Yorhaq 3
3
Yeqsur Hawr-eu Nirgawrdiq
1Khoerngae, Nirgawrdiq laer kur-eu Paqliqsaer tiq ghaq jawr-eu mae. Aqyawf-aq, Yurdav tsawrhaq-anr uvlanr-eu aqyuif tiq ghaq mae. 2Uqcif paw, aqyawf, Yeqsur jawr-eu gar lar-awr aer-eu, “Laqbir-or! Nawr-aq, Miqyaer jawr-eu gar nae oe-euq saqlaq tiq ghaq ngar-a laer nga’maf siqnya-eu ma. Aqjeq mirnae aernar-aq, nawq nae janr-euq bisiq bimawr-eu jeq, janr-eu ghaq naeq-aer Miqyaer maqjawr lawnmr-aq, tsawrhaq tiqghaq-iq maq janrnya-a.”
3Yeqsur aerkhof naeq-eu, “Ngar, nawq-anr aqdir aqmar aernaeq nyar, tsawrhaq tiq ghaq maq daefpov maq daefpar nar-aq, Miqyaer uvlanr-eu jeq-anr maqya mawr-ar.”
4Nirgawrdiq, aqyawf-anr narhaq-eu, “Mawqle-euq tsawrhaq aqjox-aer par daefpov par daefpar nya-eu la? Aqma-euq uqmav-euq lafkhoer urler-awr nyiq pov tiq pov par daefle nya-eu la laq?”
5Khoerngae, Yeqsur heulof-aer aerkhof naeq-euq mae, “Ngar, nawq-anr aqdir aqmar aernaeq nyar, tsawrhaq tiq ghaq ircuf hawr-eu muiq-eu Saflar-anr nae daefle-euq maqngeur nar-aq, Miqyaer uvlanr-eu lafkhoer maqya urler-a. 6Shiqshaq-anr nae daefle-euq jeq-aq, shiqshaq mae. Yawshawr Saflar-anr nae daefle-euq jeq-aq, saflar mae. 7‘Nawmaf ya daefpov ya daefpar mae’ laer ngar aer-eu gar nawr taq zanqler. 8Jaqlaer-aq, khar bawghae mawf-eu paw bawghae-eu mae. Nawr, jaqlaer baw-eu tersar-anr gaqnya-eu khawf, aqgeugar nae bawlaf-awr, aqgeu paw bawghae-eu nga laer maq siqnya-a. Yawshawr Saflar-anr nae daefle-euq tsawrhaq yawqghaq navluf khawf khoerlof-aer dur-eu mae.”
9Nirgawrdiq, aqyawf-anr aerkhof naeq-eu lafkhoer narhaq-eu, “Teulof-aer aqjox-aer pyeufnya-eu la?”
10Yeqsur, aqyawf-anr heulof-aer aerkhof naeq-euq mae, “Nawr, Irsaqleqlav tsawrhaq-euq saqlaq geufluf-eu khawf, garkawv heudeuq-anr maq ghovshaw nya-eu le siq laq? 11Ngar, nawq-anr aqdir aqmar aernaeq nyar, nga’maf siqluf-eu garkawv nga’maf ja-awr, nga’maf mawrluf-eu garkawv nga’maf sarkir kamq-eu ma. Aerkhawf, nga’maf sarkir kamq-eu gar nawmaf maq hageuf-a. 12Ngar, nawmaf-anr mirtsaq-anr taf-eu garkawv deuq ja’maeq-eu khawf, nawmaf maqjan nar-aq, ngar, nawmaf-anr mq-anr taf-eu garkawv deuq ja’maeq ngae, nawmaf aqjox-aer parjan nmr-mq? 13Mq-anr nae zafka le-awr, mq-anr khawf jawrluf-eu Tsawrhaq-euq Zaqyo maqngeur nar-aq, tsawrhaq tiqghaq-iq mq-anr maq davler haw-aq. 14Morseq, bawrtsanq bawrdanr-anr arlawr khanqtur-euq lof-aer, Tsawrhaq-euq Zaqyo-anr khawf khoerlof-aer yabi khanqtur taef-a. 15Khoer baqda’nae, aqyawf-anr kharjan-eu aqsur ghaq maqkaq, maqya cawv-ir-eu uqtaf, mqmaq maqbyav yarzir yadaef taef-a.”
Miqyaer, Mirtsaqzaq-anr Gaq Duidui-eu
16“Miqyaer, mirtsaqzaq-anr gaq duidui-eu mirnae, aqyawf-euq Zaqyo tiq ghaq taef khawf bifnaeq lef-euq mae. Zaqyo-anr kharjan-eu tsawrhaq maqya cawv-ir-eu uqtaf, mqmaq maqbyav yarzir yadaef-eu mae.
17Aqjeq mirnae aernar-aq, mirtsaqzaq-anr yarkhaq bidar-eu laer Miqyaer, aqyawf-euq Zaqyo-anr mirtsaq-euq khoertav khaerghae lef-euq maqngeur-a. Mirtsaqzaq, aqyawf-euq baqda’nae kakhof-eu jeq za’nya’ni khaerghae lef-euq mae.
