LUK 12
12
Akaosai Thako Alutsüo
(Mat 10:26-27)
1Khaiunia heng piakü tsak chiai tsak ta ngamekü kamshinai, apaüh aya nai apa sahoi tü chite, “Asamüh Farisihoi akaosai phoplao thaiutha lütsüolu. 2Tilüsong kiapjeikü taim nung tsükiapjeishi-e, naiuso atsangtaiu nouso apem ngekü iula-e. 3Nungtiphe asamüh anyakhem nai tilüsong ngio-e, nung awon nai lu-e, naiuso tsambai akheiai tilüsong asam noukhanai nyankü chite-e, nung tsamkhaiu chinai ve-e.
Sau Lon Hat-e
(Mat 10:28-31)
4“Jü haiso, ngo asam tü ngio-e, sauhaiüh pem luatji, lüko nung chiai ngüsoüh titso chhiao tsüshio, ngüso lon lahat. 5Lüko asamüh sau lon hatkü hao noin ngo asam lutsüo-iu: Goa lon lühat, sauüh luatküta inheeng nai louthioao oukong noin, apabao lühat. Ah, ngo asam tü ngioji, Apabao lühat!
6“Lümethso pungo poisa nime he tsüjanji süne? Goa khako ngüso tsak lüko tsümoji. 7Loüh akhaiu nai khaiuou lüko apem vesankü noin. Nungtiphe lahat; lümethso piakü nouko to asam chen!
Khrista Thaloutsün naiuso Tsüthaloutsün
(Mat 10:32-33; 12:32; 10:19-20)
8“Ngo asam tü ngioji, sauüh khaiunia khako ngo thalou-e, Khaiunia Thso nou apa lüko Goa honghoi khako thalou-e. 9Lüko sauüh khaiunia khako ngo tsüthalou-e, Khaiunia Thso nou apa aünhonghoi khako tsüthalou-e.
10“Sauüh Khaiunia Thso thako ngio singio-e, nung apa tü wankiu-e, lüko sauüh Asio Onthso thako lutsao-e, nung apa tü tsüwankiu-e.
11“Tilai ngüsoüh Yihuda kamthang nai, naiuso nokpao nokshing nouso, naiuso oukong noinso dongai asam nialoukü shi-e, asamüh titi thalashi-e tsüdekünai ti in chite-e ta layangelat. 12Tititenai nung taokolu asamüh ti ngioao noin nung Asio Onthso nou asam tü han-e.”
Mongyang Tsünoikün Memei Tsak Athatlu Ngio
13Hoi ainou khaiunia tsaküh apa tü ngiom, “Atsandetsün, jü dei tü sam poüh tengkam poitaiu kiu nou ngoko ajane ta lüngio.”
14Naiuso Yisuüh apa tü thala, “Jü hai, aje jetko tengkam janekü mikhem kiuao ngo hao sauüh oukong kiu?” 15Naiuso apaüh ngüso chikü tü tsülaokü ngiom, “Achinek mejeitsün ainou asam lütsüolu, tiautenai khaiunia tsak apa titithatso memei noilünou, aa ta ngiotsün atsüo nou apaüh taiutsün jengtsaiu nai tsüde.”
16Apaüh ngüso tü nung athatlu tsak ngiom, “Memei khaiunia tsaküh apa eiu ai khülam piakü lou. 17Apaüh meshen mongai yanglukü ngiom, ‘Ngo ti chhi-e? tititenai ngo jü khülam tiai tsütaiu. 18Apaüh ngiom, Ngo nung chhi-e, ngo jübei laopengküta losongshikü shanko, küta ngo jü khülam naiuso jü jengtsaiu apem singtaiu-e. 19Küta ngo jü onthso tü ngio-e, Onthso, pon piakü thaiutha ni jengtsaiu piakü shingtaim, tsükowekü lünoi, lühe, lüshiu, monglingkü lünoi!’ 20Lüko Goa nou apa tü ngiom, ‘Ni mongyang tsünoikün! Lüsolu a-onthso ni ainou louwan-e, nungai ti jengtsaiu ni, kamtaim nungso sau ün hao the-e?’”
