Luke 12
12
1Wa lāḵīḵ, yiḵs la ī da kīnum ī lūḵlūḵwā kīkakaula la kāpīkū nāqila, ek la tīpāp sīs wāḵaās, la ās nīk ma wīs glā ḵīs kīkākūkla matsa wī gil sa nāhwā, kākumātlāh dāḵw la sa bābāwāyau sa Pharisees, yiḵā klīqāyī.
2Kīyos glā tā tāyaāqā yiḵā kīs kla nītl īdā matsūkl, glū qulāklātlā, ḵā kīs klā īs kauglikl.
3Lāgīklis mā zātl dāḵwa ūs la wātldum lāḵ pudikila lākl wūglikl lāḵ nāqātla: gla wī da le yūs wātldum lāḵā puspayū lāḵī da awīklila awīnāgwītla lā‐kl hāsilāyūkl lāḵ ūgwe sas gī‐gūqī.
4La mī sin nīk yūklin glīglaglaula, qālā kitlila yik dāḵw sī da tlilā masā ḵā ūqīnāyī, ātlākāwī sīk kīyos dāḵw tā lā lās qīgīlats.
5La mīs glin gāgālasīlā‐kl hayāklūlā klūkl kla sīs kilumh dāḵw klā: kitlilā lats, yiḵā ātlākāwī sis la ī kīlagaqila qīhīdaas nūq kās zuḵzūdī lāḵ hell; kegl, nīkin klūkl, kitlilā lats.
6Kīsa ī da sikiā skum zisqāna lāḵūyū kā mātl tsum cent? la kīsī numī lāk klalīwī sū lāḵ dūqātla īnayā sa Ike Gīkumī.
7Lā gla tūḵ da sayēḵ sūs hyūmsīḵ nāhwā um hūzuqā: qālā kitlil; tlāhwilā kāwīh dāḵw sīts kīnum ī zī‐zisqāna.
8Lā ḵa un nīk yūkl, nāhwe ūlāqā klin lāḵ bagwānum, hī mīs lā‐kl ūgwākā‐kl ūlāqum‐kl tsa Ḵwanūqa sa bagwānum lāḵ angels ā sa Ike Gīkumī:
9Yiglā ḵī da hīhwe gāḵun laḵ bagwānum hīhwa sū‐kl lāḵ angels ā sa Ike Gīkumī.
10Gla wa nāhwe yākuntā klus wātldum lāḵ Ḵwanūqa sa bagwānum dīgiklilūd tsū klī lāk: lā glā ḵī da yākpāḵstā kla ḵā Holy Spirit kīs klī dīgiklilūd tsū‐kl lāk.
11Wa gilhdāḵw um‐kl wīs lā klūs lāḵā kīkāpīkawāzī, gla wa īaāḵsīla, gla wa tlītloqumāyī, qālā awīlilkulāk māsīs nānāḵma īnīh dāḵw kla ūs, glū mās klīs wātldumh dāḵw kla.
12Kā ī da Holy Spirit kākūklāmas klūkl, lāḵīs lā nāhwāh dum kla ūs hī‐kl qīhīd tsū klī lāḵīs wātldumh dāḵw kla ūs.
13¶ Wa numūq tā lāḵā kīkakautla nīk yik, Kākūklāmas, uḵkigātl laga ḵun numwiyūt kā wāwāhsaī‐kī sī ḵā hīlānum unūh gla wun.
14Aumīs nīk yik, bagwānum, ungwī da dādalīta masa gāḵun glū lāḵī wāwāhsa ā kulā kās?
15La nīk yik, yāklaula glū kās āḵīla ūs aḵs bībaqīnāyā kūs lāḵ awulkulā; ka īḵs kīsa ī hī qilātla gītlī bagwānumes oḵwādāās.
16Wa la nīk sa parable lāhdāḵwuk, nīkia, yiḵ awīnāgwīsa sa numūq kīkayād bagwānum gāḵā‐mas ḵā kīnum ī,
17La nānaukīhsāla qilīxma, nīkia, wīhīda zau klin, kā un kīyozīnāyī mūnāqila tsin nūnawīmas?
18La nīkia, ga mun qīhīda ās kligā: klīhiāḵūd klin klā ḵun gāyāzī, kun gūqīlāhīdīḵ wālasa kāwāya; wa hī mī sin lā‐kl mū‐nāqilas‐kl wīlā‐kl ḵun zīzidanū gla wun māmīkias.
19Wa la mī sin nīk‐kl ḵun bahwanāyī, la um kīnum īs māmīkias ūs ulgwāglaqā kā kīḵunḵīla kla: wīga nukūhwīdaga, humāplagā nākā‐laga, ekīkula laga.
20Lā glā tī da Ike Gīkumī nīk yik, yūkl nanūlū ḵwā kānūklīḵ la mūs bahwanāyā kūs dāh īd tsū‐kl lūkl: wa yiḵwā māmīkias īḵ le kūs qātlātlā matsū, ungwās klūḵ lūkl?
21Hī mīs qīx dsā tsī da ulgwāglī‐gayī kās uḵā, lāḵā ā kīs kīkayād kā ī da Ike Gīkumī.
