Лука 19
19
Глава 19
Закхей
1Тадук Иисус Иерихондула ӈэнрин, город толилдулин гиркарин. 2Тарбач, өмэн эӈэе бэй, тамам чакамӈал бэгэнтэн, Закхей гэрбэди, 3Иисусу ичимсин, ӈи-дэ Тарак бисивэн хадай, тарбач кучукэн бими, бэил додукутан итӈэ туркурин. 4Таракам, дюлэски хэтэкэниди, хякитала ойчирин Иисусу иттэй, Тарак хякита анчиндулин гиркаракан. 5Иисус, таракла хякитакла ӈэнриди, огэски ичиснин, ноӈман иттин, нян гөнин:
– Закхей! Эврили хинмач, эрэв инэӈу Мин хин дюлас биннэву.
6Нян тарак хинмамакань эвририн, хокаӈчиникан Иисусу алимрин. 7Тарбач эйду тарав коечэл тыкулритан, укчэнэдилритэн, Иисус төнӈэкичилкэнтэки бэйтэки ирэкэн. 8Закхей, Хунӈивут дэпки илриди, Ноӈантакин гөнин:
– Хунӈиву, калтаки эӈэей дӫгрилду бөдим, ӈив-кэ окта-вул яч-ул асавканив, таду дыгрэкэн хоядьмарач бөдим.
9Иисус ноӈантакитан гөнин:
– Эрэв иӈэну элэ дюла айчин эмрин. Ноӈан-да Авраам хутэн бисни. 10Бэй Хутэн Оча бактай бэрипчэв, тарав айдай-да эмрин.
Мям мэӈэм тэлэӈ
11Ок-ка ноӈартан тарав төрэддывэн долчиддытан, Иисус унэт тэлэӈу тэлэӈрин (Ноӈан укал Иерусалим анчидулан бисин, нян бэил Хэвки Тэгэмэрэдекэн укал амрак оннадин гэрбэттытэн). 12Нян Иисус гөнин:
– Өмэн бэй каган бисин, тэгэтки төртэки хөрэддин, тала мэни тэгэмэр овкандай, тарав дявучилми, амаски-да мучудай. 13Ноӈан мям мэн кэлмэлби эмдэтэн эририн, мям мэӈэӈгэтэн бэйтэнду бөрин, нян ноӈартакитан гөнин: «Эрэлбу бөчэлбу мин эмэклэв хоярталӈасан». 14Тарбач бэил ноӈман эчилтэн аявра, нян тарак бэй хөррэкэн, амаргич болганамӈалбу хөрукэнитэн, гөндэтэн: «Бу эсу аявра мун тэгэмэрун бидэн». 15Нян ноӈан тэгэмэр одыди, мучуриди, мэнтэкий мэн кэлмэлби, бөчэлдий мэӈэӈгэтэн, эмдэтэн гөнин, хадай, адыв таралды мэӈэнь ойдэлитэн бакчавутан. 16Дюлэг эмрин, нян гөнин: «Хунӈиву, хин бөчэс мэӈэн ойдэлин унэт мян мэӈэн бакаптин». 17Тэгэмэр ноӈантакин гөнин: «Чакты, хи ай кэлмэ бисэнри! Кучукэндули хи эевӈи бисис, теми хи мян городал ӈунэмэчимӈэтэн бидинри». 18Нян гя эмрин, гөнин: «Мин хунӈиву, хин бөчэс ойдэлин унэт тунӈан мэӈэн бакаптин». 19Нян тэгэмэр эртэки гөнин: «Хи тунӈан городал ӈунэмэчимӈэтэн бидинри». 20Илитан эмрин, нян гөнин: «Хунӈиву! Эр хин бөчэс мэӈэн, би булатла чакалриди, нэкчирив. 21Би хину ӈэлрив. Хи ач илрана бисэнри: яв-да эми нэд – гавачинри, яв-да эникэн тэгукэн – хечэв аталочинри». 22Хунӈин ноӈантакин гөнин: «Хин гэнчэдис төрэндис би хину усалтавкандим, хи кэнели кэлмэ бисэнри! Хи ханри мин ач илрани бэй бисиву, яв-да этылэй нэд – тала гаваттам, мэнкэн эчэй тэгувкэн – аталоттам. 23Ями-си хи тарав мэӈэм эчис хоялтавкан? Нян тек мучуми, би хоялтавкам-ул бакамчу?» 24Нян далила илаттылтаки кэлмэлтэкий гөнин: «Ноӈандулан мэӈэм галра, нян мян мэӈэӈэлкэнду бөлрэ». 25«Хунӈит, – тарал ноӈантакин гөнитэн, – тарбач тарак укал мян мэӈэӈэн бисни». 26«Хунтэки гөнэм, ӈи-лэ бисни, таду унэт бөдир, ӈи-лэ-ккэ ачча, тарак укал бисив-дэ тевдин. 27Тарбач мин булэрбув, ӈи-ккэ мин тэгэмэр бидэку эчилтэн аявра, таралбу эвуски эмукэӈэсэн, мин коерэку маӈасан», – хунӈитан барагрин.
