Лука 21
21
Глава 21
Навун анивунни
1Ичисниди-нян, Ноӈан эӈэелбу анивун тэпкэлэн анимдылбур нэддылбу иттин. 2Нян дӫгрив-да навум иттин, дӫрбу-ткэн мэӈэм тала нэчэв, 3тар гөнин:
– Айдиту хунтэки гөнэм: эрэк дӫгри навун чэлэдукун хоядмару нэдивэн, 4тарал эйдучэндюр мэр хулэктукур Хэвкиду анивум нэдытэн, ноӈан-аси дӫгридуки өмниги деплэӈи бичэв нэдин.
Хэвки Дюн, Иерусалим-да хаюбачинмаютан таимкачин
5Нян ок-ка хан гөнэкэтэн, Хэвки Дюн эрипчилди делалди, анивурди-да нодаллтавканча бисивэн, Иисус гөнин:
6– Инэӈэл-дэ одир, тек хун коеридукэсэн чэлэдукун дёл гя дёлду ойлэн өмэн-дэ этэн хулапта, чэлэн хаюпча бидин.
7Нян Ноӈман улгэмритэн:
– Хупкучимӈэ! Ок-аси тарак бидин? Нян иррөчин ичунмэй биннэн, ок-та эчин некэбэннэвэн ичувкэндэй.
8Иисус гөнин:
– Тогэӈчиӈэсэн, эдэвур ӈиду-дэ елкэврэ. Тарбач хоя-да эмдир, Мин Гэрбэдив гэрбэлэттир, Мин бисидив гөникэн, тарбач эрэк амрак биннэн, ноӈардутан эмэкэн бодда. 9Ок-аси кусим, булэтмэчим долдадис, эмэкэн хэӈулрэ, эррөчин-кэнэ биннэ, тарбач эрэк-тэ унэт эсни мудан бис.
10Таракам Иисус ноӈартакитан гөнин:
– Ӈөнмин ӈөнмим дэпки булэтмэчилдир, тэгэмэрэдек тэгэмэрэдеку дэпки булэтмэтчир, 11тарда-танна төр хилгэлдин, нян демкэр, кэӈиркир, тадук-нян ӈэлэмэл оймаил бидир, эгдер-дэ ичукэнмэил няниндук ичусэндир. 12Нонан-кана хуну хэпкэндир, нян хуну хилгитчир, тарбач Минтэкэн Гэрбэлив нэӈэдекэл дюлдула хуну иткатчир, хинючакалдула хуну тэгукэндир, тэгэмэрэртэки, ӈунэмэчимӈэртэки-дэ дэпки хуну төрэвкэндир. 13Таракам ху Мину төрэдис. 14Тарбач эмэкэн мэргэттэ, мэн мявундюр эмэкэн ӈэлрэ, яв-да барагганнавур. 15Би-нян хун мэргэӈэсэн, төрэӈэсэн бөдим, таралбу дэпки гөндэсэн, хуну баргакал яв-да некӈэ туркудир, яв-да гөӈэ туркудир. 16Тарбач энтылдур, акнилдур, ханилдур, дялдур ху коивдис, хан-да хундук мавдир. 17Нян Мин Гэрбэлив чэлэн хунэч баргаклатчир. 18Тарбач өмэн-дэ нюрит хун дылдукэсэн этэн бэриптэ. 19Мэн маӈчиндюр мэн ханьмур айдис.
20Ок-ка Иерусалиму кусимӈэлду эрэлэттыв итчис, таракам тарак город хаюкачиммон одыван халра. 21Таракам Иудеяла биддыл урэкчэртэки хэтэкэндэтэн, ӈи-ккэ городла бидин, тарал тадук дэрисэндэтэн, ӈи-ккэ анчиндулан бисни, тарал эдэтэн тала ир. 22Тарак мелэвдек инэӈэӈэн бидин, тарбач эйду дукутча обдин. 23Таракам өсэрилду, өкуттылду-дэ асалду хилус бидин, чэлэн төрлэ эгден хилус бидин, Хэвки тыкунни элэ ӈөнмилэ надин. 24Нян откэн дейдун көкэдир, нян танӈандула хөнтэлтэки ӈөнмиртэки илбэвдир, Иерусалим-да ач хэвкигчэрду кадачивдин, ач хэвкигчэл биӈситэн манукан.
Иисус Христос гяврин эмэдекэн
25Нян ичукэнмэил нӫлтэндулэ, бягла, осикаталдула-да ичулдир, төрлэ нян ӈөнмир хувулэндир, хасулдир; нам-да биялгалдин, улдалдин. 26Бэил ӈэлэмдук, алаттыдукур хилустук төрлэ наддылдук көкэдилдир, нянин эӈилни мэилбэндир. 27Таракам-нян Бэй Хутэн Очав итчир, тогэчин ойлэн эмэддыв, чэлэн эӈилкэм, эгдень хэррилкэм. 28Ок-ка тарак одилдин, мэнур ӈунрулрэ, дылалбур огэрлилрэ, тарак хун айчинмайсан эмэдилрэн.
Смоковницав тэлэӈ, тогэӈчин бидэвур гөнмэй
29Нян Иисус ноӈартакитан төлэӈу тэлэнрин:
– Смоковницав нян эйдувэн хякитав коетлилрэ. 30Тарал эбдэнрэлбэрэкэтэн, ху тарав итми, мэркэр хавачис, дюгани одилриван. 31Тачин-та-тта Мин гөнчэгчиму одилриван итми, Хэвки Тэгэмэрэдекэн эмривэн хаӈасан. 32Айдиту хунтэки гөнэм, эдлэтэн чэлэдюр ӈөнмир манур, эрэк эйду оградин. 33Нянин, төр-дэ манудир, тарбач Мин Төрэрбу этэр манур.
34Мэнур-дэ авдаткаралра, эдилрэ дебэнь, коланакач, тэрукэчинь-тэкэн инэӈтэн мэргэлэттэ, ун бидимнин тарак инэӈ хуну эдэн оламкан, 35тарбач тарак инэӈ эйдувэн бэилбу чэлэн төрлэ бисилбу адалгачин амалтадин. 36Нян эрэгэр тогэӈчиникэн бигрэлрэ, нян эрэгэр биннэлдук хилусалдук мэнур айчидавур нэӈэдьгэрэлрэ, нян Бэй Хутэн Очав дэпки илдавур.
37Инэӈтэн Иисус Хэвки Дюлан хупкучиддин, хисэчин-нян хөрми, долбоннон Елеон гэрбэлэттыду урэкчэнду биддин. 38Тар чэлэн бэил бадираптук Хэвки Дюлан Иисустаки, Ноӈман долчидавур, эмгэрэритэн.
Цяпер абрана:
Лука 21: eve
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X