JOHAN 13
13
Isûn inchûktirhai ke a sâwp
1Chun, Fekân Ruoiṭhe hmain Isûn hi khawvêl hi suok sana, Pa kuoma a fe hun a tlung tah ti a hriet a. Amaa mi khawvêla um a hmangai hlakhai chu, a tâwp chen khawmin a hmangai zing a.
2Chun, zânbu fâk laiin, (chu hma khawm chun diebolin Simon naupa Iskariot Juda chu Isu inmantir dingin ân lungriltir a,)
3Isûn Pain a kuta thil iengkim ân kawltir dâm, Pathien kuoma in- thawka hung suok a ni dâm, Pathien kuoma a fe ding dâm hre zingin,
4a zânbu awt chu a tho a, a puonhai a sieh a, inhrûkna puon a lâk a, a dierkei a.
5Chun, châwtawlah tui a sung a, inchûktirhai ke a sâwp a, inhrûkna puon a dierkei chun a hrûk pei a.
6Chuongchun, Simon Peter kuomah a hung a. Ama chun, “Lalpa, nang êmin ka ke i sâwp ding am a nih?” a ta.
7Isûn a kuomah, “Ka thilthaw hi tuhin i hriet nawh; nisienlakhawm, nakie tieng la hrieng i tih,” a ta, a dawn a.
8Peterin a kuomah, “Ka ke sâwp naw tawp i tih!” a ta; Isûn a kuomah, “Ka sâwp naw che chun ka kuomah iengkhawm chan nei naw ti nih,” a ta.
9Simon Peter chun a kuomah, “Lalpa, chuong a ni chun, ka ke chau ni loin, ka kut le ka lu khawm tie,” a ta.
10Isûn a kuomah, “Insil ta chu a ke naw chu sâwp a ngai nawh, a fai deh annâwm; nangni in fai, in rêng ruok chun ni loin,” a ta.
11(Ân mantirtu ding chu a hriet sih a; chuleiin, “In rêngin in fai nawh,” a ti a nih.)
12Chuongchun, an ke a sâwp a, a puonhai a lâk a, a ṭhung nâwk chun an kuomah, “In chunga ka thilthaw hi ieng thawna am a na, in hriet am?
13Nangnîn Inchûktirtu le Lalpa in mi ti hlak; in ti indik hle, ka ni ngei hrim a.
14Kei Lalpa le Inchûktirtu hmanin in ke ka sâwp chun, nangni khawmin in ke in insâwppêk ding a nih.
15 #
Lk 22.27 In chunga ka thaw ang hin nangni khawmin in thaw vena dingin ka sukhmu cheu a ni sih a.
16 #
Mt 10.24; Lk 6.40; Jn 15.20 Titakzetin, titakzetin ka hril cheu hi, suok a pu nêkin a ropui nawh; tirko khawm a tirtu nêkin a ropui bawk nawh.
17Chuong thil chu in hriet chun, thaw unla, hamṭhâng in tih.
18 #
Sm 41.9
In rênga thu ka hril nawh; ka ithlang hai chu ka hriet, nisienlakhawm, chu chu,
‘Ka bei fatu chun,
A kekhawng chu ka chungah ân let tah,’
ti Pathien Lekha Thu kha a hung tlung theina dingin a nih.
19Hi hi a hung tlung hmain tuhin ka hril cheu hi, a hung tlung phaleh, kei kha ka nih ti in ring theina dingin.
20 #
Mt 10.40; Mk 9.37; Lk 9.48; 10.16 Titakzetin, titakzetin ka hril cheu hi, tûkhawm ka itir taphawt lâwm chu, keima mi lâwm a nih; tûkhawm kei mi lâwm chu a mi tirtu lâwm a nih,” a ta.
Isûn a inmantirtu ding a hrillâwk
(Mt 26.20-25; Mk 14.17-21; Lk 22.21-23)
21Isûn chuong anga a hril zo chun, a lungrilin a lunginzîng a, “Titak- zetin, titakzetin ka hril cheu hi, nangni laia mi pakhatin mîn mantir a tih,” a ta, ân hriettir tah a.
22Chun, inchûktirhai chun a ti bîk an hriet nawh a, an inen tâwl a.
23Chun, a închûktirhai laia mi pakhat, Isûn a ihmangai chu, dawkân sîrah Isu ângsûnga bawkin a um a.
24Chun, Simon Peterin ama kuoma chun, “Tu thu tak am a na a hril, indawn ta,” tiin zaizirin a biek a.
25Ama chu a umna ngaiah a um a, Isu âwm hnengin a hung thleh a, a kuomah, “Lalpa, tu tak am a na?” a ta.
26Chun, Isûn “Bei hlek inchiepêk ka ta, ka ipêk chu nîng a tih,” a ta, a dawn a. Chuongchun, bei hlek chu ân chie hnungin a lâk a, Iskariot Simon naupa Juda kuoma chun a pêk a.
27Chun, bei hlek chu a pêk hnung- in a sûngah Setan chu a lût nghâl tah a. Chuongchun, Isûn a kuomah, “I thaw ding chu thaw vak rawh,” a ta.
28(Chun, dawkân kiltuhai tu- khawmin iengtiziea ti am a ni an hriet nawh a.
29Ṭhenkhatin “Juda chun tangka ip a kawl leiin, Isûn ‘Ruoiṭhenaa ding thil ei mamawhai inchaw rawh,’ a ti amanih, ‘Pasiehai kuoma iengkhat pêk ding,’ a ti amanih,” an ti a nih.)
30Chun, ama chun bei hlek chu a lâk a, a suok nghâl tah a; chu lai hun chu zân a nih.
Thupêk thar chu
31Chuongchun, a suok hnung chun Isûn a hril a, “Tuhin chu Mihriem Naupa chawimawiin a um tah, ama leiin Pathien khawm chawimawiin a um a nih.
32Pathien chu amaah chawi- mawiin a um chun, Pathien khawmin amaa chun ama chu chawimawi a tih, chawimawi nghâl a tih.
33 #
Jn 7.34
Nauhai, sâwt nawtê in kuomah ka la um hri hi, nangnîn mi zawng in ta; chun, Judahai kuoma, ‘Ka fena dingah hung thei naw ti niu,’ ti ka hril ang khan, tuhin chuong ang bawk chun in kuomah ka hril hi.
34“Thupêk thar ka pêk cheu hi, inhmangai tuo unla; keiin ka hma- ngai ang cheu hin, nangni khawm inhmangai tuo ro.
35In inhmangai tuo chun mi po poin ka închûktirhai in ni ti chutaka chun hrieng an tih,” a ta.
Peterin ân phat ding thu hrillâwkna
(Mt 26.31-35; Mk 14.27-31; Lk 22.31-34)
36Simon Peterin a kuomah, “Lalpa, khâwlai am i fe ding a na?” a ta. Isûn, “Ka fena dingah nangnîn tuhin mi zui thei naw ti niu; nakie pha ruok chu mi zui in tih,” a ta, a dawn a.
37Peterin a kuomah, “Lalpa, iengdingin am tu khawm hin zui thei nâwng ka ti cheh a? Nangma leiin ka hringna pêng ka tih,” a ta.
38Isûn, “Keima leiin i hringna i pêk ding maw? Titakzetin, titakzetin ka hril che hi, nangin vawi thum i mîn phat hmakhat chu âr khuong naw ni.
Цяпер абрана:
JOHAN 13: HMARCLBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.