LUK 24
24
A maraga taligu noi Jisas
1Lolo robongi siaga lo Sande, a muei rani talo wik, a vavine ram vano lo malanga, ram wali na gineu buhoru ngerehi rau vei rarai. 2Ram haqea ve a vatu u telulu beno dena malanga, 3siu ingere ram vano ram ahu lolona, nge rahe haqe na betui Huqe Jisas tea. 4Ram labe aie ko rahe ilo te vurugegi. Siserigi a tangaloi gairue rom labe lobera, a luqara u varavara u liu. 5Ram matagu garagara ko ram hudu sulo tano. Siu a tangaloi gairue hi rom veve lawera vena, “?Huri havai nem hikesi na tangaloi mwaso lolo livugara tangaloi mate? 6Ingeie u maraga. Inge hatie tangaha. Nen ladohaqe a hava gineu ngehi u veve lawe gimiu lune ingeie u toga lolo venue Kalili 7ve vi eno ve rain siregi i Netui Tangaloi lawera galegaleasi, rain toto vehavehaginie lo gai saroutu ko ve nge vin maraga taligu lo tagui rani gaitolu.”
8Ko a vavine ngerehi ram ladohaqe na nona leo, 9ram tudori dena malanga, ko ram veve na gineu doluegi hi lawera hangavulu domwagi gatagale ko lawera doluegi vage. 10A vavine ngerehi i Meri ta Makdala, Joana, ko i Meri retahi Jemis; ingere ko a vavine lavasigi meire ram veve na gineu ingere ngaha lawera gaihora. 11Nge ira gaihora ram lado ve a hava gineu a vavine rau veve a kalikeli, ko ingere rahe ladohogo tea ginire. 12Nge i Bita mo maraga ko mo toa mo vano sulo malanga, mo ate su lolona ko mo lehi na luqe ko hate gineu vage. Mo rovo mo mule lo tanona, mo awogi huri na hava gineu u vei.
I Jisas mo sereluae lo turegi mo vano a Emaus
13Lo rani hi tau a rorongtagi gairue rom dige huri na togagi venue a henagi Emaus, a kilomita hangavulu domwagi gatagale den Jerusalem, 14ko ingere rom laqalaqa ginire huri na gineu doluegi ngerehi ve rau vei. 15Lune rom laqa ko ram vui garogi huri, i Jisas mo vomai ko mo dige meire. 16Rom lehe, nge rohe leo te vurugeginie. 17I Jisas mo veve lawera vena, “?A hava gineu ngehi nerom vui garogi huri, lune nerom dige?”
Ingere rom labe rorongo mena nago asi. 18Gatagale denire, a henana i Kleobas, mo huie vena, “?Wa iniko a tangaloi gatagale hogosie gom toga a Jerusalem, go he ilo na hava gineu tea ngerehi rau vei aie lo rani gaivihe rau vano beno?”
19Ingeie mo hui vena, “?A hava gineu ingere?”
Rom duvi vena, “A gineu rau vei lawe i Jisas ta Nasaret. A tangaloi ngaha nge a tangaloi veve rarai, u huire lo nona lalakogi ko lo leona lo nagoi God ko lo nagora sinobu. 20Ira nomai muei rugurugu meire tomtomuegi rau sireginie vano ve vin vevegi vagamatea, ko rau toto vehavehaginie lo gai saroutu 21Nge igamai gau lado ve ingeie hi vin voli tuguhire a duvi Israel! Lo ului gineu ngerehi a rani gaitoligi ngaha lune a gineu hi u vei. 22Ko a vavine lavasigi dena nomai burigi rau vei gamai gam garigi, huri rau vano sulo malanga lolo robongi siaga, 23nge rahe haqe na betune tea. Rau vomai taligu ram veve ve rau hueri rau lehi na engsel. A engsel ngerehi rau veve lawera huri ve ingeie mo mwaso. 24A tangaloi lavasigi dena nomai burigi rau vano sulo malanga ko rau haqe vurugegi mwerehi a vavine rau veve, nge ra he lehe tea.”
25Mo rovo i Jisas mo veve lawera vena, “Gimiru a reragi, neru sagaribi lawagi lo nomiru ladohogo lo gineu doluegi ngerehi a tangaloi veve rarai rau veve! 26?Wa he eno tea huri ve i Kraes vin gagarasi lo gineu ingere ngaha, siu vin ehu lolo nona gareana?” 27Ko i Jisas mo veve matamwasaragi lawera a hava gineu u veve huri sibona lolo Reve reve Gogona doluegi, mo tauvuigi mena bugu ngerehi noi Mosis ko a revereve nora tangaloi veve rarai doluegi.
