येसुङा एहिच चेलाचि पाक्‍सुचिहा

(मात्‍ति १०:५-१५; मार्कुस ६:७-१३)

1येसुङा एहिच चेलाचि काचि, न्‍हाङ् ङ्‌खाचि घाक इसिॽहा मुइचि लोम्‍माहा न्‍हाङा तुखाबाङ्‌चि नुमेॽमाहा साक्‍ति नुङ् चोक्‍तोक पिचि॥ 2न्‍हाङा उङा ङ्‌खाचि निङ्‌वाफुमागा राज्‍यागा उतुम्‍बे खेम्‍मेसे नुङ् तुखाबाङ्‌चि नुमेसे पाक्‍सुचि॥ 3पाक्‍सुचिनिङ् उङा ङ्‌खाचि खाॽला लुचि, “न्‍निङ्‌दा खेइगानिङ् इहाचा ङ्‌खेतानुम्‍निन॥ डाङ्‌गाक, खेसुप, चाम्‍योङ्‌बा, याङ् न्‍हाङ् लेक्‍माहा तेफेन चा ङ्‌खुयानुम्‍निन॥ 4न्‍निङ्‌दा हेॽना पाङ्‌बे स्‍वागात चोगिॽवागा, न्‍ना साहार मेनाॽनाले सोम्‍मा न्‍ना पाङ्‌बेॽमाङ् वायानि॥ 5हेॽनाबे न्‍निङ्‌दा स्‍वागात न्‍जोगिॽवागान, न्‍ना साहारभाङ् लोन्‍दिखेइवागानिङ् ङ्‌खाचिगा बिरुद्‌दाबे गाबाहिगा लागि न्‍निङ्‌लाङ्‌बेॽहा धुलो आप्‍साब्‍याआनुम्‍चिम॥”#लुका १०:४-११; सेगुम्‍पाक १३:५१ 6न्‍हाङा चेलाचि नुसाला खेम्‍मेसाङ्, घाक ठोङ्‌बे तुखाबाङ्‌चि नुमेसाङ् तेन-तेनबे ङ्‌ख्‍या॥

हेरोद तोप्‍सास्‍याना

(मात्‍ति १४:१-१२; मार्कुस ६:१४-२९)

7येसुङा चोगुहा खा घाक कामगा उतुम्‍बे खेप्‍सुहोङ् गालिलगा तायेन्‍राङ्‌बा हेरोद एन्‍टिपास तोप्‍सास्‍या, इजाङ्‌बाङ्‌निङ् इखिङ्‌ङा “बाप्‍तिस्‍मा पिखुबा युहान्‍ना स्‍यानाभाङ् हिङ्‌गिलिक लेक्‍साक्‍यामाना” भोङ् ङ्‌गाया॥ 8इखिङ्‌ङा च्‍हेन, “एलिया बाङ्‌ना निङ्‌वाफुमाभाङ् चेक्‍खुबा याॽमि हिङ्‌गिलिक लेक्‍साक्‍यामाना” भोङ् ङ्‌गाया॥ न्‍हाङ् इखिङ्‌ङा च्‍हेन “उइलेहा निङ्‌वाफुमाभाङ् चेक्‍खुबाचि माध्‍येबे एको स्‍यानाभाङ् हिङाक्‍यामाना” भोङ् ङ्‌गाया॥#मात्‍ति १६:१४; मार्कुस ८:२८; लुका ९:१९ 9ङ्‌खाॽनिङ्‌गो तायेन्‍राङ्‌बा हेरोदङा च्‍हेन खाॽला काया, “युहान्‍नागा उटुखुरुक्‍को कामाङ् खोक्‍मेतुङ्‌चिङाहा ओम, ङ्‌खाॽलाभोङ् ना इसा ओम, न्‍नागा उतुम्‍बे का खाॽलाहा चेॽया खेम्‍मासिम्‍मेङ्‌ना?” न्‍हाङा उङ् येसुनुङ् तुप्‍मा मिता॥

येसुङा फा माहोम्‍बोक याॽमिचि चामेतुचिहा

(मात्‍ति १४:१३-२१; मार्कुस ६:३०-४४; युहान्‍ना ६:१-१४)

