येसु फाखुबा मामुचि

1न्‍हाङा येसु निङ्‌वाफुमागा राज्‍यागा उतुम्‍बे नुसाला खेम्‍मेसाङ् साहार-साहार नुङ् तेन-तेन कोॽमा तारोक्‍तु॥ एहिच चेलाचि चा उङ्‌नुङ् ङ्‌ख्‍या॥ 2उङ्‌नुङ् खेखुबा मामुचि चा ङ्‌वाया, ङ्‌खाचि उङा इसिॽहा मुइ नुङ् तुक्‍माभाङ् नुमेतुक्‍साचि॥ ङ्‌खाचि मारियाम माग्‍दालिनि, उङ्‌भाङ् ला ओटा इसिॽहा मुइचि न्‍लोन्‍दाख्‍यामासा, 3योआन्‍ना, उङ् च्‍हेन हाङ् हेरोदका पाङ्‌बेॽहा घाकथोक सोखुबा खाङ्‌खाङ्‌बा खुजासका उहिङ्‌खुमा साया, सुसान्‍ना न्‍हाङ् हेकोहाचा प्‍याक मामुचि ङ्‌वाया॥ ङ्‌खाचिङा येसु नुङ् चेलाचि याङ्‌सा म्‍बिचिहोङ् म्‍फातुचि॥#मात्‍ति २७:५५-५६; मार्कुस १५:४०-४१; लुका २३:४९

याङ्‌लि ह्‌वेखुबागा ताप्‍चेॽया

(मात्‍ति १३:१-९; मार्कुस ४:१-९)

4इलेन प्‍याक साहारचिभाङ् प्‍याक याॽमिचि येसुगाबे न्‍दाया, न्‍हाङा उङा ङ्‌खाचि एको खाॽलाना ताप्‍चेॽया लुचि, 5“एको याॽमिङा उलाम्‍धाङ्‌बे ख्‍याहोङ् याङ्‌लि ह्‌वेतु॥ ह्‌वेतुनिङ् इखिङ् याङ्‌लि लाम्‍बुबे आया॥ लाम्‍बुबे आयाहा ङ्‌खा याङ्‌लि याॽमिचिङा म्‍बाताहाक्‍सु न्‍हाङ् न्‍वाकुच्‍याकचि न्‍दायाहोङ् ङ्‌गोबुचोइ॥ 6हेकोहा इखिङ् याङ्‌लि च्‍हेन लुङ्‌खाकसेॽना खामबे आया, न्‍नाबे पोक्‍मा गो पोगा ङ्‌खाॽनिङ्‌गो हेराब्‍या, इजाङ्‌बाङ्‌निङ् न्‍नाबे खाम चिनुङ् न्‍सायान॥ 7इखिङ् याङ्‌लि च्‍हेन तिङ्‌गिभाक हाम्‍बे आया, न्‍हाङ् ङ्‌खा याङ्‌लिनुङ् तिङ्‌गिभाक चा पुसाक्‍या, न्‍हाङा ङ्‌खा याङ्‌लि पुमा म्‍बिन॥ 8ङ्‌खाॽनिङ्‌गो इखिङ् च्‍हेन उचुन्‍ना खामबे आया, ङ्‌खा उचुन पोगाहोङ् होम्‍बोक गुना उसा केक्‍सु॥” खिङ् लुइचिहोङ् उङा माडा सेम्‍लाङा खाॽला लुचि, “इसागा खेम्‍माहा नाभाक ङ्‌वान्‍ने, न्‍नाङा खेप्‍सुनि!”

