Marko 15
15
Yesu ngɛ Pilato hɛ mi
(Mateo 27.1-2; 27.11-14; Luka 23.1-5; Yohane 18.28-38)
1Mɔtu mla a, osɔfo nikɔtɔma amɛ, ma nimeli ɔmɛ, mlaa tsɔɔli ɔmɛ, kɛ kpe ngua a tsuo ya da, nɛ a fi Yesu; nɛ a kɛ lɛ ya ha Pilato. 2Pilato bi lɛ ke, “Mo ji Yuda bi ɔmɛ a matsɛ ɔ?”
Yesu he nɔ ke, “Ja o de ɔ nɛ!”
3Osɔfo nikɔtɔma amɛ po e nya babauu nitsɛ, 4lɔ ɔ he ɔ, Pilato bi lɛ ekohu ke, “Hyɛ o nya sɔuu nɛ a ngɛ poe! O be nɔ́ ko dee?”
5Se Yesu de we nɔ́ ko hu; nɛ Pilato hɛ mi pee lɛ yaa.
A bu Yesu gbenɔ fɔ
(Mateo 27.15-26; Luka 23.13-25; Yohane 18.39—19.16)
6Daa Hetsɔmi nyami be ɔ, Pilato ngmɛɛɔ pã mi no kake nɛ ma a bi lɛ ɔ he haa mɛ. 7Jamɛ a be ɔ mi ɔ, nyumu ko nɛ a tsɛɛ lɛ Baraba ya piɛ ni komɛ a he kɛ tsɔ atuã, nɛ a gbe nɔ. Enɛ ɔ ha nɛ a wo mɛ tsu. 8Benɛ ni kpekpemi ɔ ba bɔni Pilato pɛɛ kpami ke e pee kaa bɔ nɛ e peeɔ daa a ngɔ ha mɛ ɔ, 9e he nɔ nɛ e bi mɛ ke, “Nyɛ suɔ kaa ma ngmɛɛ Yuda bi ɔmɛ a matsɛ ɔ he ha nyɛ lo?” 10E le faii kaa ninyɛ he je nɛ osɔfo nikɔtɔma amɛ nu Yesu kɛ ba ha lɛ ɔ nɛ.
11Se osɔfo nikɔtɔma amɛ wo ma a yi mi ke a bi lɛ ke e ngmɛɛ Baraba mohu he ngɔ ha mɛ. 12Pilato bi mɛ ekohu ke, “Lɛɛ mɛni nyɛ ngɛ hlae nɛ ma pee nɔ nɛ nyɛ tsɛɛ lɛ Yuda bi a matsɛ ɔ he mɔ?”
13A kpa huhui ekohu ke, “Sɛu lɛ!”
14Jehanɛ Pilato bi mɛ ke, “Se mɛni yayami po e pee?”
A kpa huhui wawɛɛ mohu pe kekle ɔ ke, “Sɛu lɛ!”
15Akɛnɛ Pilato ngɛ hlae nɛ e pee nɔ́ nɛ sa ma a hɛ mi he je ɔ, e ngmɛɛ Baraba he ha mɛ. Yesu ɔ lɛɛ e ha nɛ a fia lɛ kpa, nɛ e ngɔ lɛ ha a ya sɛu lɛ.
Ta buli ɔmɛ ye Yesu he fɛu
(Mateo 27.27-31; Yohane 19.2-3)
16Ta buli ɔmɛ ngɔ Yesu kɛ ho amlaalo ɔ mɔ ɔ mi ya; nɛ a tsɛ tabo ɔ tsuo kɛ ba kpe. 17A wo Yesu tade he jua wawɛ tsutsuutsu, nɛ a kɛ mio pee jlasi kɛ fi e yi. 18Kɛkɛ nɛ a bɔni lɛ ngami ke, “Yuda bi a matsɛ, manye oo, manye!” 19Kɛkɛ nɛ a kɛ tso fia e yi mi, nɛ a su lada ngɔ pue e nɔ, nɛ a kpla si ha lɛ kaa pe a ngɛ lɛ jae. 20Benɛ a ye e he fɛu se ɔ, a je tade he jua wawɛ tsutsuutsu ɔ ngɛ e he, nɛ a ngɔ lɛ nitsɛ e tade ɔmɛ ngɔ wo lɛ; nɛ a kɛ lɛ ho nɛ a ya sɛu lɛ.
A sɛu Yesu
(Mateo 27.32-44; Luka 23.26-43; Yohane 19.17-27)
21 #
Rom 16.13
Simon, Kirene no nɛ ji Aleksandro kɛ Rufo a tsɛ ɔ je ngmɔ si kɛ bee jamɛ a be ɔ mi. Ta buli ɔmɛ nyɛ nyumu nɛ ɔ nɔ ke e wo Yesu sɛumi tso ɔ. 22A kɛ Yesu ho he ko nɛ a tsɛɛ Golgata a ya (Golgata sisi ji Yikoklodonya). 23A ha lɛ wai nɛ a kɛ mire tsopa futu mi ke e nu; se e kua numi. 24#La 22.18 A sɛu lɛ, nɛ a fɔ e tade ɔmɛ a nɔ sɔ, nɛ a dla kɛ ha a he. 25Mɔtu ngmlɛ nɛɛ mi ɔ, a sɛu Yesu, 26nɛ a ngma sane nɛ a kɛ po e nya a kɛ mɛtɛ e yi je ke, “Yuda bi ɔmɛ a matsɛ ɔ.” 27A sɛu awi yeli enyɔ hu ngɔ piɛ e he; nɔ kake ngɛ e hiɔ nɔ, nɛ nɔ kake ngɛ e muɔ nɔ.