10येसुङा पाक्‍सुचिहा एहिच सेगुम्‍पाकचि न्‍लासारायाहोङ् उङ्‌चिङा न्‍जोगुहा घाक कामगा उतुम्‍बे उङ् ङ्‌योक्‍मेतु॥ न्‍हाङा इसा चा था मेम्‍बिॽले उङा चेलाचि से खेतुचिहोङ् बेथ्‍सेदा बाङ्‌ना साहारपोटि ख्‍या॥ 11ङ्‌खाॽनिङ्‌गो खा चेॽया था न्‍दोक्‍तुहोङ् प्‍याक याॽमिचि उका हेक्‍साङ्-हेक्‍साङ् लान्‍जोगा॥ येसुङा ङ्‌खा याॽमिचि स्‍वागात चोगुचि, न्‍हाङ् निङ्‌वाफुमागा राज्‍यागा उतुम्‍बे खेम्‍मेतुचि न्‍हाङा तुखाबाङ्‌चि नुमेतुचि॥

12नाम आहेक्‍सासानिङ् ङ्‌खा एहिच चेलाचि न्‍दायाहोङ् येसु खाॽला न्‍लु, “हाङ्‌बा खा याॽमिचि पाक्‍साहाक्‍सुचि, यो-खेहा तेनचिबे ङ्‌खेॽहोङ् उङ्‌चि चामा-उङ्‌मा, वामाना तार्तुम्‍बि न्‍दोक्‍सुनि॥ इजाङ्‌बाङ्‌निङ् ना गो इहाचा मेॽनिङ्‌ना सुन्‍नेना ठोङ् ओम॥”

13ङ्‌खाॽनिङ्‌गो हाङ्‌बा येसुङा लुचि, “खाचि न्‍निङ्‌दामाङ् चाम्‍योङ्‌बा पियानुम्‍चिम॥”

ङ्‌खाचिङा खाॽलाना पोलोवा म्‍बि, “हाङ्‌बा कानिङ्‌नुङ् गो फा ओटा चालेप्‍पा नुङ् हिच्‍चि नासाचि से ङ्‌वान्‍ने, इना कानिङ् खिङाहा याॽमिचिगा लागि चाम्‍योङ्‌बा इन्‍दाराॽमाहायि?” 14न्‍नाबे वेम्‍फा याॽमिचि से फा माहोम्‍बोक हिङ् ङ्‌वाया॥

येसुङा चेलाचि लुचि, “खा याॽमिचि फाखेङ्, फाखेङ् हिङ्‌गा छुम चोगानुम्‍चिम्‍घोङ् युङ्‌मेतानुम्‍चिम॥” 15न्‍हाङा उङ्‌चिङा ङ्‌खाॽलामाङ् घाक याॽमिचि ङ्‌युङ्‌मेतुचि॥ 16न्‍हाङा येसुङा फा ओटा चालेप्‍पा नुङ् हिच्‍चि नासा याङुचिहोङ् वालोकपोटि सोसाङ् निङ्‌वाफुमानुङ् आसिक नाक्‍तु, न्‍हाङा उङा चालेप्‍पा नुङ् नासा एगानुम्‍चिम्‍घोङ् याॽमिचि हाप्‍साब्‍यानुम्‍चिम भोङ् चेलाचि पिचि॥ 17न्‍हाङा घाकङा खानुङ् न्‍जो, न्‍हाङ् चेलाचिङा ङोन्‍दाहा टुक्‍रा न्‍छुप्‍सुनिङ् एहिच डालो लेक्‍सा॥

येसु इसा ओम?

(मात्‍ति १६:१३-२३; मार्कुस ८:२७-३३)

18इलेन येसु ओतोखुमाक पार्थाना चोक्‍मास्‍यानिङ् उका चेलाचि चा न्‍नाबे न्‍दाया॥ उङा ङ्‌खाचि छिम्‍दुचि, “याॽमिचिङा का इसा ओमभोङ् लुम्‍मेहा?”

19ङ्‌खाचिङा न्‍लु, “इखिङ्‌ङा बाप्‍तिस्‍मा पिखुबा युहान्‍ना न्‍लुम्‍मेका, इखिङ्‌ङा निङ्‌वाफुमाभाङ् चेक्‍खुबा एलिया, न्‍हाङ् हेकोहाचिङा च्‍हेन, उइलेहा निङ्‌वाफुमाभाङ् चेक्‍खुबाचि माध्‍येबे एको स्‍यानाभाङ् हिङाक्‍यामाना भोङ् न्‍लुम्‍मेकाना॥”#मात्‍ति १४:१-२; मार्कुस ६:१४-१५; लुका ९:७-८

20येसुङा ङ्‌खाचि छिम्‍दुचि, “ङ्‌खाॽनिङ्‌गो न्‍निङ्‌दा च्‍हेन का इसा ओम लुम्‍मेकाहा?”#युहान्‍ना ६:६८-६९

पात्‍तुरुसङा खाॽलाना पोलोवा पि, “न्‍दा निङ्‌वाफुमाङा पाक्‍सागा खिरिस्‍टकान!”

