ lehia ginginanumḵ gāḵun, qālas bulāq, kā īḵs yū ma ī qīx zāts gīkāsa sa Ike Gīkumī.
15Aulin nīkiūkl, yiḵ ungwā kla kīs dādāla kluḵ gīkāsa sa Ike Gīkumī hī qīxī ginanum bīdāwī, kīsā las tī la‐īkl lāk.
16La k̤utl‐īd ḵā ginginanum kās ekīlīk, kluḵwā sīs āyasū lāh dāḵwuk.
17Wa yiḵs la‐ī kās‐īd lāḵā tihyilā, gāḵa‐ā sa numūqī zilūnāqil lāk, la klāk‐wālīs lāk, kās wuklīk, Ek Gīkumī, māsin qīgīlas kla kun lo‐klīḵ hīmunīs qilā?
18Lī Jesus nīk yuk, māzīs glīḵ‐īd gītlas ekī gāḵun? kīyosa ās ekia hīga‐ma ā sa Ike Gīkumī.
19Kauklila ma‐ā kūsā ḵā wātlduma sa Ike Gīkumī, qālā k̤īlakiāḵ, qālā autlītā ḵā tlāwādī, qālā gilūklāḵ, qālā klīlk̤wāla sīs bahwit tūs, qālā nānūtl‐tsīlāḵ, māyāhyilāla ḵīs ūmpūs gla wīs abumpūs.
20La nīk yuk, Gīkumī yūwī‐stā mun āḵīlāqūḵ gāyābāla umḵ gin ginānuma ūtlik.
21Lī Jesus dūdūḵs‐unduk, la tlāhwila nūqs, la nīk yuk, numīs wayūglānuma ūs: hāga lāḵūd ḵīs māmīkiasa ūs, kās yāqā ūsā ḵā wī‐awūsīlākā, lamīsis lā‐kl k̤īk̤iyād‐kl lāḵā īk̤e awīnāgwīs, glū kās gāḵa ūs legī gāḵun.
22Aumīs yekilḵ‐īdis wātldumas, la zihyilīs naukāyāḵs la ī kās‐īdā; kā īs klūma īnāyī k̤īk̤iyādā.
23Lī Jesus mulmulsīlelāh‐īda, la nīk ḵīs disciples, aula wīstā tlāhwātla kā ī da uḵnūgwāde sa k̤īnumī dāla kās la‐īkl lāḵ gīkāsa sa Ike Gīkumī!
24Lī da disciples ḵunyāsas wātldumas: aumīsī Jesus ītīd nīk yuk, sāsum, aula ās tlāhwātla kāh dāḵwī da hīlīkule sīs k̤īk̤iyāda īnāyī kās lā‐īkl lāḵ gīkāsa sa Ike Gīkumī!
25Hūtlumātla kāwāya ī kā ī da gūdan kās le lāhsau lāḵ qoḵglāya sī da k̤unāyū, lā glā ḵī da k̤īk̤iyādī bagwānum kās la‐īklī lāḵ gīkāsa sa Ike Gīkumī.
26Wa lā wīs gla aula‐k̤iālāh dāḵw la ḵunyāsa, nīk yuk, wa ungwā zau tā klī da hītlilā klā?
27Lī Jesus dūḵwīd lāh dāḵwuk nīkia, tlāhwātla umhs glā tā kā bagwanum, kīs glā tā lāḵā Ik̤e Gīkumī, kā īḵs kīyosa ī wāhsūwī da Ik̤e Gīkumī.
28La āsī Peter nīk yuk, dok, gānūh la mīh tlowāklā ḵā nāhwā, gāḵ lega yūkl.
29Nīk tī Jesus, aulin nīkiūkl, kīyosa ī bagwanum ḵā le bo sīs gūq, gla wīs nātlnumwiyūt, gla wīs wī‐wāk̤wā, gla wīs abump, gla wīs ūmp, gla wīs sāsum, gla wīs awīnāgwīs, kā un, glū kā ī da ek wātldum,
30Lā glā klī lo‐kluḵ lāk̤inda punā kla lāḵūḵ da bunīḵ awīnāgwīs, gūq, glū nātlnumwiyūt, glū wī‐wāk̤wā, glū ībump, glū sāsum, glū awīnāgwīs, glū māmīklātla sa‐wa; hīmīs lāḵī da ītalīs kla ī hīmunīs qilā.
31Lā glā tī kīnumī da gālā‐gīwāya, lā‐kl ātlilḵsdī‐kl; hīmīsī da ātlilḵsdiyā lā‐kl gālāgīwī‐kl.
32¶ Wa lāh dāḵw mīs ke‐nāqil qayūtlil lāḵ Jerusalem, gāla‐gīwālīs tī Jesus yih dāḵws: lāh dāḵw tā ḵunyāsa, lāh dāḵw ḵa ī da legāyī kitlilā: la ītīd uḵ‐īd ḵā mālūgwigiyū, kās nītlī sa nāhwā qīh‐īdaās kluk.