22Wa la nīk lāḵīs kīkākūkla matsa wī, hī mī sin lāgītl nīk yūkl, qālā awīlilkula kā īs qilātla īnāyūs, mās dāḵwīs hume kla: kīs ḵād kā īs ūqīnā yūs mās dāḵwīs uḵundāyū kla.
23Kā ī da qilātla īnāyāḵs awīla kāwaya ā sa humāyī, lāḵa ī da ūqīnāyī awīla kāwī sa qītlqela.
24Gīgaīkulā la ḵā qāwīna yiḵs kīsa ī zumā, kīs ḵād kīklilīsa, yiḵā kīyosī mūzolasa glū gāyāze: la mī sa Ike Gīkumī humgīlāh dāḵw umk: aumā sūs glāgl tlāhwilā kāwīh dāḵw sa pīpāklūmas?
25Wa wīḵa ī lāhdāḵwūkl yisīs awīlilkula īnayī ginwākl‐ts num punkiā lāḵīs bagwānum īnayī?
26We kāsū kīyos dāḵw lāḵ qīhīdaās ḵā hulībīdāwī, mā zau tīs awīlilkula gītla kā ī da wa‐ūq?
27Gīgaīkula la ḵgā lilies, qāḵīnī gās, kīs īāḵulā, kīs umḵaā wīs mītā: la umḵaā wīsin nīk yūkl, wāh mā ī Solomon ūtla lāḵīs nāhwūtla kias aulāze kīs wūtl tī qālunq ga qīx ga numā lāḵ ga.
28Kā glū kūḵzūda um lāḵī da Ike Gīkumī ḵwā kītum āḵ sa awīnāgwīs īḵ, yiḵwā hīḵ qā‐īs ḵwā nālāḵ, lā klū‐ḵwāḵ tlinskla zuḵzūyūkl lāḵā qunyāzī; wī zī wāḵā ās klas kekāwī klas kūḵzūdāla īnī klasī lūkl, A yūkl hūlatl‐ts ūqizalazī?
29Qālā hyī ḵād āleḵ mās dāḵwīs hume kla, glū mās dāḵwīs nākā kla, kīs la hyī ḵād wīwayūquzī kulāḵ.
30Kā īḵs gestā mī gas qīgīlat sa līlqilāklayāḵ sa nāhwāḵ awīnāgwīs lālūklā sūs: kauklila ma ā glā sīs Umpa ūs yiḵs uḵīḵsdāla sa ā kūsāk gada mamīkias ig.
31Lālūklāhdāḵw lā hyī glāḵ gīkasa sī, wa lākl gada nāhwāg alīgin dāyū‐kl lūkl.
32Qālā kitlil, lūḵwātla bīdū; kā īḵs hī ma ā ekīkum sīs Umpa ūs kās zaw ūkl yisa gīkāsa.
33Lāḵūdihdāḵw la ḵīs īḵūs, kās yāqā ūsas wāḵ‐īnayī; dālāazī gīlāhdāḵw la kās īḵdāḵwus ḵā kīsa pīkīnūḵwā, tlīlāhwile lāḵā īkī kīsa wīlā īnūḵwā, kīsa nuhwa āts gilūklīq, kīs ḵād hyizihyāsa.
34Kā uḵās kla sīs tlīlāhwile yūs, hī umḵa ā wīs uḵāskl sīs naukāyūs.
35Wīga wusīga quḵ, glū mīhyita‐wāqīs nīnīgwaya wūs.
36Kās hīh dāḵwa ūs qīx ī bībagwānum dādūqātla ḵīs gīkumaya, kū gāḵ‐kl hwīlākākl lāḵā māle qīlasā; kā, gil mīkl‐ts gāḵ‐kl mahyitl‐tawe‐kl, hīhīdih dāḵw mīs uḵstūd kā ī.
37Ek wīs tī da hīlūbatl‐zanayī, yihdāḵw ḵā, kū gāḵ klī da gīkumāyī khā sū‐kl tsī kākā‐kamālā‐kl; aula kiasin nīk yūkl, yiḵs wisīkīdī kla, kās qasumgālītlī kluk kā humh‐īdīs, gāḵ‐kl ḵa ī aāḵsīlāhdāḵw kluk.
38Wa gil um lāḵ wīsī gāḵ lāḵ lāḵa la mākil, kākākamāla, glū kū gāḵ lāḵ lāḵā la yūduh‐wunḵī kākālāla, kās khāhdāḵwīk hī qa‐īsī, ā zī kiats ekia sa hīlūbātl‐zanayī.
39Kauklila ma ā kūsāḵs gil mī lāḵī da gīkumāya sa gūq kauklilāḵ gāḵ dumā sa gilūklīq, lā lāḵs dī kākālāla, lā lāḵs da ḵa ā kīs bo sīs gūq kās lāksawāsī.
40Ugwākāhdāḵw la qātlātlāḵ: kā gāḵ dum kla sa Ḵwanūqa sa bagwānum ḵīs kīs kla ūs ninkia‐īkīkl.
41Lī Peter nīkia, Gīkumī nīkiā sī tsūḵ da parable gāk̤unūhwā, glū lāḵ nāhwā mā?