21येसुङा ङ्‌खाचि खा चेॽया इसा चा लुॽमायि न्‍लुयानुम्‍चिम्‍निन भोङ् आग्‍गे पिचि॥ 22न्‍हाङा उङा लुचि, “याॽमिगा उच्‍याङा प्‍याक तुखि आङ्‌मा पोराचोङ्‌मे॥ याहुदि हाङ्‌गुम्‍बा, खाङ्‌खाङ् हाङ्‌खुबा नुङ् धार्मासाप्‍ला चिन्‍खुबाचिङा उङ् ङ्‌ङिसित्‍वा न्‍हाङ् न्‍सिस्‍वा, ङ्‌खाॽनिङ्‌गो सुम्‍ना लेन स्‍यानाभाङ् हिङ्‌गिलिक लेङ्‌मेहोङ् पोङ्‌मेॽना॥”

येसुगा जेप्‍पागा चेला

(मात्‍ति १६:२४-२८; मार्कुस ८:३४–९:१)

23न्‍हाङा येसुङा घाक याॽमिचि लुचि, “इसा आका चेला लेङ्‌मा मिम्‍मे, न्‍नाङा उका हिङ्‌लुङ् उलुङ्‌मा न्‍दुक्‍तुन्‍नि, न्‍हाङा लेन्‍लेन उका कुरुस खुहोङ्#९:२३ कुरुस खुॽमा बाङ्‌ना च्‍हेन येसुगा लागि तुखि आङ्‌मा नुङ् उका लागि सिमा चा त्‍यार लेङ्‌मा ओम॥ आका हेक्‍साङ् लाचोक्‍नि॥#मात्‍ति १०:३८; लुका १४:२७ 24इजाङ्‌बाङ्‌निङ् इसाङा उका हिङ्‌लुङ् हिङ्‌मेॽमा योग्‍वा न्‍नाङा मासिॽवा, ङ्‌खाॽनिङ्‌गो इसाङा उका हिङ्‌लुङ् आका लागि पिवा, न्‍नाङा उका हिङ्‌लुङ् हिङ्‌मेत्‍वाना॥#मात्‍ति १०:३९; लुका १७:३३; युहान्‍ना १२:२५ 25इजाङ्‌बाङ्‌निङ् याॽमिङा कायुङ्‌लेनबेॽहा घाकथोक तोक्‍तुहोङ् चा उका आत्‍मा नास चोग्‍वानाभोङ् इहा फाइदा लेक्‍साहा? 26इसा का नुङ् का चिन्‍नेनिन्‍हा चेॽयाभाङ् ङोन्‍सिमे, न्‍नानुङ् याॽमिगा उच्‍या चा उका माहिमाबे, निङ्‌वाफुमा पागा माहिमाबे नुङ् पाबित्‍तारा वालोक्‍दुतचिगा माहिमाबे तामेॽनिङ् ङोन्‍सिमेॽना॥ 27ङ्‌खाॽनिङ्‌गो जेप्‍पा का न्‍निङ्‌दा लुम्‍मेॽनेनिन, नाबे ङ्‌येबाहा माध्‍येबे इखिङ् च्‍हेन निङ्‌वाफुमागा राज्‍या मेनिले सोम्‍मा न्‍सिमेनिन्‍हा॥”

येसुगा उनाचिक हेकोना लेक्‍साना

(मात्‍ति १७:१-८; मार्कुस ९:२-८)

