JUAN 6
6
Ang Pagpakaon sa Lima ka Libo
(Mat. 14:13-21; Mar. 6:30-44; Luc. 9:10-17)
1Sa tapus sini si Jesus nagkadto sa tabok sang Dagat sang Galilea, nga amo ang Dagat sang Tiberias. 2Kag ang dakung kadam-an nagsonod sa iya, bangud nga nakita nila ang mga tanda nga ginhimo niya sa mga masakiton. 3Si Jesus nagtaklad sa mga bakolod, kag didto naglingkod kaupud sang iya mga gintoton-an. 4Karon ang Pascua, ang piesta sang mga Judio, malapit na. 5Niyan si Jesus, sang nagbayaw sang iya mga mata kag nakita ang dakung kadam-an nga nagapalapit sa iya, nagsiling kay Felipe, “Diin bala kita mabakal sing tinapay, agud ining katawohan makakaon?” 6Ini ginsiling niya sa pagtilaw sa iya, kay sia gid nakahibalo sang iya himoon. 7Si Felipe nagsabat sa iya, “Duha ka gatus ka denario#6:7 Isa ka denario mga P.40. nga tinapay indi makaigo sa ila agud nga ang tagsatagsa makakuha sing diotay.” 8Isa sang iya mga gintoton-an, si Andres, utud ni Simon Pedro, nagsiling sa iya, 9“May bata diri nga lalaki nga may lima ka tinapay nga cebada kag duha ka isda; apang daw ano man lamang ini sa amo nga kadamuon?” 10Si Jesus nagsiling, “Palingkora ninyo ang mga tawo.” Karon may madamung hilamon sa duug; gani ang mga lalaki naglingkod, nga mga lima ka libo ang kadamuon. 11Niyan ginkuha ni Jesus ang mga tinapay, kag sang nakapasalamat, ginpanagtag niya sa mga naglingkod; subong man ang mga isda, sono sa luyag nila. 12Kag sang nabusug sila, nagsiling sia sa iya mga gintoton-an, “Tipona ninyo ang mga tinipik nga nabilin, agud nga walay mausik.” 13Gani gintipon nila sila kag napuno ang napulog duha ka alat sang mga tinipik sang lima ka tinapay nga cebada, nga nabilin sang mga nagkaon. 14Sang nakita sang katawohan ang tanda nga nahimo niya, nagsiling sila, “Matuud gid ini amo ang manalagna nga nagakari sa kalibutan!”
Si Jesus Nagalakat sa Dagat
(Mat. 14:22-33; Mar. 6:45-52)
15Niyan si Jesus, sang nakahantup nga magakara sila sa pagpilit sa iya nga himoon sia nga hari, naglikaw liwat sa mga bakolod nga sia lamang.
16Sang kahaponanon na, ang iya mga gintoton-an nagdolhog pa dagat, 17nagsakay sa sakayan, kag nagtabok sa dagat pa Capernaum. Karon madulum na, kag si Jesus wala pa mag-abut sa ila. 18Nagmabalud ang dagat bangud sang mamadlus nga hangin nga naghuyup. 19Sang nakagaud sila sing mga lima ukon anum ka kilometro, nakita nila si Jesus nga nagalakat sa dagat kag nagapalapit sa sakayan. Hinadlukan sila, 20apang nagsiling sia sa ila, “Ako ini; dili kamo mahadluk.” 21Niyan nalipay sila sa pagbaton sa iya sa sakayan, kag sa gilayon ang sakayan nagdungka sa duta nga ila ginapadolongan.
Ang Katawohan Nagapangita kay Jesus
22Sa madason nga adlaw ang katawohan nga nagpabilin sa tabok sang dagat nakakita nga may isa lamang ka sakayan didto, kag nga si Jesus wala magsakay sa sakayan upud sa iya mga gintoton-an, kondi nga ang iya mga gintoton-an nagtaliwan nga sila lamang. 23Walay sapayan, may iban nga mga sakayan gikan sa Tiberias nga nag-abut malapit sa duug nga ila ginkan-an sang tinapay sa tapus nga nakapasalamat ang Ginoo. 24Gani sang nakita sang katawohan nga wala didto si Jesus, ukon ang iya mga gintoton-an, nagsakay sila sa mga sakayan kag nagkadto sa Capernaum, nga nagapangita kay Jesus.
