Noo Mian 9
9
CAB. IX.
1As ghow e luingys, as hioil e harrish, as haink e gys e ard‐valley hene.
2As cur‐my‐ner hug ad lieu huggey dooinney va ching jeh’n chingys‐cra, ny lhie er lhiabbee: as hug Yeesey tastey da’n chredjue oc, as doort e rishyn va ching jeh’n chingys‐cra, Vac, bee dy yien mie, ta dty pheccaghyn er nyn leih dhyt.
3As cur‐my‐ner, doort shiartance jeh ny scruderyn roo hene, Te shoh loart goan mollaghtagh.
4As hoig Yeesey ny smooinaghtyn oc, as doort e, Cre’n fa ta drogh smooinaghtyn ayns ny creeaghyn eu?
5Son quoi sassey dy ghra, Ta dty pheccaghyn er nyn leih dhyt? ny dy ghra, Irree seose as shooil?
6Agh dy vod fys y ve eu, dy vel pooar ec mac y dooinney er y talloo, dy leih peccaghyn, (eisht doort e rishyn va ching jeh’n chingys‐cra) Irree, trog liat dty lhiabbee, as gow royd gys dty hie.
7As dirree e seose, as jimmee e gys e hie.
8Agh tra honnick y pobble shoh, ghow ad yyndyss, as hug ad moylley da Jee, v’er choyrt leid y phooar da deney.
9¶ As tra va Yeesey er gholl veih shen, honnick e dooinney va enmyssit Mian, ny hoie ec board y cheesh: as doort e rish, Eiyr orryms. As dirree e seose as deiyr e er.
10¶ As haink eh gy kione, myr va Yeesey ny hoie ec bee ayns y thie, cur‐my‐ner, haink ymmodee publicanee as peccee, as hoie ad sheese marishyn as marish y vooinjer va sheer geyrt er.
11Tra honnick ny Phariseyn shoh, doort ad roosyn va sheer marish, Cre’n fa ta’n mainshter eu gee marish publicanee as peccee?
12Agh cheayl Yeesey ad, as doort e roo, Cha vel feme ocsyn ta slane er y lhee, agh ec sleih chingey.
13Agh gow‐jee shiuish as ynsee‐jee cre ta dy ve toiggit liorish y raa shoh, Ta mee ny sbooie er myghin ny oural: son cha daink mish dy emagh er y vooinjer chairagh, agh er peccee gys arrys.
14¶ Eisht haink huggey adsyn va sheer geyrt er Ean, as doort ad, Cre’n fa ta shinyn as ny Phariseyn trostey dy mennick, agh cha vel adsyn ta geyrt orts trostey?
15As doort Yeesey roo, Vod ny caarjyn ta marish dooinney’n phoosee ayns e hiamyr ve er drogh yien, choud as ta dooinney’n phoosee mâroo? agh hig ny laghyn, tra vees dooinney’n phoosee er ny ghoal ersooyl vow, as shen y tra nee ad trostey.
16Cha vel dooinney erbee cur peesh dy eaddagh lajer er shen gharmad, son ta’n pheesh goall y laane ass y gharmad, as te rapit ny smessey ny ve.
17Cha-moo ta sleih coyrt feeyn noa ayns shen voteilyn#9.17 Liare.: er nonney ta ny boteilyn brishey, as ta’n feeyn deartit, as ta ny boteilyn dy choall orroo; agh ta’d cur feeyn noa ayns boteilyn noa, as ta’d nyn neesht sauchey.
18¶ Choud as ve loart ny goan shoh roo, cur‐my‐ner, haink fer‐reil as hug e ooashley da, gra, Ta m’inneen nish er gheddyn baase: agh tar as cur dty laue urree, as bee ee bio reesht.
19As dirree Yeesey as deiyr e er, as myr shen ren yn vooinjer va sheer geyrt er.
20(As cur‐my‐ner haink ben cheu‐y‐choolloo, va doghanit rish roie‐folley choud as daa vlein jeig, as venn ee rish oirr e gharmad.
21Son doort ee cheu‐stie jee hene, My oddym agh bentyn rish e gharmad, beeym er my leihys.
22Agh hyndaa Yeesey my‐geart, as tra honnick e ee, doort e, Inneen, bee dy yien mie; ta dty chredjue er dty laanaghey. As va’n ven er ny leihys veih yn oor shen.)
23As tra va Yeesey er jeet stiagh ayns thie yn fer‐reil as tra honnick e yn vooinjer va janoo kiaull, as y cheshaght ooilley bun‐rish‐kyn.
24Doort e roo, scugh‐jee ass y raad, son cha vel y ven‐aeg marroo, agh ny cadley. As hie ad son craidey mish.
25Agh tra va’n sleih er nyn eyrt magh, hie e stiagh, as ghow e ee er laue as dirree yn ven‐aeg seose.
26As hie goo magh jeh shoh, trooid ooilley’n cheer.
27¶ As tra va Yeesey er gholl veih shen, deiyr daa ghooinney doall er, gemagh as gra, Jean chymmey orrin, vac Ghavid.
28As tra ve er jeet stiagh ayns y thie, haink ny deney doall huggey: as doort Yeesey roo, Vel shiu credjal dy vel mish able shoh y yanoo? Doort adsyn rish, Ta, Hiarn.
29Eisht venn e rish ny sooyllyn oc, gra, Cordail rish nyn gredjue, dy row nyn aghin eu.
30As va ny sooyllyn oc er nyn vosley, as hug Yeesey currym geyr daue, gra, Jeagh‐jee nagh vow dooinney erbee fys er.
31Agh tra var adsyn er gholl rowe, hug ad magh yn goo echey trooid ooilley’n cheer shen.
32¶ Erreish daue shoh v’er gholl ersooyl, cur‐my‐ner hug ad lieu huggey dooinney balloo, va drogh spyrryd ayn.
33As tra va’n drogh spyrryd er ny eyrt ass, ren y balloo loart: as ghow yn pobble yyndyss, gra, Cha row rieau leid shoh er ny akin ayns Israel.
34Agh doort ny Phariseyn, Liorish prince ny drogh spyrrydyn te tilgey magh drogh spyrrydyn.
35As hie Yeesey my‐geart ooilley ny ard‐valjyn as ny baljyn beggey oc, gynsaghey ayns ny kialteenyn oc, as preacheil sushtal yn reeriaght, as leihys dy chooilley hingys as dy chooilley ghoghan mastey’n pobble.
36¶ Agh tra honnick e yn chaglym moar dy leih, ve er ny veyghey lesh chymmey orroo, er‐yn‐oyr dy row ad ass cree, as nyn lhie noon as noal, myr kirree fegooish bochilley.
37Eisht doort e roosyn va sheer geyrt er, Ta’n fouyr dy jarroo palchey, agh ny labreeyn beggan.
38Guee‐jee shiuish er‐y‐fa shen er Chiarn y fouyr, e dy chur magh labreeyn gys y fouyr echey.
Цяпер абрана:
Noo Mian 9: NMian
Пазнака
Падзяліцца
Капіяваць
Want to have your highlights saved across all your devices? Sign up or sign in
historic text maintained in digital form by the British and Foreign Bible Society (Sheshaght y Vible)