Marko 10
10
Gba mi pomi he ní tsɔɔmi
(Mateo 19.1-12; Luka 16.18)
1Enɛ ɔ se ɔ, Yesu si lejɛ ɔ, nɛ e pue nɔ kɛ ho Yudea ní ɔmɛ a mi, kɛ Yordan pa a se ya. Nihi babauu ba bu e nɔ ekohu, nɛ e tsɔɔ mɛ ní kaa bɔ nɛ e pɔɔ peemi ɔ.
2Farisi bi komɛ ba e ngɔ ba hla e yi mi. A bi lɛ ke, “Anɛ wa mlaa a ngmɛɛ blɔ kaa nyumu fieɔ e yo lo?”
3Yesu he nɔ nɛ e bi mɛ ke, “Mɛni mlaa Mose wo nyɛ ɔ?”
4 #
Mose V, 24.1-4; Mat 5.31 A he nɔ ke, “Mose ngmɛ blɔ kaa ke nɔ ko maa fie e yo ɔ, e ngma fiemi womi, nɛ e wo lɛ blɔ.”
5Yesu de mɛ ke, “Mose ngma mlaa nɛ ɔ, ejakaa nyɛ tue wa. 6#Mose I, 1.27; 5.2 Se kaa bɔ nɛ ngmami ɔ de ɔ, ‘Sisije ɔ, nyumu kɛ yo Mawu bɔ. 7#Mose I, 2.24 Enɛ ɔ he ɔ, nyumu ma si e tsɛ kɛ e nyɛ, nɛ e maa mɛtɛ e yo he, 8nɛ mɛ ni enyɔ ɔmɛ tsuo a maa pee nɔ kake.’ Lɛɛ jehanɛ ɔ, a pi ni enyɔ hu, se nɔ kake. 9Lɔ ɔ he ɔ, nɔ́ nɛ Mawu ngɔ tsa a, nɔmlɔ kó gba mi.”
10Benɛ a kpale kɛ ba we mi ɔ, Yesu kaseli ɔmɛ bi lɛ munyu ngɛ sane nɛ ɔ he ekohu. 11#Mat 5.32; Kor I, 7.10-11 E de mɛ ke, “Nɔ tsuaa nɔ nɛ fieɔ e yo nɛ e ya ngɔɔ nɔ kpa a, e puɛ gba, ejakaa e pee yayami kɛ si e kekle yo ɔ. 12Yo nɛ kuaa e huno nɛ e ya gbaa nɔ kpa a, e puɛ gba ja nɔuu, ejakaa e pee yayami kɛ si e kekle huno ɔ.”
Yesu gbaa jokuɛwi komɛ
(Mateo 19.13-15; Luka 18.15-17)
13Ni komɛ ngɔ jokuɛ tsɔwi kɛ ba Yesu ngɔ konɛ e ngɔ ninehi ngɔ pue a nɔ; se e kaseli ɔmɛ kuɛ wo mɛ. 14Benɛ Yesu na a, e tsui fia, nɛ e de e kaseli ɔmɛ ke, “Nyɛ ha jokuɛwi ɔmɛ nɛ a ba ye ngɔ; nyɛ ko tsi mɛ blɔ, ejakaa nihi nɛ ngɛ kaa ni nɛ ɔmɛ a nɔ ji Mawu matsɛ yemi ɔ nɛ. 15#Mat 18.3 I ngɛ nyɛ dee anɔkuale mi ke, nɔ tsuaa nɔ nɛ he we Mawu matsɛ yemi ɔ kaa bɔ nɛ jokuɛ nyafii maa pee ɔ, e be mi sɛe kɔkɔɔkɔ.” 16Kɛkɛ nɛ e wo jokuɛwi ɔmɛ ngɛ e kɔni bɔkɔ mi, nɛ e ngɔ e ninehi ngɔ pue a nɔ, nɛ e gbaa mɛ.
Nyumu niatsɛ ɔ
(Mateo 19.16-30; Luka 18.18-30)
17Benɛ Yesu je kpo kɛ ma blɔ ɔ nɔ ekohu ɔ, nyumu ko sa fo kɛ ba na lɛ. E ba kpla si ngɛ e hɛ mi, nɛ e bi lɛ ke, “Tsɔɔlɔ kpakpa, mɛni ma pee nɛ ma ná neneene wami?”
18Yesu bi lɛ ke, “Mɛni he je o ngɛ mi tsɛe ke nɔ kpakpa? Nɔ kpakpa ko be kaa ja Mawu pɛ. 19#Mose II, 20.12-16; Mose V, 5.16-20 Tse o le mlaa amɛ: ‘Koo gbe nɔmlɔ; ko puɛ gba; koo ju; koo ye lakpa odase; koo sisi nɔ; bu o tsɛ kɛ o nyɛ!’ ”
20Se nyumu ɔ he nɔ nɛ e de lɛ ke, “Tsɔɔlɔ, i ye enɛ ɔmɛ tsuo a nɔ kɛ je ye jokuɛwi a si.”
