LUK 24
24
Jisu Ringcthaumei
(Met 28.1-10; Mrk 16.1-8; Jhn 20.1-10)
1Neidak tuang reymei nungc, lauthwan thwanzingh, meicpui nunc tei kaniw rui chamdaanvloumei namh gaymei maruai thauc sinna tarou thangc tei tat the. 2Khoutei roukham tauc tei luangc patlou bammei ta kaniw how the. 3Kumna kalungc gut pwkhou, Poubauhmei Jisu pumc tei thu how mak khe. 4Kaniw ngakna bam khou, kaney pheybaan ti tah tamei gaanv nei kaniw daeng khou ding bam khwan the. 5Ping langvna kaniw zaw kandih khou sow nkhumlouna bam khou, mi pu nei tei rui kaniw khou sa the, “Tabui swna nangniw theihmei pang khou ringhmei ta phu bam tu cho? 6-7[Kamei mi khou hei bam mak khe; ringcthau kan the!] ‘Meic Nac Mpouh ta paapcmei nunc baanc khou tii pat puni, kros khou swluai puni, kumna zaeng neih thumh nungc ringcthau dat puni,’ twna kamei Galili khou bammei douc nangniw khou salou kanmei tei ningtow o.”#Met 16.21; 17.22-23; 20.18-19; Mrk 8.31; 9.31; 10.33-34; Luk 9.22; 18.31-33 8Khoutei, kamei rui saloumei guay tei ningtow the.
9Kaniw tarou khou tei rui guang datna, mi guay hei ziap ruhna akhat khatni baihmei guay khou tei raclou the. 10Mi hei latdiutatmei nunc khou guang pouloumei nunc kiu thu: Magadaleni Meri, Joanna, Jakob pui Meri, khatni kaniw lev tat nchamcmei baihmei nunc hei e. 11Tiki kaniw meicpui nunc lat tei lwm mak khe; kaniw lat tei mbamei lat kumc the. 12[Tiki, Pitar thu thauna tarou thangc pak tat kan the. Kamei nkhum key pwkhou, linen phey na ganclou bammei ta how the. Kumna tabui sw lana the cho twna kamei ngak sakh sakna tat dat the.]#Baanhhy baibal asaekc khou thu kathaek 12 hei maek ge.
Emma-u Chaeng khou
(Mrk 16.12-13)
13Mi nungc kahak tei Jisu ziap gaanv nei, Jerusalem khou rui kilomitar chanei dou duhmei khou naimei Emma-u kawmei namv thangc tat bam khwan e. 14Kaney tei mi pat kanmei lam guay tei racna tat bam khwan e. 15Kaney mi lam hei racna khatni kaphianhna tat bam khou, Jisu kamei kahak guangna kaney lev tat nchamc the. 16Tiki kata kaney thay mak khang kaney mik sw nzeiclou the.
17“Nangney tabui lat kaphianh tat bam tu cho?” twna Jisu rui kaney khou sa the.
Khoutei kaney nchwng suih suina ding the. 18Kaney khou gaanv khat Kleopa twmeipu rui, “Aseicdou dak khou Jerusalem khou pat kanmei lam khou hei thay makmei gin nang na khuang di the,” twna sa the.
19“Mi kiu tabui tuang cho?” twna kamei rui thanv the.
Kaney rui kakhou sa the, “Nazarethmei Jisu lam e. Kamei hei Ravguangc hu khou ni, maansei hu khou ni kalat khou khatni kataanv khou pumtan naimei gaanv khat sw bammei muhzwng e. 20Karuc khou theihmei latzan keylou khang aniu tuang amuh daihmei nunc khatni kapy nunc rui tii pat tina kata kros khou thaengcluai kan the. 21Kamei hei Isaraelmei ta thuaklou nimeipu kiu lana khuangh the twna aniw lwm bam tuang the! Tiki, mi pat kanmei hei ntaw thu zaeng neih thumh tangc the. 22Kum bam khou, akailianghmei meicpui nunc gaanvsaekc rui aniw ta ti ngak sakh saklou e. Twmei thu, aseic lauthwan thwanzingh kaniw katuang tarou thangc tat the. 23Khoutei kapumc tei how mak khe. Kumna kaniw kauh baanchara gaanv nei ta ndawman khou how the. Kumna mi nei tei rui kamei ringcthau kan the twna sa e twmei kaniw rui guang sa the. 24Khoutei akailianghmei gaanvsaekc tarou thangc tei tat the, kumna meicpui nunc tei rui samei kumc rapna how the; tiki kata thu kaniw how kan mak ge.”
25Khoutei kamei rui kaney khou sa the, “He mpangmei khatni muhzwng nunc rui saloumei tei lwm khang lungning nkacmeithiu! 26Khrista hei mi ryanramei guay hei ariw lana katuang hymdaihmei khou gut nina hamh nah cho?” 27Mousi khou rui thauna muhzwng nunc nganv khou, Nthanmei Latrik khou, kalam khou hyloumei guay tei kamei rui kaney khou dinclou the.
