Лукара йибкьыд Шадды Хабар 6
6
«Кишды йыгъад ки иесси Илсанашды Дух йиъи»
1Сада кишды йыгъа ГьӀаса хуйяа хьуъ йиъина ай. Гьанийды мутагьӀлимеше гытӀбыр луулкьара, хыле ыйхӀаӀре, кьирид сукбыр улере ай. 2Фарисейеше рухьура:
– ВаӀ шиви гьаъад? Кишды йыгъа гьааса гьаъас ихтияр ад диш!
3– ВаӀ кьыле гьыъыд дишме, Давыд-пайгъампарара, шыв гьыъырди, джуу на джуды илсанашыы гаӀш йибкьыйне? – джываб хъывылцӀара ГьӀасара. – 4Гьа Йинчид Хала йыхьыр, гъарсыд хьыв лаӀшур, джу ки луьъури, джуды илсанашис ки кывыри, амма гьа хьыв дибирешыыла гъайри гьалысна улес ихтияр ад диш. – 5Хьели ГьӀасара рухьура: Кишды йыгъад ки иесси Илсанашды Дух йиъи.
6Мирджед Кишды йыгъа ГьӀасара синагогади йыхьыр, илсанар хӀар даъара ай. Ай гьади са гьӀарчед хыл къуру йишир ад эдеми. 7Диндид магьӀалимер не фарисейер макъыет диъий, ГьӀасара гьа кишды йыгъа хъаъарамыхь хьур, хьели гьа нагьакь гьаъас йигара. 8Амма ГьӀасас гьацӀарай гьабишды фикирбыр, гьадыыла хыл къуру йишир ад эдемиеде рухьура:
9– Лаъ луза, йыкьа мидиъ йыкьӀаӀ. За хулкара ваӀдаа, – сулкара тимбишихда ГьӀаса, – шыв гьаъас ихтияр а кишды йыгъа: йыхаъан име, – писвалды? Илсанас йикьис куьмег гьаъасиме, ешемиш йикис?
10Сиенебишихда гакъыр, ГьӀасара рухьура эдемиеде:
– Хьуъ гьаъ хыл!
11Тиние гьааса гьаъара – хыл ки хъӀугъӀуре. ГьӀасад душманаше хьуйне, хъӀал либкьыр, фикир ваъара, шыв гьаъасди ГьӀасак.
ГьӀасара кеетӀид цӀыкьӀваӀр шагырт
12Сада гьа йыгъырма ГьӀаса руъура банаа дугьӀабыр гьаъас.
Вышед-йокшир Миние Йинчис дугьӀабыр гьаъара. 13ЙаӀкв йишийне, сес ваъара Миние джуды мутагьӀлимешихда, хьели кеэделъэре гьабишиклаа цӀыкьӀвар, гьабишыы «шагыртар» хьур дур лирхьере. 14Гьабыр диъий: Симан, Гьание «Петр» дур лихьир ад, гьанийды шу Андрей, Якьуб, Янан, Филипп, Варфоломей, 15Матфей, Фома, Якьуб, Алфейды дух, Симан, Зелот хьур лакьаб гъад, 16Джавыд, Якьубды дух, са ки Джавыд Искариот, Гьа хьели масак выд.
17Гьабишихьван саъ хъиркьыр, ГьӀаса дуьзенаа лубзура, джуды мутагьӀлимешды кӀабал гид, са ки сиене Иудеядаады, Иерусалимдаады, дейрагьад къирхыы гъад шегьермаа Тираа на Сидондаа йидкьыд гьӀараасат гид джигиди. 18Гьабыр сиене Гьанийхда хъадацус на эзримыс даваа ваъас йидкьыр адбыр диъий. ШийтӀамашде хабыр ки хъӀудирей, 19гьадыыла сиенебыр ГьӀасак кедкьас чалыш диъий, гьис хьуйне Гьанийклаа каӀаӀбчӀурей сиенебишис даваа ваъад яхӀ.
ЙахъӀ на ишел
20ГьӀаса мутагьӀлимешихда гакъара, гьалгара кагъӀуре:
– Шад диш, касибер!
Аллагьад ПагьӀчаалыгъ выхьды виъи.
21Гьамыъ гаӀше диъидбыр шад диш!
Йинчире ваӀ тух даъаси.
Гьамыъ дешедбыр шад диш!
– ВаӀ яхъӀ гьаъаси.
22Шад диш, ваӀ илсанашис кӀваӀчӀе диъиди,
йидиргади, хатир адгаъади, выхьды дур тӀалхъаъади –
йидж ки сиене Илсанашды Дух бадаана.
23Гьа йыгъа шад диш, шадваӀлире эли-аа сете!
ВаӀ хӀалире эккене шад даъаси!
Гьа илсанашды дидабар ки пайгъампарашихьван гьааса аӀчӀуд и.
24Амма пашмал диш, девлетлиер!
ВаӀ тух гемаа шад дишир а.
25Гьамыъ тухдыбыр пашмал диш!
ВаӀ гаӀш беъэси.
Гьамыъ яхъӀ гьаъадбыр пашмал диш!
ВаӀ дешере дыкьыркьаси.
26Илсанаше ваӀ дирзеди пашмал диш:
гьааса дирзерей нагьакьды-пайгъампарар
гьа илсанашды дидабаше.