Si Jesus ang Tinapay nga Nagahatag sang Kabuhi
25Sang nakita nila sia sa tabok sang dagat, nagsiling sila sa iya, “Rabbi, san-o ka pa mag-abut diri?” 26Si Jesus nagsabat sa ila, “Sa pagkamatuud, sa pagkamatuud, nagasiling ako sa inyo, nagapangita kamo sa akon, indi bangud nga nakakita kamo sing mga tanda, kondi nga nakakaon kamo sang mga tinapay kag nabusug. 27Pangabudlay kamo indi tungud sang kalan-on nga nagakawala, kondi tungud sang kalan-on nga nagapadayon sa kabuhi nga walay katapusan, nga ihatag sa inyo sang Anak sang tawo; kay sia ginpat-inan sang Dios nga Amay.” 28Niyan nagsiling sila sa iya, “Ano bala ang dapat namon himoon, agud mabuhat namon ang buluhaton sang Dios?” 29Si Jesus nagsabat sa ila, “Amo ini ang buluhaton sang Dios, nga magtoo kamo sa ginpadala niya.” 30Gani nagsiling sila sa iya, “Niyan ano bala ang ginahimo mo nga tanda, agud nga makita namon, kag magtoo sa imo? Ano bala ang ginabuhat mo? 31Ang amon mga ginikanan nagkaon sang mana sa kamingawan;#Ex. 16:4, 15. subong sang nasulat na, ‘Ginhatagan niya sila sing tinapay nga kaonon gikan sa langit.’#Sal. 78:24.” 32Niyan si Jesus nagsiling sa ila, “Sa pagkamatuud, sa pagkamatuud, nagasiling ako sa inyo, indi si Moises ang naghatag sa inyo sang tinapay gikan sa langit; kondi ang akon Amay nagahatag sa inyo sang matuud nga tinapay gikan sa langit. 33Kay ang tinapay sang Dios amo ang nagagikan sa langit, kag nagahatag sing kabuhi sa kalibutan.” 34Nagsiling sila sa iya, “Ginoo, hatagi kami sing dayon sining tinapay.”
35Si Jesus nagsiling sa ila, “Ako amo ang tinapay nga nagahatag sang kabuhi; ang nagakari sa akon indi paggutumon, kag ang nagatoo sa akon indi na gid pag-uhawon. 36Apang nagsiling ako sa inyo nga nakita ninyo ako kag bisan pa wala kamo magtoo. 37Ang tanan nga ginahatag sa akon sang Amay magakari sa akon; kag ang nagakari sa akon indi ko gid pagsobolon. 38Kay nagkari ako gikan sa langit, indi sa paghimo sang akon kabubut-on, kondi sang kabubut-on sang nagpadala sa akon; 39kag ini amo ang kabubut-on sang nagpadala sa akon, nga wala ako sing madula sang tanan nga ginhatag niya sa akon, kondi nga banhawon ini sa katapusan nga adlaw. 40Kay ini amo ang kabubut-on sang akon Amay, nga ang tagsatagsa nga nakakita sa Anak kag nagatoo sa iya may kabuhi nga walay katapusan; kag banhawon ko sia sa katapusan nga adlaw.”
41Niyan ang mga Judio nagkumud sa iya, bangud nga nagsiling sia, “Ako ang tinapay nga naggikan sa langit.” 42Nagsiling sila, “Indi bala ini si Jesus, ang anak ni Jose, nga ang iya amay kag iloy nakilala naton? Paano bala nga nagasiling sia karon, ‘Nagkari ako gikan sa langit’?” 43Si Jesus nagsabat sa ila, “Dili kamo magkumud sa inyo kaugalingon. 44Walay tawo nga makakari sa akon kon indi sia pagbuyukon sang Amay nga nagpadala sa akon; kag banhawon ko sia sa katapusan nga adlaw. 45Nasulat na sa mga manalagna, ‘Kag tudloan sila tanan sang Dios.’#Isa. 54:13. Ang tagsatagsa nga nakapamati kag nakatoon sa Amay nagakari sa akon. 46Indi kay may tawo nga nakakita sa Amay luwas sia nga nagikan sa Dios; sia nakakita sa Amay. 47Sa pagkamatuud, sa pagkamatuud, nagasiling ako sa inyo, ang nagatoo may kabuhi nga walay katapusan. 48Ako amo ang tinapay nga nagahatag sang kabuhi. 49Ang inyo mga ginikanan nagkaon sang mana sa kamingawan, walay sapayan nagkalapatay sila. 50Ini amo ang tinapay nga nagagikan sa langit, agud nga ang tawo makakaon sini kag indi mapatay. 51Ako ang buhi nga tinapay nga nagkari gikan sa langit; kon bisan sin-o ang magkaon sining tinapay, magakabuhi sia sing dayon; kag ang tinapay nga akon ihatag tungud sa kabuhi sang kalibutan amo ang akon unud.”