18“Aqyawf-anr kharjan-eu tsawrhaq-aq, yarkhaq dar-eu gar maqya daq-a. Aerkhawf, maqjan-eu tsawrhaq-aq, yarkhaq dar-eu gar daqluf-eu mae. Aqjeq mirnae aernar-aq, aqyawf, Miqyaer-euq Zaqyo tiq ghaq taef-euq tsawrmyanr-anr maqjan-a. 19Yarkhaq dar-eu jeq-aq heulof-aer mae. Mirtsaq-euq khoertav yawshaefbya le-euq khawf, tsawrhaqzaq yawdoer jeq mr-eu mirnae, yawshaef-anr navmaqtser yawzanr-anr gaq-eu mae. 20Yawdoer jeq kharmr-eu tsawrhaq-aq, yawshaef-anr byae-awr, aqyawf mrluf-euq jeq maqya dovlarni yawshaef bya-eu gar maqlar-a. 21Aerkhawf, yawtsaq yawdawr jeq mr-eu tsawrhaq-aq, aqyawf nae mr-euq jeq, Miqyaer-anr ghoe-awr mr-euq nga laer byacaevni bi dovlar-eu gharduq, yawshaef jav-eu gar lar-eu mae.”
Yeqsur Hawr-eu Bartirsaq Mrnaeq-eu Yorhaq
22Khoernar-aq, Yeqsur hawr-eu aqyawf-euq zaqlanr deuq, Yurdav mirkhanq-anr ir-euq mae. Khoergar aqyawf, zaqlanr deuq naeq-aer jawr-awr, bartirsaq mrnaeq-euq mae. 23Khoerngae, Aernoq-anr jav-eu Saqliq meuq-euq dawqpae ircuf ghawqmya’ni danq-eu mirnae, Yorhaq bartirsaq mrnaeq luf-eu mae. Aqyawfmaf lar-awr bartirsaq hageuf lar-euq mae. 24(Heungae keuvni, Yorhaq, kuv-anr maqbi nyaefur-aq siq.)
25Khoerngae, Yorhaq-euq zaqlanr, Yurdav tsawrhaq naeq-aer lavmuiq lavshawr-eu zanr-euq garkawv dawqpyaer pyaerluf-eu mae. 26Aqyawfmaf, Yorhaq jawr-eu gar lar-awr aer-eu, “Laqbir-or! Hawsher-eq. Yawrdaq lawrbaq-euq nanrma dovkhaeq paw nawq naeq-aer jawr ngae, aqyawf-euq garkawv nawr sarkir kamq-euq khoerghaq, nymq-mr aqcawq-anr bartirsaq mrnaeq luf-eu mae. Tsawrhaq dawqtawvluf, aqyawf jawr-eu gar irluf-eu mae.”
27Yorhaq heulof-aer aerkhof naeq-euq mae, “Mq-euq khoertav jawr-eu Miqyaer nae bifnaeq-euq jeq maqngeur nar-aq, tsawrhaqzaq-aq tiqjeq-iq maqza nya-a. 28‘Ngar-aq, Kali maqngeur, Kali-euq maeqhu Miqyaer nae khaerghae lef-euq ghaq taef ma’ laer ngar, nawmaf-anr aernaeq-euq ma. Ngaq nae aer-euq dawq heudawq-anr nawmaf khawf sarkir kamqnya-eu mae. 29Miqshuif-anr sheuq-eu ghaq-aq, Yoshuif mae. Yoshuif-euq cawq yoshuif-euq dawqpae yawf-awr, yoshuif-euq dawq yagaq ngae, laqkhaqcaer duidui-eu mae. Khoerlof-aer durni, ngar khawf laqkhaq caer-eu jeq byan duidui mir-a. 30Aqyawf-aq, yahuiq ya manrlar-awr, ngar-aq, yateq ya’nyir-ir-eu mae.”
Mq-anr Nae Oe-euq Ghaq
31“Mq-anr nae oe-euq ghaq-aq, dawqtawv luf-euq khoertav huiqdzaeq-eu ghaq mae. Mirtsaq-anr nae dovlar-euq ghaq-aq, mirtsaq-anr taf-awr, mirtsaq-euq garkawv taef-aer ngaeq-awr tmr-eu mae. Mq-anr nae oe-euq ghaq-aq, dawqtawv luf-euq khoertav huiqdzaeq-eu ghaq mae. 32Aqyawf nae yagaq ya’mawr-euq deuq aqyawf sarkir kamq-eu mae. Aerkhawf, aqyawf nae sarkir kamq-euq gar tiqghaq-iq maq hageuf-a. 33Aqyawf nae sarkir kamq-euq gar hageuf-eu tsawrhaq-aq, Miqyaer-aq, tsaq-awr dawr-eu mae laer jmq diq-eu mae. 34Miqyaer nae khaerghae lef-euq ghaq-aq, Miqyaer-euq dawq ngaeq-eu mae. Aqjeq mirnae aernar-aq, Miqyaer, aqyawf-anr Yawshawr Saflar maqpaeq maq savjir coer-eu gar keuvni bif-eu mae. 35Aqda, Zaqyo-anr gaq-awr, yawqjeq navluf aqyawf-euq aqlaf-euq lafkhoer a’naeq jir-euq mae. 36Zaqyo-anr jan-eu tsawrhaq-aq, mqmaq maqbyav yarzir daef-eu jeq za-eu mae. Zaqyo-anr maqjan-eu tsawrhaq-aq, daef-eu jeq-anr maqya mawr-eu uqtaf, Miqyaer nuima paer-eu jeq, yawqjawr navluf aqyawf-euq khoertav javluf-eu mae.”
Цяпер абрана:
Yorhaq 3: AKA
Пазнака
Падзяліцца
Капіяваць
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions