Joannostir 10
10
Džeļ, 10.
1Lašņes, lašņes rakirava tumenge: kon nadžala druh udār ane bakrenge hļiva, ne ližini varthal, andre, dova isi čhor te rozboiņikos.
2Ne kon džala druh udār dova bakrengo pastuhos.
3Leske udaresko rakhibnaskīro otkērla, te bakre šunena leskīri glos, te jov dela goli peskīre bakren po lav, te vilidžala len,
4Te kedi vilidžala peskīre bakren, džala angil lenge; ne bakre pal leske džana, vašo dova so džinen glos leskīri.
5Pal cudzoneske nadžana, ne našēna lestir, vašo dova so napinškirna cudzoneske glos.
6Da dolidžipen phendža lenge Iisusos; ne jone nahalīne, so Jov dasav lenge rakirdža.
7Te jake noko Iisusos phendža lenge: lašņes, lašņes rakirava tumenge, so Me udār isom bakrenge.
8Sāre, kon angil Mange jāvdle, dola sāre čhora te rozboiņiki; ne bakre nakandīne len.
9Me isom udār: kon druh Mange zadžala, dova virakhelapes, te zadžala, te vidžala, te paščakirben lathela.
10Čhor jāvela feņu vašo dova, sobi čhorel, domārel te zgiņakirel. Me jāvdžom vašo dova, sobi dolenge jāl džīben te sāro‐so.
11Me isom pastuhos lačo: lačo pastuhos dela pesko džīben vaše bakrenge.
12Zarakirdo pastuhos, lašņo nāni, koneske bakre nāni peskīre, te dikhela so jāvela ruv, te mukhela bakren, te nāšēla; te ruv rozšņikakirla bakren, te roztrādela len.
13Ne zarakirdo pastuhos nāšela, vašo dova šo jov feņu zarakirdo, te narado vaš bakrenge.
14Me isom pastuhos lačo; te džinav Mīren, te Mīre džinen Man.
15Sir Dād dzinel Man, jake Me džinav Dādes; te džīben Mīro dava vaše bakrenge.
16Isi Mange var bakre, dola nāni da hļivatir; te nin dolen Mange čhebi dojanav: te jone šunena glos Mīri, te jāla jek bakrengo gajos te jek pastuhos.
17Wašo dova miļini Man Dād, so Me otdava džīben Mīro, sobi noko lav les.
18Nikon naotlela Mandir les; ne Me Kokoro otdava les. Mange moca isi otdav les, te moca isi noko lav les. Da dopheniben Me dolijom Mīre Dādestir.
19Da lavendir noko maškir Iudenge vigija gola.
20Būt lendir rakirdle: Jov pšelīno bengestir te begodžakīro; šo šunena Les?
21Wār rakirdle: ?da lava nāni bengatuneskīre: hobi vašti beng kororenge jakha otkērel?
22Ane Ijerusaļima isis khangirjako svencumasko svenkos, te isis žima.
23Te pširdža Iisusos ane khangīri, ane Solomonosko khangīrjako anglatuno.
24Doi Judi obtardīne Les, te rakirdle Leske: hāra Tuke men rikires ano nadžinipen? keļi Tu Hristos, phen menge lašņes.
25Iisusos otphendža lenge: Me phendžom tumenge, te napačana; buča, saje Me kērava an Mīre Dādesko lav, jone švatkinena vaš Mange.
26Ne tume napačana; hai tume nasan Mīre bakrendir, sir Me phendžom tumenge.
27Bakre Mīre šunena glos Mīri, te Me džinav len, te jone javena pal Mange.
28Te Me dava lenge džīben bekoncoskīro, te nazgiņinena ņigdi; te nikon naviļela len Mīre vastendir.
29Dād Mīro, Sav len Man dija, barēdīr sarēndir te nikon našti vilel len Mīre Dādeskīre vastendir.
30Met te Dād isam — jek.
31Doi noko Judi dīne caplam bara, sobi domāren Les.
32Iisusos otphendža lenge: būt lače buča Me posikadžom tumenge Mīre Dādestir; vaš saje lendir kamena domāren Man barensa.
33Judi phendle Leske ano otpheniben: na vaše lači būtin kamasa domāres Tut barensa, ne vašo Davlesko tellečhuviben te vašo dova, so Tu, isan mānuš, ne kēresa Tut Davleske.
34Iisusos otphendža lenge: te nāni hobi čhindlo an tumāro dopheniben: Me phendžom: tume Dēvela?
(David. gili 82, 6.).
35Keļi jake Jov dija goli delenge dolen, ke saje isis Davlesko lav, te našti zgiņinel čhiniben.
36Hobi Doleske, Sajes Dād svenčakirdža te bičadža ano svetos, tume rakirna: davles tellečhuvesa, vašodova so Me phendžom: Me isom Davlesko Čhāvo?
37Ja Me nakēra Mīri Dādeskīri butin, napačan Mange;
38Ne ja Me kēra, togi, keļi napačana Mange, pačan Mīre bučenge, sobi džinen te pačan, so Dād an Mange te Me an Leske.
39Togi noko rodīne capladen Les; ne Jov norišija lengīre vastendir.
40Te gija noko pe korīg Iordana, pe do štetos, kai vāgo boldža Ioannos; te jača doi.
41Būt jāvdle ke Jov, te rakirdle, so Ioannos nakērdža nisavo dživos; ne sāro, so phendža Ioannos Lestir, isis lašņes.
42Te būt doi pačandīne an Leske.
Цяпер абрана:
Joannostir 10: LET1933
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© British and Foreign Bible Society 1933, 2016