ताप्‍चेॽयागा तुम्‍बिला

(मात्‍ति १३:१०-२३; मार्कुस ४:१०-२०)

9येसुगा चेलाचिङा उङ् ना ताप्‍चेॽयागा तुम्‍बिला इना ओमभोङ् न्‍छिम्‍दु॥ 10उङा ङ्‌खाचि खाॽला लुचि, “न्‍निङ्‌दा च्‍हेन निङ्‌वाफुमागा राज्‍यागा होङ्‌चेॽया आमाना ग्‍यान तोक्‍तुक्‍सुम्‍गा, ङ्‌खाॽनिङ्‌गो हेकोहा याॽमिचि गो खा चेॽया ताप्‍चेॽयाभाङ् माङ् न्‍लुमेहा,

‘न्‍हाङामाङ् ङ्‌खाचिङा सोॽमा गो न्‍स्‍वा ङ्‌खाॽनिङ्‌गो न्‍निस्‍वानिन,

खेम्‍मा गो ङ्‌खेप्‍स्‍वा ङ्‌खाॽनिङ्‌गो ङ्‌ङास्‍वानिन॥’ # यासाइया ६:९-१०

11 “ना ताप्‍चेॽयागा तुम्‍बिला ना ओम, याङ्‌लि च्‍हेन निङ्‌वाफुमागा चेॽया ओम॥ 12लाम्‍बुगा उलाप्‍पे आयाहा याङ्‌लि च्‍हेन ङ्‌खा याॽमि ओम्‍चि, ङ्‌खाचिङा निङ्‌वाफुमागा चेॽया खेम्‍मा गो ङ्‌खेप्‍स्‍वा ङ्‌खाॽनिङ्‌गो निङ्‌वाबे युङ्‌मा ङ्‌यास्‍वानिन, इजाङ्‌बाङ्‌निङ् बिस्‍वास न्‍जोग्‍वाहोङ् हिङ्‌मा न्‍दोक्‍तुनिन्‍नि भोङ् दियाबालासङा ङ्‌खाचिगा निङ्‌वाबेॽहा निङ्‌वाफुमागा चेॽया कोभेतिॽवा॥ 13लुङ्‌खाकसेॽना खामबे आयाहा याङ्‌लि च्‍हेन ङ्‌खा याॽमि ओम्‍चि, ङ्‌खाचिङा निङ्‌वाफुमागा चेॽया चोन्‍सिसाङ् ङ्‌खेप्‍स्‍वाहोङ् लियान्‍जोग्‍वा, ङ्‌खाॽनिङ्‌गो ङ्‌खा चेॽया उचुन निङ्‌वाबे ङ्‌युक्‍सुनिन्‍नाङा एहिलेन बिस्‍वास न्‍जोग्‍वा, न्‍हाङा जाच आन्‍दारामेॽनिङ् बिस्‍वास न्‍लेप्‍तिॽवा॥ 14तिङ्‌गिभाक हाम्‍बे आयाहा याङ्‌लि च्‍हेन ङ्‌खा याॽमि ओम्‍चि, ङ्‌खाचिङा ङ्‌खेप्‍स्‍वा, ङ्‌खाॽनिङ्‌गो ना हिङ्‌लुङ्‌गा चिन्‍ताङा, याङ्‌सा नुङ् चामा-उङ्‌माबे से निङ्‌वा पिॽमाङा बिस्‍वासपे पुमा न्‍दोक्‍त्‍वानिन, न्‍हाङ् ङ्‌खाचिगा उसा तुम्‍मा न्‍दोक्‍त्‍वान॥ 15उचुन्‍ना खामबे आयाहा याङ्‌लि च्‍हेन उचुन्‍ना निङ्‌वा काप्‍खुबा याॽमि ओम्‍चि, ङ्‌खाचिङा निङ्‌वाफुमागा चेॽया ङ्‌खेप्‍स्‍वाहोङ् उचुन निङ्‌वाबे ङ्‌युक्‍स्‍वा न्‍हाङ् ङ्‌खाॽलामाङ् न्‍जोङ्‌मे॥ न्‍हाङ् इखिङ् तुखि आन्‍दाराहोङ्‌चा केङ्‌माना बेलाबे प्‍याक उसा ङ्‌गेक्‍स्‍वा॥”

कुप्‍पिगा ताप्‍चेॽया

(मार्कुस ४:२१-२५)