52Niyan ang mga Judio nagbinaisay, nga nagasiling, “Paano bala nga paghatag sining tawo sa aton sang iya unud nga kaonon?” [ 53Gani si Jesus nagsiling sa ila, “Sa pagkamatuud, sa pagkamatuud, nagasiling ako sa inyo, kon indi kamo magkaon sang unud sang Anak sang tawo kag mag-inum sang iya dugo, wala kamo sing kabuhi sa inyo kaugalingon; 54ang nagakaon sang akon unud kag nagainum sang akon dugo may kabuhi nga walay katapusan, kag banhawon ko sia sa katapusan nga adlaw. 55Kay ang akon unud kalan-on gid, kag ang akon dugo ilimnon gid. 56Ang nagakaon sang akon unud kag nagainum sang akon dugo nagapabilin sa akon, kag ako sa iya. 57Subong nga ang Amay nga buhi nagpadala sa akon, kag ako nagakabuhi bangud sa Amay, amo man ang nagakaon sa akon magakabuhi bangud sa akon. 58Ini amo ang tinapay nga naggikan sa langit, indi subong sang ginkaon sang mga ginikanan nga walay sapayan nagkalapatay; ang nagakaon sining tinapay magakabuhi sing dayon.”] 59Ini ginsiling niya sa sinagoga, sang nagpanudlo sia sa Capernaum.
Ang mga Polong nahanungud sa Kabuhi nga Walay Katapusan
60Ang madamu sang iya mga gintoton-an, sang nakabati sini, nagsiling, “Maiwat ining pololongon; sin-o bala ang makapamati sini?” 61Apang si Jesus, nga nakahibalo sa iya kaugalingon nga ang iya mga gintoton-an nagkumud sa sini, nagsiling sa ila, “Nagapasandad bala ini sa inyo? 62Niyan ano bala kon makita ninyo ang Anak sang tawo nga nagakayab sa diin sia sadto anay? 63Ang espiritu amo ang nagahatag sing kabuhi, ang unud walay pulus; ang mga polong nga napamolong ko sa inyo amo ang espiritu kag kabuhi. 64Apang may iban sa inyo nga wala nagatoo.” Kay si Jesus nakahibalo kutub sa ginsuguran kon sin-o ang wala magtoo, kag kon sin-o ang matugyan sa iya. 65Kag nagsiling sia, “Bangud sini nagsiling ako sa inyo nga walay tawo nga makakari sa akon kon indi natugut sa iya sang Amay.”
66Sa tapus sini madamu sang iya gintoton-an ang nag-isul kag wala na magpakig-upud sa iya. 67Si Jesus nagsiling sa napulog duha, “Buut man bala kamo maghalin?” 68Si Simon Pedro nagsabat sa iya, “Ginoo, kay sin-o bala kami makadto? Ikaw may mga polong sang kabuhi nga walay katapusan; 69kag kami nagatoo, kag nagakilala, nga ikaw ang Balaan sang Dios.”#Mat. 16:16; Mar. 8:29; Luc. 9:20. 70Si Jesus nagsabat sa ila, “Wala bala ako magpili sa inyo, nga napulog duha, kag ang isa sa inyo yawa?” 71Nagpamolong sia nahanungud kay Judas nga anak ni Simon Iscariote, kay sia, nga isa sang napulog duha, magatugyan sa iya.
Цяпер абрана:
JUAN 6: ABHIL82
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ang Biblia ©1982 Philippine Bible Society