HAOKAPHOK 6
6
Mikumowui Makaphā-makhayā
1 #
Job 1.6; 2.1. Okathuili mikumo kachungkha mataisangmamān kaji tharan, sha̱naola kachungkha pharāsanga, 2Varewui naomayara ngarāna miwui naongalāva̱ ngarāwui khamathā chi theilaga; athumna kapangkakhui chi khalattawui preiva̱ sāda ngakuma. 3Chieina Prohona hānga, “Imanglāna mikumoli katang mavaila mangayurchingmara, kaja ava phasā khavaiana; ana zingkum shākha maga̱ okthuira.” 4#Mis 13.33. Atam chitharān Nephilimbing okathuili pānsai, kala Varewui naomayara ngarāna mibingwui naongalāva̱ ngarāli ngakumda nao kachungkha pharā kahaiwui thilila leisai. Achālakha aming kazata kala kapanga mi chi athumna.
5 #
Mat 24.37; Lk 17.26; 1 Pet 3.20. Okathui alungli mikumowui makaphā sorngasai kahai kala makaphāmāng chukkhamaja katang makhavai chi Prohona thei. 6Kala okathuili mikumo semhaikasāwui vang Proho wukkhananghaowa. 7Chieina Prohona hānga, “Ngalei eina sākakhui mi hili okathuili malei khavai mila, sāyurla, phara̱-pharāla kala kazingli yongkazat vānaobingla ina shimān ngasakserhaora, kaja athumli sākahai hi I wukkhananghaira.” 8Kha Prohowui mangāli Noahva ngahānkhangai mi ngasāsai.
Noahna Marikhong Kasā
9Noahwui naothot hithai. Noah khamashunga mina, awui thotli shātmakakā mina; Noahna Vareli ngavaplak eina okthui. 10Noahwui nao Shem, Ham kala Japheth hoda kathum leisai. 11Chitharān okathui hi Varewui mangāli khamakhao mirin kala khangama̱ khangazaina pemsai. 12Varena okathui hi theilaga, yanglu, makhaolak eina thei; kaja phasā khavai athum saikora kachichāwui ningkachāng athishurda zatsai. 13Chieina Varena Noahli hānga, “Phasā khavai saikora shimān khavai ina machukhaira; kaja athumwui eina okathui hi khangama̱ khangazaina pemtinghaira; yanglu, okathui eina ngasoda athumli ina shimān ngasakra. 14Gopher thing eina nakhalatta marikhong akha sākhuilu; alungli kā khailu, kala khe eina alung ayār saphinlu. 15Chi hithāda sāki kajina: marikhong chiwui asān khuining shākathumra, aretna khuining hangphangā, kala kajuina khuining thumra jira. 16Marikhong chiwui akhum sāsanglu, kala chi khuining akha juimeida kāfalu, kala arāpli khāmong wutlu; nemkhamei mathāng kakhane, kala kakathuma sāsangra. 17Kaja yanglu, ina okathuili tara̱ phongshilongra, kazingramwui azingli khalei khak-kasuia yur saikora shimān ngasakra; okathuili khalei saikora thiserra. 18Kha ina nali tuingashit akha sāra, na, napreiva̱, nanaomayara ngarā kala athumwui preiva̱ngarā nali ngasoda marikhongli zangserra. 19Asā vaida kharingyur kachiva̱ nali ngasoda ringkhavai, ayur kachiva̱wui khanini, chiya avā akha, ava̱ akha da marikhongli zangngasaklu. 20Vānaola ayur-ayā athishurda, kala sāyurla ayur-ayā athishurda kala ngaleili ngawokazat kachiva̱ ayur peida, khanini nali ngasoda ringkhavai zangngasaklu. 21Kala kashakazā sakapai yur saikorala khuiphunglu kala kazipkhuilu; kaja chi nathumwui vangla kala athumwui vangla kashakazā sāra.” 22#Heb 11.7. Varena kakaso athishurda Noahna sāsera.
Цяпер абрана:
HAOKAPHOK 6: TANGBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.