28खा चेॽया लुचिहा ता लेन हेक्‍साङ् लोप्‍पि पात्‍तुरुस, युहान्‍ना नुङ् याकुब खेतुचिहोङ् येसु पार्थाना चोक्‍से कोङ्‌गुबे थाङा॥ 29उङ् पार्थाना चोक्‍मास्‍यानिङ् उका उनाचिक हेकोना लेक्‍सा, न्‍हाङ् उका तेकचि चा बिजुलि चाम्‍काचोगाना लोॽवा छेरेरेङ् लेक्‍साराया॥ 30न्‍हाङा थाप्‍थुम्‍बे हिप्‍पाङ् याॽमिचि मोसा नुङ् एलिया माहिमित रुप्‍पे ओताचिहोङ्, 31उङ्‌चि येसु सिहेक्‍सानागा उतुम्‍बे साला न्‍लेन्‍मास्‍या॥ खा घाक चेॽया येसुङा यारुसालेमबे पुरा चोक्‍माहा साया॥

32पात्‍तुरुस नुङ् उकाम्‍निभाकचि ङ्‌ङिप्‍साख्‍यामासा॥ उङ्‌चि युप्‍माभाङ् न्‍जेन्‍दाक्‍यानिङ् येसुगा माहिमा न्‍हाङा उङ्‌नुङ् येबाचिहा हिप्‍पाङ् याॽमिचि न्‍निसुचि॥ 33ङ्‌खा हिप्‍पाङ् याॽमिचि येसुभाङ् फोक्‍साख्‍याचिहोङ् पात्‍तुरुसङा येसु लु, “चिन्‍खुबा, कानिङ् नाबे वामा उचुन लेङ्‌मेहा॥ कानिङ् सुम्‍चि वामाहा ठोङ् चोगुम्‍चिम, एको ङ्‌गा लागि, एको मोसागा लागि न्‍हाङ् एको च्‍हेन एलियागा लागि॥” (ङ्‌खाॽनिङ्‌गो उङा का इहा चेक्‍मासिमेङ्‌ना भोङ् था माङ् म्‍मायान)॥

34पात्‍तुरुसङा खा चेॽया चेक्‍मास्‍यानुङ् खिम्‍फुरुम्‍मा तायाहोङ् उङ्‌चि मोप्‍तिचि, न्‍हाङा चेलाचि तुक्‍नुङ् ङ्‌गिसिता॥ 35ङ्‌खिङ्‌बेला खिम्‍फुरुम्‍माहोङ्‌भाङ् खाॽला चेक्‍ताना सेम्‍ला खेप्‍सा, “ना का सेगुङ्‌ना आच्‍या ओम, न्‍निङ्‌दा नागा चेॽया खेप्‍सानुम॥”#यासाइया ४२:१; मात्‍ति ३:१७; १२:१८; मार्कुस १:११; लुका ३:२२ 36चेक्‍ताब्‍याहोङ् चेलाचिङा न्‍नाबे येसु से न्‍निसु॥ ङ्‌खिङ्‌बेला न्‍निसुहा चेॽया उङ्‌चिङा इसा चा ङ्‌योक्‍मेतुन्‍चिनिन॥

इसिॽना मुइङा याक्‍सुना बाबु नुयाना

(मात्‍ति १७:१४-१८; मार्कुस ९:१४-२७)

37हेक्‍साङ्‌ना लेन येसु सुम्‍भाङ् चेलाचिनुङ् चोम्‍कोङ्‌भाङ् मो उक्‍सा, न्‍हाङा प्‍याक याॽमिचि उङ् तुप्‍से न्‍दाया॥ 38ङ्‌खा प्‍याक याॽमिलुम्‍भाङ् एको याॽमि खाॽला कासाङ् ओक्‍ता, “चिन्‍खुबा, आका आच्‍या बाबु सोताब्‍याङ्‌गानिभोङ् का सेमेमेॽनेन्‍ना, ना एको सेॽना आच्‍या ओम॥ 39उङ् एको इसिॽना मुइङा दाफे-दाफे लाब्‍वा, ङ्‌खिङ्‌बेला उङ् थाप्‍थुम्‍बे ओङ्‌मे न्‍हाङा इसिॽना मुइङा काक्‍राक-कुक्‍रुक चोग्‍वा॥ उयाभाङ् ओथोक्‍मा लोन्‍साङ् काङ्‌गुलिङ्-वाङ्‌गुलिङ् चोङ्‌मे न्‍हाङा ह्‌वा मेलेङ्‌ले सोम्‍मा उङ् नाॽनामायि न्‍नाॽवान॥ 40का ङ्‌गा चेलाचि इसिॽना मुइ लोन्‍धाक्‍ताब्‍यानुम लुङ्‌चिङ्, ङ्‌खाॽनिङ्‌गो ङ्‌खाचिङा ङ्‌यासुनिन्‍ना॥”