21“Nungti sauhaiüh meshen memei jengtsaiu kamsanji lüko Goa khako to memei tsüde” ta ngiokü Yisuüh philou.
Goa da Monglamtsün
(Mat 6:25-34)
22Yisuüh apa sahoi nouso tü ngiom, “Nungtiphe ngo asam tü ngio-e, asam aa thaiutha asamüh ti he-e, tsüdekünai asam pem thaiutha ti tene, layangelat. 23Tititenai eheshiu nouko hau aa chen, naiuso nese nouko pem chen. 24Mükho nouso tü lüthaplu: ngüsoüh le tsülethioji, be-eiuyam tsüyamji, naiuso akamtaiutsün tsam tsüdekünai bei tsülahji, lüko Goa nou ngüso tsadji! 25Asam ongko ajantsoüh amongpi nou aakihlaiu phasab tsak lüko lolaiuao shio-e süne? 26Asamüh nung chhi ehen nou tsümonkü naito, tiau amao apoi nouso thaiutha yangelatji? 27Liutsa nai lakkhaiu taopon titi sungji ta lüyanglu. Ngüsoüh kongkü tsüchhiji, tsüdekünai ethsa tsüyangji, nungti lüko ngü asam tü ngio-e, nokpao Solomon apa ajinka apem nou nungso tsak khekkü tsüthochu. 28Lüko Oh intsolu monglamtsünso, ti liutsa sang lonyi noiküta lühom in nai thio-e, nung hao Goa nou tenkiuji tünaito, apaüh nung tü simkü asam hao tsütenkiu-e süne?
29“Nungtiphe asamüh heao naiuso shiuao, thaiutha layangelat. 30(Tititenai nung goumchi khaiunia Goa tsüngekünhoi nou nungti yamji.) Lüko asam Poüh nung poukü noin ta ngen. 31Nungti lüko asamüh apa nokshing lüyam, nungai asam hao ouk nou kamlutkiu-e.
Aün nai Memei
(Mat 6:19-21)
32“Ehen hoiso lahat, tititenai asam Poüh asam hao Nokshing nou kiuao mongchiokü noin. 33Ni taiutsün jengtsaiu apem lüjan naiuso tangka nou angjahai hao lükiu. Anyi-an tsüyangkün tangka nekong lütuh, naiuso aün nai jengtsaiu lükamtaiu, nungai tilaitso tsüthsaojikanji, tiautenai kao napao tsüshio, naiuso mat nou tsüheji. 34Tititenai tiai asam jengtsaiu taim, nungko asam mong noi-e.
Jiokü noitsün Tsamkihoi
35“Tsamkihoi meshen tsampao tsamsigoh shan sümai ainou laokü shitsün tü jiokü noitsünli, 36asam tilüsong shilünou achhiao thaiuthalu sheitholokü tson sunkü khemkü lünoi. 37Tsamki nouso sauhaiüh Apaou shinai thsümonkü noikü epji ngüso thaiumei. Ngo asam tü atsüoting ngio-e, Apaüh meshen chija omthsa thsalou-e, küta ngüso heshiu-iao thaiutha moknoi-e, naiuso shikü ngüso hao sunkü wao-e. 38Apa ah-wem tsüdekünai tsangankü shilüko, khemloukü sauhai eppe ngüso thaiumei! 39Lüko nung lüngelu, tsampao nou ti taoko kao nou shi-e nung ngetünto apaüh jimkü noi-ela, naiuso apaüh apa tsam tsülusat-iela. 40Asam lüko khemloukü lünoi, tititenai asamüh tsüyangtsün atao tsakko Khaiunia Thso nou shi-e.”
Monglamtsün Tsüdekünai Mongtsülamkün Tsamki
(Mat 24:45-51)
41Peterüh ngiom, “Apaou, athatlu ngio nung sam thaiutha chitetsün süne, tsüdekünai apem thaiutha noin?”