42Lī da Gīkumāyī nīkia, ungwā zau wīs glī da nukutl‐tauya glū naukād aāḵsīla, yiḵ aāḵsīla mātsū kla sa Gīkumayī lāḵīs gūq, kā zaw lāhdāḵwuk yisa humāyī lāḵā zawhdumī?
43Azī kias ekia sa hīlūbātl‐zanayī yiḵā khā sū kla sīs Gīkumāyī hī qīgīlā klī.
44Aulā kiasin nīk yūkl, yiḵs aāḵsīla masī klāk lāḵīs nāhwā uḵā.
45Gil umkl wīs glī da hīlūbātl‐zanayī nīk‐kl lāḵīs naukāyī, ketla klin gīkumāya īs gāḵ‐kl; lā klī k̤īlāhīd kla ḵā bībagwānum hīlūbātl‐zanī gla wa zīdāk hīlūbātlzanī; lā klī humhīd glū nāḵīd kās wunātlī:
46Ḵā gīkumāya sa hīlūbātlzanāyī gāḵ‐kl ḵā nālā kla kū kīs‐kl nākiatlākl glū wāḵāzākīlas klas kīs‐kl ḵād kauglitlis, lā klī tūdzundikluk, kās glīḵīdī kluḵ uḵ‐klās gla wa wīwiyūqisī.
47Wa lā klī da hīlūbatlzanāyī, yiḵā kauklilāh deḵ naukāyā sīs gīkumāyī, kās kīsīh‐dī qātlātl‐masa, glū kīs nānākīgīḵ naukāyas, hwisā sū‐kl yis kīpenūstakā kla.
48Yiglā ḵī da kīs dī kauklilāk, kās uḵī ḵī da hwisā sū gwītlā las, lā klī hwisā sū klis hūlatl penūstakā kla: kā īḵs hī mī klī da zaw sa was kīnum, dākiālas kluk kīnum, gla wa gīzaula sa was bagwānum yis kīnum, hī um uḵkiālas dāḵw klisīḵ kīkūklā.
49¶ Gāḵī gin kun les hyīkulā lāḵwā awīnāgwīsīḵ; wa mās tā klin? kū la um lāḵ mīhyīq gīmūhw lāḵ.
50Lā gla tin uḵnūgwādis baptism baptizum kla gāḵun; ādsīs gin tlālāwilkulāg yiḵs kīs ma ā qātltsīstā.
51Nīnkīkulāh dāḵwā sin gāḵ kun zawes nākulkula lāḵwā awīnāgwīsī ḵā? nīkī gūkl, kī; hī glī wāwāhsaākā masa:
52Kā īḵs le kla gegiklilākl lāq sikioqkl lāḵā num gūq wāwāhsaākākl, yūdūq hāyūtaula gla wa mālūq, gla wa mālūq hāyūtaula gla wa yūdūq.
53Wāwāhsaākāh dāḵw klī, ūmp hāyūtaulā‐kl gla wīs ḵwanūq, gla wa ḵwanūq hāyūtaulā kl gla wīs ūmp: abumpa hāyūtaulā‐kl gla wīs zidāk ḵwanūqa, gla wa zidāk ḵwanūq hāyūtaulā‐kl gla wīs abump; nagwūmp hāyūtaula gla wīs zidākī nagwūmp, gla wa zidāk nagwūmp hāyūtaula gla wīs nagwūmp.
54¶ La nīk ḵā kīkakaula ūgwākā, gilh daḵw ma ā kūs dūqila ḵā unwāyī laḵa lunza sa sa klīsila, hīhīdih daḵw mī sis nīkia, gāḵ klī yūgwā kla; wa aula mīs gāḵā.
55Wa gilh daḵw um ḵa ā wīsis dūqila ḵā zilqa‐zis yaula, lahdaḵws nīkia, klūmā klūḵ zilqā‐kl, wa kās aulamī.
56Yūkl klīklaqis, kauklilāh daḵwa ā kūsāḵ ayūzūdes qīxdum kla sa awīnāgwīsīḵ gla wa īkī; wa mā zau tīs kīs dāḵwītla mātltela ḵgādā gāḵdumk?
57Mās daḵw zī ḵa īs kīsītla qilīxum dādalītāḵ nuke?
58¶ Kā sīḵs la ā kūs qayūtlil gla wīs hayūtūs laḵa dādalītā‐īnūḵ, āekkunwālāk kā bo wīs lūkl; āklas lā yūs laḵa dādalītā‐īnūḵ, lā klī da dādalītā‐īnūḵ lā klūs laḵa zikkilā, lā klī da zikkilā zukīklā klūs laḵa wālazī.
59La tin nīkiūkl, kīsī kla kūs qīwil zās nūq‐kl lāk, wāwāsdum kla ūs kīs mī kla kūs wīlūkau mas hutlākā‐kl lā ga ā‐kl laḵā lākla ātlulḵsdī‐kl cent.
Цяпер абрана:
Luke 12: Kwak
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Historical texts first published by the British and Foreign Bible Society 1882-1897. These texts were digitised for the Canadian Bible Society.