Душман ки хъыгыр йыгара
27Амма ваӀде, захда хьадабцубишде, рухьура За:
выхьды душманар хъыдгара диш,
ваӀ кӀваӀчӀдыбишис йыхвалды ваъ,
28вахӀде къаргъышбыр гьаъабишихда алхышбыр гьаъ, выхьды хатир адгаъабишихъаъ дугьӀабыр гьаъ.
29Хьесымад са сур йыхӀыдбишихда ти сур хьуъ гьаъ,
гьалга чухуй эгъелъэре анахъун,
гьанийс выды ухун ки эгъепӀес куьмег гьаъ.
30Вадаа ягъӀыдухъундыбишис ви,
Гьалга вадаа хӀаашухьна, – хъӀымыягъӀ.
31ВаӀс шыв илсанаше ваӀ бадаана гьыъыр йигаарди,
гьа ваӀ илсанашис гьаъ.
32ВаӀ хъыдгабыр ваӀс ки хъыдганахъун,
гьа выхьды гьунар диш.
Гунаабыр кибишис ки хъыдгара джвер хъыдгабыр.
33ВаӀ куьмег са ваӀс куьмег гьаъадбишис гьаъанахъун,
Гьили а выхьды гьунар?
Гунаабыр кибише гьааса гьаъара.
34Нагагь ваӀ бырдж вылцӀанахъун са хъывыс йикиснийде,
Выхьды гьунар гьили а?
Гунаабыр кибише гунаабыр кибишде ки бырдж вылцӀара,
хьели лаӀхъӀашус хьур.
35ВаӀ гьааса маъ!
Выхьды душманар хъыдгара диш,
куьмегбыр гьаъ, бырджбыр вияъ,
гьидыына умуд гъадишне.
Хьели ва хӀалире шад даъаси;
ваӀ Йинчид духре дикиси,
Аллагь писдыбишихда на хатир джацӀабишихда ки йикӀе рагьӀим ад и.
36ВаӀ ки, выхьды Дид кал, рагьӀим адбыр диш.
«Гьалды-га гьакь гьамабутӀ»
37Гьалды-га гьакь гьамабутӀ – выхьды ки гьатӀусдиш.
Выш-га нагьакь маъ – ваӀ ки нагьакь даъасдиш.
Хыл луьвуш – ваӀала ки хыл луьвшуси.
38Вияъ – ваӀс ки выси,
гуг гъад кьадар выси:
субда выъыр, аӀшур, уула ки лаъ либхьуд кьадар
выхьды чухуед этеге ивхьиси.
Шууды кьадарахьван ваӀ рацура ади,
ваӀс ки гьааса гьацуси.
39ГьӀасара гьабишис мисед ихтилат гьаъара;
БыркьӀынийдаа быркьӀынийды хьура гаӀчӀус йикисиме?
КьӀваӀрси гьабыр хьвара идхьусдишме?
40МутагьӀлим магьӀалимехъаъ лаь руъуд диш.
Кьыле выъын лаабтӀудка,
гьанийдаа магьӀалимехьван сакал йикис и руъуд.
41Бес гьис ва выды шуд уле ад чӀумлахда гакъара,
Выдыди ад дал гьуджувгур?
42Шууна вадаа выды шуда гьухьус йичӀере:
«Гьай шу, йыкьа за выды уле ад чӀумул эхъетӀеси»,
выдыди ад дал гьуджувгади?
Десмалчи!
Суьхьде выхьды уле ад дал гъаъ эхъепӀе –
хьели гьагуси, шууна шуд уле ад чӀумул гъаъ эхъетӀесди.
43Йыхды хукара писды емишбыр гыргадиш.
«Емишмыыла хук вацӀара»
44Емишмыыла хук вацӀара!
Зазалмыд кулаала инджир сепӀес руъудиш,
рукьӀуу уу тӀымлад къиркъ руъудиш.
45Йыхды эдемиере йыхвалды эгъвелъэре
джуды йикӀе ад йыхваӀлид лакьаа,
Писдыние писваӀлид лакьаа писвалды эгъвелъэре.
Илсанашды ггаӀляа гъаъ руъуд джуды йикӀе адбыйды дишме?
Халбыр гьаъад кьӀвар эдеми
46Гьис ваӀ Захда «Илагьи, Илагьи» рухьура,
Амма За гьаъ хьуд гьаъаардиш?
47Захда йиркьыдбыйды,
48Захда хъабцудбыйды,
Гьалыхьван хилхьеэрди гьацӀарама?
Гьа хихьис йикиси эдемиехьван,
гьал, халбыр луза гьаъади,
гьабтӀур ади деринды къандах,
духлад хьеб сивир ад.
Вуруъура нацӀура юх,
дели вуруъура нацӀур,
хъивилхьвара ми халыхда,
амма гьа лукаъас руъурдиш,
гьис хьуйне, гьа бытӀраана луза гьыъыр а.
49Амма изды чӀилмыд ун ана,
гьаммыхда хьаджабцудбыйды,
ара хихьис йикиси эдемиехьван,
къандах джабтӀур, джиляа лаъ хал силхьере каӀчӀунийхьван.
Хъивилхьвара гьадыхда нацӀур,
Гьа ки гьассагьӀат лукури.
Гьадиклаа гелгад харабыр и.
Цяпер абрана:
Лукара йибкьыд Шадды Хабар 6: RUT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Библие мадды чӀилмыы хъывгад Институтара, 2004