42 Apaou nou thalan, “Naito, monglamtsün naiuso mongsai noitün tsamki nou sau? Apa to apa tsampaoüh apa tsam apem khaiuko apaotsangau the-itsün amonglam tsamki nou noin. 43Apa tsampao shinai tsamki sauüh nungti chhikü eppe, nung tsamki thaiumei! 44Tsampao nou apa jengtsaiu apem khaiuko nung tsamki apaotsangao taiu-e ta, ngo atsüoting asam tü ngioji. 45Lüko tsamki sübaoüh ngo nou tsampao shitsün tsanganji ta apa mongai ngioji, naiuso tsamki nouso naiuso menyiu tsamki nouso da shiu-e, naiuso heshiukü tokatao yachu-e, 46nung tsamki nou tilai tsüyangkün atao naiuso tsüngekün taoko tsampao nou nyitso laokü shi-e. Nungai tsampao nou apa nelangkü tapneküta, angem tsülukünso ko aikü haoson sunkiu-e.
47“Tsamki sauüh apa tsampaoüh mongchiotsün ngekü nung tsükhemlou tsüdekünai apa mongchiotsünli tsüchhi ta piaküjam shiukü angja kiu-e. 48Lüko sauüh tsünge, naiuso ashiutsün epao lümeikü chhisan, apa ashiutsün intso noulu shiu-e. Sauhai hao piakü kiutaim, apa ainou piakü sao-e; sau phamongai ngüsoüh piakü wankü noin, ngüsoüh apa ainou tekkü piakü sao-e.
Yisu Ajanpektsün Noin
(Mat 10:34-36)
49“Goumchi ko in sung-iao ngo shin, naiuso nung nyaisanantünto titengkü mei-e-la! 50Lüko ngo alimkiutsün tsak nou limkiukü hao noin, naiuso nung mokhemkün chikü ngo titi jeiatji! 51Goumchi ko nokmei kiuao ngo shin ta asamüh yangji süne? Ngo asam tü ngio-e, Tsüde, lüko ajanpek sung-iao thaiutha ngo shin. 52Tititenai loyakü tsam tsakko pungo noinai, süme nou nime thako, naiuso nime nou süme thako ajanpek sungi-e. 53Po nou thso thako, thso nou po thako, nyiu nou thso menyiuthso thako, thso menyiuthso nou nyiu thako, anyai nou apa le thako, thso tsammongnyiu nou apa nyai thako ngüso ajanpek sungi-e.”
Ataothat Ngelatsün
(Mat 16:2-3)
54Apaüh hoi nouso tü thapkü ngiom, “Tilai asamüh ajenap etsai thengmiakhao tsak epji, nungai asamüh ngioji, Ah-nou ou-e; naiuso nungti thawaoji. 55Tilai asamüh ajepek etsai asheih shinou epji, nungai asamüh ngioji, Ahnou lam-e, naiuso nungti thawaoji. 56Asam akaosai nouso! asamüh goumchi naiuso aün kha titi ngeao monji, lüko asamüh nung atao thatsanao titi ngeao tsümon?
Akhengshitsün ko Mi Lüshingthalo
(Mat 5:25-26)
57“Ti atsüoting noin nung tiauta asamüh meshen chija tsüthaiusanji? 58Tititenai ni mipao nouko mikhemtsünso dongai khunai, yamai ni apako jeiai-ao lükowe; nungti tsüdekünai apaüh mikhemtsünso phamongai ni thio-e, naiuso mikhemtsünsoüh ni akhouwantsün phamongai kiuwane, naiuso akhoutsünsoüh ni akhou tsamai taiu-e. 59Ngo ni tü ngio-e, Ni athonting poisa nou mothamkhemkün chikü nung ainou ni titi thekü tsüsung-e.”
Цяпер абрана:
LUK 12: KHIABSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.