Mpiin 12
12
Uwumbɔr aah nan yin Abram pu na
1Uwumbɔr nan bui Abram ke, “Nya aado yaab aatiŋ ni, ni saanib, ni aate do, ki buen kitiŋ ki m ga di ki mɔk si na ni.#12.1: Lik Lituln 7.2-3; Hiibru Yaab 11.8. 2M ga cha aa maa ki pɔr pam, le saamaal ga ŋa linibokpaan. M ga ŋa tinyoor ŋa aa pu, le aa ga li kpa liyimbil, le aa pu, binib ga kan tinyoor m chee. 3M ga ŋa tinyoor ŋa unii umɔk ŋa tinyoor ŋa aa pu na, ki ga puun lii unii umɔk puun lii aa pu na, le aa pu, m ga ŋa tinyoor ŋa ŋinibol mɔmɔk pu.”
4N‑yoonn mu Abram nan ti saa ŋibin imonko itaa ni kipiik ni ŋiŋmu na, le u nyan Harann aatiŋ ni, Uwumbɔr aah nan bui u ke u ŋa pu na, le Lot nan dii u buen. 5Abram nan yoor upuu Sarai, ni Lot u ye unaal Harann aajapɔɔn na, ni waawangol mɔmɔk, ni waanaagbiib bi mɔmɔk bi u nan kan Harann aatiŋ ni na, le bi piin ki cha Kanaann aatiŋ ni.
N‑yoonn mu bi ti fuu Kanaann aatiŋ ni na, 6le Abram chuun dii kitiŋ ngbaan ni, le ki ti fuu bususakpem bu bi yin bu ke More, ki bi Sekem aatiŋ ni na chee. N‑yoonn ngbaan, Kanaann yaab nan laa beenin bi kitiŋ ngbaan ni. 7Uwumbɔr nan dan Abram chee le ki nan bui u ke, “Kitiŋ kee le m joo m di tii saamaal.” Nima chee le Abram maa kitork aabimbiln tii Uwumbɔr u nan dan u chee na. 8Nimina aapuwɔb, le u ki fii ki buen ŋŋangii wɔb, ki ti fuu ŋijoo aatiŋ ki bi Betel aawipuul wɔb na, ki kal Betel ni Ai aakaasisik ni. Betel nan bi liwilir wɔb, Ai mu nan bi liwipuul wɔb. Nima chee mu u nan ki maa kitork aabimbiln, le ki toor kitork ki doon Uwumbɔr. 9U nan ki fii nima chee, ki chuun ki doo nsan ni, ki ti ki fuu Kanaann aapepel li bi ŋŋangii wɔb na.
Abram aah nan buen Ijipt aatiŋ ni pu na
10Tɔ, n‑yoonn mubaa le nkon nan lir Kanaann aatiŋ ni. Nkon ngbaan nan pɔɔ ti nyaŋ. Nima pu le Abram nan buen Ijipt aatiŋ ni, u ti laa li bi nima aan bi kan tijikaar ki ji. 11Baah nan ban bi koo Ijipt aatiŋ ni na, le Abram bui upuu Sarai ke, “Aa ye upii u ŋan na la. 12Ijipt yaab yaa kan si kan, bi ga bee ke aa ye mpuu la, le bi ga ku mi, ki gaa si. 13Bui bi ke nninkpan le ye si. Nima kan bi ga cha m li bi, ki ŋa mi tiŋann.” 14Baah ti fuu Ijipt na, Ijipt yaab nan sil kan ke Abram aapuu Sarai ŋan pam. 15Ubɔr ngbaan aaninkpiib nan sil kan Sarai, le ki buen ti bui ubɔr, Sarai aah ŋan sakpen pu na, le ki di u buen ubɔr aachiln ni. 16Sarai pu na, ubɔr ngbaan nan ŋa Abram tiŋann pam, le ki tii u ipiih, ni iŋoob, ni inaa, ni ibon, ni binaagbiib, ni laakumii tiib.
17Tɔ, ubɔr aah nan gaa Sarai, Abram chee na, le Uwumbɔr nan cha iween i bir na lir u ni waachiln aanib pu. 18Iween aah lir ubɔr ni udo yaab pu na, le u tun ki ti yin ni Abram, le ki nan baa u ke, “Ba ŋa aa ŋa mi kina? Ba ŋa saa tuk mi mbamɔn ke u ye aapuu la? 19Ba ŋa aa tuk mi ke u ye aaninkpan la, ki cha m yoor u ki di ŋa mpuu? Aapuu sɔ. Gaa u, ki di u nya kitiŋ kee ni.” 20Ubɔr ngbaan nan cha waanib jenn nyan Abram, ni upuu, ni waawan mɔmɔk, waatiŋ ni.
Цяпер абрана:
Mpiin 12: xonB
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
©1998, 2014 Wycliffe Bible Translators, Inc. All rights reserved.