21Yesu hyɛ lɛ too nɛ e suɔ lɛ, lɔ ɔ he ɔ, e de lɛ ke, “E piɛ mo nɔ kake. Yaa nɛ o ya jua níhi tsuo nɛ o ngɛ ɔ, nɛ o dla sika a ha ohiatsɛmɛ, nɛ o ba nyɛɛ ye se.” 22Benɛ nyumu ɔ nu nɔ́ nɛ ɔ, e hɛ mi tsake, nɛ e pue nɔ kɛ ho kɛ aywilɛho, ejakaa e ngɛ ní babauu.
23Yesu hyɛ e kaseli ɔmɛ a hɛ mi kɛ kpe, nɛ e de mɛ ke, “Nyɛ na bɔ nɛ e wa ha niatsɛmɛ kaa a maa ba Mawu matsɛ yemi ɔ mi!” 24Nɛ e de kikɛ nɛ ɔ, e kaseli ɔmɛ a he mi po. Se Yesu ya nɔ nɛ e de mɛ ke “Ye bimɛ, tse nyɛ na bɔ nɛ e wa ha nɔ ko nɛ ngɔɔ e hɛ ngɔ fɔɔ sika nɔ kaa e maa sɛ Mawu matsɛ yemi ɔ mi. 25E wa ha niatsɛ kaa e maa sɛ Mawu matsɛ yemi ɔ mi pe kaa afukpɔngɔ maa gu abui hɛngmɛ mi.”
26Benɛ e de kikɛ nɛ ɔ, e kaseli ɔmɛ a he mi po saminya, nɛ a bi a he ke, “Lɛɛ mɛnɔ yi wami a ma nyɛ he mɔ?”
27Yesu hyɛ a hɛ mi too nɛ e de mɛ ke, “Nimli a blɔ fa mi ɔ, a be nyɛe maa pee, ja ngɛ Mawu blɔ fa mi; ejakaa Mawu blɔ fa mi lɛɛ a nyɛɔ níhi tsuo peeɔ.”
28Kɛkɛ nɛ Petro je nya ke, “Hyɛ, wɔɔ lɛɛ wa si wa níhi tsuo nɛ wa ba nyɛɛ o se.”
29Yesu de mɛ jehanɛ ke, “Niinɛ i ngɛ nyɛ dee ke, nɔ tsuaa nɔ nɛ si e we, loo nyɛminyumuhi, loo nyɛmiyihi, loo nyɛ, loo tsɛ, loo bimɛ, loo zugba ngɛ imi, kɛ sane kpakpa a wa he ɔ, 30e nine maa su babauu nɔ ngɛ be nɛ ɔ mi. E ma na ní nɛ ɔmɛ kɛ bɔ he totoe lafa: we, nyɛminyumuhi, nyɛmiyihi, nyɛmɛ, bimɛ, zugba, kɛ yi wami hulɔ; nɛ e nine maa su neneene wami nɔ ngɛ je nɛ maa ba a mi. 31#Mat 20.16; Luk 13.30 Kekletsɛmɛ fuu ma ba pee sekpɛli, nɛ sekpɛli ma ba pee kekletsɛmɛ.”
Yesu tu e gbenɔ he munyu si etɛne
(Mateo 20.17-19; Luka 18.31-34)
32Jehanɛ Yesu kɛ e kaseli ɔmɛ ngɛ blɔ ɔ nɔ kɛ yaa Yerusalem, nɛ Yesu nyɛɛ a hɛ mi. Kaseli ɔmɛ a hɛ mi pee mɛ yaa, nɛ nihi nɛ nyɛɛ se ɔ, gbeye nu mɛ. Yesu ngɔ ni nyɔngma kɛ enyɔ ɔmɛ kɛ ya se ekohu, nɛ e bɔni mɛ níhi nɛ maa ba e nɔ ɔ demi ke, 33“Nyɛɛ bu tue; wa yaa Yerusalem, nɛ a maa ngɔ Nɔmlɔ Bi ɔ ngɔ wo osɔfo nikɔtɔma amɛ, kɛ mlaa tsɔɔli ɔmɛ a dɛ mi. A maa bu lɛ gbenɔ fɔ, nɛ a maa ngɔ lɛ ngɔ ha ma je li ɔmɛ. 34Ni nɛ ɔmɛ maa ye e he fɛu, nɛ a maa la lada ngɔ pue e nɔ. A maa fia lɛ kplibi, nɛ a maa gbe lɛ; se ligbi etɛ se ɔ, e maa te si kɛ ba wami mi ekohu.”
Yakobo kɛ Yohane bi nɔ́ ko
(Mateo 20.20-28)
35Yakobo kɛ Yohane, Zebedeo bimɛ ɔmɛ ba Yesu ngɔ ba de lɛ ke, “Tsɔɔlɔ, wa ma bi mo nɔ́ ko nɛ o pee ha wɔ.”
