MATHIU 6
6
Kutchoi Pek Ruia Manchuna
1“Misanna nan nei karra mitam mai kung ana mu rase u tia nan tho nima rase. Animak inko vanram ma nan pa jiang nan tum rang om mak.
2“Hava jarra misanna nan nei karra asat kanrolngain an tho ang han khuong ve maru, ajarko anmanin mi jiang an pek pha han mi kan chun nale lampuia mi ning an manpak na rang tia an tho, a thianga kein nang ni jiang kati ani anmani an tum rang ha an mu jui. 3Tak-ha misanna nan nei karra na kut chang tiang i tho ha na veitiangin jet ma rase. 4Hava jarra misanna nan nei karra rukchian na nan tho ni rase, rukchian na ana mu nan pan na malekhir nati.
Lam na Ruia Manchuna
(Luk. 11:2-4)
5“Hava jarra nang nin lam na nan nei karra, asat kan rol ngai asanga ni maru, ajarko anmanin lam na an nei karra min an mu na rang Sainagok sunga hale lam lian akia an ngirra an lam, a thianga nang ni jiang ka na ripe ani, anmani ranga mana ha an mu jui. 6Tak-ha nang nin lam na nan nei karra inn sunga lutnang inn kharra, rukchian na a om nan pa jiang lamru han rukchian na ana mu nan pan na pek nati.
7“Nang nin nan lam karra, a dangjat mi anga nem na buia veisosom nol maru; ajarko anmanin chong tam tak an ri han nangaipe nati tia an ngaidon. 8Ajarko, anmani ang ni maru, nan lam mak ma nan ngaidon, nan dei phur ha nan pa ning a jet. 9‘Hiva jarra hingahin lamru: Vanram ma om kan Pa, na ming thiang chang rase. 10Na rengram hong rase, vanram ma na lungdo tung ang han ramuol la hong ni rase. 11Anitin kan chak kan nek ranga, ve en ni na pero. 12Hale kein in kan lamaltualngai ngaidam kan nei anga kan lamaltual hi na ngaidamro. 13Mathemna han na ruai maro, tak-ha asat mak khat tenna na sanro; ajarko rengram, ranak hale lianpui na amongtibui ha nangta ani. Amen.’
14“Ajarko, mi ning nan chunga mashialna a nei ha nan ngaidam inko, vanram ma nan Pa in om ngaidam na nei nati. 15Tak-ha mingai mashialna ngaidam nan nei mak inko vanram ma om nan Pa ning om nan mashialna ha na ngaidam noning.
Bungei Ruia Manchuna
16“Hava khel la, bungeina nan nei karra asat kanrolmi anga tho maru; ajarko anmanin bungeina an nei le mi ning na jet rase u anta an maisua a pong omchan ando, a thiang tak a ka na ri ani, anmanin an tum rang ha an mu jui. 17Tak-ha nang niko bu nan ngei karra nan lu sariak notru hale nan mai phiaru. 18Ha ang han nan bungei mi jiang a kando nima rase, vanram ma nan Pa ning rukchian na mu rase; hale rukchian na ana mu nan Pa ning na pek nati.
Vanram ma Neina
(Luk. 12:33,34)
19“Ngente le thir ek in an chakmangtor, hale a ruklerep in om an ve khui tor an ruktor phurlepai, ramuol chunga nang nin buk maru. 20Tak-ha ngente le thir ek in om an chakmangtorlui, hale ruk le rep in om an ve khui an ruktorlui vanram ma nan phur nan pai bukru. 21Ajarko nan neinak sampar om na mun han, nan lung om om nati.
Taksha Var
(Luk. 11:34-36)
22“Taksha meivarko mit ani, na mit asat inko na tak sa pumpui var nati. 23Tak-ha na mit asat mak inko, na tak sa pumpui jing nati; nang jiang var ha a jing inko i duk amo a jing khup rang.
Pathian Le Neinun Sampar
(Luk. 16:13; 12:22-31)
24“Tu khat om oja anni chuan tho tor noning, ajarko an khat ha enda nati hale an khat lam lungsiat nati. Animakle an khat ha don nati hale an khat ha don noning, ajarko nang nin Pathian le neinak sampar chuan thosuamtor noni che u,
25“Hiva jarra kein nang ni jiang kati, ring na rang imo kan chak kan in rang, animakle imo kanshi kankei rang tia nan ning man dong maru bu khel la ringkhuo, hale puanshi diar kei nek a tak sa lam alutdet mo nimak? 26Vanna vatengai enru, vorum vor ma u, at om at ma u, manchunna innte han nom buk ma u; an in nom vanram ma nan Pa ning avai, nang niko amani nek alutdet mo nima che u? 27Tu ang khat in an ning an mandonga, a ringkhuo khutup khat mo an manseitor?
28“Puanshi diar kei ranga ijarra mo nan ning adong? Phaijolla tonpar ha ngaidon ru, chuan om sin ma u, pat om kher ma u. 29Aninnom kein nang ni jiang ka na ri ani, Solomon rengpa ning a kan ma hok na rakip sunga tonpar an khat sat ha leiphak tor mak. 30Ve en ni a lui om jingako mei lum sunga deng juan rang, phaijolla ramsul ngal lom Pathian in anmani rang a ngaidon pe ani. Aviarte takngai neingai, Pathian in a khel la na ngaidon noning mo?
31“Hiva jarra keini imo kan chak rang imo kan in rang, animakle kanshi rang, tia nan ning man dong maru. 32Ajarko jatdangngai om hiva rakip hi an tok, hava jarra vanram ma nan Pan hiva rakip hi nang ni nem na rang a jet. 33Tak-ha a rapatak Pathian rengram le ama dikna ha tokru, hale phur rakip hi nang ni na pekde nati. 34Ajarko jinga ranga nan ning man dong maru, jinga ranga jinga kan ning nati ni khat ni khat a akanvarna han ahunthekjui.
Цяпер абрана:
MATHIU 6: AIMOLBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.