16 “इसाङा चा कुप्‍पि हान्‍द्‌वाहोङ् पाथिङा म्‍फोप्‍त्‍वान, खाट होङ्‌बे चा ङ्‌युक्‍स्‍वान, ङ्‌खाॽनिङ्‌गो पाहोङ्‌बे ताखुबाचि ओम ओतुचिनिभोङ् चान्‍चान्‍ना ठोङ्‌बे युक्‍स्‍वा॥ # मात्‍ति ५:१५; लुका ११:३३ 17ङ्‌खाॽलामाङ् चुमाहोङ् युक्‍साहा चेॽया घाक होम्‍भोङ्‌मे न्‍हाङ् आमामेयामाहा चेॽया घाक आमायामाहा लेङ्‌मे, न्‍हाङा घाकङा ङ्‌ङास्‍वा॥#मात्‍ति १०:२६; १२:२ 18न्‍हाङामाङ् न्‍निङ्‌दा थाङ्‌थाङ् वायानि, न्‍निङ्‌दा खेप्‍सुम्‍घा चेॽयाबे उचुन निङ्‌वा पियानुम, इजाङ्‌बाङ्‌निङ् इसानुङ् वान्‍ने, न्‍ना हाकुचा पिमे, ङ्‌खाॽनिङ्‌गो इसानुङ् मान, न्‍नाङा कानुङ् वेॽहा मितुहा चेॽया चा न्‍नाभाङ् नाप्‍निमे॥”#मात्‍ति २५:२९; लुका १९:२६

येसुगा उमा नुङ् उनुन्‍छाचि

(मात्‍ति १२:४६-५०; मार्कुस ३:३१-३५)

19न्‍हाङा येसु तुप्‍से उमा नुङ् उनुन्‍छाचि न्‍नाबे न्‍दाया॥ ङ्‌खाॽनिङ्‌गो प्‍याक याॽमिचि ङ्‌वायानाङा उयुम्‍बे खेॽमा ङ्‌यासानिन॥ 20एको याॽमिङा येसु खाॽला लु, “म्‍मा नुङ् न्‍नुन्‍छाचिङा न्‍दानुङ् तुप्‍मागा पाखा ङ्‌गुसानेसागाना॥”

21ङ्‌खाॽनिङ्‌गो येसुङा ङ्‌खाचि लुचि, “निङ्‌वाफुमागा चेॽया ङ्‌खेप्‍स्‍वाहोङ् ङ्‌खाॽला चोक्‍खुबाचिमाङ् आमा नुङ् आनुन्‍छा ओम्‍चि॥”

येसुङा कुहिक लामेतुना

(मात्‍ति ८:२३-२७; मार्कुस ४:३५-४१)

22इलेन येसुङा उका चेलाचि खाॽला लुचि, “कानिङ् ना तालगा योना उलाप्‍पे खेइ॥” न्‍हाङा उङ्‌चि डुङ्‌गाबे न्‍थाङाहोङ् ङ्‌ख्‍या॥ 23ङ्‌खेॽमास्‍यानिङ् येसु इप्‍साख्‍या॥ ङ्‌खिङ्‌बेला थाप्‍थुम्‍बे माडा कुहिक-वासिक तामा तारोक्‍तु॥ डुङ्‌गाबे माङ्‌च्‍वा थोम्‍साङ् ख्‍या, न्‍हाङा उङ्‌चि तुक्‍नुङ् आप्‍ठेरोबे ङ्‌ङाया॥ 24न्‍हाङा उका चेलाचि येसुगा उयुम्‍बे न्‍दायाहोङ् खाॽला लुसाङ् म्‍बोगु, “चिन्‍खुबा, चिन्‍खुबा, कानिङ् लुप्‍सिखेइहेक्‍सिङाहा॥”

खा चेॽया खेप्‍सुहोङ् येसु पोगा, न्‍हाङा कुहिक नुङ् छाल थिन्‍दुचि॥ ङ्‌खिङ्‌बेलाक्‍माङ् कुहिक लासाख्‍या न्‍हाङ् छाल चा स्‍वाक वायाब्‍या॥

25उङा ङ्‌खाचि लुचि, “न्‍निङ्‌गा बिस्‍वास हेॽनायि?”