36E bi mɛ ke, “Mɛni nyɛ ngɛ hlae nɛ ma pee ha nyɛ?”
37A de lɛ ke, “Ke benɛ o hii si ngɛ o nyami sɛ ɔ nɔ ngɛ o matsɛ yemi ɔ mi ɔ, ha nɛ wa ti nɔ kake nɛ hi o hiɔ nɔ, nɛ nɔ kake nɛ hi o muɔ nɔ.”
38 #
Luk 12.50
Yesu de mɛ ke, “Nyɛ li nɔ nɛ nyɛ ngɛ bie ɔ. Amanehlu kplu nɛ ma nu ɔ, anɛ nyɛ ma nyɛ nu lo? Nɔ sɔlemi nɛ a kɛ maa sɔle mi ɔ, anɛ nyɛ ma nyɛ lo!”
39A he nɔ ke, “Wa ma nyɛ.”
Kɛkɛ nɛ Yesu de mɛ ke, “Kplu nɛ ma nu ɔ, nyɛ ma nyɛ maa nu, nɛ nɔ sɔlemi nɛ a kɛ maa sɔle mi ɔ, a kɛ maa sɔle nyɛ hulɔ lɛɛ, 40se ye hiɔ nɔ, kɛ ye muɔ nɔ himi ɔ, pi ye nɔ́ nɛ i kɛ haa, se mohu nihi nɛ a dla to ɔ a nɔ́.”
41Benɛ ni nyɔngma amɛ nɛ piɛ ɔ nu ɔ, a mi mi fu Yakobo kɛ Yohane. 42#Luk 22.25-26 Lɔ ɔ he ɔ, Yesu tsɛ mɛ tsuo kɛ ba e ngɔ, nɛ e de mɛ ke, “Kaa bɔ nɛ nyɛ le ɔ, je nɛ ɔ mi nɔ yeli ɔmɛ ngɛ he wami saminya nɛ a kɛ yeɔ ma je li ɔmɛ a nɔ wawɛɛ. 43#Mat 23.11; Mar 9.35; Luk 22.26 Se nyɛɛ lɛɛ nyɛ blɔ be jã. Mohu nɔ tsuaa nɔ nɛ hlaa nɛ e pee nɔmlɔ ngua ngɛ nyɛ kpɛti ɔ, e pee e he nyɛ tsɔlɔ; 44nɛ nɔ nɛ hlaa nɛ e pee e he nɔkɔtɔma a, e pee e he nyɛ tsuo nyɛ sɔmɔlɔ. 45Ejakaa Nɔmlɔ Bi ɔ tete bɛ nɛ a sɔmɔlɔ lɛ, se mohu e ba sɔmɔ, nɛ́ e ngɔ e wami ngɔ ha kɛ kpɔ nihi babauu.”
Yesu tsa Bartimeo hɛ yuyuilɔ ɔ
(Mateo 20.29-34; Luka 18.35-43)
46Jehanɛ a ba su Yeriko, nɛ benɛ Yesu kɛ e kaseli ɔmɛ, kɛ ma kpekpemi nihi babauu je lejɛ ɔ kɛ yaa a, a na Timeo bi Bartimeo hɛ yuyuilɔ ɔ nɛ hii si ngɛ gbɛjegbɛ ɔ tue ngɛ nɔ́ bae. 47Benɛ e nu kaa Yesu Nazaret no ɔ lɛ bee ɔ, e bɔni ngmlaa kpami ke, “Yesu, David bi, naa mi mɔbɔ!”
48Nihi fuu nga e yi ke e pee kɔ. Se e kpa ngmlaa wawɛɛ mohu pe kekle ɔ ke, “David bi, naa mi mɔbɔ!”
49Yesu da si, nɛ e ke, “Nyɛ tsɛ lɛ kɛ ba!”
Kɛkɛ nɛ a tsɛ hɛ yuyuilɔ ɔ, nɛ a de lɛ ke, “Na tsui; tee si, e ngɛ mo tsɛe!”
50Kɛkɛ nɛ e sake e tade klɔii ɔ ngɔ fɔ he; e te si pam; nɛ e ba Yesu ngɔ.
51Yesu bi lɛ ke, “Mɛni o ngɛ hlae nɛ ma pee ha mo?”
Hɛ yuyuilɔ ɔ de lɛ ke, “Tsɔɔlɔ, ha ma hyɛ nɔ́ ekohu.”
52Kɛkɛ nɛ Yesu de lɛ ke, “Yaa, o hemi kɛ yemi tsa mo!”
Amlɔ nɔuu ɔ, e bɔni nɔ́ hyɛmi, nɛ e kɛ Yesu ho.
Цяпер абрана:
Marko 10: Dangme
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bible in Dangme © Bible Society of Ghana, 2018.