41न्‍हाङा येसुङा खाॽला लुचि, “इमिन्‍हा बिस्‍वास मेॽनिङ्‌हा नुङ्, इसिॽहा निङ्‌वा वाखुबा याॽमिचि, का हेॽनिङ् सोम्‍मा न्‍निङ्‌दानुङ् वाङा, न्‍हाङ् का हेॽनिङ् सोम्‍मा न्‍निङ्‌दा साहाचोक्‍नेनिन? न्‍ज्‍या नाबे आप्‍तु॥” 42न्‍ना बाबु आॽमास्‍यानुङ् इसिॽना मुइङा हुच्‍चेरेप चेप्‍तु, न्‍हाङ् पेन्‍दाख्‍या॥ ङ्‌खाॽनिङ्‌गो येसुङा न्‍ना इसिॽना मुइ थिन्‍दु, न्‍हाङा न्‍ना बाबु नुमेतुहोङ् उप्‍पा पिहाक्‍सु॥ 43निङ्‌वाफुमागा खिङ् माडा साक्‍ति न्‍निसुहोङ् घाक आच्‍चाम्‍मा ङ्‌येता॥

येसुङा उङ् सिमाना चेॽयागा उतुम्‍बे फेरि लुचिहा

(मात्‍ति १७:२२-२३; मार्कुस ९:३०-३२)

घाक याॽमिचि येसुङा चोगुहा काम न्‍निसुहोङ् आच्‍चाम्‍मा ङ्‌येतामासानिङ् उङा उका चेलाचि खाॽला लुचि, 44“का इ लुन्‍हेङ्‌नेनिन खा चेॽया म्‍मुन्‍दिॽयानुम्‍निन, इजाङ्‌बाङ्‌निङ् याॽमिगा उच्‍या लाम्‍मेहोङ् याॽमिचिगा मुकपे पिमे॥” 45ङ्‌खाॽनिङ्‌गो चेलाचिङा खा चेॽया ङ्‌ङासुनिन॥ इजाङ्‌बाङ्‌निङ् ङ्‌खा चेॽया उङ्‌चिभाङ् चुमिॽयामासा, न्‍हाङा ङ्‌खाचि उङ्‌नुङ् न्‍नागा उतुम्‍बे छिम्‍मा चा ङ्‌गिसिता॥

घाक हाक्‍निङ् माडा इसा?

(मात्‍ति १८:१-५; मार्कुस ९:३३-४०)

46ङ्‌खिङ्‌बेला चेलाचिबे घाक हाक्‍निङ् माडा इसा ओमभोङ् सालापुला लेक्‍सा॥#लुका २२:२४ 47ङ्‌खाॽनिङ्‌गो येसुङा ङ्‌खाचिगा निङ्‌वाबेॽहा चेॽया था तोक्‍तुहोङ् एको पिछा ता न्‍हाङ् उयुम्‍बे युक्‍सु, 48न्‍हाङा ङ्‌खाचि लुचि, “इसाङा आनिङ्‌बे ना पिछा स्‍वागात चोग्‍वा, न्‍नाङा का स्‍वागात चोङ्‌मेङ्, न्‍हाङ् इसाङा का स्‍वागात चोङ्‌मेङ्, न्‍नाङा का पाङ्‌खुबा स्‍वागात चोग्‍वा॥ न्‍निङ्‌दा माध्‍येबे इसा घाक हाक्‍निङ् मि, न्‍नामाङ् घाक हाक्‍निङ् मा लेङ्‌मेॽना॥”#मात्‍ति १०:४०; लुका १०:१६; युहान्‍ना १३:२०

49युहान्‍नाङा येसु लु, “चिन्‍खुबा, कानिङ् एको याॽमि ङ्‌गा निङ्‌बे इसिॽहा मुइचि लोन्‍मास्‍याना निसुम्‍ङा, न्‍हाङ् कानिङ् उङ् ङ्‌खाॽला चोक्‍मा म्‍बिम्‍ङान्‍ना, इजाङ्‌बाङ्‌निङ् उङ् कानिङ्‌नुङ् लाम्‍खुबा याॽमि म्‍मेतासान॥” 50ङ्‌खाॽनिङ्‌गो येसुङा ङ्‌खाचि खाॽला लुचि, “उङ् खाॽला न्‍जोगान न्‍लुयानुम्‍निन॥ इजाङ्‌बाङ्‌निङ् इसाङा न्‍निङ्‌गा बिरोध न्‍जोग्‍वान, न्‍ना न्‍निङ्‌दा पोटिक्‍नामाङ् ओम॥”