ङ्‌खाचि घाक आच्‍चाम्‍मा ङ्‌ङेताहोङ् किसिसाङ् उङ्‌चि-उङ्‌चि खाॽला कामा न्‍दारोक्‍तु, “ना इसा ओम? उङा थिन्‍द्‌वाचिहोङ् कुहिक-वासिक नुङ् छालङा चा उका चेॽया ङ्‌येन्‍वान्‍हा!”

इसिॽना मुइङा याक्‍सुना याॽमि

(मात्‍ति ८:२८-३४; मार्कुस ५:१-२०)

26येसु नुङ् उका चेलाचि गालिल तालगा योप्‍पारिक गेरासेनास बाङ्‌ना ठोङ्‌बे न्‍दासु॥ 27न्‍हाङा येसु डुङ्‌गाभाङ् पाखाबे लोन्‍दानिङ् एको इसिॽना मुइङा याक्‍सुना याॽमि उङ् तुप्‍से ताया॥ न्‍ना याॽमिङा प्‍याक ओन्‍दाङ् नाहाङ्‌तो तेक ङ्‌वान, न्‍हाङ् उङ् पाङ्‌बे मेवाले सियापाङ्‌खाबे वायाघोन्‍दा॥ 28न्‍नाङा येसु निसुहोङ् तुक्‍नुङ् ओक्‍ता न्‍हाङा येसुगा ओन्‍दाङ् फोप फोप्‍ताहोङ् माडा सेम्‍लाङा खाॽला लु, “ओ घाक हाक्‍निङ् तो वाखुबा निङ्‌वाफुमागा उच्‍या येसु, एन्‍चिङ्‌गा इहाचा साम्‍बान्‍धा मान्‍हा, का आमुक फाक्‍त्‍वाङ्‌चिङ्, का तुखि म्‍ब्‍याङान॥” 29इजाङ्‌बाङ्‌निङ् येसुङा इसिॽना मुइ न्‍ना याॽमिभाङ् लोङ्‌खेॽमाना आग्‍गे पिक्‍सा॥ न्‍ना याॽमि प्‍याक खेप इसिॽना मुइङा लाबुक्‍सा॥ साङ्‌लिङा उलाङ्-उमुक न्‍थुन्‍दुहोङ् ङ्‌युक्‍सुनिङ् चा इसिॽना मुइगा साक्‍तिङा साङ्‌लि पुरेहेतुचिहोङ् इसा चा मेॽनिङ्‌ना सुन्‍नेना ठोङ्‌बे खेतु॥

30येसुङा उङ् छिम्‍दु, “न्‍निङ् इना ओम?”

उङा लु, “आनिङ् फाउज ओम॥” इजाङ्‌बाङ्‌निङ् न्‍ना याॽमिबे प्‍याक मुइचि ङ्‌ङुयामासा॥

31ङ्‌खा इसिॽहा मुइचिङा येसु सेमेसाङ् खाॽला न्‍लु, “कानिङ् लोम्‍मा मेयामाना आताल कुन्‍डाबे म्‍बाक्‍साहाक्‍सान॥” 32न्‍ना कोङ्‌गुगा पाखाबे प्‍याक फाकचि चारान्‍जोक्‍मास्‍या॥ ङ्‌खा इसिॽहा मुइचिङा येसु सेमेसाङ् “कानिङ् ङ्‌खा फाकचिबे उमा पिया” भोङ् न्‍लु,

न्‍हाङा येसुङा लुचि, “ख्‍यानि॥” 33ङ्‌खा इसिॽहा मुइचि न्‍ना याॽमिभाङ् न्‍लोन्‍दाहोङ् फाकचिबे ङ्‌ङुया॥ ङ्‌खिङ्‌बेला ङ्‌खा फाकचि उइमालाङ्‌ना पाखाभाङ् मो लुक्‍साङ् ङ्‌ख्‍याहोङ् तालबे न्‍लुप्‍सास्‍या॥

