YUH 9
9
Isa ka ɲa funyen do ɲa laka
1Nba, Isa tamintɔla, a ka cɛɛ do yen a ɲa funyen de sɔrɔnda. 2A la karandenilu ka a maɲininka ko: «Rabi, yon ka julumun kɛ cɛɛ ɲin wala a sɔrɔnbailu, a ɲa funyen sɔrɔnni wa?» 3Isa ka ii jabi: «Cɛɛ ɲin ma sɔrɔn ka bɛn a jɛrɛ la julumun ma wala a la mɔɔbailu la julumun ma. A ɲa funyen de sɔrɔnda, sa Alla la sebaya ri yiraka mɔɔilu la ale fɛ. 4Fanin tele ye ye, an ka kan ka baara kɛ a yɛ mɛn ka n kelaya. Su ko wa sudunya, a wa ko: mɔɔ si ti se baarala. 5Ka n to dunuɲa rɔ, n ye dunuɲa kɛnɛbɔlan de ri.» 6A bannin kuma wo la, Isa ka daji labɔ duu ma ka bɔɔ lamun wo la, ka bɔɔ wo ta ka a sisa ɲa funyen ɲa la. 7A ka a fɔ ko: «Wa i ko Silowame ji lamara diya ji la.» Silowame kɔrɔ ye le ko «kela». Ɲa funyen wo wara a ko ji wo la tuma mɛn na, a nara a ɲa ye yennin kɛla!
8A siiɲɔɔ ni mɛnilu ka a yen taralila kɔrɔman na woilu ka a maɲininka ko: «Cɛɛ ɲin de siini tɛ taralila kanma kɔrɔman na wa?» 9Doilu ka a fɔ ko: «Ale le.» Dogbɛrɛ ka a fɔ ko: «Ale tɛ, kɔni imunuɲani.» Cɛɛ ka a fɔ ko: «Nde le jɔ!» 10Ii ka a maɲininka ko: «I ɲa lakara di?» 11A ka ii jabi: «Cɛɛ mɛn tɔɔ ko Isa wo le ka bɔɔ ta ka a sisa n ɲa la ka a fɔ ko: ‹Wa Silowame ka i ko.› N wara. N banni n kola, n ka yenni kɛ.» 12Ii ka a maɲininka ko: «Cɛɛ wo ye min?» A ka ii jabi: «N ma a lɔn.»
Farisiilu ka cɛɛ ɲa lakani fɛsɛfɛsɛ
13Ii ka cɛɛ ɲa lakani wo lana Farisiilu ma. 14Awa Isa ka bɔɔ sisa a ɲakɔrɔ da la lon mɛn na a ɲa lakara wo lon de, Ɲɔɲɔ Lon de tɛrɛ. 15Wo le rɔ Farisiilu ka cɛɛ maɲininka ko mɛn taminni ko a ye yenni kɛla sisɛn. A ka a fɔ ii yɛ ko: «A ka bɔɔ le sisa n ɲa la, n ka n ko: wo rɔ n ka yenni kɛ.»
16Farisi doilu ka a fɔ ko: «Mɛn ka wo kɛ a ma bɔ Alla rɔ, baa a ti Ɲɔɲɔ Lon sariya bonyala.» Kɔni, doilu ka a fɔ ko: «Julumuntɔilu ri se ko makabani su ɲin kɛla di?» Ii talara. 17Farisiilu ka ɲa funyen mɛn ɲa lakani maɲininka fanan ko: «I ri se nfen fɔla i dandanninna la ko rɔ, ka a masɔrɔn a ka i ɲa laka?» A ka ii jabi: «Keladen fisamante le.»