28Kaniw guanglou nimei namv tei kaniw ana guang pwkhou, kamei mi namv tei tat twan kan ni kumc ti khou, 29“Aniu bam nchamc di kho, tingzyn na di the; zingc kan ni the,” twna kaney rui kata khaam the. Kumna kaney lev bam nchamclou khang kamei ni gut the.
30Kumna kaniw tu khang dungc keypui ganv khou, kamei rui ntyan laana thuanckulouna, by bakna kaney khang tii the. 31Khoutei kaney mik tirakpatlou the, kumna kata thay the; tiki mi khou tei kata how dat mak khe. 32“Chaeng khou kamei rui anei khou Nthanmei Latrik khou rui raclouna tat bam khou tei anei lung chuangc thau mak nah cho?” twna kaney khat khat khou sa the.
33Khoutei kaney kadyng khou thauna Jerusalem thangc hanc guang dat the. Mi khou tei ziap ruhna khat khatni kaniw lev bam nchamcmei nunc tei guang kaduai bammei, 34“Poubauhmei ringcthau dat changc kan the! Kamei Simon khou lyanlou the!” twna sa bammei nunc ta kaney ariw the. 35Khoutei chaeng khou pat kanmei khatni kamei rui ntyan by baklou pwkhou kaney kata akumhna thay kan tu cho twmei guay tei kaney rui raclou the.
Jisu Kaziap nunc khou Lyanloumei
(Met 28.16-20; Mrk 16.14-18; Jhn 20.19-23; Lat 1.6-8)
36Kaney mi hei sana bam khou, Jisu kaniw chung khou guang dingna, “Nangniw khou chuzaenghmei nai diu!” twna sa the.#Baanhhy baibal asaekc khou thu, “Nangniw khou chuzaenghmei nai diu!” twna sa the twmei hei maek ge.
37Khoutei kabumaengc lana khuangh the twna kaniw kaluang the khatni ping the. 38Kamei rui kaniw khou, “Tabui swna nangniw ping bam tu cho? Tabui swna nangniw lwmsi bam tu cho? 39Aphay abaanc hei zauc tho. Mi hei ai de! Ata kahi zauc o. Mi hei kumcna bumaengh khou thu katei karou maek ge,” twna sa the.
40Kamei mi hei sana, kaphay kabaanc kaniw khou lyanlou the.#Baanhhy baibal asaekc khou thu kathaek 40 hei maek ge. 41Kaniw neihlamei lev ngakmei rui lwm thau lwm guang khang thay makna bam khou, “Nangniw khou tu khang ramh nai bu cho?” twna Jisu rui thanv the. 42Khoutei khav minhmei kiak akhat tiilou tina, 43laana kaniw hu khou hei tei tu the.
44“Mi hei Mousi tuang Riakdanv, Muhzwng nunc khatni Kalumlu khou alam khou hyloumei guay tei guang tangc puni twna ai rui nangniw lev bam nchamc bam khou salou kanmei tei guang tanghmei tuang the,” twna kamei rui kaniw khou sa the.
45Khoutei kamei rui kaniw lungning laanc patlou tina, kaniw Nthanmei Latrik tei kabah thay the. 46Jisu rui kaniw khou sa the, “Khrista hei ryanramei ariw puni kumna neih thumhpui nungc ringcthau dat puni, 47kumna lungh laihmei khatni paapc kuakloumei lam khou, Jerusalem khou rui thauna zaatc guayna khou kazanc khou dinc ndauh puni twna hyloumei tei mi hei the. 48Mi guay lam khou dinc nimei kiu nangniw hei the. 49Apu rui tii ni twna nrianhloumei tei ai rui nangniw khou ndiu guang puni; kumna kauh thangc rui nangniw khou pumtan tiilou mak saanv mi kaidai khou hei bam o.”#Lat 1.4
Jisu Tingkauh Ku Kanmei
(Mrk 16.19-20; Lat 1.9-11)
50Jisu rui kaniw ta Bethani nganv nduangh patna, kabaanc zay thauna kaniw ta suaihiamlou the.#Lat 1.9-11 51Kamei rui kaniw ta suaihiamlouna bam khou, kamei kaniw khou rui tat pat kan the, kumna tingkauh thangc laa thau kan the.#Baanhhy baibal asaekc khou thu, kumna tingkauh thangc laathau kan the twmei hei maek ge. 52Khoutei kaniw kata kalumlou duc lana, neihlana Jerusalem thangc hanc guang dat the. 53Kumna kaniw Ravkai khou bam tanh tanna Ravguangc ta thuancku bam khwan e.
Цяпер абрана:
LUK 24: RONGBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.