34खा घाक न्‍निसुहोङ् फाक कोप्‍खुबाचि लुक्‍साङ् ङ्‌ख्‍याहोङ् साहारबे न्‍हाङ् यो-खेहा तेनचिबे खा चेॽया ङ्‌खेम्‍मेतुचि॥ 35न्‍हाङा प्‍याक याॽमिचि इहा लेक्‍साहा ओमभोङ् सोसे येसु वायानाबे न्‍दाया॥ ङ्‌खिङ्‌बेला उङ्‌चिङा ओन्‍दाङ् इसिॽहा मुइचिङा तुखि म्‍बिना याॽमि लोप उचुन नुयाहोङ् तेक वाहोङ् येसुगा उलाङ् युम्‍बे युङामासाना न्‍निसु॥ खा न्‍निसुहोङ् ङ्‌खाचि घाक ङ्‌गिसिता॥ 36न्‍हाङा न्‍ना याॽमि नुयाना निखुबाचिङा इमिन नुयानाभोङ् ङ्‌खाचि घाक चेॽया ङ्‌योक्‍मेतुचि॥ 37न्‍हाङ् गेरासेनास उयुम्‍बेॽहा घाक तेनबेॽहा याॽमिचिङा येसु सेमेसाङ् नाभाङ् खेब्‍याभोङ् न्‍लु, इजाङ्‌बाङ्‌निङ् ङ्‌खाचि तुक्‍नुङ् ङ्‌गिसितामासा॥ न्‍हाङामाङ् येसु लामागा डुङ्‌गाबे थाङा॥ 38ङ्‌खिङ्‌बेला न्‍ना नुयाना याॽमिङा येसु सेमेसाङ् खाॽला लु, “का चा न्‍दानुङ् खेॽमा पियाङ्॥”

ङ्‌खाॽनिङ्‌गो येसुङा उङ् खाॽला लुहोङ् उपाङ्‌बे पाक्‍सु, 39“न्‍दा म्‍बाङ्‌बे लासाख्‍या, न्‍हाङ् निङ्‌वाफुमाङा ङ्‌गा लागि इखिङ् माडा काम चोगुना, ङ्‌खा घाक चेॽया हेकोहा याॽमिचि खेम्‍मेतुचि॥” न्‍हाङा उङ् ख्‍याहोङ् येसुङा उका लागि इ चोगु ङ्‌खा कामगा उतुम्‍बे साहारभोरि खेम्‍मेसाङ् लामा॥

याइरासका उच्‍या नुङ् तुखामाङ्

(मात्‍ति ९:१८-२६; मार्कुस ५:२१-४३)

40येसु तालगा खेप्‍पारिक तायाब्‍यानिङ् प्‍याक याॽमिचिङा उङ् स्‍वागात न्‍जोगु, इजाङ्‌बाङ्‌निङ् ङ्‌खाचि घाकङा उका लाम्‍बु न्‍सोनेसुक्‍सा॥ 41ङ्‌खिङ्‌बेला याहुदि छुम्‍पाङ्‌गा एको तायेन्‍राङ्‌बा याइरास बाङ्‌ना याॽमि न्‍नाबे ताया॥ उङा येसुगा उलाङ्‌बे सेमेसाङ् “आपाङ्‌बे आबा” भोङ् लु, 42इजाङ्‌बाङ्‌निङ् उका एको सेॽना उच्‍या मामु सेहेक्‍सासा, उङ् एहिच फिम्‍बिलिङ्‌गा साया॥ येसु न्‍ना याॽमिनुङ् खेॽमास्‍यानिङ् प्‍याक याॽमिचिङा उङ् न्‍जोमास्‍या॥

43न्‍नाबे एहिच फिम्‍बिलिङ् ओन्‍दाङ् नाहाङ्‌तो हेलि लोन्‍नुङ्‌खुबा एको तुखामाङ् चा वाया॥ उङ् इसाङा चा नुमेॽमा ङ्‌यासुक्‍सानिन॥ 44न्‍ना मामु येसुगा हेक्‍साङ्‌भाङ् तायाहोङ् उका तेक्‍का उलाप तोक्‍ति, न्‍हाङा तोक्‍तिहोङ् सोलोक उका हेलि लोन्‍मा लेप्‍ति॥

45न्‍हाङ् येसुङा छिम्‍दुचि, “का इसाङा तोक्‍तिॽयाङ्‌ना?”