18Judiyailu tɛrɛ ma sɔn lala a la ko a ɲa funyen de tɛrɛ, a ni a ɲa ra a laka, sani ii ye a sɔrɔnbailu kili. 19Ii ka ii maɲininka ko: «Ai dencɛ le wa, ai kan mɛn ma ko a ɲa funyen de sɔrɔnda? Nfen de taminnin a ye yenni kɛla sisɛn wa?» 20A sɔrɔnbailu ka ii jabi: «An ka a lɔn ko an dencɛ le. A ɲa funyen de sɔrɔnda. 21Kɔni an ma a lɔn fewu ko mɛn taminnin ko a ye yennin kɛla sisɛn. An ma a lɔn fanan fewu mɛn ka a ɲa laka. A ye a maɲininka, a ra bonya ka kɛ mɔɔ ri, a ri se a jabila a jɛrɛ yɛ!» 22Cɛɛ sɔrɔnbailu ka jabili kɛ ten, ka a masɔrɔn ii silanni Judiyailu la ɲɛmɔɔilu yɛ. Baa woilu tun da bɛn a ma ko ni mɔɔ mɔɔ ka a lɔ a la ko Isa ye Ɲenematɔmɔnin de ri, ko ii ri wo tii gbɛn ii la salibon na. 23Wo le rɔ a sɔrɔnbailu ka a fɔ ko: «Ai ye a maɲininka, a ra bonya ka kɛ mɔɔ ri.»
24Farisiilu ka cɛɛ wo kili kokura, mɛn tɛrɛ ye ɲa funyen di, ka fɔ a yɛ ko: «I ye i kali Alla ɲakɔrɔ ko i ri tuɲa fɔ. An ka a lɔn ko cɛɛ wo ye julumun kɛla le ri.» 25A ka ii jabi: «N ma a lɔn ni julumuntɔ le walama julumuntɔ tɛ, kɔni n ka ko kelen lɔn, n ɲa funyen de tɛrɛ kɔni n ye yenni kɛla sisɛn.» 26Ii ka a maɲininka ko: «A ka nfen de kɛ i la? A ka i ɲa laka di?» 27A ka ii jabi: «N tɛrɛ ra a fɔ ai yɛ fɔlɔ, kɔni ai ma a lamɛn. Nfenna ai ye a fɛ ka a lamɛn kokura? Ai fanan ye a fɛ ka a kɛ a la karandenilu le ri wa?» 28Ii ka a manani ka a fɔ a yɛ ko: «Ile le a la karanden di. Ande ye Musa la karandenilu le ri. 29Ande ka a lɔn ko Alla kumara Musa yɛ, kɔni ɲin, an ma a lɔn a ye bɔla yɔrɔ mɛn dɔ.» 30Cɛɛ ka ii jabi: «Hen! Ko makabani ba le ɲin di. Ai ma a lɔn a ye bɔla yɔrɔ mɛn dɔ, kɔni a ra n ɲa laka! 31An ka a lɔn ko Alla ti a tolo malɔla julumun kɛla la, kɔni a ye a tolo malɔla wo la mɛn ye a bonyala ka a sawo kɛ. 32Habadan mɔɔ si ma a lamɛn ni mɔɔ ra mɔɔ ɲa laka mɛn ɲa funyen sɔrɔnda. 33Ni cɛɛ ɲin ma bɔ Alla rɔ, a ti se foyi kɛla.» 34Ii ka a jabi: «I ye i la julumun dɔ kɛbi i sɔrɔn waati. I ri an karan wa?» Wo rɔ, ii ka a gbɛn salibon na.
Yon ye ɲa funyen jɛrɛjɛrɛ ri?
35Isa ka a mɛn ko ii ra a gbɛn. A ka cɛɛ wo ɲinin ka a yen, ka a fɔ a yɛ ko: «I ra lemɛniya Mɔɔ Dencɛ ma wa?» 36Cɛɛ ka a jabi: «Maari, yon ye wo ri? I ye wo fɔ n yɛ, kosa n di lemɛniya a ma?» 37Isa ka a fɔ a yɛ ko: «I ra a yen. A ye kumala i yɛ sisɛn.» 38Wo rɔ a ka a fɔ a yɛ ko: «N da lemɛniya, n Maari.» A ka sudibe Isa yɛ ka a bato. 39Isa ka a fɔ ko: «N nani dunuɲa makiti la kan ma. Ɲa funyen ɲa ye laka; mɛnilu ye yenni kɛla, woilu ye kɛ ɲa funyen di.»
40Farisi doilu tɛrɛ ye a tɔrɔfɛ, woilu ka kuma wo mɛn ka a maɲininka ko: «Ande fanan ye ɲa funyen de ri?» 41Isa ka ii jabi: «Ni ɲa funyen de ai ri, ai tɛ jatɛla julumuntɔ ri. Kɔni sisɛn ai ye a fɔla ko ai ye yenni kɛla. Wo le kosɔn, ai la julumun di to ai kan fɔlɔ.»
Цяпер абрана:
YUH 9: AKS
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/