सामारियाबेॽहा याॽमिचिङा येसु स्‍वागात न्‍जोगुनिन्‍ना

51येसुगा वालोकपे खेॽमाना बेला लेक्‍सेहेक्‍सानाङा उङ् यारुसालेमबे खेॽमा मिता॥ 52न्‍हाङा उङ् खेॽमाहाक्‍निङ् ओन्‍दाङ् सालेन खेखुबा याॽमिचि पाक्‍सुचि॥ ङ्‌खाचि खेॽमाहोङ् येसुगा लागि घाक तार्तुम्‍बि तोङ्‌मागा सामारिया लिङ्‌खामगा एको तेनबे ङ्‌ङुया॥ 53ङ्‌खाॽनिङ्‌गो सामारि याॽमिचिङा येसु यारुसालेम खेॽमासिम्‍मेॽना बाङ्‌ना था न्‍दोक्‍तुहोङ् उङ् न्‍नाबे तामा म्‍बिनिन॥ 54खा न्‍निसुहोङ् उका चेलाचि याकुब नुङ् युहान्‍नाङा येसु खाॽला लुयाचु, “हाङ्‌बा, वालोकपाहाङ् कान्‍चिङ् मि आॽनेन्‍चुङ्‌होङ् ङ्‌खाचि छुबुक न्‍लेङ्‌नि बाङ्‌ना न्‍दा मिम्‍मेकाना?”#२ हाङ् १:९-१६

55ङ्‌खाॽनिङ्‌गो येसु खिरिक हिक्‍साहोङ् ङ्‌खाचि थिन्‍दुचि॥ 56न्‍हाङा येसु नुङ् उका चेलाचि हेकोना तेनबे ङ्‌ख्‍या॥

येसुगा चेलाङा छिक्‍माहा ओमेन

(मात्‍ति ८:१९-२२)

57येसु नुङ् उका चेलाचि लाम्‍बुबे ङ्‌खेॽमास्‍यानिङ्, एको याॽमि तायाहोङ् येसु खाॽला लु, “हाङ्‌बा, न्‍दा हेॽने खेम्‍मेका का चा न्‍दानुङ् लोङ्‌मेङ्‌ना॥”

58उङा न्‍ना खाॽलाना पोलोवा पि, “स्‍यालचिगा युङ्‌माहा लुङ्‌ढाङ् ङ्‌वान्‍ने, न्‍वाकुच्‍याकचिगा ओहोप ङ्‌वान्‍ने, ङ्‌खाॽनिङ्‌गो याॽमिगा उच्‍यागा लागि गो टुखुरुक युङ्‌माना ठोङ् चा मान्‍ना॥”

59येसुङा हेकोना याॽमि लु, “कानुङ् आबा॥”

ङ्‌खाॽनिङ्‌गो न्‍नाङा काया, “चिन्‍खुबा, ओन्‍दाङ् आप्‍पागा लास हुम्‍मा पियाङ्॥”

60येसुङा न्‍ना याॽमि खाॽला लु, “मुर्दाचि मुर्दाचिङामाङ् ङ्‌हुम्‍दुचिनि, ङ्‌खाॽनिङ्‌गो न्‍दा च्‍हेन ख्‍याघोङ् निङ्‌वाफुमागा राज्‍यागा नुसाला खेम्‍मेतुचि॥”

61हेकोना एको याॽमिङा चा येसु खाॽला लु, “हाङ्‌बा, का ङ्‌गा हेक्‍साङ् लाम्‍मेङ्, ङ्‌खाॽनिङ्‌गो ओन्‍दाङ् आपाङ्‌बेॽहाचिनुङ् बिदा नाक्‍मा पियाङ्॥”#१ हाङ् १९:२०

62येसुङा न्‍ना खाॽला लु, “उमुक आन्‍नाउबे युक्‍स्‍वाहोङ् हेक्‍साङ् पोटि सोसाङ् फेङ्‌खुबा इसा चा निङ्‌वाफुमागा राज्‍यागा योग्‍या न्‍लेङ्‌मेन्‍ना॥”

Listen to लुका 9