ङ्‌खाॽनिङ्‌गो घाकङा ङ्‌गाया, “का गो न्‍दोक्‍निनुङ्‌नेन्‍ना॥”

न्‍हाङा पात्‍तुरुसङा लु, “चिन्‍खुबा, न्‍दा प्‍याक याॽमिचिङा म्‍बुप्‍तामागाहोङ् न्‍जोमासिम्‍मेकाना॥”

46ङ्‌खाॽनिङ्‌गो येसुङा लुचि, “मेन्‍ना, का तोक्‍तियाङ्‌ना ओम, इजाङ्‌बाङ्‌निङ् काभाङ् साक्‍ति लोन्‍दाख्‍याहा का था तोक्‍तुङ्‌हा॥” 47न्‍ना मामु चा हाकु का चुम्‍दिॽमा ङ्‌यामेङान्‍ना बाङ्‌ना था तोक्‍तुहोङ् किसिॽमाङा योङ्‌साङ् ताया, न्‍हाङ् येसुगा उलाङ्‌बे फोप फोप्‍ता॥ न्‍हाङा उङा येसु इजाङ् तोक्‍तिना, न्‍हाङ् तोक्‍तिहोङ् सोलोक इमिन नुयाना, खा चेॽया घाक याॽमिचिगा उयुम्‍बे योक्‍मेतु॥ 48येसुङा न्‍ना मामु खाॽला लु, “आच्‍या मामु, ङ्‌गा बिस्‍वासङा न्‍दा नुमेतामागा, हाकु उचुन ख्‍या॥”

49येसुङा खाॽला कामास्‍यानिङ् छुम्‍पाङ्‌बेॽना तायेन्‍राङ्‌बा याइरासका पाङ्‌भाङ् एको याॽमि तायाहोङ् याइरास खाॽला लु, “ङ्‌गा न्‍ज्‍या मामु गो सेब्‍याना, हाकु चिन्‍खुबा तुखि म्‍बिन॥”

50ङ्‌खाॽनिङ्‌गो येसुङा खा चेॽया खेप्‍सुहोङ् याइरास लु, “ङ्‌गिसितान, बिस्‍वास से चोगु, न्‍ज्‍या मामु हिङ्‌मेॽना॥” 51येसु याइरासका पाङ्‌बे तासुहोङ्, उङा पात्‍तुरुस, याकुब, युहान्‍ना नुङ् मामुगा उप्‍पा-उमा से पाहोङ्‌बे उङ्‌नुङ् खेॽमा पिचि॥ 52न्‍नाबे न्‍छुप्‍साहा घाक याॽमिचि इब्‍बे-इब्‍बे निङ्‌वा तुक्‍मेसाङ् ङ्‌हाप्‍मास्‍या, ङ्‌खाॽनिङ्‌गो येसुङा लुचि, “ङ्‌हाबानिन, उङ् न्‍स्‍यामान्‍ना, इप्‍सामाना से ओम॥” 53खा चेॽया ङ्‌खेप्‍सुहोङ् ङ्‌खाचिङा येसु ङ्‌युतुचो, इजाङ्‌बाङ्‌निङ् ङ्‌खाचि घाकङा न्‍ना मामु सेब्‍यानाभोङ् था वाया॥ 54ङ्‌खाॽनिङ्‌गो उङा न्‍ना मामु उमुकपे लाबुहोङ् खाॽला लु, “नानि, पोगा॥” 55ङ्‌खिङ्‌बेलामाङ् उका ओसोक्‍मा लासाराया, न्‍हाङा सोलोक पोगा॥ न्‍हाङ् येसुङा मामुगा उप्‍पा-उमा “ना मामु मिॽयाङ् चाम्‍योङ्‌बा पियानुम” भोङ् लुचि॥ 56न्‍ना मामुगा उमा-उप्‍पा आच्‍चाम्‍मा एताचि, ङ्‌खाॽनिङ्‌गो येसुङा उङ्‌चि खा चेॽया इसा चा ङ्‌योक्‍मेतान्‍चुन्‍चिन भोङ् आग्‍गे पिचि॥

Listen to लुका 8