33Nīkia, dok, lamunts lā‐kl lāḵ Jerusalem, lamīs lā klī da Ḵwanūqa sa bagwanum zawekl lāḵā gī‐gikumāyī la‐ulbled gla wī da scribes, lāh dāḵw klī nīk‐kl kā tlilīs, lāh dāḵw klī zaw klis lāḵā Gentiles;
34Lāh dāḵw klī a‐umtlātlā klis, qī‐qisumā kluk, glū hwisā kluk, lāh dāḵw klī tlilā mas kluk; wa kū lā‐kl yūduh punhwā zīs‐kl lāklī qilā‐gilīs‐kl.
35Gāḵa‐ā sī James glū John yiḵ sāsumas Zebedee nuhwāh‐īd lāk kās nīkīk, Gīkumī, nīkinūh kās hī ūs qelā kā unūhwunūh uḵk̤iāla sū kla lūkl.
36La nīk lāh dāḵwuk, māsīs qayūh dāḵwa ūs kun qīgīlas kās?
37Lāh dāḵw nīk yuk, hīd kās zaw ūs gāḵunūh kunūh k̤wātlī, numūqī sī lāḵūs hītlk̤iūta kāwāyūs, hīmīsī numūqā lāḵīs kumḵūtā kāwāyūs, lāḵīs hyāhyīlanūsa ūs qīxdum‐kl.
38Aumīsī Jesus nīk lāh dāḵwuk, kīs dāḵwa ākūs kauklila ḵīs uḵkiāla sū wūs: hītl‐āzaula mas nāḵ‐īd ḵī da k̤wāstā ḵun nākā sa wa, glū baptize īd tsū sa baptize īdāyū gāḵun?
39Lāh dāḵw nīk yuk, hītl‐āzaula munūh: lī Jesus nīk yuk, yiḵī da k̤wāste un nākā sa wa lāh dāḵw ums nāḵ‐īd kluk, glū wī da baptize zīnī baptize‐īdāyū gāḵun lamī baptize īdāyū‐kl lūkl:
40Wa yiglāḵ k̤wātla lāḵ gin hītl‐k̤iūtā kāwīk glū gwin kumḵūtā‐kāwīk kīs glā nūs kun zawya, hus dāḵw um glī ḵī da le qātlātlagīlī gītluk.
41Wa gil mīsī da nukoq la wuklilā ḵīk, lāh dāḵw wānīkās James glū John.
42Lī Jesus klīlālāk kā gāḵ dāḵwīs lāk, la nīk yuk, kauklilāh dāḵw um sīḵs gīgak̤āla īda īḵāyī kās gīkumāyī lāḵā Gentiles; glū īawīlāh dāḵwā sīḵs klīlumkāh dāḵwa ī lāh dāḵwuk.
43Kīs glā tā klis hī gāḵ qīx dāḵw klī: yiglā ḵī da nīk kla kās awīlī‐kl lāh dāḵwūkl, hīlūbātl‐zanī klī yūs.
44Wa yiḵī da ungwā kla nīk‐kl kās gālākumāyī‐kl lāh dāḵwūkl k̤ākiū klī sa nāhwā.
45Kā aula īnāyā sī da Ḵwanūqas bagwanum k̤īs hī gā‐gaḵītl kās aāḵsīlā sa wī, hī āglātl kās aāḵsīlī, glū kās zawe sīs bagwanum īnāyī kilhwās kā ī da kīnumī.
46¶ Gāḵ dāḵw lāḵ Jericho: wa yiḵs lā ī lotlzaulīs lāḵ Jericho gla wīs disciples hīmī sa kīnum bagwānum, yiḵ ḵwanūqas Timæus, Bartimæus ḵā pupāsī dādāk̤iāla ā k̤wāstaulīs ḵā tihyilā.
47Gil mīs k̤autl‐āklilā kīḵs he‐ī Jesusas Nazareth, la‐ās lāk̤wigātl nīkia, Jesus, yūkl Ḵwanūqs David, wāḵ‐īda gāḵun.
48La yāk̤iāla sū sa kīnumī, kās k̤wīklātlī: aumīs hutīd hāsil lāk̤wāla, Yūkl Ḵwanūqs David, wāḵ‐īda gāḵun.
49Lī Jesus wulga‐uls, la nīkia, klīlālāh dāḵw lāq: lāh dāḵw klīlgātl ḵā pupāsī bagwanum, nīk yuk, ekīkulāla, glāḵwīdaga, la ums klīlāla sūs.
50La uḵūd ḵīs nuhwunāyī, kās duhwilsī, kās gāḵī lāḵ Jesus.
51Lī Jesus nīk yuk, māsīs qayau ūs kun qīh‐īdaās kās? lī da pupāsī bagwānum nīk yuk, Gīkumī, kās wāḵā ūs dih‐īdā mas gāḵun.
52Lī Jesus nīk yuk, hāga ek umḵ, la ums hītl‐tsīstā matsū sīs ūqizīnāyūs: wa lamīs hīh‐īda um duqilāh‐īda, kās lāskumā yīk lāḵā tihyilā.
Цяпер абрана:
Mark 10: Kwak
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Historical texts first published by the British and Foreign Bible Society 1882-1897. These texts were digitised for the Canadian Bible Society.