28Ram vomai kakarani lobei na togagi venue ngehi ram vano hurie, ko i Jisas mo vai mwere huri ve ingeie vin tutuvano, 29nge ingere rom hako bibie, rom veve vena, “Gon toga mei gamaru; a rani mo kakarani mo rovo ko mo tauvuigi mo dodo.” Siu mo vano ve vin toga meire. 30Lune mo toga meire lo tantanoi hinaga, mo lai na bereti ko mo veve gareagi God ko mo vise na bereti hi mo bete lawera. 31A matara mo tawaga ko rom ilo vurugeginie. Ne ingeie mo salasala dena matara. 32Rom veve veve ginire vena, “?Wa he mwere na avi tea mo gao lolo lolodaru lune mo gato mei gideru lo turegi ko mo veve matamwasaragi na Reve reve Gogona ngerehi lawe gideru?”
33Rom maraga siserigi ko rom vano taligu a Jerusalem, rom haqe ra hangavulu domwagi gatagale rau toga bubugi meire rorongtagi lavasigi vage, 34ko ingere ram veve vena, “A Huqe u maraga hogo! I Saemon u lehe!”
35Siu ingere gairue hi rom veve matamwasaragi lawera a hava gineu u vei lo turegi, ko huri ve ru leo vurugegi na Huqe lune ingeie mo vise vurivuri na bereti.
I Jisas mo sereluae lawera nona rorongtagi
36Lune ingere rom veve lawera, siserigi a Huqe mo labe lolo livugara ko mo veve lawera vena, “A tamwata lobemiu.”
37Ram vutugegi ko ram matagu liu, ram lado huri ve rau lehi na tamate. 38Nge ingeie mo veve lawera vena, “?Nem romasi huri havai? ?A lado gairue mo vomai lolo domimiu huri havai? 39Nen lehi na limeku ko a karuku ko nen leo ve ineu ngaha. Nen tango vomai luku ko nen lehieu vage, huri a tamate hate vihigona ko hate huine, mwerehi nem lehieu.”
40Mo veve ngaha ko mo haharagi na limana ko a karune lawera. 41Ingere rahe ladohogo tea lai mosigei huri ingere ram horo gina havuhevu ko ram awogi hurie. Siu ingeie mo huire vena, “?Tau igimiu neu hako te gineu ve nein geni tangaha?” 42Ram bete na mavusui ige manoga lawea, 43nge mo laie ko mo ganie lo nagora.
44Mo rovo mo veve lawera vena, “A gineu ingere ngaha nau veve lawe gimiu lune nau toga mei gimiu ve mo eno huri ve vin vagahorongi na gineu doluegi rau reve hurieu lo Leo Hora noi Mosis, lo revereve nora tangaloi veve rarai, ko lolo Sam.”
45Mo rovo mo tawaga lolo domire ve rain ilo vurugegi na Reve reve Gogona, 46ko mo veve lawera vena, “Nge ngaha a hava gineu u reve: huri ve i Kraes vin gagarasi ko vin maraga dena mateana lo rani gaitoligi, 47ko ve rain toretore lo henana huri na ladowenigi ko a ladovohogi bugu lawe na ureure doluegi, vin teuvuigi a Jerusalem. 48Igimiu a tangaloi nein haharagi na gineu ngere ngaha. 49Ko ineu siboku nain hora sulumiu a hava gineu i Tamaku u warataugi teu. Nge nen toga rarai lolo qatui venue vin dadari lune a huireana den eulu vin himei sulumiu.”
I Jisas mo hage lo eulu
50Siu mo tomueginire dena qatui venue ram vano kakarani Betani, aiehi mo horagi na limana ko mo vaigareaginire. 51Lune mo vaigareaginire, ingeie mo sireginire ko mo laie hage lo eulu. 52Ngere ram huduhudu goroe, ko ram mule taligu a Jerusalem gena havuhevu lawua, 53ko ram toga vataha bongi lolo Sara Gogona ko ram waregareagi God.
Цяпер абрана:
LUK 24: HNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bible Society of the South Pacific, 2013