VPHAUNGC VYAUNGC 4
4
Kain nuiyc Abel
1Kvruex yimaq Adam kuex vtaungx nyuiuz rulc woalc naungx koq tueq Ewa kuex wvgvnz nyuiuz yaungx vtueq vsaz miqwaz saz jawx tueq. Ewa kuex, “Yehowa rueq romc lawc kuy ningkhvnc nuex miqwaz saz lvp tauk,” ngoz tueq jungx ruiux, vsaz kuex Kain#4:1 Kain: Vruex muingc kuex Hebre maq “lvp taq tueq” ngoc kvjaz rvtueq. ngoz tueq muingc tueq. 2Kvruex yimaq vsaz Abel kuex jawx tueq. Abel kuex khelbuenx remc jix waz rvtueq, Kain kuex wuik vnax yauk shuimc jix waz rvtueq. 3Vshauk puq httaz yix maq Kain rueq Yehowa muex shomc kuy tvkoc piq pulx thuey waqthuimx wvyvmc kuex lvmz laq vtueq kuq tueq. 4Kvruex yimaq Abel rueq muinz piq khelbuenx phungc kvwawc vphaungc vnyuiuz khelbuenx saz kuex lvmz laq vtueq, kvruex thvt ruiux vhvlx pinhtumc baung htenc shomc kuq tueq. Yehowa rueq Abel nuiyc piq rueq shomc kuq tueq kuex raungc raq tueq,#Heb 11:4 5yuq muinz Kain nuiyc piq rueq shomc kuq tueq kuex raungc raq muq. Kvkhoc ningkhvnc nuex Kain kuex pinhtumc khaq vtueq htvlx phawc bac tueq. 6Kvruex yimaq Yehowa rueq Kain muex, “Mnoz yvmx ngoz tueq lac khaq kaz tuiux? Yvmx rvtueq lac mhtvlx phawc bac kaz tvnx? 7Mnoz rueq vlvmx yauk shuimc shuimx ruiux kuex mhtvlx phawc shalc khvmz tueq;#4:7 shalc khvmz tueq: rvmuq ngoz ruiux mnoz rueq vshomc kuq kuex ngaz rueq raungc raq shaungx. yuq muinz mnoz rueq layx vbac yauk shuimc shuimx gay toq ningkhvnc nuex mvrax rueq mkaluix daungx hep maq sisunx bvmc yaq. Kvruex raq mnoz guimz wvnc roc yaq, yuq muinz mnoz rueq kvruex taungx gay lot shuiux,” ngoz tueq jungx tueq.
8Kvruex yimaq Kain rueq vnox Abel muex, “Tvnx nuex khuemx kaz ix,” ngoz tueq jungx tueq. Kvkaq tsuingnueyc kuex tvnx nuex httuiuc kaz tueq, Kain rueq vnox kuex thaungthoz naq vtueq thvt gay tueq.#Mat 23:35; Luk 11:51; 1Yoh 3:12
9Yehowa rueq Kain muex, “Mnox Abel m-yuq lac?” ngoz tueq wiz tueq.
Piq rueq, “Ngaz tuiuz mauk. Ngaz kuex inox lawc mawc jix waz haz rvtauk nguinx?” ngoz tueq tvralc tueq.
10Yehowa rueq, “Mnoz rueq yvmx rvtueq lac vkhoc kvhiz juing yauk shuimc kuex shuimx vshuiux? Mnox piq tvguiy kuex murx tvyez kuy tvkoc gvl yaq tvruingc ikhoc ghaq vmaq ngaz muex ramc thvt yaq vnauz.#Heb 12:24 11Mnoz rueq piq thvt gay toq nuex piq tvguiy kuex lvp wvnc tvkoc ghaq rueq vnuix tvkac vtueq mnox tvguiy kuex nuingx gay tueq. Mnoz kuex mvnhttonc rvhumc vtueq wuik vnax shuimx ruiux muinz kungkhux wawc kuex lauz lot muq shex rvshuiux. 12Mnoz rueq ghaq nuex shuimx kaz khic yuingc ruiux muinz, vthuey vngoz thuey ngoz tuex rvmuq; mnoz kuex yuimx vwuik vguez maq ghaq htauk nuex kvroz httax tuiux.”
13Kvkaq Kain rueq Yehowa muex ngoc, “Vruex murx tvgurc vphux kuex ngvy tvkoc nanx lot mauk tanc khvnc yungx yaq. 14Mnoz rueq ngaz kuex vruex ghaq ruiykhuix vwawc nuiyc khaungkac wawc muinz yurc gay vphux shex. Ngaz kuex yuimx guez wuik guez maq ghaq ruiykhuix nuex dvyx shex khuemx httax taungx, ngaz rulc rvhumc jix waz ukhaq muinz ngaz kuex thvt gay phuex,” ngoz tueq jungx tueq.
15Yuq muinz Yehowa rueq, “Kvkhoc kuex rvmuq. Washiz shiz rueq mnoz thvt ruiux yuq, murx htvp mvshix tvyez kuy rvhumc tuex,” ngoz tueq piq muex jungx tueq. Kvkhoc rvtueq Yehowa rueq Kain humc jix bix ukhaq rueq muinz piq kuex thvt gay muq mruez shueq piq htauk nuex tvtsuingc juing kuq tueq. 16Kain kuex Yehowa khaungkac kvwawc kaz wvnc vtueq Eden maq shaldungc kox nuex httax tueq, “Khuemx juing baung,” ngoz tueq ngoz yaq mungx nuex httax kaz tueq.
Kain Suiuz Vsaz Hez
17Kain kuex vtaungx nyuiuz rulc woalc naungx koq tueq, vtaungx nyuiuz kuex wvgvnz yaungx vtueq vsaz miqwaz saz vmuingc Enok ngoz yaq kuex jawx tueq. Kvruex yimaq Kain rueq ghaqyungx tec ruiux vsaz muingc kuex lvmz vtueq, kvruex ghaq kuex Enok ghaqyungx ngoz tueq muingc tueq. 18Enok rueq vsaz miqwaz saz vmuingc Irad ngoz yaq kuex lvp tueq. Irad saz kuex Mehujael, Mehujael saz kuex Methushael, Methushael saz kuex Lamek rvtueq. 19Lamek rueq vtaungx nyuiuz nueyc lvmz tueq kuex Ada nuiyc Zilla rvtueq. 20Ada rueq vsaz miqwaz saz vmuingc Jabal ngoz yaq kuex jawx tueq. Jabal kuex khelx vmanx remx vtueq tap nuex httaz ngaungc jix muex jix vwaz yaungx tueq. 21Vnox muingc kuex Jubal rvtueq, torox nuiyc toloz tuimc tvlc jix htenc muex jix vwaz yaungx tueq. 22Zilla rueq vsaz miqwaz saz vmuingc Tubal Kain ngoz yaq kuex jawx tueq, kvruex waz kuex jek waz tamx muex jix vwaz yaungx wvnc tueq. Tubal Kain shvlx nyuiuz kuex Naama rvtueq.
23Lamek rueq vtaungx nyuiuz nueyc muex ngoc,
“Ada nuiyc Zilla lex, ngvy kvjaz tay shuinz: ngaz rueq yalxrox washiz thvt gay tauk,
yvmx rvtueq lac ngoz ruiux lec piq rueq ngvy wungc khuec nuex rvtueq.
24Kain thvy jix waz kuex htvp mvshix murx tvyez rvhumc tuex ngoz ruiux kuex,
Ngvy thvy jix waz kuex rok mvshix maq lauk mvshix murx tvyez rvhumc tuex,”
ngoz tueq jungx tueq.
Set nuiyc Enok
25Adam nuiyc Ewa rueq vsaz miqwaz saz vshiz hulawx jawx yek tueq. Ewa rueq, “Kain rueq thvt gay tueq Abel pumhttungx miqwaz saz vshiz Tishox rueq kuq phuex,” ngoz tueq. Kvkhoc rvtueq vsaz kuex Set ngoz tueq muingc tueq. 26Set rueq muinz vsaz miqwaz saz lvp vtueq Enok ngoz tueq muingc tueq. Kvruex pat maq phaungc vtueq miqsaz rueq Yehowa vsawc muingc jungc kuex nawk palx wuez tueq.
Цяпер абрана:
VPHAUNGC VYAUNGC 4: HNOT01
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Hawa Naga Bible © Bible Society of Myanmar, 2014.