Иисус Христос Иерусалимна ӈэнэдекэн
28Тарав тэлэӈу тэлэӈриди, Иисус часки Иерусалимтаки хөррин. 29Ок-ка төр Виффагия, Вифания-да, урэкчэн-дэ Элеон гэрбэлэтты анчиндулатан ӈэнрин, Иисус дӫрбу хупкуттыӈэлби дюллэ хөрукэнин, 30гөникэн:
– Дюллэ биситки билэктэки ӈэнэлрэ. Тала ими онеттыв явкам бакчис, ӈи-дэ тарич унэт эч учиклатта, онелгэӈэсэн, эвуски элгэӈэсэн. 31Ӈи-дэ хуну эчин улгэмрэкэн: «Ядавур онелгэс?» – ноӈантакин эчин гөндис: «Хунӈит эрэв надан».
32Хөрукэнчэлни ӈэнритэн, тачин гөнчэгчинни бичэв бакритан. 33Явкам ноӈартан онелгэрэкэтэн, тарак хунӈилни ноӈартакитан гөнитэн:
– Ядавур явкам онелгэс?
34Ноӈартан барагритан:
– Хунӈит эрэв надан.
35Ноӈартан тарав явкам Иисустэки элгэритэн, нян явкан хэелэн оилдюр гиркэритэн, Иисусу ноӈандулан тэгукэнитэн. 36Иисус бадуракан, дюлдэлэн хотарандули оилбур гиркэритэн.
37Нян ок-ка Ноӈан Элеон гэрбэлэтты урэкчэн эвридектэкин иссин, хупкуттыӈэлни эйдучэндюр хокаӈчиникан Хэвкив, хояв хомив очаван итчэвур, эскэдилритэн, 38төрэникэн:
– Аювкамгарари Тэгэмэр, Хэвки гэрбэлин эмри, Аймулдан няниндула бидэн, хэррин-дэ ойгэлдулэ бидэн!
39Фарисеил, бэил додукутан, Иисустэки гөнитэн:
– Хупкучимӈэ, хупкуттыӈэлби тывнэвкэли!
40Ноӈан-нян ноӈартакитан барагрин:
– Хунтэки гөнэм, ноӈартан тывнэрэкэтэн, таракам дӫлал кунилдир.
Иисус Христос Иерусалиму хоӈран
41Город далилан ӈэнриди, Иисус тарав коетникэн, ноӈман хоӈалрин, 42нян гөнин:
– Эрэв-дэлу хотарам аймулдантаки хамалкаракас ай бимчи! Тарбач эрэв инэӈу ясалди тарав эсэнри коер. 43Тарал-да инэӈэл одир, ок-ка хин баргакалси хину эрэлдир, хину эрэли улэдекэлгэвур улдир, нян тэрингич хину каддир, 44нян хину хаюдир, нян хин долас бисилбу хурэлбус мадир, нян дӫлу дӫл ойлэн хиндулэ этэр эмэн, тарбач тали-ткан, Хэвки Айчим хинду бөннэвэн эчилис хамса.
Иисус Христос Хэвки Дюлан
45Нян Хэвки Дюлан имнин, униемӈэлбу, унийрилбу-дэ тала Иисус тадук эрэсэдилрин, 46ноӈартакитан гөникэн:
– Хэвки Дукундулан дукуттан: «Мин Дюв нэӈэдек дюн», ху-си хөнэл билэккэтэн овканисан.
47Иисус инэӈтэн Хэвки дюлан хупкуткэрэрин. Дюлэгэл бисил хиргэмӈэл попал, Итум-да хупкучимӈэл, каганкар-да мадавур Ноӈман некритэн, 48тарбач туркуритэн яв-да Ноӈман некӈэ: бэил Иисусу ач мудна долчиддытан, Ноӈан анчиндун эрэгэр биникэн.
Цяпер абрана:
Лука 19: eve
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X