[ 28#Yes 53.12 Nɛ ngmami ɔ nɛ de ke, “A bu lɛ ngɔ si yayami peeli nɔ” ɔ ba mi.]
29 #
La 22.7; 109.25; Mar 14.58; Yoh 2.19 Nihi nɛ bee ɔ tu musu bɔmi munyuhi kɛ si Yesu. A mimiɛ a yi, nɛ a de ke, “Ei, mo nɛ o kuɔ sɔlemi we ɔ, nɛ o kpaleɔ maa lɛ ligbi etɛ ɔ ji nɛ ɔ! 30He mo nitsɛ o yi wami, nɛ o je sɛumi tso ɔ nɔ kɛ kple si!”
31Jã nɔuu osɔfo nikɔtɔma amɛ, kɛ mlaa tsɔɔli ɔmɛ hu ye e he fɛu ngɛ a kpɛti ke, “E he ni kpahi a yi wami, se lɛ nitsɛ e yi wami lɛɛ e nyɛ we nɛ e he. 32Ke lɛ ji Kristo, Israel matsɛ ɔ, e je sɛumi tso ɔ nɔ kɛ kple si nɛ waa na konɛ wa he ye!”
Ni enyɔ ɔmɛ nɛ a sɛu ngɔ piɛ e he ɔ hu ye e he fɛu.
Yesu gbo
(Mateo 27.45-56; Luka 23.44-49; Yohane 19.28-30)
33Diblii wo ngɛ zugba a tsuo nɔ kɛ je piani ngmlɛ nyɔngma kɛ enyɔ kɛ ya si ngmlɛ etɛ. 34#La 22.1 Ngmlɛ etɛ mi ɔ, Yesu kpa ngmlaa wawɛɛ ke, “Eloi, Eloi, lama sabaktani?” E sisi ji, “Ye Mawu, ye Mawu, mɛni he je nɛ o kua mi?”
35Benɛ nihi nɛ daa si ngɛ lejɛ ɔ, a ti ni komɛ nu ɔ, a de ke, “Hyɛ, e ngɛ Eliya tsɛe.” 36#La 69.21 Kɛkɛ nɛ a ti nɔ ko sa fo nɛ e ya ngɔ wo mi kutsa kɛ sɔ dã nɛ kuã mi, nɛ e kɛ ma tso nya ha lɛ ke e nu; nɛ e de ke, “Nyɛɛ mlɛ! Wa maa hyɛ kaa Eliya maa ba ba je lɛ lo!”
37Jehanɛ Yesu kpa ngmlaa wawɛɛ, kɛkɛ nɛ e ma nya.
38 #
Mose II, 26.31-33
Sɔlemi we ɔ mi pomi bo ɔ mi gba kɛ je hiɔwe ba ma si. 39Benɛ asafoatsɛ ɔ nɛ daa si ngɛ Yesu hanɔ ɔ na bɔ nɛ e plɛ kɛ gbo ɔ, e de ke, “Niinɛ, nɔmlɔ nɛ ɔ, Mawu Bi ji lɛ!”
40 #
Luk 8.2-3
Yi komɛ hu ngɛ lejɛ ɔ nɛ daa si ngɛ se banee ngɛ nɔ hyɛe. A ti ni komɛ ji Maria Magdalena kɛ Maria, Yakobo wayo kɛ Yose a nyɛ ɔ, kɛ Salome. 41Mɛ lɛ a nyɛɛ Yesu se kɛ je Galilea, nɛ a sɔmɔ lɛ ɔ nɛ. Yi kpa komɛ babauu nɛ kɛ lɛ ba Yerusalem ɔ, a ti ni komɛ hu ngɛ lejɛ ɔ.
A pu Yesu
(Mateo 27.57-61; Luka 23.50-56; Yohane 19.38-42)
42-43He dlami ligbi nɛ nyɛɛ Hejɔɔmi ligbi ɔ hɛ mi ji jamɛ a ligbi ɔ nɛ. Gbɔkuɛ ɔ, Yosef nɛ je Arimatia pee kã nɛ e ya Pilato ngɔ ya bi lɛ Yesu gbogboe ɔ. Yosef nɛ ɔ, kpe ngua a mi no nɛ a buu saminya ji lɛ, nɛ lɛ nitsɛ hu e ngɛ Mawu matsɛ yemi ɔ blɔ hyɛe. 44Se Pilato hɛ mi pee lɛ yaa kaa Yesu gbo momo. E tsɛ asafoatsɛ ɔ, nɛ e bi lɛ ke e gbo kɛ lo. 45Benɛ e ná le enɛ ɔ kɛ je asafoatsɛ ɔ nya a, e fa kaa a ngɔ Yesu gbogboe ɔ kɛ ha Yosef. 46Yosef ya he kploba; nɛ e ba je Yesu gbogboe ɔ kɛ je tso ɔ nɔ. E kɛ kploba a ha he, nɛ e ya to lɛ ngɛ yɔkɔ ko mi. Tɛ sa mi a kpɛ yɔkɔ ɔ ngɛ, nɛ a kpɛne tɛ kɛ tsi muɔ ɔ nya. 47Maria Magdalena, kɛ Maria, Yose nyɛ ɔ daa si nɛ a ngɛ hyɛe he nɛ a to Yesu gbogboe ɔ ngɛ ɔ.
Цяпер абрана:
Marko 15: Dangme
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bible in Dangme © Bible Society of Ghana, 2018.