LUK 15
15
Iantsün Onnemok
(Mat 18:12-14)
1Nyitso liukim shitsünso naiuso angeihoi piakü Yisu ngio tü angao thaiutha kamjikan, nai 2Farisihoi naiuso Ngiokhem tsandetsünsoüh, “Nung khaiunia nou angeihoi louji naiuso ngüsoko lüko aikü heshiuji!” ta ngiokü namnamao yachu. 3Nungtiphe Yisuüh nung athatlu ngio ngüso tü ngiom:
4“Asam ongko tsaküh onnemok tsom tsak taiukü naiuso nung ongko tsak iannaiapaüh ti chhiji? Apaüh aolükaokü lükao nou thsan tsamhetsün nai letaiuküta iantsün tsak nou moepkün lektso yamkü khuji. 5Tilai apaüh nung eplouji, apa thatü monglingkü nung apa sangdongkhaiu nai loklutkü 6kankü apa tsamai laokü shiji, nai apaüh meshen haiso naiuso phaohai jonkamkü ngüso tü ngioji, ‘Ngo thatü monglingji, tiautenai ngü iankü noitsün jü onnemok eplou-iu. Sam monglingkü maiheko!” 7Nung khekkü, ngo asam tü ngioji, mong phokleao poukü tsünoikün asiohoi aolükaokü lükao nouko naito mong phokletsün angei khaiunia tsak nou ta aün nai amongling asong noi-e.
Iantsün Tangka
8“Loüh nyiuhai tsaküh son tangka che taiutsün ongko tsak iannaiapaüh ti chhi-e? Apaüh tson sunlouküta tsam kaikü nung moepkün lektso paotsangkü yamji. 9Tilai apaüh nung epji, apa haiso naiuso phaosipohai jonkamkü ngüso tü ngioji, ‘Ngo thatü monglingji tiautenai ngo iantsün tangka eplou-iu. Sam monglingkü maiheko!’ 10Nung khekkü, ngo asam tü ngioji, angei khaiunia tsak mong phokletsün nouko Goa aünhonghoi monglingji.”
Iantsün Melothso
11Yisuüh tsülaokü ngiom, “Atao tsak ko khaiunia tsak ün melothso nime noiküla. 12Niophi nou apa po tü ngiom, ‘Po, tengkam ongko ti haoson ngo theao noin nung ngü hao lo akiu.’ Nungtiphe Po nou apa thso nime jetko apa tengkam janekü kiu. 13Ajekhaiu intso shamküta thso niophi nou apa tengkam apem janheküta chai kamloukü tsam letaiukü goumchi laiukü nai khuwan. Apa shingkhannio laiukü noitsün tsakai khukü athatha kihtsün nai chai thapengan. 14Apaüh suntsün tengkam apem wankheman. Nai nung shingkhannio nai naiusile thatü thsüokü tsak shikü, apa titso tsütaiushikü thatü tsosilu iulan. 15Nungtiphe nung shingkhannio nouko noitsün khaiunia tsak tü panlut, naiuso apa khengtaiu nai yahpin tü jimao hong. 16Apaüh yah nou hetsün laponkhup nou heao aiu, lüko sauüh apa hao eheao titso tsükiu. 17Aphiteng nai apa mongtsüo shikü ngiom, ‘Jü po ko chaichen nousoüh ngüsoüh aiutsün chiai epji, lüko ngo to nungai naiusile nou eanji! 18Ngo tsaloukü jü po dongai khu-e küta apa tü ngio-e, Jü po, Goa thako naiuso athako ngo angei sunlou-iu. 19Ngo loto athso ta jonao tsümai; ngo ni nou chaichenhoi ongko tsakli akankeiha.’ 20Nungtiphe apa tsaloukü apa po dongai laokü khu.
“Apa kumai noikünaita, apa poüh apa epkü mong kiakü yangküta kopkü khukü apa thso sang nai piplouküta son nai chep. 21Thso nou ngiom, ‘Jüpo,’ ‘Goa thako naiuso athako ngo angei suniu. Ngo loto athso ta jonao tsümai.’ 22Lüko apa poüh tsamkihoi tü ngiom, ‘Liukü!’ ‘Phakhut ameiting kankü shikü apa tü akhutlut. Apa pha nai khiapthso naiuso hok nai hokkhut lükhut kiu. 23Nai jangthso atsateng nou kankü shikü aloat, naiuso samüh monglingekü heshiukü sümaiko! 24Tititenai jü thso nung mowankü noiküla, lüko lo aa noin; apa iankü noiküla, lüko lo apa eploushikü noin.’ Naiuso ngüsoüh monglingkü sümaiheao yachu.
25“Nung taokonai apa thso petche nou eiuai keitaiukü noiküla. Apa yashitsün taoko, apa tsam shimkü shinai, apaüh jih hangtsün naiuso akoihe ngem lula. 26Nungtiphe apaüh tsamki tsak jonshikü apa tü, ‘nungso titi theji?’ ta sanglu. 27Tsamki nou apa tü ngiom, ‘Tsamai anio laokü shikü noin,’ naiuso ‘apoüh jangtso atsateng nou loat, tiautenai apaüh anio ameilei eploushin.’
28Adei nou thatü mongmatkü tsamai sungao tsüaiu, nungtiphe apa poüh kamai saokü apa tsamai nappao sailu. 29Lüko apa po tü thalakü ngiom, ‘Athaplu-eime, pon nungtitso ngo sua tsakühli ni yathsüo, naiuso ni ngiotsün tsüangkü laitso tsünoi. Ni ngü hau ti kium? Jü haiso ko monglengekü heshiuao ni laitso wonthso tsaktso ngü hau tsükiu! 30Lüko nung athso sauüh, tsütsamtsütsüokün yamai achai apem kheman, naiuso tilai apa tsamai laokü shin, ni apa thaiutha jangtso atsating nou loat!’ 31Apa poüh apa tü thala, ‘Jü thso,’ ‘Ni ngüko nungko asaita noikü shin, naiuso ngü nou alum ni nou noin. 32Lüko sam monglengkü maiheaolu noin, tiautenai anio eankü noiküla, lüko lo apa aa noin; apa iankü noiküla, lüko lo apa eploushikü noin.’”
Цяпер абрана:
LUK 15: KHIABSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.