Joannostir 4
4
Džeļ, 4.
1Kedi Iisusos dolija džinel so dogija ko fariseji šuniben, so Jov butir sikļaibnangīren dolela te bolela, nasir Ioannos.
2(Hai Iisusos Kokoro naboldža, ne feņu Leskīre sikļaibnangīre):
3Togi mukša Judengīri phu, te gija noko ane Galileja.
4Jaudžapes Leske pšedžal druhe Samārija.
5Te jake javela Jov ane Samārakīro foros, denas goli Sihar, paše ke do šmatos phu, dīno Jakovostir peskīre čhāveske Iosifoske,
6Doi isis Jakovoskīri hāning. Iisusos, khino dromestir, bešča ke hāning. Isis ke šovto štunda.
7Javela džūli Samarijatir phērel pāņing. Iisusos phenela lake: de Man pjav.
8(Ne Leskīre sikļaibnangīre gīne ano foros kinen hāben.)
9Samarijakīri džūli rakirla Leske: sir Tu, Judos javindoi, mangesa pjes mandir, Samarjanatir? hai Judi Samarjanensa nazadžanapen.
10Iisusos phendža lake ano otpheniben: keļi tu do Davleskīro žāļuma džindžanas so Jov dela, te kon tuke phenela: de Man pjav, keļi tu dava džindžanas, togi tu kokori mangjanas Lestir, te Jov tuke dijasis džīdo pāņing.
11Džūli rakirla Leske: Raija! tuke nāni sosa phēres, hai hāning hor: karīg tuke džīdo paņing?
12Hobi tu bāredīr māre dādestir Jakovostir, savo dija menge da hāning, te kokoro latir pija, te leskīre čhāve, te leskīre bidli?
13Iisusos phendža lake ano otpheniben: svako, pibnaskīro da pāņing, kamela noko;
14Ne kon pjela pāņing, savo Me dava leske, dova nakamela pjel ņigdi; ne pāņing, savo Me dava leske, kērlapes an leske pāņingali krenicake, savo thadela ano džīben bekonkoskīro.
15Džūli phenela Leske: Raija! de man da pāņing, sobi mange nakamelpes pjav te najāl mange javav dai phērav.
16Iisusos phenela lake: dža, te khēr tīre romes, te jov dārīg.
17Džūli phendža ano otpheniben: mange nāņi rom. Iisusos phenela lake: tu čačo phendžan, so tuke nāni rom:
18Hai tuke isis pandž roma, te dova, savo kana tuke isi, dova nāni tīro rom; dava čačipen tu phendžan.
19Džūli phenela Leske: Raija! dikhava, so Tu isam prorokos.
20Māre dāda kloninenapen pe da berga; ne tume phenena, so štetos, kai čhebi kloninenpes, isi ane Ijerusaļima.
21Iisusos lake phenela: pača Man, so javela brīža, kedi na pe da berga, te na ane Ijerusaļima pokloninena tumen Dādeske.
22Tume nadžinen, koneske kloninenatumen; ne me džinas, koneske, sir kloninasamen: rakhiben bidatir isi Judendir.
23Ne javela brīža, te uze javdža, kedi lašņa poklonibnaskīre pokloninenapen Dādeske ano duhos te lašņuma; hai dasajen poklonibnaskīren Dād rodela Peske.
24Devēl isi duhos: te poklonibnaskīrenge Leske čhebi pokloninenpen Leske ano duhos te lašņuma.
25Džūli phenela Leske: džinav, so jāvela Messija, dova isi Hristos; kedi Jov jāvela, togi sāro phenēla menge.
26Iisusos phenēla lake: dova Me, Savo rakirava tusa.
27An da brīža jāvdle Leskīre sikļaibnangīre, te dživindepen, so Jov rakirdža džuļasa; ne nijek naphendža: so Tuke čhebi? vai: sostir rakieresa lasa?
28Togi džūli mukša peskīre paņiņgengīre janibnangīre, te gija ano foros, te rakirla mānušenge:
29Javen, dikhen mānušes, savo phendža mange sāro, so me kērdžom: nāni feņu Jov Hristos?
30Jone javdle forostir, te gīne ke Jov.
31An do brīža sikļaibnangīre mangle Les phenindoi: Ravvi! ha.
32Ne Jov phendža lenge: Mange isi hāben, savo tume nadžinen.
33Vaša dava sikļaibnangīre rakirdle maškir penge: hobi kon jandža Leske hal?
34Iisusos rakirla lenge: Mīro hāben isi kērav voļa Doleskīri kon Man bičadža pokērav Leskīri butin.
35Narakirna hobe tume, oščo štār čhona, te jāvēla žbožako čhiniben? ne Me rakirava tumenge: haden tumāre jakha opre te dikhen po māro, sir jov poparņandīja te iejavdžapes ko čhiniben.
36Čhinibnaskīro dolela pleskirben te zalela bārīno ano sajek džīben, jake so sējejos te čhinibnaskīro khetane hotņakirnapen
37Hai an dasav molos čača virakirdo: jek sējini, ne vār čhinela.
38Me tumen bičadžom mečhinen dova, pe so tume nasan butin kēri: vār robindle, ne tume gīne an lengīri robiņ.
39Būt Samārjaņi do forostir pačandīne an Leske pe do džūlakire lava, joi švatkidža, so Jov phendža lake sāro, so joi kerdža.
40Te vašo dova kedi javdle ke Jov Samārjaņi, togi mangle Les mejačel ke jone; te Jov jača doi dui dīvesa.
41Te oščo butir giniben pačandīne pe Lesko lav.
42Te do džūļake rakirdle: kana uže na pe tīre phenibena pačasa; ne uže kokore kana šundžam te dodžindžam, so Jov lašņes svetosko rakhinaskīro, Hristos.
43Kedi vigīne dui dīvesa, Jov vigija dorīg, te gija ane Gaļileja.
44Hai Kokoro Iisusas švatkindža, so prorokos an peskīri dādeskīri phu nāni rožume,
45Kedi Jov javdža ane Gaļileja, togi Gaļijaņe Les dolīne, vašo dova so dikhindoi sāro, so Jov kerdža ane Ierusaļima po svenkos, hai jone nin gīne po svenkos.
46Te jake Iisusos noko jāvdža ane Kānā Galilejakīri, kai kērdža paņing vinoske. Ane Kapernauma isis jek kraļisko slugos, koneske isis raklo nasvalo.
47Jov šundža, so Iisusos jāvdža Judenge phujatir ane Galilejakīri, jāvdža ke Jov, te mangja Les mejāvel te mesačkirel leskīre čhāves, savo isi ke šmerč.
48Iisusos leske phendža: tume napačana, keļi nadikhena znaki te dživi.
49Kraļisko slugos Leske rakirla: Raija! jov, poskil nameija mo čhāvo.
50Iisusos phenela leske: dža, čhāvo tīro isi sasto. Jov pačandija laveske savo phendža leske Iisusos, te gija.
51Po drom lačne les slugi leskīre, te phendle: čhāvo tīro sasto.
52Jov phuča lendir: an saij štunda jača leske lokedīr? leske phendle: taša ane eftato štunda izdrāni les otmukša.
53Dolestir dād džindža, so dava isis do štunda, an saiji Iisusos phendža leske: čhāvo tīro sasto, te pačandija kokoro te sāro leskīro khēr.
54Dava vār dživos kērdža Iisusos pālē rišindoi Judengīri phujatir ane Galilejakīri phu.
Цяпер абрана:
Joannostir 4: LET1933
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© British and Foreign Bible Society 1933, 2016